ಉನ್ನತ ಶಿಕ್ಷಣ ಪಡೆದಿರುವ ಭಾರತೀಯರಲ್ಲಿ ನಿರುದ್ಯೋಗ ದರಗಳು ಹೆಚ್ಚುತ್ತಲೇ ಇವೆ ಎಂದು ಕೋಟಾಕ್ ಸಾಂಸ್ಥಿಕ ಇಕ್ವಿಟೀಸ್‌ನ ಇತ್ತೀಚಿನ ವರದಿಯು ಬಹಿರಂಗಪಡಿಸಿದೆ. ಪದವಿ ಅಥವಾ ಡಿಪ್ಲೊಮಾ ಪದವಿ ಪಡೆದ ವ್ಯಕ್ತಿಗಳಲ್ಲಿ ನಿರುದ್ಯೋಗ ದರಗಳು ಹೆಚ್ಚಳವಾಗುತ್ತಲೇ ಇದೆ ಎಂದು ವರದಿ ಹೇಳಿದೆ.
ಕಳೆದ ಐದು ವರ್ಷಗಳಲ್ಲಿ ಕೆಲವು ಪ್ರಗತಿ ಕಂಡರೂ, ಡಿಪ್ಲೊಮಾ ಹಾಗೂ ಪದವಿ ಪಡೆದ ವ್ಯಕ್ತಿಗಳಲ್ಲಿ ನಿರುದ್ಯೋಗ ದರ ಹೆಚ್ಚುತ್ತಲೇ ಇವೆ. ಉದ್ಯೋಗಾವಕಾಶಗಳು ಮತ್ತು ಉದ್ಯೋಗಗಳನ್ನು ಹುಡುಕುವವರ ನಡುವೆ ಗಮನಾರ್ಹ ಅಂತರವಿದೆ, ಇದು ಸುಧಾರಿಸಲು ತುಂಬಾ ಸಮಯ ತೆಗೆದುಕೊಳ್ಳಬಹುದು ಎಂದು ಕೋಟಾಕ್ ಇನ್‌ಸ್ಟಿಟ್ಯೂಶನಲ್ ಇಕ್ವಿಟೀಸ್‌ ನಡೆಸಿದ ಸಮೀಕ್ಷೆಯ ವರದಿಯಲ್ಲಿ ತಿಳಿಸಿದೆ.
ಜೂನ್ 2023 ರ ಹೊತ್ತಿಗೆ, ಡಿಪ್ಲೊಮಾ ಪದವಿ ಪಡೆದವರಲ್ಲಿ ನಿರುದ್ಯೋಗ ದರವು ಶೇಕಡಾ 12.1 ರಷ್ಟಿದ್ದರೆ, ಪದವೀಧರರು ಶೇಕಡಾ 13.4 ಮತ್ತು ಸ್ನಾತಕೋತ್ತರ ಪದವೀಧರರ ನಿರುದ್ಯೋಗ ದರವು ಶೇಕಡಾ 12.1 ರಷ್ಟಿದೆ ಎಂದು ವರದಿ ತಿಳಿಸಿದೆ ಎಂದು ಮನಿ ಕಂಟ್ರೋಲ್‌ ವೆಬ್ ನಲ್ಲಿ ವರದಿಯಾಗಿದೆ.
2018 ರಿಂದ 2023ರವರೆಗೆ ನಿರುದ್ಯೋಗ ದರವು ತೀವ್ರವಾಗಿ ಕುಸಿದಿದೆ ಎಂದು ವಾರ್ಷಿಕ ಕಾರ್ಮಿಕರ ಪಡೆ ಸಮೀಕ್ಷೆಯು ವರದಿ ಮಾಡಿದೆ. ಆದಾಗ್ಯೂ, ಸೃಷ್ಟಿಯಾದ ಹೊಸ ಉದ್ಯೋಗಗಳಲ್ಲಿ ಹೆಚ್ಚಿನವು ಸ್ವಯಂ ಉದ್ಯೋಗಿಗಳಿಗೆ ಮಾತ್ರ. ಸಂಬಳ ಪಡೆಯುವ ಉದ್ಯೋಗಿಗಳ ಸಂಖ್ಯೆಯಲ್ಲಿಯೂ ಗಮನಾರ್ಹ ಕುಸಿತ ಕಂಡುಬಂದದೆ. ಅಂದರೆ ಕೆಲಸದ ಗುಣಮಟ್ಟವು ಗಣನೀಯವಾಗಿ ಸುಧಾರಿಸಲು ವಿಫಲವಾಗಿದೆ.
ದೇಶದಲ್ಲಿ ಸ್ವಯಂ ಉದ್ಯೋಗಿಗಳು 510 ಬೇಸಿಸ್ ಪಾಯಿಂಟ್ ಹೆಚ್ಚಳವನ್ನು ಪ್ರದರ್ಶಿಸಿದ್ದಾರೆ ಮತ್ತು ಸಾಂಕ್ರಾಮಿಕ ಸಮಯದಲ್ಲಿ ಗೃಹ ಸಹಾಯಕರು 470 ಬೇಸಿಸ್ ಪಾಯಿಂಟ್ಗಳಷ್ಟು ಹೆಚ್ಚಳವಾಗಿರುವುದು ಈ ಬೆಳವಣಿಗೆಗೆ ಕಾರಣವಾಗಿದೆ ಎಂದು ಸಮೀಕ್ಷೆ ಬಹಿರಂಗಪಡಿಸಿದೆ.
ಕಳೆದ ಐದು ವರ್ಷಗಳಲ್ಲಿ ಕೃಷಿ, ವ್ಯಾಪಾರ ಮತ್ತು ಸಾರಿಗೆ ಕ್ಷೇತ್ರಗಳು ಸ್ವಯಂ ಉದ್ಯೋಗಿಗಳಲ್ಲಿ ಪ್ರಮುಖ ಹೆಚ್ಚಳವನ್ನು ತೋರಿಸಿವೆ ಎಂದು ಕೋಟಕ್ ಬ್ರೋಕರೇಜ್ ಗಮನಿಸಿದೆ. ಗ್ರಾಮೀಣ ಮಹಿಳೆಯರು ಭಾಗವಹಿಸುವಿಕೆ ಮತ್ತು ಉದ್ಯೋಗದಲ್ಲಿ ಹೆಚ್ಚಳ ಕಾಣಸಿಗುತ್ತದೆ.
ಆದಾಗ್ಯೂ, ನೈಜ ವೇತನದ ಬೆಳವಣಿಗೆಯು ವಿವಿಧ ವಿಭಾಗಗಳಲ್ಲಿ ಅಸಮಂಜಸವಾಗಿದ್ದು, ಇದು ಬಳಕೆಯ ಮೇಲೆ ನಕಾರಾತ್ಮಕ ಪರಿಣಾಮ ಬೀರಿದೆ. ಸಂಬಳ ಪಡೆಯುವ ಕಾರ್ಮಿಕರಿಗೆ ವಾರ್ಷಿಕ ವೇತನವು 3.4 ಶೇಕಡಾ CAGR ನಲ್ಲಿ ಹೆಚ್ಚಾಗಿದ್ದರೆ, ಸ್ವಯಂ ಉದ್ಯೋಗಿ ವ್ಯಕ್ತಿಗಳು 2018 ರಿಂದ 2023 ರವರೆಗೆ ಒಟ್ಟು ಗಳಿಕೆಯಲ್ಲಿ 1.8 ಶೇಕಡಾ CAGR ಹೆಚ್ಚಳವನ್ನು ಕಂಡಿದ್ದಾರೆ ಎಂದು ವರದಿಯಾಗಿದೆ.
