ಭಾರತದಲ್ಲಿ ಕರೋನಾ ಪೀಡಿತರ ಸಂಖ್ಯೆ 30 ಸಾವಿರದ ಗಡಿಯನ್ನು ದಾಟಿದೆ ಎಂದು ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಸಚಿವಾಲಯ ಹೇಳಿದೆ. ರಾಜ್ಯಗಳ ವರದಿ ಪ್ರಕಾರ ಭಾರತದಲ್ಲಿ ಕಳೆದ 24ಗಂಟೆಗಳಲ್ಲಿ 1897 ಹೊಸ ಕರೋನಾ ಪಾಸಿಟಿವ್ ಪ್ರಕರಣಗಳು ಕಂಡುಬಂದಿದ್ದು ಒಟ್ಟು ಪ್ರಕರಣಗಳ ಸಂಖ್ಯೆ 31,332 ತಲುಪಿದೆ. ಸಾಂಕ್ರಾಮಿಕ ರೋಗ ಹರಡಲು ಪ್ರಾರಂಭಿಸಿದ್ದರಿಂದ ಒಂದೇ ದಿನದಲ್ಲಿ ಇಷ್ಟೊಂದು ಪ್ರಮಾಣದ ಕರೋನಾ ಪ್ರಕರಣ ದಾಖಲಾಗಿದ್ದು ಇದೇ ಮೊದಲು. ಕರೋನಾ ಮರಣ ಸಂಖ್ಯೆ 1,007ಕ್ಕೇರಿದ್ದು ಮಂಗಳವಾರ ಒಂದೇ ದಿನ 73 ಜನರು ಕರೋನಾದಿಂದಾಗಿ ಸಾವನ್ನಪ್ಪಿದ್ದಾರೆ.
ಅತೀ ಹೆಚ್ಚು ಕರೋನಾ ಪ್ರಕರಣಗಳು ದಾಖಲಾಗಿರುವ ಮಹಾರಾಷ್ಟ್ರದಲ್ಲಿ ಪರಿಸ್ಥಿತಿ ಇನ್ನಷ್ಟು ಬಿಗಡಾಯಿಸುತ್ತಿದೆ. ಮಂಗಳವಾರ ಒಂದೇ ದಿನ 728 ಹೊಸ ಪ್ರಕರಣಗಳು ದೃಢೀಕರಿಸಲಾಗಿದ್ದು, ಒಟ್ಟು ಸೋಂಕಿತರ ಸಂಖ್ಯೆ 9,318 ಕ್ಕೇರಿದೆ. ಮಂಗಳವಾರದಂದು ಮಹಾರಾಷ್ಟ್ರ ರಾಜ್ಯವೊಂದರಲ್ಲೇ 31 ಮಂದಿ ರೋಗಿಗಳು ಮೃತಪಟ್ಟಿದ್ದು ಮೋದಿ ತವರು ರಾಜ್ಯ ಗುಜರಾತಿನಲ್ಲಿ 19 ಮಂದಿ ಮೃತಪಟ್ಟಿದ್ದಾರೆ. ʼನಮಸ್ತೇ ಟ್ರಂಪ್ʼ ಕಾರ್ಯಕ್ರಮ ಆಯೋಜಿಸಿದ್ದ ಗುಜರಾತಿನಲ್ಲಿ 3,744 ಪ್ರಕರಣಗಳು ಕಂಡು ಬಂದಿದ್ದು ಕರೋನಾ ಪೀಡಿತರಲ್ಲಿ ಮಹಾರಾಷ್ಟ್ರ ಬಿಟ್ಟರೆ ನಂತರದ ಸ್ಥಾನ ಮೋದಿ ತವರು ರಾಜ್ಯ ಪಡೆದುಕೊಂಡಿದೆ.
ದೇಶದಲ್ಲಿ ಇಲ್ಲಿಯವರೆಗೂ 7,696 ಮಂದಿ ಸೋಂಕಿನಿಂದ ಚೇತರಿಸಿಕೊಂಡಿದ್ದಾರೆ. ಕೇರಳ ರಾಜ್ಯ ದೇಶದಲ್ಲೇ ಹೆಚ್ಚು ಚೇತರಿಕೆ ದರ ಹೊಂದಿದ್ದು ದೇಶದ ಉಳಿದ ರಾಜ್ಯಗಳಿಗೆ ಮಾದರಿಯೆನಿಸಿದೆ. ಕರೋನಾ ವಿರುದ್ಧದ ಹೋರಾಟದಲ್ಲಿ ದೇಶದ ಇತರ ರಾಜ್ಯಗಳಿಗಿಂತ ಮುಂಚೂಣಿಯಲ್ಲಿರುವುದಕ್ಕೆ 2018ರಲ್ಲಿ ನಿಫಾ ವೈರಸ್ಸನ್ನು ಎದುರಿಸಿ ಅನುಭವ ಹೊಂದಿರುವುದು ಕೂಡಾ ಒಂದು ಕಾರಣ.
ಬಿ.ಎಸ್.ಯಡಿಯೂರಪ್ಪರ ನೇತೃತ್ವದ ಕರ್ನಾಟಕ ರಾಜ್ಯ ಸರ್ಕಾರ, ಕೇಂದ್ರ ಸಾಕಷ್ಟು ನೆರವಿನ ಹಸ್ತ ಚಾಚದ ಹೊರತಾಗಿಯೂ ಕರೋನಾ ವಿರುದ್ದದ ಹೋರಾಟದಲ್ಲಿ ಉತ್ತಮ ಫಲಿತಾಂಶ ತೋರುತ್ತಿದೆ. ಭಾರತದ ಆರೋಗ್ಯ ಸಚಿವಾಲಯ ಎಪ್ರಿಲ್ 29ರಂದು ನೀಡಿರುವ ಮಾಹಿತಿ ನೀಡಿರುವ ಪ್ರಕಾರ ಕರ್ನಾಟಕದಲ್ಲಿ ಒಟ್ಟು 523 ಪ್ರಕರಣಗಳು ದಾಖಲಾಗಿದ್ದು 207 ಸೋಂಕಿತರು ಚೇತರಿಸಿಕೊಂಡಿದ್ದಾರೆ.
ಕರೋನಾ ಸೋಂಕಿತರ ರಾಜ್ಯವಾರು ಅಂಕಿಅಂಶ
ಮಹಾರಾಷ್ಟ್ರ – 9,318
ಗುಜರಾತ್ – 3,744
ದೆಹಲಿ – 3,314
ಮಧ್ಯ ಪ್ರದೇಶ – 2,387
ರಾಜಸ್ಥಾನ್ – 2364
ತಮಿಳುನಾಡು – 2058
ಉತ್ತರಪ್ರದೇಶ – 2,053
ಆಂಧ್ರ ಪ್ರದೇಶ – 1,259
ತೆಲಂಗಾಣ – 1,004
ಪಶ್ಚಿಮ ಬಂಗಾಳ – 725
ಜಮ್ಮು ಮತ್ತು ಕಾಶ್ಮೀರ – 566
ಕರ್ನಾಟಕ – 523
ಕೇರಳ – 485
ಬಿಹಾರ – 366
ಪಂಜಾಬ್ – 322
ಹರ್ಯಾಣ – 310
ಒಡಿಸಾ – 118
ಜಾರ್ಖಂಡ್ – 103
ಛಂಢೀಗಡ – 56
ಉತ್ತರಾಖಂಡ – 54
ಹಿಮಾಚಲ ಪ್ರದೇಶ – 40
ಅಸ್ಸಾಂ – 38
ಛತ್ತೀಸಗಡ – 38
ಅಂಡಮಾನ್ ನಿಕೋಬಾರ್ – 33
ಲಡಾಖ್ – 22
ಮೇಘಾಲಯ – 12
ಪುದುಚ್ಚೇರಿ – 08
ಮಿಝೊರಾಂ – 01
