ಉತ್ತರ ಪ್ರದೇಶದ ವಾರಾಣಸಿಯ ಐಐಟಿ- ಬಿಎಚ್ಯು ವಿದ್ಯಾರ್ಥಿನಿ ಮೇಲಿನ ಲೈಂಗಿಕ ದೌರ್ಜನ್ಯ ಪ್ರಕರಣಕ್ಕೆ ಸಂಬಂಧಿಸಿದಂತೆ ಭಾನುವಾರ ಮೂವರು ವ್ಯಕ್ತಿಗಳನ್ನು ಪೊಲೀಸರು ಬಂಧಿಸಿದ್ದಾರೆ.
ಈ ಘಟನೆ ನಡೆದು ಎರಡು ತಿಂಗಳ ಬಳಿಕ ಈ ಬಂಧನ ನಡೆದಿದೆ. ಈ ಆರೋಪಿಗಳು ಬಿಜೆಪಿ ಸದಸ್ಯರು ಎಂದು ಸಮಾಜವಾದಿ ಪಕ್ಷದ ಮುಖ್ಯಸ್ಥ ಅಖಿಲೇಶ್ ಯಾದವ್ ಸಾಮಾಜಿಕ ಮಾಧ್ಯಮದಲ್ಲಿ ಬರೆದುಕೊಂಡು ಆರೋಪಿಸಿದ್ದಾರೆ.
ಬಂಧಿತ ಆರೋಪಿಗಳನ್ನು ಕುನಾಲ್ ಪಾಂಡೆ, ಆನಂದ್ ಅಲಿಯಾಸ್ ಅಭಿಷೇಕ್ ಚೌಹಾಣ್ ಮತ್ತು ಸಾಕ್ಷಮ್ ಪಟೇಲ್ ಎಂದು ಗುರುತಿಸಲಾಗಿದೆ. ಈ ವ್ಯಕ್ತಿಗಳಿಗೆ ಬನಾರಸ್ ಹಿಂದೂ ವಿವಿ ಜತೆ ಯಾವುದೇ ಶೈಕ್ಷಣಿಕ ನಂಟು ಇಲ್ಲ ಎಂಬುದು ತಿಳಿದುಬಂದಿದೆ.
ನವೆಂಬರ್ 2ರಂದು ವಾರಾಣಸಿಯ ಐಐಟಿ- ಬನಾರಸ್ ಹಿಂದೂ ವಿಶ್ವವಿದ್ಯಾಲಯದ ಕ್ಯಾಂಪಸ್ನಲ್ಲಿ ನಸುಕಿನಲ್ಲಿ ಬೈಕ್ನಲ್ಲಿ ಬಂದ ವ್ಯಕ್ತಿಗಳು ವಿದ್ಯಾರ್ಥಿನಿಯೊಬ್ಬಳಿಗೆ ಲೈಂಗಿಕ ಕಿರುಕುಳ ನೀಡಿದ್ದರು ಎಂದು ಆರೋಪಿಸಲಾಗಿತ್ತು. ಆಕೆಯ ಬಟ್ಟೆಗಳನ್ನು ಎಳೆದು ಕಿತ್ತಿದ್ದ ದುಷ್ಕರ್ಮಿಗಳು, ತಮ್ಮ ಹೇಯ ಕೃತ್ಯದ ವಿಡಿಯೋ ಕೂಡ ಮಾಡಿದ್ದರು.
![](https://pratidhvani.com/wp-content/uploads/2023/12/BHU-jpg.webp)
ಇದನ್ನು ಅನೇಕ ವಿದ್ಯಾರ್ಥಿ ಸಂಘಟನೆಗಳು ವಿದ್ಯಾರ್ಥಿನಿಗೆ ನ್ಯಾಯ ಒದಗಿಸಬೇಕು ಮತ್ತು ಕ್ಯಾಂಪಸ್ನಲ್ಲಿ ಭದ್ರತಾ ಕ್ರಮಗಳನ್ನು ಹೆಚ್ಚಿಸಬೇಕು ಎಂದು ಆಗ್ರಹಿಸಿತ್ತು. ಎರಡು ತಿಂಗಲ ಬಳಿಕ ಈಗ ಈ ಪ್ರಕರಣಕ್ಕೆ ಒಂದು ದಾರಿ ಸಿಕ್ಕಂತಾಗಿದ್ದು ತನಿಖೆ ಮುಂದುವರೆದಿದೆ.