ನವದೆಹಲಿ : ಲೈಂಗಿಕ ಅಪರಾಧಿ ಜೆಫ್ರಿ ಎಪ್‌ಸ್ಟೀನ್ (effrey Epstein )ಜೊತೆಗೆ ಭಾರತದ ಕೇಂದ್ರ ಪೆಟ್ರೋಲಿಯಂ ಸಚಿವ ಹರ್ದೀಪ್ ಸಿಂಗ್ ಪುರಿ (Hardeep Puri) ಮುಖಾಮುಖಿ ಕುಳಿತಿರುವ ಫೋಟೋವೊಂದು ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಾಪಕ ಚರ್ಚೆಗೆ ಗ್ರಾಸವಾಗಿದೆ.
ಅಮೆರಿಕದ ನ್ಯಾಯಾಂಗ ಇಲಾಖೆಯು ಇತ್ತೀಚೆಗೆ ಬಿಡುಗಡೆ ಮಾಡಿದ ಎಪ್‌ಸ್ಟೀನ್‌ಗೆ ಸಂಬಂಧಿಸಿದ ದಾಖಲೆಗಳ ಒಂಬತ್ತನೇ ಸರಣಿಯಲ್ಲಿ (Dataset 9) ಈ ಚಿತ್ರ ಲಭ್ಯವಾಗಿದೆ. ಸೂಟ್ ಧರಿಸಿರುವ ಹರ್ದೀಪ್ ಪುರಿ ಹಾಗೂ ಕಪ್ಪು ಬಣ್ಣದ ಉಡುಪಿನಲ್ಲಿರುವ ಎಪ್‌ಸ್ಟೀನ್ ಮುಖಾಮುಖಿಯಾಗಿ ಆರಾಮದಾಯಕ ಕುರ್ಚಿಗಳಲ್ಲಿ ಕುಳಿತಿರುವುದು ಫೋಟೋದಲ್ಲಿದ್ದು, ಇಬ್ಬರ ನಡುವಿನ ಟೇಬಲ್ ಮೇಲೆ ಕೆಲವು ಕಡತಗಳು ಮತ್ತು ದಾಖಲೆಗಳು ಕಂಡುಬಂದಿವೆ. ಈ ಫೋಟೋದಲ್ಲಿ ಇವರಿಬ್ಬರನ್ನು ಹೊರತುಪಡಿಸಿ ಬೇರೆ ಯಾರೂ ಕಾಣಿಸಿಲ್ಲ. ‘ದಿ ವೈರ್’ ವರದಿಯ ಪ್ರಕಾರ, ಈ ನಿರ್ದಿಷ್ಟ ಭೇಟಿಗೆ ಸಂಬಂಧಿಸಿದಂತೆ ಬೇರೆ ಬೇರೆ ಕೋನಗಳಿಂದ ತೆಗೆಯಲಾದ ಸುಮಾರು ಹತ್ತು ಛಾಯಾಚಿತ್ರಗಳು ದಾಖಲೆಗಳಲ್ಲಿ ಸೇರಿವೆ.
ಪ್ರತಿ ನಿಯೋಗದ ಭಾಗವಾಗಿ ಭೇಟಿಯಾಗಿದ್ದೆ ಎಂದಿದ್ದ ಸಚಿವರಿಗೆ ಹೊಸ ಪ್ರಶ್ನೆ
ಈ ಹಿಂದೆ ಅಂತಾರಾಷ್ಟ್ರೀಯ ಶಾಂತಿ ಸಂಸ್ಥೆಯ (ಐಪಿಐ) ನಿಯೋಗದ ಭಾಗವಾಗಿ ಮಾತ್ರ ಎಪ್‌ಸ್ಟೀನ್‌ನನ್ನು ಭೇಟಿಯಾಗಿದ್ದೆ ಎಂದು ಸಚಿವರು ನೀಡಿದ್ದ ಹೇಳಿಕೆಗೂ, ಪ್ರಸ್ತುತ ಬಿಡುಗಡೆಯಾಗಿರುವ ಏಕಾಂಗಿ ಸಭೆಯ ಫೋಟೋಗೂ ತಾಳೆಯಾಗುತ್ತಿಲ್ಲ ಎಂಬ ಟೀಕೆಗಳು ವ್ಯಕ್ತವಾಗಿವೆ. ಈ ಹಿಂದೆ ಫೆಬ್ರವರಿಯಲ್ಲಿ ನಡೆದ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ್ದ ಪುರಿ, 2009ರಲ್ಲಿ ವಿಶ್ವಸಂಸ್ಥೆಗೆ ಭಾರತದ ರಾಜತಾಂತ್ರಿಕರಾಗಿ ನಿಯೋಜನೆಗೊಂಡಾಗಿನಿಂದ 2017ರಲ್ಲಿ ಸಚಿವರಾಗುವವರೆಗಿನ ಅವಧಿಯಲ್ಲಿ ತಾವು ಎಪ್‌ಸ್ಟೀನ್‌ನನ್ನು ಒಟ್ಟು ಮೂರರಿಂದ ನಾಲ್ಕು ಬಾರಿ ಮಾತ್ರ ಭೇಟಿಯಾಗಿದ್ದಾಗಿ ತಿಳಿಸಿದ್ದರು. ಐಪಿಐ ಸಂಸ್ಥೆಯಲ್ಲಿದ್ದ ತಮ್ಮ ಹಿರಿಯ ಅಧಿಕಾರಿ ಟರ್ಜೆ ರಾಡ್-ಲಾರ್ಸೆನ್ ಮೂಲಕ ಎಪ್‌ಸ್ಟೀನ್ ಪರಿಚಯವಾಗಿದ್ದು, ಸಂಸ್ಥೆಯ ನಿಯೋಗದ ಜತೆಗಷ್ಟೇ ಭೇಟಿ ನಡೆದಿತ್ತು ಎಂದು ಈ ಹಿಂದೆ ಸಮರ್ಥಿಸಿಕೊಂಡಿದ್ದರು.
ಸಷ್ಟನೆ ನೀಡಿದ ಸಚಿವರ ಕಚೇರಿ
ಹೊಸ ಫೋಟೋ ಬಹಿರಂಗವಾದ ಬೆನ್ನಲ್ಲೇ ಸಚಿವ ಹರ್ದೀಪ್ ಸಿಂಗ್ ಪುರಿ ಅವರ ಕಚೇರಿ ಈ ಬಗ್ಗೆ ಸ್ಪಷ್ಟನೆ ನೀಡಿದೆ. ಸುಮಾರು ಒಂದು ದಶಕದ ಹಿಂದೆ ನಡೆದ ಸಭೆಯಾಗಿದ್ದರಿಂದ ಈ ನಿರ್ದಿಷ್ಟ ಫೋಟೋ ಯಾವ ಸಭೆಯದ್ದು ಅಥವಾ ಆ ಸಮಯದಲ್ಲಿ ಇತರೆ ವ್ಯಕ್ತಿಗಳು ಹಾಜರಿದ್ದರೇ ಎಂಬುದು ಸಚಿವರಿಗೆ ನಿಖರವಾಗಿ ನೆನಪಿಲ್ಲ ಎಂದು ಕಚೇರಿ ತಿಳಿಸಿದೆ. ಜತೆಗೆ, ಈ ಚಿತ್ರಗಳು ಯಾವುದೇ ಹೊಸ ಸಂಗತಿಯನ್ನು ಬಯಲು ಮಾಡಿಲ್ಲ; ಬದಲಿಗೆ ಸಚಿವರು ಮೊದಲಿನಿಂದಲೂ ಹೇಳಿಕೊಂಡು ಬಂದಿರುವಂತೆ, ಸೂಕ್ತ ಉಡುಪು ಧರಿಸಿ ದಾಖಲೆಗಳೊಂದಿಗೆ ನಡೆದ ಔಪಚಾರಿಕ ಹಾಗೂ ವೃತ್ತಿಪರ ಸಭೆಗಳಿವು ಎಂಬುದನ್ನು ಸಾಬೀತುಪಡಿಸುತ್ತವೆ ಎಂದು ಸ್ಪಷ್ಟಪಡಿಸಿದೆ. ತಾವು ಎಂದಿಗೂ ಎಪ್‌ಸ್ಟೀನ್‌ನ ಖಾಸಗಿ ದ್ವೀಪಕ್ಕೆ ಭೇಟಿ ನೀಡಿಲ್ಲ ಹಾಗೂ ಭಾರತದ ಆರ್ಥಿಕತೆ ಮತ್ತು ಡಿಜಿಟಲ್ ಸಾಮರ್ಥ್ಯದಲ್ಲಿ ಹೂಡಿಕೆ ಆಕರ್ಷಿಸುವ ನಿಟ್ಟಿನಲ್ಲಿ ಮಾತ್ರ ಆ ಸಂವಾದಗಳು ನಡೆದಿದ್ದವು ಎಂದು ಕಚೇರಿ ಪುನರುಚ್ಚರಿಸಿದೆ.
ಹಳೆಯ ಇಮೇಲ್‌ಗಳಿಂದ ಬಹಿರಂಗವಾದ ಸಭೆಗಳು ಮತ್ತು ಸಂವಹನ ವಿವರ
ಅಮೆರಿಕ ನ್ಯಾಯಾಂಗ ಇಲಾಖೆ ಬಿಡುಗಡೆ ಮಾಡಿರುವ ಇಮೇಲ್ ದಾಖಲೆಗಳ ಪ್ರಕಾರ, 2014 ಮತ್ತು 2017ರ ನಡುವೆ ನ್ಯೂಯಾರ್ಕ್‌ನ ಮ್ಯಾನ್‌ಹ್ಯಾಟನ್‌ನಲ್ಲಿರುವ ಎಪ್‌ಸ್ಟೀನ್ ನಿವಾಸದಲ್ಲಿ ಸಚಿವರೊಂದಿಗೆ ಕನಿಷ್ಠ ಮೂರು ಸಭೆಗಳು ನಿಗದಿಯಾಗಿದ್ದವು. ಲಿಂಕ್ಡ್‌ಇನ್ ಸಂಸ್ಥಾಪಕ ರೀಡ್ ಹಾಫ್‌ಮನ್ ಅವರನ್ನು ಎಪ್‌ಸ್ಟೀನ್ ಮೂಲಕ ಸಂಪರ್ಕಿಸಿದ್ದ ಪುರಿ, ‘ಡಿಜಿಟಲ್ ಇಂಡಿಯಾ’ ಯೋಜನೆ ಮತ್ತು ಭಾರತದಲ್ಲಿನ ಹೂಡಿಕೆ ಅವಕಾಶಗಳ ಬಗ್ಗೆ ಚರ್ಚಿಸಿದ್ದರು. ಇದಲ್ಲದೆ, ಎಪ್‌ಸ್ಟೀನ್ ಅವರ ಸಹಾಯಕಿ ಭಾರತಕ್ಕೆ ಬರಲು ವೀಸಾ ಕೋರಿದಾಗ ಅದಕ್ಕೆ ಆದ್ಯತೆ ನೀಡುವಂತೆ ಭಾರತೀಯ ರಾಜತಾಂತ್ರಿಕರಿಗೆ ಪುರಿ ಸಂದೇಶ ರವಾನಿಸಿದ್ದು ಹಾಗೂ ದ್ವೀಪ ಪ್ರವಾಸದಿಂದ ಹಿಂದಿರುಗಿದ ನಂತರ ಭೇಟಿಯಾಗುವ ಕುರಿತು ಇಮೇಲ್ ವಿನಿಮಯ ಮಾಡಿಕೊಂಡಿದ್ದ ವಿವರಗಳು ಈ ದಾಖಲೆಗಳ ಮೂಲಕ ಬೆಳಕಿಗೆ ಬಂದಿವೆ. 2008ರಲ್ಲೇ ಲೈಂಗಿಕ ಅಪರಾಧ ಪ್ರಕರಣದಲ್ಲಿ ತಪ್ಪೊಪ್ಪಿಕೊಂಡಿದ್ದ ಎಪ್‌ಸ್ಟೀನ್, 2019ರಲ್ಲಿ ಲೈಂಗಿಕ ಕಳ್ಳಸಾಗಣೆ ಆರೋಪದ ಮೇಲೆ ಬಂಧನಕ್ಕೊಳಗಾಗಿ ಜೈಲಿನಲ್ಲಿದ್ದಾಗಲೇ ಸಾವನ್ನಪ್ಪಿದ್ದ.
