(ಮೂಲ : ಬಿ . ಶಿವರಾಮನ್ ಅವರ Behind Trumpʼs New Aggressiveness ; Jan Chowk Magazine 19-02-2025 )
ಕನ್ನಡಕ್ಕೆ : ನಾ ದಿವಾಕರ
ಭಾಗ 2
ಬೈಡನ್ ನೀತಿಗಳ ಹಿನ್ನೆಲೆಯಲ್ಲಿ ಟ್ರಂಪ್ 2.0
ಬಿಡೆನ್ ಅವರ ನೇತೃತ್ವದಲ್ಲಿ ಫೆಡರಲ್ ಸರ್ಕಾರದ ಮೂಲಕ ಅಮೆರಿಕ ಸರ್ಕಾರವು ವೈಜ್ಞಾನಿಕ ಸಂಶೋಧನೆ ಮತ್ತು ತಂತ್ರಜ್ಞಾನ ಅಭಿವೃದ್ಧಿಗಾಗಿ 150 ಬಿಲಿಯನ್ ಡಾಲರ್ ಮೊತ್ತದ ಬೆಂಬಲವನ್ನು ವಿಸ್ತರಿಸಿತ್ತು. ಜನವರಿ 20, 2025 ರಂದು ಎರಡನೇ ಬಾರಿಗೆ ಅಮೆರಿಕದ ಅಧ್ಯಕ್ಷರಾಗಿ ಅಧಿಕಾರ ವಹಿಸಿಕೊಂಡ ನಿಖರವಾಗಿ ಒಂದು ವಾರದ ನಂತರ, ಜನವರಿ 28, 2025 ರಂದು, ಟ್ರಂಪ್ ಕೈಗಾರಿಕಾ ವಲಯಗಳು ಮತ್ತು ವೈಜ್ಞಾನಿಕ ಸಂಶೋಧನೆಗಳಿಗೆ ತಾಂತ್ರಿಕ ಬೆಂಬಲಕ್ಕೆ ಸಂಬಂಧಿಸಿದ ಎಲ್ಲಾ ಫೆಡರಲ್ ಅನುದಾನಗಳು ಮತ್ತು ಸಾಲಗಳ ಮೇಲೆ ಸ್ಥಗಿತವನ್ನು ಘೋಷಿಸಿದರು. ಆದಾಗ್ಯೂ, ಬಂಡವಾಳಶಾಹಿಗೆ ತಡೆಗೋಡೆಗಳಾಗಿ ಕಾರ್ಯನಿರ್ವಹಿಸುತ್ತಾ, ಅಮೆರಿಕದ ಫೆಡರಲ್ ನ್ಯಾಯಾಧೀಶರು ಈ ಹಣವನ್ನು ಸ್ಥಗಿತಗೊಳಿಸುವ ಟ್ರಂಪ್ ಅವರ ನಿರ್ದೇಶನವನ್ನು ತಾತ್ಕಾಲಿಕವಾಗಿ ತಡೆಹಿಡಿದರು. ಈ ಪ್ರಕರಣದಲ್ಲಿ ಅಂತಿಮ ಫಲಿತಾಂಶ ಏನಾಗುತ್ತದೆ ಎನ್ನುವುದನ್ನು ಸುಲಭವಾಗಿ ಊಹಿಸಬಹುದು.
ಆದರೆ, ಇದಕ್ಕೂ ಮೊದಲು ಜನವರಿ 21, 2025 ರಂದು, ಟ್ರಂಪ್ ಅಮೆರಿಕದಲ್ಲಿ AI ಮೂಲಸೌಕರ್ಯ ಅಭಿವೃದ್ಧಿಗಾಗಿ 500 ಬಿಲಿಯನ್ ಡಾಲರ್ ಸ್ಟಾರ್ಗೇಟ್ ಯೋಜನೆಯನ್ನು ಘೋಷಿಸಿದರು. ಈ 500 ಬಿಲಿಯನ್ ಡಾಲರ್ ಮುಕ್ತ ಎಐ (Open AI) ಒರಾಕಲ್ ಮತ್ತು ಸಾಫ್ಟ್ಬ್ಯಾಂಕ್ನಿಂದ ಖಾಸಗಿ ಹೂಡಿಕೆಯಾಗಿ ಬರುತ್ತದೆ ಎಂದು ಘೋಷಿಸಲಾಗಿದ್ದರೂ, ಟ್ರಂಪ್ ಸರ್ಕಾರ ಅದನ್ನು ಏಕೆ ಘೋಷಿಸಿತು ಎಂಬ ಪ್ರಶ್ನೆ ಉದ್ಭವಿಸುತ್ತದೆ. ಈ ಘೋಷಣೆಯಲ್ಲಿ ಸೂಚ್ಯವಾಗಿ ಕಾಣುವುದೇನೆಂದರೆ, ಚೀನಾದಿಂದ ಮಾತ್ರವಲ್ಲದೆ ಯುರೋಪ್ನಿಂದ ಕೂಡ AI ಕ್ಷೇತ್ರದಲ್ಲಿ ಹೆಚ್ಚುತ್ತಿರುವ ಸ್ಪರ್ಧೆಯನ್ನು ನಿಭಾಯಿಸಲು ಟ್ರಂಪ್ ಸರ್ಕಾರವು ಅಮೆರಿಕದಲ್ಲಿ AI ಮೂಲಸೌಕರ್ಯವನ್ನು ಅಭಿವೃದ್ಧಿಪಡಿಸಲು ತನ್ನದೇ ಆದ ಹಣಕಾಸಿನ ಕೊಡುಗೆಯನ್ನು ನೀಡುವ ಸಾಧ್ಯತೆಯಿದೆ.
ಪ್ಯಾರಿಸ್ AI ಶೃಂಗಸಭೆಯಲ್ಲಿ ಫ್ರಾನ್ಸ್ , ಉದಯೋನ್ಮುಖ AI ಶಕ್ತಿಯಾಗಿರುವ ಭಾರತದೊಂದಿಗೆ ಕೈಜೋಡಿಸಿತು. ವಿಶ್ವದ ಅತ್ಯಂತ ಶ್ರೀಮಂತ ವ್ಯಕ್ತಿ ಹಾಗೂ ಟ್ರಂಪ್ ಅವರ ಆಪ್ತ ಉದ್ಯಮಿಯೂ ಆಗಿರುವ ಎಲೋನ್ ಮಸ್ಕ್ ಮತ್ತು ಅವರ ಪ್ರತಿಸ್ಪರ್ಧಿ ಹಾಗೂ ಟ್ರಂಪ್ ಅವರ ಆಂತರಿಕ ಸಲಹೆಗಾರರ ವಲಯಕ್ಕೆ ಯಶಸ್ವಿಯಾಗಿ ಪ್ರವೇಶ ಪಡೆದ ಹೊಸ AI ಟೆಕ್ ಮೊಘಲ್ ಸ್ಯಾಮ್ ಆಲ್ಟ್ಮನ್, ಅಮೆರಿಕದಲ್ಲಿ AI ಮೂಲಸೌಕರ್ಯವನ್ನು ಉತ್ತೇಜಿಸಲು ಟ್ರಂಪ್ ಅವರ ಪ್ರಭುತ್ವದ ಬೆಂಬಲದ ನಿರ್ಧಾರದ ಮೇಲೆ ಪ್ರಭಾವ ಬೀರಿದ್ದಾರೆ ಎಂದು ವರದಿಯಾಗಿದೆ. ವಿಶೇಷವಾಗಿ ಡೀಪ್ಸೀಕ್ನಂತಹ ಸಣ್ಣ ಚೀನೀ ಸ್ಟಾರ್ಟ್ಅಪ್ ಮೈಕ್ರೋಸಾಫ್ಟ್, Open AI , ಎನ್ವಿಡಿಯಾ ಮತ್ತು ಒರಾಕಲ್ನಂತಹ ಅಮೇರಿಕನ್ AI ಟೆಕ್ ದೈತ್ಯರನ್ನು ಅಮೆರಿಕದ ಪ್ರಮುಖ ಕಂಪನಿಗಳು ಖರ್ಚು ಮಾಡಿದ ವೆಚ್ಚದ ಒಂದು ಅಲ್ಪ ಭಾಗದಲ್ಲಿ ಅಭಿವೃದ್ಧಿಪಡಿಸಿದ ತನ್ನ ನವೀನ AI ಕಾರ್ಯಕ್ರಮದೊಂದಿಗೆ ರೂಪಿಸಲಾಗಿದೆ. ತಂತ್ರಜ್ಞಾನ ನಾವೀನ್ಯತೆಯನ್ನು ಬೆಂಬಲಿಸುವುದರ ಜೊತೆಗೆ, ಅಮೇರಿಕ ಸರ್ಕಾರವು ವ್ಯಾಪಾರ ಒಪ್ಪಂದಗಳ ಮೂಲಕ ತನ್ನ ಸ್ಪರ್ಧಾತ್ಮಕತೆಯನ್ನು ಉಳಿಸಿಕೊಳ್ಳಲು ಪ್ರಯತ್ನಿಸುತ್ತಿದೆ. ಈ ವ್ಯಾಪಾರ ಒಪ್ಪಂದಗಳನ್ನು ನಾವು ಪರಿಶೀಲಿಸಬೇಕಿದೆ.
ಅಮೆರಿಕದ ವ್ಯಾಪಾರ ಒಪ್ಪಂದಗಳು
ಅಮೆರಿಕವು ತನ್ನ ವ್ಯಾಪಾರ ಒಪ್ಪಂದಗಳಲ್ಲಿ ಮಿಶ್ರ ದಾಖಲೆಯನ್ನು ಹೊಂದಿದೆ ಮತ್ತು ಅಮೆರಿಕಾದ ಆರ್ಥಿಕತೆಯ ಮೇಲೆ ಅವುಗಳ ಪರಿಣಾಮಕಾರಿ ಕೊಡುಗೆಯನ್ನು ಗಮನಿಸಲೇಬೇಕಿದೆ. ಅಮೆರಿಕವು ಬಹುಪಕ್ಷೀಯ ವ್ಯಾಪಾರ ಒಪ್ಪಂದವಾದ ವಿಶ್ವ ವಾಣಿಜ್ಯ ಒಪ್ಪಂದದ (WTO) ಭಾಗವಾಗಿದೆ. ಇದರೊಂದಿಗೆ 2020 ರಲ್ಲಿ ವಿವಾದಾತ್ಮಕ NAFTAದ (ಉತ್ತರ ಅಟ್ಲಾಂಟಿಕ್ ಮುಕ್ತ ವ್ಯಾಪಾರ ಒಪ್ಪಂದ) ರೂಪಾಂತರವಾದ ಯುನೈಟೆಡ್ ಸ್ಟೇಟ್ಸ್-ಮೆಕ್ಸಿಕೋ-ಕೆನಡಾ ಒಪ್ಪಂದದ (USMCA) ಭಾಗವಾಗಿದೆ. ಸುಂಕದ ಸಮರ ಇಲ್ಲದೆಯೂ USMCA ಅಮೆರಿಕದಲ್ಲಿ ಉದ್ಯೋಗಗಳನ್ನು ಹೆಚ್ಚಿಸಲು ಕೊಡುಗೆ ನೀಡಿತ್ತು. ಆದರೆ ಇತರ ಶಕ್ತಿಗಳೊಂದಿಗೆ ವ್ಯಾಪಾರ ಒಪ್ಪಂದಕ್ಕಾಗಿ ಅಮೆರಿಕ ತನ್ನ ಪ್ರಯತ್ನಗಳಲ್ಲಿ ಇದೇ ರೀತಿಯ ಯಶಸ್ಸನ್ನು ಸಾಧಿಸಲು ಸಾಧ್ಯವಾಗಲಿಲ್ಲ. US-ಜಪಾನ್ ವ್ಯಾಪಾರ ಒಪ್ಪಂದ (USJTA) ಅಧಿಕೃತವಾಗಿ ಜನವರಿ 1, 2020 ರಂದು ಜಾರಿಗೆ ಬಂದಿತು. ಆದರೆ ಜಪಾನ್ನೊಂದಿಗೆ ಅಮೆರಿಕದ ಮೂರು ದಶಕಗಳ ತೀವ್ರ ವ್ಯಾಪಾರ ಪೈಪೋಟಿಯ ನಂತರ, ವಿಶೇಷವಾಗಿ ಜಪಾನಿನ ಹೆಚ್ಚು ಸ್ಪರ್ಧಾತ್ಮಕ ಆಟೋಮೊಬೈಲ್ಗಳು ಮತ್ತು ಗ್ರಾಹಕ ಎಲೆಕ್ಟ್ರಾನಿಕ್ಸ್ಗಳೊಂದಿಗೆ ಅಮೆರಿಕದ ಮಾರುಕಟ್ಟೆಗಳನ್ನು ಆಕ್ರಮಿಸಿದ ನಂತರದಲ್ಲಿ ಸಂಭವಿಸಿದ ಒಂದು ಬೆಳವಣಿಗೆ ಇದಾಗಿತ್ತು.
ಐರೋಪ್ಯ ಒಕ್ಕೂಟದೊಂದಿಗೆ ಅಮೆರಿಕ 2013 ರಲ್ಲಿ ಟ್ರಾನ್ಸ್ಅಟ್ಲಾಂಟಿಕ್ ವ್ಯಾಪಾರ ಮತ್ತು ಹೂಡಿಕೆ ಪಾಲುದಾರಿಕೆ (TTIP) ಎಂಬ ವ್ಯಾಪಾರ ಒಪ್ಪಂದಕ್ಕಾಗಿ ಮಾತುಕತೆಗಳನ್ನು ನಡೆಸಿತು ಆದರೆ 2016 ರಲ್ಲಿ ಮಾತುಕತೆಗಳನ್ನು ರದ್ದುಗೊಳಿಸಲಾಯಿತು ಮತ್ತು ಈ ಕ್ರಮವು ಯಶಸ್ವಿಯಾಗಲಿಲ್ಲ. ವಿಪರ್ಯಾಸವೆಂದರೆ, ಮುಕ್ತ ಮಾರುಕಟ್ಟೆ ಬಂಡವಾಳಶಾಹಿ ಎಂದು ಹೇಳಲಾಗುವ ಎರಡು ಪ್ರಮುಖ ಕೇಂದ್ರಗಳು ತಮ್ಮ ನಡುವೆ ವ್ಯಾಪಾರದ ಬಗ್ಗೆ ಒಮ್ಮತಕ್ಕೆ ಬರಲು ಸಾಧ್ಯವಾಗಲಿಲ್ಲ. ಅಮೆರಿಕವು ಟ್ರಾನ್ಸ್-ಪೆಸಿಫಿಕ್ ಪಾರ್ಟ್ನರ್ಶಿಪ್ (TPP) ನ ಸದಸ್ಯ ರಾಷ್ಟ್ರವಾಗಿದ್ದು, ಇದು ಅಮೆರಿಕ ಮತ್ತು ಕೆನಡಾ, ಮೆಕ್ಸಿಕೊ ಮತ್ತು ಪೆರು ಮತ್ತು ದೂರದ ಪೂರ್ವದಲ್ಲಿ ಜಪಾನ್, ಆಸ್ಟ್ರೇಲಿಯಾ, ನ್ಯೂಜಿಲೆಂಡ್, ಸಿಂಗಾಪುರ್, ಮಲೇಷ್ಯಾ ಮತ್ತು ವಿಯೆಟ್ನಾಂ ನಡುವಿನ ವ್ಯಾಪಾರ ವ್ಯವಸ್ಥೆಯಾಗಿದೆ. ಇದರ ಚರಿತ್ರೆಯೇ ಹಲವು ಗೊಂದಲಗಳಿಂದ ಕೂಡಿದ್ದು 2017 ರಲ್ಲಿ ಅಮೆರಿಕ ಈ ಒಪ್ಪಂದದಿಂದ ಹಿಂದೆ ಸರಿದಿದೆ.
ಅಮೆರಿಕದ ವ್ಯಾಪಾರ ಕೊರತೆಗಳು
2024 ರಲ್ಲಿ ಚೀನಾ ಅಮೆರಿಕಕ್ಕೆ ಸರಕುಗಳ ಅತಿದೊಡ್ಡ ಪೂರೈಕೆದಾರನಾಗಿದ್ದು, ಆಮದುಗಳ ಮೌಲ್ಯ ಸುಮಾರು 501.22 ಬಿಲಿಯನ್ ಡಾಲರ್ಗಳಷ್ಟಾಗಿವೆ. ಇದು 2022 ರಲ್ಲಿ ಅಮೆರಿಕಕ್ಕೆ ಚೀನಾದಿಂದ ರಫ್ತು ಮಾಡಲಾದ 536.3 ಬಿಲಿಯನ್ ಡಾಲರ್ಗಿಂತಲೂ ಕಡಿಮೆ ಪ್ರಮಾಣದಲ್ಲಿದೆ. ಇದು ಟ್ರಂಪ್ 2.0 ಗಿಂತ ಮೊದಲೇ ಚೀನಾ ವಿರುದ್ಧ ಅಮೆರಿಕದ ರಕ್ಷಣಾ ನೀತಿ ಪ್ರಾರಂಭವಾಯಿತು ಎನ್ನುವುದನ್ನು ತೋರಿಸುತ್ತದೆ. 2024 ರಲ್ಲಿ ಅಮೆರಿಕದಿಂದ ಚೀನಾದ ಒಟ್ಟು ಆಮದುಗಳು 462.62 ಬಿಲಿಯನ್ ಡಾಲರ್ಗಳಷ್ಟಾಗಿದ್ದು, ಇದು 2023 ರಲ್ಲಿದ್ದ 165.16 ಬಿಲಿಯನ್ ಡಾಲರ್ಗಿಂತಲೂ ಗಮನಾರ್ಹ ಹೆಚ್ಚಳವಾಗಿ ಕಂಡುಬರುತ್ತದೆ. ಇದು ಮುಖ್ಯವಾಗಿ ಅಮೆರಿಕದ ವ್ಯಾಪಾರ ಬೆದರಿಕೆಗಳಿಂದಾಗಿ ಸಂಭವಿಸಿದೆ. 2024 ರಲ್ಲಿ ಚೀನಾದೊಂದಿಗಿನ ಅಮೆರಿಕದ ಸಂಚಿತ ವ್ಯಾಪಾರ ಕೊರತೆ 295.4 ಬಿಲಿಯನ್ ಡಾಲರ್ ಆಗಿತ್ತು.
2024 ರಲ್ಲಿ ಐರೋಪ್ಯ ಒಕ್ಕೂಟವು ಸುಮಾರು 527.49 ಬಿಲಿಯನ್ ಡಾಲರ್ ಮೌಲ್ಯದ ಸರಕುಗಳನ್ನು ಅಮೆರಿಕಾಗೆ ರಫ್ತು ಮಾಡಿ, 372.59 ಬಿಲಿಯನ್ ಡಾಲರ್ ಮೌಲ್ಯದ ಸರಕುಗಳನ್ನು ಆಮದು ಮಾಡಿಕೊಂಡಿತು. ತದನಂತರ ಅಮೆರಿಕದ ವ್ಯಾಪಾರ ಬೆದರಿಕೆಗಳಿಂದಾಗಿ 2023 ರಲ್ಲಿದ್ದ 347 ಬಿಲಿಯನ್ ಡಾಲರ್ಗಿಂತಲೂ ಸಮರ್ಪಕವಾದ ಹೆಚ್ಚಳವಾಗಿರುವುದನ್ನು ಗುರುತಿಸಬೇಕಿದೆ. ಆದರೆ ಐರೋಪ್ಯ ಒಕ್ಕೂಟವು ಒಂದೇ ರಫ್ತು ಘಟಕವಲಯ ಅಲ್ಲ ಬದಲಾಗಿ ಅನೇಕ ದೇಶಗಳನ್ನು ಒಳಗೊಂಡಿದೆ ಎಂಬುದನ್ನು ನೆನಪಿನಲ್ಲಿಡಬೇಕು ಐರೋಪ್ಯ ಒಕ್ಕೂಟದ ವ್ಯಾಪಾರ ಒಪ್ಪಂದವು ಎಲ್ಲಾ ಒಕ್ಕೂಟ ದೇಶಗಳಿಂದಲೂ ಬದ್ಧತೆ ಪಡೆದಿರುತ್ತದೆ. 2024 ರಲ್ಲಿ ವರ್ಷಗಳಲ್ಲಿ ಐರೋಪ್ಯ ಒಕ್ಕೂಟದ ಜೊತೆಗಿನ ಅಮೆರಿಕದ ಸಂಚಿತ ವ್ಯಾಪಾರ ಕೊರತೆ 235.6 ಬಿಲಿಯನ್ ಡಾಲರ್ ಆಗಿತ್ತು. 2024 ರಲ್ಲಿ ಕೆನಡಾ ಸುಮಾರು 439.6 ಬಿಲಿಯನ್ ಡಾಲರ್ ಸರಕು ಮತ್ತು ಸೇವೆಗಳನ್ನು ಅಮೆರಿಕಾಗೆ ರಫ್ತು ಮಾಡಿ ಅಮೆರಿಕದಿಂದ 421.21 ಬಿಲಿಯನ್ ಡಾಲರ್ ಮೌಲ್ಯದ ಸರಕು ಮತ್ತು ಸೇವೆಗಳನ್ನು ಆಮದು ಮಾಡಿಕೊಂಡಿತು. 2024 ರಲ್ಲಿ ಕೆನಡಾದೊಂದಿಗೆ ಅಮೆರಿಕದ ಸಂಚಿತ ವ್ಯಾಪಾರ ಕೊರತೆ 63.3 ಬಿಲಿಯನ್ ಡಾಲರ್ ಆಗಿತ್ತು. ಮೆಕ್ಸಿಕೊ ಅಮೆರಿಕಾಗೆ 436.6 ಬಿಲಿಯನ್ ರಫ್ತು ಮಾಡಿ ಅಲ್ಲಿಂದ 334 ಬಿಲಿಯನ್ ಡಾಲರ್ ಸರಕು ಸೇವೆಗಳನ್ನು ಆಮದು ಮಾಡಿಕೊಂಡಿತ್ತು. 2024 ರಲ್ಲಿ ಮೆಕ್ಸಿಕೊದೊಂದಿಗೆ ಅಮೆರಿಕದ ಸಂಚಿತ ವ್ಯಾಪಾರ ಕೊರತೆ 171.8 ಬಿಲಿಯನ್ ಡಾಲರ್ ಆಗಿತ್ತು.
ಮತ್ತೊಂದು ರೀತಿಯಲ್ಲಿ ಹೇಳುವುದಾದರೆ, ಅಮೆರಿಕ ತನ್ನ ನಾಲ್ಕು ಪ್ರಮುಖ ವ್ಯಾಪಾರ ಪಾಲುದಾರರೊಂದಿಗೆ ಹೊಂದಿರುವ ಒಟ್ಟು ಸಂಚಿತ ವ್ಯಾಪಾರ ಕೊರತೆ 750 ಬಿಲಿಯನ್ ಡಾಲರ್ಗಿಂತ ಹೆಚ್ಚಿತ್ತು. ಇದು ಅಮೆರಿಕದ ಪ್ರಮುಖ ವ್ಯಾಪಾರ ಪಾಲುದಾರರ ವಿರುದ್ಧ ಟ್ರಂಪ್ ಅವರ ಸುಂಕ ಸಮರಗಳನ್ನು ಪ್ರಾರಂಭಿಸುವ ಬೆದರಿಕೆಯ ಕಾರಣಗಳನ್ನು ಸೂಚಿಸುತ್ತದೆ. ಇದು ಟ್ರಂಪ್ ಅವರ ಹೊಸ ಆಕ್ರಮಣಶೀಲತೆಯ ಆರ್ಥಿಕ ಆಧಾರವಾಗಿದೆ. ಇದು ವಿಚಾರದ ಒಂದು ಆಯಾಮ ಮಾತ್ರ. ಟ್ರಂಪ್ ಅವರ ವ್ಯಾಪಾರ ಆಕ್ರಮಣವು ಪ್ರತಿದಾಳಿಯನ್ನು ಸಹ ಪ್ರಚೋದಿಸುತ್ತದೆ ಎನ್ನುವುದನ್ನೂ ಗಮನಿಸಬೇಕಿದೆ.
ಚೀನಾ ಮಾತ್ರವಲ್ಲದೆ ಕೆನಡಾ, ಮೆಕ್ಸಿಕೊ ಮತ್ತು ಐರೋಪ್ಯ ಒಕ್ಕೂಟವೂ ಸಹ ಈಗಾಗಲೇ ಪ್ರತಿ-ಸುಂಕಗಳನ್ನು ಹೆಚ್ಚಿಸುವ ಮೂಲಕ ಪ್ರತೀಕಾರ ತೀರಿಸಿಕೊಂಡಿವೆ. ಇದು ಅಂತರರಾಷ್ಟ್ರೀಯ ವ್ಯಾಪಾರವು ಸರ್ವತೋಮುಖ ಜಾಗತಿಕ ವ್ಯಾಪಾರ ಯುದ್ಧದ ಹೊಸ ಹಂತಕ್ಕೆ ಹೋಗುವ ಬೆದರಿಕೆಯನ್ನು ಹುಟ್ಟುಹಾಕುತ್ತದೆ. ಸಹಜವಾಗಿ, ಮುಕ್ತ ವ್ಯಾಪಾರವು ಎಂದಿಗೂ ಬಂಡವಾಳಶಾಹಿಯ ದೀರ್ಘಕಾಲೀನ ನೀತಿಯಲ್ಲ. ಒಂದು ದೇಶದ ರಫ್ತುಗಳು ಮೇಲುಗೈ ಸಾಧಿಸಿದಾಗ ಇದು ಸೂಕ್ತವಾದ ಕಾಲೋಚಿತ ನೀತಿಯಾಗಿದೆ. ಆದಾಗ್ಯೂ, ಈ ಹೊಸ ಹಂತದ ವ್ಯಾಪಾರ ಪೈಪೋಟಿಯು ಎಲ್ಲಾ ಆರ್ಥಿಕತೆಗಳ ಪರಸ್ಪರ ವ್ಯಾಪಾರ ಲಾಭಗಳನ್ನು ದುರ್ಬಲಗೊಳಿಸುವ ಮತ್ತು ಒಟ್ಟಾರೆಯಾಗಿ ವಿಶ್ವ ಆರ್ಥಿಕತೆಯ ಬೆಳವಣಿಗೆಯನ್ನು ಕುಗ್ಗಿಸುವ ಬೆದರಿಕೆಯನ್ನು ಒಡ್ಡುತ್ತದೆ.
ಅಮೆರಿಕದ ಸ್ಪರ್ಧಾತ್ಮಕತೆಯ ಸವಾಲುಗಳು
ಅಮೆರಿಕದ ಸರಕು ಮತ್ತು ಸೇವೆಗಳು ದಕ್ಷಿಣ ಕೊರಿಯಾ, ತೈವಾನ್, ಬ್ರೆಜಿಲ್ ಮತ್ತು ಭಾರತದ ಸರಕು ಮತ್ತು ಸೇವೆಗಳಿಂದ ಹೆಚ್ಚಿನ ಪೈಪೋಟಿಯನ್ನು ಎದುರಿಸುತ್ತಿವೆ. ಈ ದೇಶಗಳು ಹೈಟೆಕ್ ವಲಯಗಳಲ್ಲಿಯೂ ಸಹ ಅಮೆರಿಕದ ಮಾರುಕಟ್ಟೆ ಪಾಲನ್ನು ಕಡಿಮೆ ಮಾಡಲು ಪ್ರಾರಂಭಿಸಿವೆ. ಉಕ್ರೇನ್ ಯುದ್ಧದ ನಂತರದ ಹಣದುಬ್ಬರ ಏರಿಕೆಯು 2022 ರ ಆರಂಭದಲ್ಲಿ ಐರೋಪ್ಯ ಒಕ್ಕೂಟದಲ್ಲಿ ಶೇಕಡಾ 8ಕ್ಕೆ ಹೋಲಿಸಿದರೆ ಅಮೆರಿಕದಲ್ಲಿ ಶೇಕಡಾ 9.1ರಷ್ಟಿತ್ತು ಆದರೆ ನಂತರ ಅಮೆರಿಕದಲ್ಲಿ ಹಣದುಬ್ಬರವು ಶೇಕಡಾ 4.5ಕ್ಕೆ ಇಳಿದಿದೆ ಆದರೆ ಐರೋಪ್ಯ ಒಕ್ಕೂಟದಲ್ಲಿ ಅದು 2024 ರ ಅಂತ್ಯದಲ್ಲಿಯೂ ಸಹ ಶೇಕಡಾ 6.5ರ ಆಸುಪಾಸಿನಲ್ಲಿತ್ತು. ಇದು ಅಮೆರಿಕದ ಸರಕು ಮತ್ತು ಸೇವೆಗಳನ್ನು ವಿದೇಶಗಳಲ್ಲಿ ದುಬಾರಿಯನ್ನಾಗಿ ಮಾಡಿತು.
ಅಮೆರಿಕ ಹಿಂದಿನಂತೆ ಈಗ ಹೈಟೆಕ್ ಕ್ಷೇತ್ರಗಳ ಮೇಲೆ ಏಕಸ್ವಾಮ್ಯವನ್ನು ಹೊಂದಿಲ್ಲ ಮತ್ತು ಚೀನಾದಿಂದ ಮಾತ್ರವಲ್ಲದೆ ಪುನರುಜ್ಜೀವನಗೊಳ್ಳುತ್ತಿರುವ ಜಪಾನ್ ಮತ್ತು ಯುರೋಪ್ ಮತ್ತು ಚೀನಾ ಹೊರತುಪಡಿಸಿ ಬ್ರಿಕ್ಸ್ (BRIC) ದೇಶಗಳ ಕೆಲವು ಸ್ಥಾಪಿತ ಪ್ರದೇಶಗಳಲ್ಲಿ ಹೆಚ್ಚುತ್ತಿರುವ ಸ್ಪರ್ಧೆಯನ್ನು ಎದುರಿಸುತ್ತಿದೆ. ಎಲೆಕ್ಟ್ರಿಕ್ ವಾಹನಗಳು, ಮೈಕ್ರೋಪ್ರೊಸೆಸರ್ಗಳು ಮತ್ತು ನವೀಕರಿಸಬಹುದಾದ ಇಂಧನದಂತಹ ಹೊಸ ಹೈಟೆಕ್ ಕ್ಷೇತ್ರಗಳಲ್ಲಿ, ಚೀನಾ ಮಾತ್ರವಲ್ಲದೆ ತೈವಾನ್ ಮತ್ತು ದಕ್ಷಿಣ ಕೊರಿಯಾದಂತಹ ದೇಶಗಳು ಸಹ ಅಮೆರಿಕಾಗೆ ಸ್ಪರ್ಧೆಯನ್ನು ನೀಡುತ್ತಿವೆ. ಹೆಚ್ಚು ಮುಖ್ಯವಾಗಿ, ಅಮೆರಿಕವು ಸಾಂಪ್ರದಾಯಿಕ ಉತ್ಪಾದನೆಯಲ್ಲಿ ಮಾತ್ರ ವೇತನ ವೆಚ್ಚದ ಪ್ರಯೋಜನವನ್ನು ಹೊಂದಿದೆ ಮತ್ತು ಹೈಟೆಕ್ ಕ್ಷೇತ್ರಗಳಲ್ಲಿ ಅಲ್ಲ. ಈ ವೇತನ ವೆಚ್ಚದ ಪ್ರಯೋಜನದ ಹೊರತಾಗಿಯೂ, ಜಪಾನ್ ಮತ್ತು ಜರ್ಮನಿಯ ಸರಕುಗಳು ಆರೋಗ್ಯ ರಕ್ಷಣೆ ವೆಚ್ಚಗಳು, ಇತರ ಕಾರ್ಮಿಕ ಕಲ್ಯಾಣ ವೆಚ್ಚಗಳು ಮತ್ತು ಹೆಚ್ಚಿನ ಉತ್ಪಾದನಾ ತೆರಿಗೆಗಳಿಂದಾಗಿ ಅಮೆರಿಕದ ಮಾರುಕಟ್ಟೆಗಳಲ್ಲಿ ಹೆಚ್ಚು ಸ್ಪರ್ಧಾತ್ಮಕವಾಗಿವೆ.
ಸುಂಕ ಹೆಚ್ಚಳದ ದೀರ್ಘಕಾಲೀನ ಪರಿಣಾಮ
ಸುಂಕಗಳನ್ನು ಹೆಚ್ಚಿಸುವುದು ಅಥವಾ ಪರಸ್ಪರ ಸುಂಕಗಳನ್ನು ವಿಧಿಸುವುದು ಅಮೆರಿಕದ ಸರಕು ಮತ್ತು ಸೇವೆಗಳಿಗೆ, ವಿಶೇಷವಾಗಿ ರಫ್ತು ಮಾರುಕಟ್ಟೆಗಳಲ್ಲಿ ತಾತ್ಕಾಲಿಕ ರಕ್ಷಣೆಯನ್ನು ಮಾತ್ರ ನೀಡುತ್ತದೆ. ಆದರೆ ಸುಂಕ ಹೆಚ್ಚಳವು ಆಮದು ಮಾಡಿಕೊಂಡ ಉತ್ಪನ್ನಗಳ ಬೆಲೆಗಳನ್ನು ಶೇಕಡಾ 10ರಷ್ಟು ಮತ್ತು ದೇಶೀಯವಾಗಿ ಉತ್ಪಾದಿಸುವ ವಸ್ತುಗಳ ಬೆಲೆಗಳನ್ನು ಶೇಕಡಾ 16ರಷ್ಟು ಹೆಚ್ಚಿಸುತ್ತದೆ ಎಂದು ಅಂದಾಜಿಸಲಾಗಿದೆ. ಅಮೆರಿಕದ ಅರ್ಥಶಾಸ್ತ್ರಜ್ಞರಲ್ಲಿ ಭಿನ್ನವಾದ ಅಭಿಪ್ರಾಯಗಳೂ ವ್ಯಕ್ತವಾಗುತ್ತಿವೆ. ಟ್ರಂಪ್ ಅವರ ಸುಂಕ ಹೆಚ್ಚಳವು ಆರ್ಥಿಕ ಕುಸಿತಕ್ಕೆ ಕಾರಣವಾಗುತ್ತದೆ ಮತ್ತು ಜಿಡಿಪಿಯಲ್ಲಿ ಅಲ್ಪ ಇಳಿಕೆಗೆ ಕಾರಣವಾಗುತ್ತದೆ ಎಂದು ಕೆಲವು ಅರ್ಥಶಾಸ್ತ್ರಜ್ಞರು ವಾದಿಸಿದ್ದಾರೆ. ಸಂರಕ್ಷಿತ ವಲಯಗಳಲ್ಲಿ ರಕ್ಷಿಸಲ್ಪಟ್ಟ ಅಥವಾ ಹೊಸದನ್ನು ಸೃಷ್ಟಿಸಿದ ಉದ್ಯೋಗಗಳಿಗಿಂತ ಹೆಚ್ಚಿನ ಉದ್ಯೋಗಗಳು ಒಟ್ಟಾರೆಯಾಗಿ ಆರ್ಥಿಕತೆಯಲ್ಲಿ ಕಡಿಮೆಯಾಗುತ್ತವೆ ಎಂದೂ ಹೇಳಲಾಗುತ್ತಿದೆ.
.ಹೀಗಾಗಿ ಟ್ರಂಪಿಸಂ ಒಂದು ಕ್ಷಣಿಕ, ಆಂತರಿಕವಾಗಿ ಕಾಣುವ ವಿದ್ಯಮಾನವಾಗಿದ್ದು, ದೀರ್ಘಾವಧಿಯಲ್ಲಿ ಹಿಮ್ಮುಖವಾಗಿ ಚಲಿಸಬಹುದು. ಆದರೆ ಇದು ಕಾರ್ಮಿಕ ವರ್ಗಗಳ ಪ್ರಭುತ್ವ ವಿರೋಧಿ ಭಾವನೆಗಳನ್ನು ಮತ್ತು ಅಮೆರಿಕಾ ಮೊದಲು ಎಂಬ ರೀತಿಯ ಬಲಪಂಥೀಯ ರಾಷ್ಟ್ರೀಯತೆಯನ್ನು ಬಳಸಿಕೊಳ್ಳುವ ಜನಪ್ರಿಯ ಮಾದರಿಯನ್ನು ಆಧರಿಸಿದೆ. ಟ್ರಂಪ್ ಡಾಲರ್ ಅಪನಗದೀಕರಣದ ವಿರುದ್ಧ, ವಿಶೇಷವಾಗಿ ಬ್ರಿಕ್ಸ್ ಶಕ್ತಿಗಳಿಗೆ ದೊಡ್ಡ ಬೆದರಿಕೆಗಳನ್ನು ನೀಡುತ್ತಿದ್ದಾರೆ. ಡಾಲರ್ ಪ್ರಬಲವಾಗಿದೆ. ಆದರೆ ಅಮೆರಿಕದಲ್ಲಿ ಸರ್ಕಾರದ ಸಾಲ ಹೆಚ್ಚುತ್ತಿದೆ. ಹೆಚ್ಚಿನ ಹಣದುಬ್ಬರ ಪುನಃ ಗೋಚರಿಸಿದರೆ, ಮೀಸಲು ಕರೆನ್ಸಿಯಾಗಿ ಡಾಲರ್ ತೀವ್ರತೆರನಾದ ಸವಾಲಿಗೆ ಒಳಗಾಗಬಹುದು. ಮೊದಲ ಪ್ರಮುಖ ತೊಂದರೆಯ ಸೂಚನೆಯಾಗಿ, ಡಾಲರ್ ವಿಚಲಿತವಾಗಲು ಆರಂಭಿಸಿದರೆ, ಅಮೆರಿಕದಿಂದ ಬಂಡವಾಳದ ಪಲಾಯನವೂ ಸಂಭವಿಸಬಹುದು. ಏನೇ ಆದರೂ ಅಮೆರಿಕದ ಆರ್ಥಿಕತೆಗೆ ಈಗ ಪರಿಸ್ಥಿತಿ ಅಷ್ಟು ಹದಗೆಟ್ಟಿರುವಂತೆ ಕಾಣುವುದಿಲ್ಲ ಆದರೆ ಅಪಾಯಗಳು ಹೆಚ್ಚುತ್ತಿರುವುದನ್ನು ಅಲ್ಲಗಳೆಯಲಾಗುವುದಿಲ್ಲ.
ಹಲವರು ಹೇಳುವಂತೆ ದೀರ್ಘಾವಧಿಯಲ್ಲಿ ಟ್ರಂಪಿಸಂ ಕೂಡ ಅವಸಾನ ಹೊಂದಬಹುದು.
