ಕಿಚ್ಚ ಸುದೀಪ್ ಅಭಿನಯದ ವಿಕ್ರಾಂತ್ ರೋಣ ಚಿತ್ರ ಮಿಶ್ರ ಪ್ರತಿಕ್ರಿಯೆ ನಡುವೆಯೂ ಮೊದಲ ದಿನ ಉತ್ತಮ ಆರಂಭ ಪಡೆದಿದ್ದು, ಮೊದಲ ದಿನದ ಗಳಿಕೆಯಲ್ಲಿ ಹಿಂದಿಯಲ್ಲಿ ವಿಕ್ರಂ, ಬೀಸ್ಟ್ ದಾಖಲೆಗಳನ್ನು ಮುರಿದಿದೆ.
ವಿಕ್ರಾಂತ್ ರೋಣ ಚಿತ್ರ ಹಿಂದಿಯಲ್ಲಿ ಮೊದಲ ದಿನವೇ 1 ಕೋಟಿ ರೂ. ಆದಾಯ ಗಳಿಸಿದೆ. ಅದರಲ್ಲೂ ಏಕ್ ವಿಲನ್ ರಿಟರ್ನ್ಸ್ ಪೈಪೋಟಿಯ ನಡುವೆಯೂ ಈ ಸಾಧನೆ ಮಾಡಿದೆ. ಆದರೆ ಕಮಲ್ ಹಾಸನ್ ನಟಿಸಿದ ವಿಕ್ರಂ, ವಿಜಯ್ ನಟಿಸಿದ್ದ ಬೀಸ್ಟ್ ಮತ್ತು ರಕ್ಷಿತ್ ಶೆಟ್ಟಿ ಅಭಿನಯದ 777 ಚಾರ್ಲಿ ಚಿತ್ರಗಳು ಮೊದಲ ದಿನ 50 ಲಕ್ಷ ಗಡಿ ದಾಟಲು ವಿಫಲವಾಗಿದ್ದವು.
ಸಿನಿಮಾ ಪಂಡಿತರ ಪ್ರಕಾರ ವಿಕ್ರಾಂತ್ ರೋಣ ಮೊದಲ ದಿನ 40ರಿಂದ 45 ಕೋಟಿ ರೂ. ಆದಾಯ ಗಳಿಸಲಿದೆ ಎಂದು ನಿರೀಕ್ಷಿಸಲಾಗಿತ್ತು. ಆದರೆ ಕರ್ನಾಟಕ ಹೊರತುಪಡಿಸಿ ಉಳಿದೆಡೆ ನಿರೀಕ್ಷಿತ ಆರಂಭ ದೊರೆಯದ ಕಾರಣ ನಿರೀಕ್ಷೆ ಮುಟ್ಟುವುದು ಅಸಾಧ್ಯ ಎಂದು ಹೇಳಲಾಗುತ್ತಿದೆ.
ಕರ್ನಾಟಕದಲ್ಲಿ ಈ ಚಿತ್ರ ಉತ್ತಮ ಆರಂಭ ಪಡೆದಿದೆ. ಕರ್ನಾಟಕದಲ್ಲಿ ಮೊದಲ ದಿನ 16ರಿಂದ 17 ಕೋಟಿ ಗಳಿಸಿದೆ ಎನ್ನಲಾಗಿದ್ದು, ಇದೇ ರೀತಿ ವೀಕೆಂಡ್ ನ ಮೂರು ದಿನಗಳು ಪ್ರತಿಕ್ರಿಯೆ ಬಂದರೆ ಚಿತ್ರಕ್ಕೆ ಹಾಕಿದ ಬಂಡವಾಳ ವಾಪಸ್ ಬರುವುದು ಖಚಿತ. ಆದರೆ ಚಿತ್ರಕ್ಕೆ ಮಿಶ್ರ ಪ್ರತಿಕ್ರಿಯೆ ಬಂದಿರುವುದು ಆದಾಯಕ್ಕೆ ಕತ್ತರಿ ಬೀಳುವ ಸಾಧ್ಯತೆ ಇದೆ ಎನ್ನಲಾಗಿದೆ.
ಆರ್ ಆರ್ ಆರ್, ಕೆಜಿಎಫ್ ಮತ್ತು ಪುಷ್ಪ ನಂತರ ವಿಕ್ರಾಂತ್ ರೋಣ ದೊಡ್ಡ ಸದ್ದು ಮಾಡುತ್ತದೆ ಎಂದು ನಿರೀಕ್ಷಿಸಲಾಗಿತ್ತು. ಮುಂದಿನ ದಿನಗಳ ಗಳಿಕೆ ಮೇಲೆ ಚಿತ್ರದ ಯಶಸ್ಸು ಅವಲಂಬಿಸಿದೆ.
