ಸಾಮಾನ್ಯವಾಗಿ ವಿದೇಶ ಪ್ರಯಾಣಕ್ಕೆ ಪಾಸ್ಪೋರ್ಟ್ ಹಾಗೂ ಇಮಿಗ್ರೇಷನ್ ಪ್ರಕ್ರಿಯೆಗಳು ಕಡ್ಡಾಯ. ವಿಮಾನ ನಿಲ್ದಾಣದಲ್ಲಿ ಗಂಟೆಗಳ ಕಾಲ ಸಾಲಿನಲ್ಲಿ ನಿಂತು ದಾಖಲೆ ಪರಿಶೀಲನೆಗೊಳಗಾಗುವುದು ಎಲ್ಲರಿಗೂ ಸಾಮಾನ್ಯ ಅನುಭವ. ಆದರೆ ಜಗತ್ತಿನಲ್ಲಿ ಕೇವಲ ಮೂವರು ವ್ಯಕ್ತಿಗಳಿಗೆ ಮಾತ್ರ ಈ ನಿಯಮಗಳು ಅನ್ವಯಿಸುವುದಿಲ್ಲ ಎಂಬುದು ಅಚ್ಚರಿಯ ಸಂಗತಿ.
ಜಗತ್ತಿನ 200ಕ್ಕೂ ಹೆಚ್ಚು ದೇಶಗಳಲ್ಲಿ ಪಾಸ್ಪೋರ್ಟ್ ಇಲ್ಲದೇ ಸಂಚರಿಸಲು ವಿಶೇಷ ಅವಕಾಶ ಹೊಂದಿರುವವರು ಬ್ರಿಟನ್ನ ರಾಜ ಮೂರನೇ ಚಾರ್ಲ್ಸ್ (King Charles III), ಜಪಾನ್ನ ಚಕ್ರವರ್ತಿ ನರುಹಿಟೊ (Naruhito) ಹಾಗೂ ಅವರ ಪತ್ನಿ ಮಸಕೊ(Masako Owada) ಮಾತ್ರ. ಇವರಿಗೆ ಯಾವುದೇ ಪಾಸ್ಪೋರ್ಟ್ ತೋರಿಸುವ ಅಗತ್ಯವಿಲ್ಲದೆ, ಅತ್ಯುನ್ನತ ರಾಜತಾಂತ್ರಿಕ ಗೌರವದೊಂದಿಗೆ ಸ್ವಾಗತ ಲಭ್ಯವಾಗುತ್ತದೆ.
ಬ್ರಿಟನ್ನಲ್ಲಿ ಪಾಸ್ಪೋರ್ಟ್ಗಳು ರಾಜನ ಹೆಸರಿನಲ್ಲಿ ಜಾರಿಯಾಗುವ ಹಿನ್ನೆಲೆಯಲ್ಲಿ, ಮೂರನೇ ಚಾಲ್ಸ್ಸ್ ಸ್ವತಃ ತಮ್ಮ ಹೆಸರಿನಲ್ಲಿ ಪಾಸ್ಪೋರ್ಟ್ ಹೊಂದುವುದಿಲ್ಲ. ಇದೇ ಕಾರಣದಿಂದ ಅವರಿಗೆ ಡ್ರೈವಿಂಗ್ ಲೈಸೆನ್ಸ್ ಕೂಡ ಕಡ್ಡಾಯವಲ್ಲ.ಕಾನೂನಾತ್ಮಕವಾಗಿ ಅವರ ಸ್ಥಾನಮಾನ ವಿಭಿನ್ನವಾಗಿರುವುದರಿಂದ ಇಂತಹ ವಿನಾಯಿತಿಗಳು ನೀಡಲಾಗಿದೆ.
ಇನ್ನು ಜಪಾನ್ ಸಂವಿಧಾನದ ಪ್ರಕಾರ, ನರುಹಿಟೊ ಅವರನ್ನು ಕೇವಲ ವ್ಯಕ್ತಿಯಷ್ಟೇ ಅಲ್ಲದೆ, ದೇಶದ ಏಕತೆ ಮತ್ತು ಅಸ್ತಿತ್ವದ ಸಂಕೇತವಾಗಿ ಪರಿಗಣಿಸಲಾಗುತ್ತದೆ. ಈ ಕಾರಣದಿಂದ ಅವರಿಗೂ ಹಾಗೂ ಸಾಮ್ರಾಜ್ಞಿ ಮಸಕೊ ಅವರಿಗೆ ಪಾಸ್ಪೋರ್ಟ್ ಅಗತ್ಯವಿಲ್ಲ. ವಿದೇಶ ಪ್ರವಾಸಕ್ಕೂ ಮುನ್ನ ಜಪಾನ್ ಸರ್ಕಾರದಿಂದ ಸಂಬಂಧಿತ ದೇಶಕ್ಕೆ ಅಧಿಕೃತ ಮಾಹಿತಿ ನೀಡಿದರೆ ಸಾಕು. ವಿಶ್ವದ ಪ್ರಮುಖ ರಾಷ್ಟ್ರಗಳ ರಾಷ್ಟ್ರಪತಿಗಳು ಅಥವಾ ಪ್ರಧಾನ ಮಂತ್ರಿಗಳಿಗೂ ಈ ರೀತಿಯ ಸೌಲಭ್ಯ ಇಲ್ಲ. ಅವರು ವಿದೇಶ ಪ್ರವಾಸಕ್ಕೆ ‘ಡಿಪ್ಲೊಮ್ಯಾಟಿಕ್ ಪಾಸ್ಪೋರ್ಟ್’ ಹೊಂದಿರಲೇಬೇಕು.
ಒಟ್ಟಾರೆ, ಜಗತ್ತಿನ ಅತ್ಯಂತ ಅಪರೂಪದ ಮತ್ತು ವಿಶಿಷ್ಟ ಸೌಲಭ್ಯವನ್ನು ಈ ಮೂವರು ಮಾತ್ರ ಹೊಂದಿದ್ದು, ಅವರ ಸ್ಥಾನಮಾನಕ್ಕೆ ಹೊಂದಿಕೊಂಡ ಗೌರವ ಹಾಗೂ ನಿಯಮಗಳಲ್ಲಿ ವಿಶೇಷ ವಿನಾಯಿತಿ ನೀಡಲಾಗಿದೆ.
