2021 ರಲ್ಲಿ ಮಧ್ಯಪ್ರದೇಶದಲ್ಲಿ ಪ್ರತಿದಿನ ಸರಾಸರಿ 29 ಮತ್ತು ರಾಜಸ್ಥಾನದಲ್ಲಿ 14 ಮಕ್ಕಳು ಕಾಣೆಯಾಗಿದ್ದಾರೆ. ಕ್ರೈ (Child Rights and You- Cry) ಎನ್‌ಜಿಒ ತಯಾರಿಸಿದ ವರದಿಯಲ್ಲಿ ಈ ಮಾಹಿತಿ ನೀಡಲಾಗಿದೆ. ವರದಿಯ ಪ್ರಕಾರ, ಉತ್ತರ ಭಾರತದ ನಾಲ್ಕು ಪ್ರಮುಖ ರಾಜ್ಯಗಳಲ್ಲಿ ಮಕ್ಕಳು ಕಾಣೆಯಾದ ಪ್ರಕರಣಗಳಲ್ಲಿ ಗಣನೀಯ ಏರಿಕೆ ಕಂಡುಬಂದಿದೆ.
ದೆಹಲಿಯ ಎಂಟು ಪೊಲೀಸ್ ಜಿಲ್ಲೆಗಳಲ್ಲಿ, 2021 ರಲ್ಲಿ ಪ್ರತಿದಿನ ಐದು ಮಕ್ಕಳು ಕಾಣೆಯಾಗಿದ್ದಾರೆ. ಉತ್ತರ ಪ್ರದೇಶದ 58 ಜಿಲ್ಲೆಗಳಲ್ಲಿ ಪ್ರತಿ ದಿನ ಸರಾಸರಿ ಎಂಟು ಮಕ್ಕಳು (ಆರು ಹುಡುಗಿಯರು ಮತ್ತು ಇಬ್ಬರು ಗಂಡು ಮಕ್ಕಳು) ಕಾಣೆಯಾಗುತ್ತಿದ್ದಾರೆ ಎಂದು CRY ಯ ‘ಕಾಣೆಯಾದ ಮಕ್ಕಳ ಸ್ಥಿತಿ ವರದಿ’ (Status Report on Missing Children) ಹೇಳಿದೆ.
2021 ರಲ್ಲಿ ಮಧ್ಯಪ್ರದೇಶ ಮತ್ತು ರಾಜಸ್ಥಾನದಲ್ಲಿ ಕಾಣೆಯಾದ ಹುಡುಗಿಯರ ಸಂಖ್ಯೆ ಹುಡುಗರಿಗಿಂತ ಐದು ಪಟ್ಟು ಹೆಚ್ಚು ಎಂದು ವರದಿ ಹೇಳಿದೆ. ರಾಷ್ಟ್ರೀಯ ಅಪರಾಧ ಬ್ಯೂರೋದ (NCB) 2020 ರ ಅಂಕಿಅಂಶಗಳ ಪ್ರಕಾರ, ಮಧ್ಯಪ್ರದೇಶದಲ್ಲಿ 8,751 ಮತ್ತು ರಾಜಸ್ಥಾನದಲ್ಲಿ 3,179 ಮಕ್ಕಳು ಕಾಣೆಯಾದ ಪ್ರಕರಣಗಳು ದಾಖಲಾಗಿವೆ. ಅದೇ ವೇಳೆ, 2021 ರಲ್ಲಿ ಮಧ್ಯಪ್ರದೇಶದಲ್ಲಿ 10,648 ಮತ್ತು ರಾಜಸ್ಥಾನದಲ್ಲಿ 5,354 ಮಕ್ಕಳು ಕಾಣೆಯಾದ ಪ್ರಕರಣಗಳು ದಾಖಲಾಗಿವೆ ಎಂದು ಸರ್ಕಾರಗಳು ವರದಿ ಮಾಡಿದೆ.
RTI ಅರ್ಜಿಗಳ ಮೂಲಕ ಸಂಗ್ರಹಿಸಿದ ಮಾಹಿತಿಯು ಮಧ್ಯಪ್ರದೇಶದ ಇಂದೋರ್, ಭೋಪಾಲ್, ಧಾರ್, ಜಬಲ್ಪುರ್ ಮತ್ತು ರೇವಾ ಜಿಲ್ಲೆಗಳಲ್ಲಿ ಕಾಣೆಯಾದ ಮಕ್ಕಳ ಸಂಖ್ಯೆ ಹೆಚ್ಚಿದೆ ಎಂದು ತೋರಿಸಿದೆ.
“ಮಧ್ಯಪ್ರದೇಶದಿಂದ ಪ್ರತಿದಿನ 24 ಹುಡುಗಿಯರು ಮತ್ತು ಐದು ಹುಡುಗರು ಸೇರಿದಂತೆ ಸರಾಸರಿ 29 ಮಕ್ಕಳು ಕಾಣೆಯಾಗುತ್ತಾರೆ” ಎಂದು ವರದಿ ಹೇಳಿದೆ.
2021 ರಲ್ಲಿ ಉತ್ತರ ಪ್ರದೇಶದ 75 ಜಿಲ್ಲೆಗಳಲ್ಲಿ ಒಟ್ಟು 2,998 ಮಕ್ಕಳು (835 ಗಂಡು ಮತ್ತು 2,163 ಹುಡುಗಿಯರು) ನಾಪತ್ತೆಯಾಗಿದ್ದಾರೆ. ರಾಜ್ಯದಲ್ಲಿ ಕಾಣೆಯಾದ ಮಕ್ಕಳ ಪೈಕಿ ಶೇ.88.9ರಷ್ಟು ಮಕ್ಕಳು 12-18 ವರ್ಷ ವಯಸ್ಸಿನವರಾಗಿದ್ದಾರೆ. ಉತ್ತರ ಪ್ರದೇಶದಲ್ಲಿ ಕಾಣೆಯಾದ ಮಕ್ಕಳ ಸಂಖ್ಯೆಯಲ್ಲಿ ಮೊದಲ ಐದು ಜಿಲ್ಲೆಗಳಲ್ಲಿ ಲಕ್ನೋ, ಮೊರಾದಾಬಾದ್, ಕಾನ್ಪುರ್ ನಗರ, ಮೀರತ್ ಮತ್ತು ಮಹಾರಾಜ್‌ಗಂಜ್ ಸೇರಿವೆ ಎಂದು ಅಂಕಿ ಅಂಶ ತೋರಿಸಿದೆ.
ದೆಹಲಿಯ ಎಂಟು ಪೊಲೀಸ್ ಜಿಲ್ಲೆಗಳಲ್ಲಿ, 2021 ರಲ್ಲಿ ಒಟ್ಟು 1641 ಮಕ್ಕಳು ನಾಪತ್ತೆಯಾಗಿದ್ದಾರೆ, ಅಂದರೆ ಪ್ರತಿದಿನ ಸರಾಸರಿ ಐದು ಮಕ್ಕಳು ಕಾಣೆಯಾಗಿದ್ದಾರೆ ಎಂದು ವರದಿ ಹೇಳುತ್ತದೆ. ದೆಹಲಿಯಲ್ಲಿ ಕಾಣೆಯಾದ ಶೇ.85ರಷ್ಟು ಮಕ್ಕಳು 12-18 ವರ್ಷ ವಯಸ್ಸಿನವರಾಗಿದ್ದಾರೆ.
ರಾಜಸ್ಥಾನದಲ್ಲಿ ಒಟ್ಟು 5,354 ಮಕ್ಕಳು (4,468 ಹುಡುಗಿಯರು ಮತ್ತು 886 ಹುಡುಗರು) ನಾಪತ್ತೆಯಾಗಿದ್ದಾರೆ. ವರದಿಯ ಪ್ರಕಾರ, ರಾಜಸ್ಥಾನದಲ್ಲಿ ಪ್ರತಿದಿನ 12 ಹುಡುಗಿಯರು ಮತ್ತು ಇಬ್ಬರು ಹುಡುಗರು ಸೇರಿದಂತೆ ಸರಾಸರಿ 14 ಮಕ್ಕಳು ಕಾಣೆಯಾಗುತ್ತಾರೆ.
ಈ ಅಂಕಿಅಂಶಗಳನ್ನು 2020 ಕ್ಕೆ ಹೋಲಿಸಿದರೆ ಮಧ್ಯಪ್ರದೇಶದಲ್ಲಿ ಮಕ್ಕಳ ಕಾಣೆಯಾದ ಪ್ರಕರಣಗಳಲ್ಲಿ ಸುಮಾರು 26 ಪ್ರತಿಶತ ಮತ್ತು ರಾಜಸ್ಥಾನದಲ್ಲಿ 41 ಪ್ರತಿಶತದಷ್ಟು ಹೆಚ್ಚಳವನ್ನು ಸೂಚಿಸುತ್ತವೆ.
ಅದರ ಪ್ರಕಾರ, 2020 ರಲ್ಲಿ 2,222 ಮಕ್ಕಳನ್ನು ಕಳ್ಳಸಾಗಣೆ ಮಾಡಲಾಗಿದೆ ಮತ್ತು ರಾಜಸ್ಥಾನದಿಂದ ಅತಿ ಹೆಚ್ಚು ಮಕ್ಕಳನ್ನು ಕಳ್ಳಸಾಗಣೆ ಮಾಡಲಾಗಿದೆ.
ಉತ್ತರ ಪ್ರದೇಶದ 58 ಜಿಲ್ಲೆಗಳು ಮಾತ್ರ ಡೇಟಾವನ್ನು ಒದಗಿಸಿವೆ. ಅದೇ ರೀತಿ, ದೆಹಲಿಯ ಎಲ್ಲಾ ಪೊಲೀಸ್ ಜಿಲ್ಲೆಗಳು ಅಂಕಿಅಂಶಗಳನ್ನು ನೀಡಿಲ್ಲ. ಮತ್ತೊಂದೆಡೆ, ಆರ್‌ಟಿಐ ಅಡಿಯಲ್ಲಿ ಸಲ್ಲಿಸಲಾದ ಅರ್ಜಿಗಳಿಗೆ ಹರಿಯಾಣ ಪ್ರತಿಕ್ರಿಯಿಸಲಿಲ್ಲ.
CRY (ಉತ್ತರ) ಪ್ರಾದೇಶಿಕ ನಿರ್ದೇಶಕರಾದ ಸೋಹಾ ಮೊಯಿತ್ರಾ, “ಮಧ್ಯಪ್ರದೇಶ ಮತ್ತು ರಾಜಸ್ಥಾನದಲ್ಲಿ 2021 ರಲ್ಲಿ ಕಾಣೆಯಾದ ಮಕ್ಕಳ ಪೈಕಿ 83 ಪ್ರತಿಶತಕ್ಕಿಂತ ಹೆಚ್ಚು ಹೆಣ್ಣುಮಕ್ಕಳು. ಕಳೆದ ವರ್ಷ ಮಧ್ಯಪ್ರದೇಶದಲ್ಲಿ 8,876 ಮತ್ತು ರಾಜಸ್ಥಾನದಲ್ಲಿ 4,468 ಹುಡುಗಿಯರು ನಾಪತ್ತೆಯಾಗಿದ್ದಾರೆ.” ಎಂದು ಹೇಳಿದ್ದಾರೆ.
ಕಳೆದ ಐದು ವರ್ಷಗಳಿಂದ ನಾಪತ್ತೆಯಾಗಿರುವ ಮಕ್ಕಳ ಸಂಖ್ಯೆ ಹೆಚ್ಚಾಗಿರುವುದು ತೀವ್ರ ಕಳವಳಕಾರಿ ಸಂಗತಿ ಎಂದು ಅವರು ಹೇಳೀದ್ದಾರೆ.
