ನವದೆಹಲಿ : ದೇಶದಲ್ಲಿ ದಿನೇದಿನೆ ಹೆಚ್ಚುತ್ತಿರುವ ಸೈಬರ್ ವಂಚನೆ ಹಾಗೂ ಗುರುತಿನ ಕಳ್ಳತನದಂತಹ ಅಕ್ರಮಗಳಿಗೆ ಕಡಿವಾಣ ಹಾಕಲು ಭಾರತೀಯ ವಿಶಿಷ್ಟ ಗುರುತಿನ ಪ್ರಾಧಿಕಾರ (UIDAI) ಅತ್ಯಾಧುನಿಕ ಭದ್ರತಾ ವೈಶಿಷ್ಟ್ಯಗಳನ್ನು ಒಳಗೊಂಡ ನೂತನ ಆಧಾರ್ ಆ್ಯಪ್ (Aadhaar App) ಅನ್ನು ಸಾರ್ವಜನಿಕರ ಬಳಕೆಗೆ ತಂದಿದೆ.
ಈ ಹಿಂದೆ ಬಳಕೆಯಲ್ಲಿದ್ದ ‘ಎಂ-ಆಧಾರ್’ ಆ್ಯಪ್ ಬದಲಿಗೆ ಹೆಚ್ಚು ಸುರಕ್ಷಿತವಾದ ನೂತನ ಆವೃತ್ತಿಯನ್ನು ಪರಿಚಯಿಸಲಾಗಿದ್ದು, ನಾಗರಿಕರು ತಮ್ಮ ಬೆರಳ ತುದಿಯಲ್ಲೇ ಆಧಾರ್ ಕಾರ್ಡ್ ಸುರಕ್ಷತೆಯನ್ನು ಖಚಿತಪಡಿಸಿಕೊಳ್ಳಲು ಇದು ನೆರವಾಗಲಿದೆ. ಈ ಹಿಂದೆ ಆಧಾರ್ ಸೇವಾ ಕೇಂದ್ರಗಳಿಗೆ ಖುದ್ದಾಗಿ ಭೇಟಿ ನೀಡಿ ಮಾಡಿಸಬೇಕಾಗಿದ್ದ ಪ್ರಮುಖ ಕೆಲಸಗಳನ್ನು ಇನ್ಮುಂದೆ ಮನೆಯಲ್ಲೇ ಕುಳಿತು ಸುಲಭವಾಗಿ ಪೂರ್ಣಗೊಳಿಸಬಹುದು.
ಒಂದೇ ಟ್ಯಾಪ್‌ನಲ್ಲಿ ಬಯೋಮೆಟ್ರಿಕ್ ಲಾಕ್ ಹಾಗೂ ಅನ್‌ಲಾಕ್ ಸೌಲಭ್ಯ
ಬಳಕೆದಾರರು ತಮ್ಮ ಮೊಬೈಲ್‌ನಲ್ಲಿ ಹೊಸ ಆ್ಯಪ್ ಇನ್‌ಸ್ಟಾಲ್ ಮಾಡಿ, ಆಧಾರ್ ಸಂಖ್ಯೆ ನಮೂದಿಸಿ ಲಾಗಿನ್ ಆಗಬೇಕು. ಆ್ಯಪ್‌ನ ಕೆಳಭಾಗದಲ್ಲಿ ಕಾಣುವ ‘ಸರ್ವಿಸಸ್’ ಆಯ್ಕೆಯನ್ನು ಒತ್ತಿದಾಗ ಬಯೋಮೆಟ್ರಿಕ್ ಲಾಕ್ ಮಾಡುವ ಸೌಲಭ್ಯ ದೊರೆಯುತ್ತದೆ. ಈ ಆಯ್ಕೆಯ ಮೇಲೆ ಒಮ್ಮೆ ಟ್ಯಾಪ್ ಮಾಡುವ ಮೂಲಕ ಬೆರಳಚ್ಚು ಹಾಗೂ ಕಣ್ಣಿನ ಸ್ಕ್ಯಾನ್‌ನಂತಹ ಬಯೋಮೆಟ್ರಿಕ್ ಮಾಹಿತಿಯನ್ನು ತಕ್ಷಣವೇ ಲಾಕ್ ಮಾಡಬಹುದು. ಅಗತ್ಯ ಬಿದ್ದಾಗ ಇದೇ ವಿಧಾನದ ಮೂಲಕ ಅನ್‌ಲಾಕ್ ಮಾಡಿಕೊಳ್ಳುವ ಅವಕಾಶವೂ ಇದರಲ್ಲಿದೆ. ಇದರಿಂದಾಗಿ ನಿಮ್ಮ ಅನುಮತಿಯಿಲ್ಲದೆ ಯಾರೂ ಬಯೋಮೆಟ್ರಿಕ್ ದೃಢೀಕರಣವನ್ನು ದುರುಪಯೋಗಪಡಿಸಿಕೊಳ್ಳಲು ಸಾಧ್ಯವಿಲ್ಲ.
ಸಿಮ್ ಬೈಂಡಿಂಗ್ ಭದ್ರತೆ ಮತ್ತು ಕುಟುಂಬದ ಸದಸ್ಯರ ಪ್ರೊಫೈಲ್ ಸೇರ್ಪಡೆ
ಹೊಸ ಆ್ಯಪ್‌ನಲ್ಲಿ ಭದ್ರತೆಯನ್ನು ಮತ್ತಷ್ಟು ಬಿಗಿಗೊಳಿಸಲು ‘ಸಿಮ್ ಬೈಂಡಿಂಗ್’ ವ್ಯವಸ್ಥೆಯನ್ನು ಅಳವಡಿಸಲಾಗಿದೆ. ಅಂದರೆ, ಆಧಾರ್ ಸಂಖ್ಯೆಯೊಂದಿಗೆ ನೋಂದಣಿಯಾಗಿರುವ ಸಿಮ್ ಕಾರ್ಡ್ ಚಾಲ್ತಿಯಲ್ಲಿರುವ ಫೋನ್‌ನಿಂದ ಮಾತ್ರ ಈ ಆ್ಯಪ್‌ಗೆ ಲಾಗಿನ್ ಆಗಲು ಸಾಧ್ಯವಾಗಲಿದ್ದು, ಬೇರೆಯವರು ಅಕ್ರಮವಾಗಿ ಪ್ರವೇಶಿಸುವುದನ್ನು ಇದು ಸಂಪೂರ್ಣವಾಗಿ ತಡೆಯುತ್ತದೆ. ಇದರ ಜತೆಗೆ, ಒಂದೇ ಮೊಬೈಲ್ ಸಂಖ್ಯೆಯನ್ನು ಬಳಸಿಕೊಂಡು ಮುಖ್ಯ ಬಳಕೆದಾರರ ಜತೆಗೆ ಕುಟುಂಬದ ಇತರ ಐದು ಸದಸ್ಯರ ಆಧಾರ್ ಪ್ರೊಫೈಲ್‌ಗಳನ್ನು ಇದೇ ಆ್ಯಪ್‌ನಲ್ಲಿ ಸೇರಿಸಿ ನಿರ್ವಹಿಸಲು ಅವಕಾಶ ಕಲ್ಪಿಸಲಾಗಿದೆ.
ಮನೆಯಲ್ಲೇ ಕುಳಿತು ಮೊಬೈಲ್ ಸಂಖ್ಯೆ ಹಾಗೂ ವಿಳಾಸ ಅಪ್‌ಡೇಟ್
ಸಾಮಾನ್ಯವಾಗಿ ಆಧಾರ್ ಕಾರ್ಡ್‌ಗೆ ಮೊಬೈಲ್ ಸಂಖ್ಯೆ ಜೋಡಿಸಲು ಅಥವಾ ಬದಲಾಯಿಸಲು ಜನಸಾಮಾನ್ಯರು ಕೇಂದ್ರಗಳ ಮುಂದೆ ಸರತಿ ಸಾಲಿನಲ್ಲಿ ನಿಲ್ಲಬೇಕಿತ್ತು. ಆದರೆ ಈ ಹೊಸ ಆ್ಯಪ್ ಮೂಲಕ ಮನೆಯಲ್ಲೇ ಕುಳಿತು ಮೊಬೈಲ್ ಸಂಖ್ಯೆ ನವೀಕರಣ ಮತ್ತು ವಿಳಾಸ ಬದಲಾವಣೆಯನ್ನು ಅತ್ಯಂತ ಸರಳವಾಗಿ ಮಾಡಿಕೊಳ್ಳಬಹುದು. ಇದರೊಂದಿಗೆ ಕ್ಯೂಆರ್ ಕೋಡ್ ಆಧಾರಿತ ಪರಿಶೀಲನೆ, ಅಗತ್ಯ ವಿವರಗಳನ್ನು ಮಾತ್ರವೇ ಹಂಚಿಕೊಳ್ಳುವ ಆಯ್ಕೆ ಹಾಗೂ ಈವರೆಗೆ ನಡೆದಿರುವ ಆಧಾರ್ ದೃಢೀಕರಣದ ಇತಿಹಾಸವನ್ನು ಪರಿಶೀಲಿಸುವ ಹಲವು ಮಹತ್ವದ ಸೇವೆಗಳು ಇದರಲ್ಲಿ ಲಭ್ಯವಿವೆ.
ಸಾರ್ವಜನಿಕರ ಗಮನಕ್ಕೆ: ಗ್ರಾಮ ಪಂಚಾಯತಿ ‘ಬಾಪೂಜಿ ಸೇವಾ ಕೇಂದ್ರ’ಗಳಲ್ಲೇ ಸಿಗಲಿವೆ ಪ್ರಮುಖ ಪ್ರಮಾಣ ಪತ್ರಗಳು!
