ರಾಘವ್ ಚಡ್ಡಾ ಅವರ ರಾಜಕೀಯ ಪಯಣದಲ್ಲಿ ಮಹತ್ವದ ತಿರುವು ಕಂಡುಬಂದಿದ್ದು, ಅವರು ಹೊಸ ರಾಜಕೀಯ ದಾರಿಗೆ ಹೆಜ್ಜೆಯಿಟ್ಟಿರುವುದು ರಾಜಕೀಯ ವಲಯದಲ್ಲಿ ಚರ್ಚೆಗೆ ಗ್ರಾಸವಾಗಿದೆ. ಇತ್ತೀಚೆಗೆ ಆಮ್ ಆದ್ಮಿ ಪಕ್ಷವು (ಎಎಪಿ) ಅವರನ್ನು ರಾಜ್ಯಸಭೆಯ ಉಪನಾಯಕ ಹುದ್ದೆಯಿಂದ ವಜಾಗೊಳಿಸಿದ್ದರಿಂದಲೇ ಅವರ ಮುಂದಿನ ನಡೆ ಬಗ್ಗೆ ಹಲವು ಊಹಾಪೋಹಗಳು ಮೂಡಿದ್ದವು. ಇದೀಗ ಆ ಊಹಾಪೋಹಗಳಿಗೆ ತೆರೆ ಎಳೆದಂತೆ, ಅವರು ಅಧಿಕೃತವಾಗಿ ಬಿಜೆಪಿಗೆ ಸೇರುವ ನಿರ್ಧಾರ ಘೋಷಿಸಿದ್ದಾರೆ.ಈ ಬೆಳವಣಿಗೆ ಎಎಪಿಗೆ ದೊಡ್ಡ ಹಿನ್ನಡೆಯಾಗಿ ಕಾಣಲಾಗಿದೆ.
ಸಂಸದನಾಗಿ ತನ್ನ ತೀಕ್ಷ್ಣ ಭಾಷಣಗಳಿಂದ ಗಮನ ಸೆಳೆದಿರುವ ರಾಘವ್ ಚಡ್ಡಾ ಸರಳ ಜೀವನಶೈಲಿಗೆ ಹೆಸರುವಾಸಿ. ಚುನಾವಣಾ ಅಫಿಡವಿಟ್ ಹಾಗೂ ಲಭ್ಯ ಮಾಹಿತಿಗಳ ಪ್ರಕಾರ, ಅವರ ಒಟ್ಟು ಆಸ್ತಿ ಸುಮಾರು ₹50 ಲಕ್ಷದಷ್ಟಿದೆ. ವೃತ್ತಿಯಿಂದ ಚಾರ್ಟರ್ಡ್ ಅಕೌಂಟೆಂಟ್ ಆಗಿರುವ ಅವರು ದೆಹಲಿಯಲ್ಲಿ ಸುಮಾರು ₹36–37 ಲಕ್ಷ ಮೌಲ್ಯದ ಮನೆಯನ್ನು ಹೊಂದಿದ್ದಾರೆ. ಜೊತೆಗೆ ಹಳೆಯ ಮಾದರಿಯ ಮಾರುತಿ ಸುಜುಕಿ ಸ್ವಿಫ್ಟ್ ಡಿಜೈರ್ ಕಾರು, ಸುಮಾರು 90 ಗ್ರಾಂ ಚಿನ್ನ (ಸುಮಾರು ₹5 ಲಕ್ಷ) ಹಾಗೂ ₹6 ಲಕ್ಷ ಮೌಲ್ಯದ ಷೇರುಗಳು ಮತ್ತು ಬಾಂಡ್ಗಳನ್ನು ಹೊಂದಿದ್ದಾರೆ.ಸಂಸದನಾಗಿ ಪಡೆಯುವ ಸಂಬಳ ಮತ್ತು ಭತ್ಯೆಗಳೇ ಅವರ ಪ್ರಮುಖ ಆದಾಯದ ಮೂಲ.
ಇನ್ನೊಂದೆಡೆ, ಅವರ ಪತ್ನಿ ಹಾಗೂ ಬಾಲಿವುಡ್ ನಟಿ ಪರಿಣಿತಿ ಚೋಪ್ರಾ ದೊಡ್ಡ ಮಟ್ಟದ ಆಸ್ತಿ ಹೊಂದಿದ್ದಾರೆ. ವರದಿಗಳ ಪ್ರಕಾರ, ಅವರ ಒಟ್ಟು ಆಸ್ತಿ ಸುಮಾರು ₹74 ಕೋಟಿ. ಮುಂಬೈನ ಬಾಂದ್ರಾದಲ್ಲಿ ಸುಮಾರು ₹22 ಕೋಟಿ ಮೌಲ್ಯದ ಐಷಾರಾಮಿ ಮನೆ ಹೊಂದಿರುವ ಅವರು, ಸಿನಿಮಾಗಳು, ಜಾಹಿರಾತುಗಳು, ವೇದಿಕೆ ಕಾರ್ಯಕ್ರಮಗಳು ಮತ್ತು ಸಾಮಾಜಿಕ ಜಾಲತಾಣಗಳ ಮೂಲಕ ಹೆಚ್ಚಿನ ಆದಾಯ ಗಳಿಸುತ್ತಿದ್ದಾರೆ. ಆಡಿ ಸೇರಿದಂತೆ ಹಲವು ಐಷಾರಾಮಿ ಕಾರುಗಳ ಸಂಗ್ರಹವೂ ಅವರಲ್ಲಿದೆ.
ಇವರಿಬ್ಬರ ಒಟ್ಟು ಆಸ್ತಿ ಸುಮಾರು ₹74.5 ಕೋಟಿಗಳಷ್ಟಾಗಿದ್ದು, ದಂಪತಿಗಳಲ್ಲಿ ಹೆಚ್ಚಿನ ಪಾಲು ಪರಿಣಿತಿ ಚೋಪ್ರಾ ಅವರದ್ದೇ ಆಗಿದೆ. ಇತ್ತ ರಾಘವ್ ಚಡ್ಡಾ ಸಾರ್ವಜನಿಕ ಸೇವೆ ಮತ್ತು ರಾಜಕೀಯದಲ್ಲಿಯೇ ಹೆಚ್ಚು ಗಮನ ಹರಿಸುತ್ತಿರುವುದು ಗಮನಾರ್ಹ.
ಪಕ್ಷತ್ಯಾಗದ ಕುರಿತು ಮಾತನಾಡಿದ ರಾಘವ್ ಚಡ್ಡಾ, “ಎಎಪಿ ತನ್ನ ಮೂಲ ಸಿದ್ಧಾಂತಗಳಿಂದ ದೂರ ಸರಿದಿದೆ. 15 ವರ್ಷಗಳ ಕಾಲ ನಾನು ನಂಬಿಕೆ ಇಟ್ಟುಕೊಂಡಿದ್ದ ಪಕ್ಷ ಈಗ ತನ್ನ ದಾರಿಯನ್ನು ತಪ್ಪಿಸಿಕೊಂಡಿದೆ” ಎಂದು ಗಂಭೀರ ಆರೋಪ ಮಾಡಿದರು. ಜೊತೆಗೆ, ಪಕ್ಷ ಈಗ ಸಾರ್ವಜನಿಕ ಹಿತಕ್ಕಿಂತ ಖಾಸಗಿ ಲಾಭಕ್ಕಾಗಿ ಕೆಲಸ ಮಾಡುತ್ತಿದೆ ಎಂದು ಟೀಕಿಸಿದರು. ಇದೇ ಕಾರಣದಿಂದ ತಾವು ಪಕ್ಷದಿಂದ ದೂರ ಸರಿದು ಜನರ ಬಳಿಗೆ ಹೋಗುವ ನಿರ್ಧಾರ ಕೈಗೊಂಡಿದ್ದಾಗಿ ತಿಳಿಸಿದ್ದಾರೆ.
