ಬಸವರಾಜ ನೇತೃತ್ವದ ರಾಜ್ಯ ಸರ್ಕಾರಕ್ಕೆ ಒಂದು ವರ್ಷ ಪೂರ್ಣಗೊಂಡ ಹಿನ್ನಲೆಯಲ್ಲಿ ಬಿಜೆಪಿ ಹಮ್ಮಿಕೊಂಡಿರುವುದು ಸಾಧನಾ ಸಮಾವೇಶವಲ್ಲ, ಬದಲಾಗಿ ಭ್ರಷ್ಟೋತ್ಸವವಾಗಿದೆ ಎಂದು ಕೆಪಿಸಿಸಿ ಅಧ್ಯಕ್ಷ ಡಿಕೆ ಶಿವಕುಮಾರ್ ಆರೋಪಿಸಿದರು.
ಕೆಪಿಸಿಸಿ ಕಚೇರಿಯಲ್ಲಿ ನಡೆದ ಜಂಟಿ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ಅವರು, ಬಿಜೆಪಿ ಸರ್ಕಾರದ ಸಾಧನಾ ಸಮಾವೇಶ ನಡೆಸಲು ನಿರ್ಧಾರ ಮಾಡಿದೆ. ಸರ್ಕಾರ ಬಂದು ನಾಲ್ಕು ವರ್ಷ ಆಗಿದೆ. ನಾಲ್ಕು ವರ್ಷದ ಸಾಧನೆ ಸಮಾವೇಶ ಅಲ್ಲ ಬದಲಾಗಿ ಇದು ಬಿಜೆಪಿಯ ಭ್ರಷ್ಟೋತ್ಸವವಾಗಿದೆ ಎಂದು ಕಿಡಿಕಾರಿದರು.
ಅಧಿಕಾರಕ್ಕೆ ಬಂದ ಬಳಿಕ ರಾಜ್ಯದಲ್ಲಿ ಭ್ರಷ್ಟಾಚಾರ ತಾಂಡವವಾಡುತ್ತಿದೆ. ಭ್ರಷ್ಟಾಚಾರದ ರಾಜಧಾನಿ ಕರ್ನಾಟಕ ಆಗಿದೆ. ಇದು ನಿಮ್ಮ ಸಾಧನೆಯಾಗಿದೆ. ಪಿಎಂ ಹಾಗೂ ರಾಷ್ಟ್ರೀಯ ಮುಖಂಡರು ಹಾಡಿ ಹೊಗಳುತ್ತಿದ್ದರು ರಾಜ್ಯದಲ್ಲಿ ಬಿಜೆಪಿ ಸರ್ಕಾರ ಉತ್ತಮ ಕೆಲಸ ಮಾಡಿದ್ದರೆ ಎಂದರು.
ರೈತರಿಗೆ ಏನು ಲಾಭ ಆಯಿತು ಬಿಜೆಪಿ ಸರ್ಕಾರದಿಂದ? ಗೊಬ್ಬರ, ಔಷಧಿ ದರ ಮಿತಿ ಮೀರಿದೆ. ಹಾಲು ಮೊಸಲು, ಪನ್ನೀರು ಮೇಲೆ ಜಿಎಸ್ ಟಿ ಹಾಕುವ ಮೂಲಕ ಹೊಸ ದಾಖಲೆ ಸೃಷ್ಟಿ ಮಾಡಿದ್ದೀರಿ. ಇದರ ಹೊರತಾಗಿ ರೈತರಿಗೆ ಯಾವ ಅನುಕೂಲ ಆಗಿಲ್ಲ ಎಂದು ವಿವರಿಸಿದರು.
ಕೋವಿಡ್ ಸಂದರ್ಭದಲ್ಲಿ ಏನು ಸಹಾಯ ಮಾಡಲಾಗಿದೆ ರೈತರಿಗೆ, ಯುವರಿಗೆ ಎಷ್ಟು ಉದ್ಯೋಗ ನೀಡಿದ್ದೀರಿ? ಸರ್ಕಾರದ ಇಲಾಖೆಗಳಲ್ಲೂ ಭ್ರಷ್ಟಾಚಾರ ತಾಂಡವವಾಡುತ್ತಿದೆ. ನಮ್ಮ ಒತ್ತಡದಿಂದಾಗಿ ಐಎಎಸ್ ಐಪಿಎಸ್ ಅಧಿಕಾರಿಗಳ ಬಂಧನ ಆಗಿದೆ.
ಪಬ್ ದಾಳಿಗೆ ಡಿಕೆಶಿ ಕಿಡಿ
ನೈತಿಕ ಪೊಲೀಸ್ ಹೆಸರಿನಲ್ಲಿ ಕಾರ್ಯಕರ್ತರ ವಸೂಲಿ ಬಾಜಿಗೆ ನೀವೇ ಪ್ರೋತ್ಸಾಹ ನೀಡಿದ್ದೀರಿ. ಮಂಗಳೂರಿನಲ್ಲಿ ಮತ್ತೆ ನೈತಿಕ ಪೊಲೀಸ್ ಗಿರಿ ಶುರುವಾಗಿದೆ ಎಂದು ಡಿಕೆಶಿ ಕಿಡಿಕಾರಿದರು. ಯುವಕರ ಜೀವನದಲ್ಲಿ ಏಕೆ ಮಧ್ಯಪ್ರವೇಶ ಮಾಡುತ್ತಿದ್ದೀರಿ. ಹೀಗಾದರೆ ಕಾನೂನು ಎಲ್ಲಿ ಸುವ್ಯವಸ್ಥೆ ಇರಲು ಸಾಧ್ಯ?
ಪಠ್ಯ ಪರಿಷ್ಕರಣೆ ಹೆಸರಿನಲ್ಲಿ ಕುವೆಂಪು, ಶಿವಕುಮಾರ್ ಸ್ವಾಮೀಜಿ ಸೇರಿದಂತೆ ಹಲವರಿಗೆ ಅವಮಾನ ಮಾಡಲಾಗಿದೆ. ನೆರೆ ಸಂದರ್ಭದಲ್ಲೂ ಸಚಿವರು ಜಿಲ್ಲಾ ಪ್ರವಾಸ ಮಾಡಿಲ್ಲ. ಕೊನೆಗೆ ಸ್ವತಃ ಸಿಎಂ ಸೂಚನೆ ಕೊಡಬೇಕಾಯಿತು ಎಂದರು. ಗಂಗಾ ಕಲ್ಯಾಣ ಯೋಜನೆಯಲ್ಲಿ ಭ್ರಷ್ಟಾಚಾರ ನಡೆಸಿದ್ದೆ, ಈ ಬಗ್ಗೆ ವರದಿ ಬಂದರೂ ಏಕೆ ಕ್ರಮ ಕೈಗೊಂಡಿಲ್ಲ.
ಹನಿ ನೀರಾವರಿ ವರ್ತಕರ ಸಂಘ 8 ಪರ್ಸೆಂಟ್ ಕುರಿತಾಗಿ ಪತ್ರವನ್ನು ಬರೆದಿದ್ದಾರೆ ರಾಜ್ಯಪಾಲರಿಗೆ. ಭ್ರಷ್ಟಾಚಾರದ ಬಗ್ಗೆ ಸ್ವತಃ ಬಿಜೆಪಿ ಪಕ್ಷದ ಶಾಸಕರೂ ಆರೋಪ ಮಾಡಿದರೂ ಏಕೆ ತನಿಖೆ ಮಾಡಿಲ್ಲ? ನೋಟಿಸ್ ಕೊಟ್ಟಿಲ್ಲ? ಎಂದು ಪ್ರಶ್ನಿಸಿದರು. ಸಿಎಂ ಆಗಬೇಕಾದರೆ 2,500 ಕೋಟಿ ಕೊಡಬೇಕು ಎಂದು ಹೇಳಿದ್ದರು, ಆದರೆ ಈ ಬಗ್ಗೆ ಏಕೆ ಕ್ರಮ ಆಗಿಲ್ಲ? ಸರ್ಕಾರ ಜಾಣಕುರುಡು ಆಗಿದೆ ಎಂದು ಆರೋಪಿಸಿದರು.
ಬಿಜೆಪಿಯಿಂದ ಯಾವ ವರ್ಗಕ್ಕೂ ಯಾವುದೇ ಸಹಾಯ ಆಗಿಲ್ಲ. ಭ್ರಷ್ಟೋತ್ಸವ ಕಾರಣಕ್ಕಾಗಿ ಯಾವುದೇ ರಾಷ್ಟ್ರೀಯ ನಾಯಕರು ಬರ್ತಾ ಇಲ್ಲ ಎಂದರು.
