IPL 2026ರ ಋತುವಿನಲ್ಲಿ ಯುವ ಆಟಗಾರರು ತಮ್ಮ ಪ್ರತಿಭೆಯಿಂದ ತಂಡಗಳಿಗೆ ಮಹತ್ವದ ಬಲವಾಗುತ್ತಿದ್ದಾರೆ. ಈ ಸಾಲಿನಲ್ಲಿ ಸನ್ ರೈಸ್ ಹೈದರಾಬಾದ್ ಪರ ಪದಾರ್ಪಣೆ ಮಾಡಿದ 24 ವರ್ಷದ ವಿದರ್ಭ ಮೂಲದ ವೇಗದ ಬೌಲರ್ ಪ್ರಫುಲ್ ಹಿಂಗೆ, ತಮ್ಮ ಅದ್ಭುತ ಪ್ರದರ್ಶನದಿಂದ ಕ್ರಿಕೆಟ್ ಲೋಕದ ಗಮನ ಸೆಳೆದಿದ್ದಾರೆ.ಸೋಮವಾರ ನಡೆದ ರಾಜಸ್ಥಾನ ರಾಯಲ್ಸ್ ವಿರುದ್ಧದ ಪಂದ್ಯದಲ್ಲಿ ಅವಕಾಶ ಪಡೆದ ಹಿಂಗೆ, ಅದನ್ನು ಸಂಪೂರ್ಣವಾಗಿ ಸದುಪಯೋಗಪಡಿಸಿಕೊಂಡರು. ಐಪಿಎಲ್ನ ತಮ್ಮ ಮೊದಲ ಓವರ್ನಲ್ಲೇ ಮೂರು ಪ್ರಮುಖ ವಿಕೆಟ್ಗಳನ್ನು ಪಡೆದು ರಾಜಸ್ಥಾನ್ ತಂಡಕ್ಕೆ ಭಾರೀ ಆಘಾತ ನೀಡಿದರು. ಒಟ್ಟು ನಾಲ್ಕು ವಿಕೆಟ್ಗಳನ್ನು ಕಬಳಿಸುವ ಮೂಲಕ ಪಂದ್ಯದಲ್ಲಿ ತೀರ್ಮಾನಾತ್ಮಕ ಪಾತ್ರ ವಹಿಸಿದರು.
ಮೊದಲ ಎಸೆತದಲ್ಲೇ ಸ್ಪೋಟಕ ಬ್ಯಾಟರ್ ವೈಭವ್ ಸೂರ್ಯವಂಶಿಯನ್ನು ಔಟ್ ಮಾಡುವ ಮೂಲಕ ತಮ್ಮ ದಾಳಿಗೆ ಚಾಲನೆ ನೀಡಿದ ಹಿಂಗೆ, ಬಳಿಕ ಮಧ್ಯಕ್ರಮದ ಪ್ರಮುಖ ಆಟಗಾರ ಧ್ರುವ್ ಜುರೇಲ್ ವಿಕೆಟ್ ಕಿತ್ತುಕೊಂಡರು. ಇನಿಂಗ್ಸ್ನ ಮೊದಲ ಓವರ್ನ ಕೊನೆಯ ಎಸೆತದಲ್ಲಿ ಲುವಾನ್ ಡ್ರೆ ಪ್ರಿಟೋರಿಯಸ್ ಅವರನ್ನು ಪೆವಿಲಿಯನ್ಗೆ ಕಳುಹಿಸುವ ಮೂಲಕ ರಾಜಸ್ಥಾನ್ ರಾಯಲ್ಸ್ನ ಬ್ಯಾಟಿಂಗ್ ಸರಣಿಯನ್ನು ಕುಸಿತಗೊಳಿಸಿದರು.
ಐಪಿಎಲ್ 2026ರ ಹರಾಜಿನಲ್ಲಿ ಸನ್ರೈಸರ್ಸ್ ಹೈದರಾಬಾದ್ ತಂಡವು ಪ್ರಫುಲ್ ಹಿಂಗೆ ಅವರನ್ನು 30 ಲಕ್ಷ ರೂ.ಗಳಿಗೆ ಖರೀದಿಸಿತ್ತು.ದೇಶೀಯ ಕ್ರಿಕೆಟ್ನಲ್ಲಿ 10 ಪ್ರಥಮ ದರ್ಜೆ, 6 ಲಿಸ್ಟ್-ಎ ಮತ್ತು 2 ಟಿ20 ಪಂದ್ಯಗಳ ಅನುಭವ ಹೊಂದಿರುವ ಹಿಂಗೆ, ತಮ್ಮ ಮೊದಲ ಐಪಿಎಲ್ ಪಂದ್ಯದಲ್ಲೇ ಪ್ರತಿಭೆಯನ್ನು ಸಾಬೀತುಪಡಿಸಿದ್ದಾರೆ.
ಹಿಂಗೆ ಅವರ ಶಿಸ್ತುಬದ್ಧ ಬೌಲಿಂಗ್, ವೇಗ ಮತ್ತು ನಿಖರ ಲೈನ್-ಲೆಂಗ್ತ್ಗಳು ಕ್ರಿಕೆಟ್ ಅಭಿಮಾನಿಗಳಲ್ಲಿ ಹೊಸ ಭರವಸೆ ಮೂಡಿಸಿದ್ದು, ಮುಂದಿನ ಪಂದ್ಯಗಳಲ್ಲಿ ಅವರ ಪ್ರದರ್ಶನದ ಮೇಲೆ ಹೆಚ್ಚಿನ ನಿರೀಕ್ಷೆಗಳು ಮೂಡಿವೆ. ಈ ಯುವ ಬೌಲರ್ನ ಭರ್ಜರಿ ಆರಂಭವು ಐಪಿಎಲ್ 2026ಕ್ಕೆ ಹೊಸ ತಾರೆಯೊಬ್ಬರ ಉದಯವನ್ನು ಸೂಚಿಸುತ್ತಿದ್ದು, ಸನ್ರೈಸರ್ಸ್ ಹೈದರಾಬಾದ್ ತಂಡಕ್ಕೆ ದೊಡ್ಡ ಬಲವಾಗಿ ಪರಿಣಮಿಸಿದೆ.
