ಬೆಂಗಳೂರು: ಬಾಲಿವುಡ್ ಸೂಪರ್ ಸ್ಟಾರ್ ಶಾರುಕ್ ಖಾನ್ ಪುತ್ರ ಆರ್ಯನ್ ಖಾನ್ ನಗರದ ಪಬ್ ವೊಂದರಲ್ಲಿ ಸಾರ್ವಜನಿಕವಾಗಿ ಮಧ್ಯದ ಬೆರಳು ತೋರಿಸಿ ಅಸಭ್ಯ ವರ್ತನೆ ತೋರಿದ್ದಾನೆ. ಆರ್ಯನ್ ಖಾನ್ ನ ಈ ಎಡವಟ್ಟಿನ ದೃಶ್ಯ ವೈರಲ್ ಆಗಿದ್ದು ಪೊಲೀಸರು ತನಿಖೆ ಶುರು ಮಾಡಿದ್ದಾರೆ.
ನ. 28ರಂದು ಬೆಂಗಳೂರಿಗೆ ಖಾಸಗಿ ಕಾರ್ಯಕ್ರಮದ ನಿಮಿತ್ತ ಬಂದಿದ್ದ ಆರ್ಯನ್ ಖಾನ್ ಕಬ್ಬನ್ ಪಾರ್ಕ್ ಠಾಣಾ ವ್ಯಾಪ್ತಿಯ ಪಬ್ ಗೆ ತನ್ನ ಆತ್ಮೀಯರಾದ ನಲಪಾಡ್ ಮತ್ತು ಜೈದ್ ಖಾನ್ ಜೊತೆ
ಭೇಟಿ ನೀಡಿದ್ದರು. ಆದರೆ ಪಬ್ ನಲ್ಲಿ ಸಾರ್ವಜನಿಕವಾಗಿ ವ್ಯಕ್ತಿಯೊಬ್ಬರಿಗೆ ಮಧ್ಯದ ಬೆರಳು ತೋರಿಸಿ ಅಸಭ್ಯ ವರ್ತನೆ ತೋರಿದ್ದರು. ಬಳಿಕ ಪಕ್ಕದಲ್ಲಿದ್ದ ನಲಪಾಡ್ ಸೂಚನೆಯಂತೆ ಫ್ಲೈನ್ ಕಿಸ್ ಕೂಡ ಕೊಟ್ಟಿದ್ದರು. ಈ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದ್ದು ಸಾಕಷ್ಟು ಟೀಕೆ ವ್ಯಕ್ತವಾಗಿದೆ.
ಘಟನೆ ಸಂಬಂಧ ವಿಡಿಯೋ ವೈರಲ್ ಹಿನ್ನೆಲೆ ಕಬ್ಬನ್ ಪಾರ್ಕ್ ಪೊಲೀಸರು BNSS ಸೆಕ್ಷನ್ 173 ಅಡಿಯಲ್ಲಿ ಪ್ರಾಥಮಿಕ ತನಿಖೆ ಕೈಗೊಂಡಿದ್ದಾರೆ. ಈ ಬಗ್ಗೆ ಪ್ರತಿಕ್ರಿಯೆ ನೀಡಿರೋ ಗೃಹ ಸಚಿವ ಪರಮೇಶ್ವರ್ ಪ್ರಾಥಮಿಕ ತನಿಖೆಯಲ್ಲಿ FIR ಮಾಡಬೇಕಾದಂತ ಪ್ರಕರಣವಾದ್ರೆ ಮುಂದಿನ ಕ್ರಮ ಕೈಗೊಳ್ತಿವಿ ಎಂದಿದ್ದಾರೆ.
ಇನ್ನು ಪೊಲೀಸರು ಈಗಾಗಲೇ ಪಬ್ ಗೆ ಭೇಟಿ ನೀಡಿ ಸಿಸಿಟಿವಿ ಸಂಗ್ರಹ ಮಾಡಿ ಮ್ಯಾನೇಜರ್ ವಿಚಾರಣೆ ಕೂಡ ನಡೆಸಿದ್ದಾರೆ. ಅವಶ್ಯಕತೆ ಬಂದರೆ ಆರ್ಯನ್ ಜೊತೆ ನಿಂತಿದ್ದ ಜೈದ್ ಖಾನ್, ನಲಪಾಡ್ ಗೂ ಕರೆದು ಹೇಳಿಕೆ ಪಡೆಯಲಿದ್ದಾರೆ
