ಅಯೋಧ್ಯೆ: ಅಯೋಧ್ಯೆಯ ರಾಮಮಂದಿರಕ್ಕೆ ದೇಣಿಗೆಯಾಗಿ ನೀಡಲಾಗಿದ್ದ ಬೆಳ್ಳಿ ಇಟ್ಟಿಗೆಗಳು ಮತ್ತು ಬೆಳ್ಳಿ ಬಾರ್ಗಳ ಕುರಿತು ಎದ್ದಿರುವ ವಿವಾದಕ್ಕೆ ಹೊಸ ತಿರುವು ಸಿಕ್ಕಿದೆ. ದೇಣಿಗೆ ನಿಧಿ ದುರುಪಯೋಗ ಮತ್ತು ಬೆಳ್ಳಿ ವಸ್ತುಗಳ ಕಣ್ಮರೆ ಆರೋಪಗಳ ಹಿನ್ನೆಲೆಯಲ್ಲಿ ನಡೆಯುತ್ತಿರುವ ತನಿಖೆಯಲ್ಲಿ, ಸುಮಾರು 200 ಕೆಜಿ ಬೆಳ್ಳಿ ಕಳುವಾಗಿದೆ ಎಂಬ ಊಹಾಪೋಹಗಳನ್ನು ವಿಶೇಷ ತನಿಖಾ ತಂಡ (SIT) ತಳ್ಳಿಹಾಕಿದೆ.ಆದರೆ, ದೇಣಿಗೆಯಾಗಿ ಸ್ವೀಕರಿಸಲಾದ ಬೆಳ್ಳಿ ವಸ್ತುಗಳ ನಿರ್ವಹಣೆ ಮತ್ತು ಸಂಗ್ರಹಣೆ ಕುರಿತು ಹಲವು ಪ್ರಶ್ನೆಗಳು ಇನ್ನೂ ಉಳಿದಿವೆ. ತನಿಖೆಯ ಆರಂಭಿಕ ಹಂತದಲ್ಲಿ ಬೆಳ್ಳಿ ಬಾರ್ಗಳು ಮತ್ತು ಇಟ್ಟಿಗೆಗಳಿಗೆ ಸಂಬಂಧಿಸಿದ ದಾಖಲೆಗಳನ್ನು ಪತ್ತೆಹಚ್ಚುವಲ್ಲಿ ಅಧಿಕಾರಿಗಳಿಗೆ ಸವಾಲು ಎದುರಾಗಿದೆ ಎನ್ನಲಾಗಿದೆ.
ಎಸ್ಐಟಿ ತನಿಖೆ ವೇಳೆ, ದೇವಾಲಯಕ್ಕೆ ದೇಣಿಗೆಯಾಗಿ ಬಂದ ಕೆಲವು ಬೆಳ್ಳಿ ಇಟ್ಟಿಗೆಗಳನ್ನು ನಂತರ ಕರಗಿಸಲು ಕಳುಹಿಸಲಾಗಿದೆ ಎಂಬ ಮಾಹಿತಿ ಬೆಳಕಿಗೆ ಬಂದಿದೆ. ದೇವಾಲಯದ ದಾಖಲೆಗಳ ಪ್ರಕಾರ, ಸರಣಿ ಸಂಖ್ಯೆ 96ರ ಅಡಿಯಲ್ಲಿ ದಾಖಲಾಗಿದ್ದ ಎಂಟು ಬೆಳ್ಳಿ ಇಟ್ಟಿಗೆಗಳನ್ನು ಕರಗಿಸಲು ಕಳುಹಿಸಲಾಗಿತ್ತು.ಇದರ ಜೊತೆಗೆ ಮತ್ತೊಂದು ಬ್ಯಾಚ್ ಬೆಳ್ಳಿ ಇಟ್ಟಿಗೆಗಳನ್ನು ಹಣಕಾಸು ಸಚಿವಾಲಯದ ಅಧೀನದಲ್ಲಿರುವ ಸೆಕ್ಯುರಿಟಿ ಪ್ರಿಂಟಿಂಗ್ ಅಂಡ್ ಮಿಂಟಿಂಗ್ ಕಾರ್ಪೊರೇಷನ್ಗೆ ರವಾನಿಸಲಾಗಿತ್ತು ಎಂಬುದೂ ತನಿಖೆಯಲ್ಲಿ ತಿಳಿದುಬಂದಿದೆ.
ಭಾರತೀಯ ಬುಲಿಯನ್ ಮತ್ತು ಜ್ಯುವೆಲ್ಲರ್ಸ್ ಅಸೋಸಿಯೇಷನ್ (IBJA) ಅಧ್ಯಕ್ಷ ಅನುರಾಗ್ ರಸ್ತೋಗಿ ಅವರು ರಾಮಮಂದಿರಕ್ಕೆ ದೇಣಿಗೆಯಾಗಿ ನೀಡಲಾಗಿದ್ದ 60 ಕೆಜಿ ಬೆಳ್ಳಿ ಗಟ್ಟಿಗಳು ಮತ್ತು 3 ಕೆಜಿ ತೂಕದ ಬೆಳ್ಳಿ ದೀಪದ ಕುರಿತು ಪ್ರಶ್ನೆ ಎತ್ತಿದ ಬಳಿಕ ಈ ವಿಷಯ ಹೆಚ್ಚು ಗಮನ ಸೆಳೆಯಿತು.“ಭೂಮಿ ಪೂಜೆ ವೇಳೆ ಬಳಸುವ ಉದ್ದೇಶದಿಂದ ಬೆಳ್ಳಿಯನ್ನು ನೀಡಲಾಗಿತ್ತು. ಆದರೆ ನಂತರ ಆ ಬೆಳ್ಳಿ ವಸ್ತುಗಳು ಎಲ್ಲಿಯೂ ಕಾಣಿಸಲಿಲ್ಲ” ಎಂದು ಅವರು ಆರೋಪಿಸಿದ್ದಾರೆ.
ಶಿವಸೇನೆ (ಉದ್ಧವ್ ಠಾಕ್ರೆ ಬಣ) ನಾಯಕರು ದೇಣಿಗೆಯಾಗಿ ನೀಡಿದ್ದ 4 ಕೆಜಿ ತೂಕದ ಬೆಳ್ಳಿ ಇಟ್ಟಿಗೆಯ ಸ್ಥಿತಿಗತಿಯ ಕುರಿತು ಸಹ ಪ್ರಶ್ನೆಗಳು ಎದ್ದಿವೆ. ಶಿವಸೇನೆ ನಾಯಕ ಸಂಜಯ್ ರಾವತ್, ಹಲವು ವರ್ಷಗಳಾದರೂ ಟ್ರಸ್ಟ್ನಿಂದ ಸ್ಪಷ್ಟ ಮಾಹಿತಿ ಅಥವಾ ಅಧಿಕೃತ ರಶೀದಿ ಲಭ್ಯವಾಗಿಲ್ಲ ಎಂದು ಆರೋಪಿಸಿದ್ದಾರೆ.ದೇವಾಲಯದ ದಾಖಲೆಗಳನ್ನು ಪರಿಶೀಲಿಸಿದ ಎಸ್ಐಟಿ, ಬೆಳ್ಳಿ ದೇಣಿಗೆಗಳನ್ನು ಎರಡು ಹಂತಗಳಲ್ಲಿ ಸ್ವೀಕರಿಸಲಾಗಿದೆ ಎಂದು ತಿಳಿಸಿದೆ. 2020ರ ಜುಲೈ ತಿಂಗಳಲ್ಲಿ ಒಟ್ಟು 38 ಕೆಜಿ ಬೆಳ್ಳಿ ಹಾಗೂ ನಂತರ 25.576 ಕೆಜಿ ಬೆಳ್ಳಿ ಇಟ್ಟಿಗೆಗಳನ್ನು ದೇಣಿಗೆಯಾಗಿ ಪಡೆದಿರುವುದು ದಾಖಲೆಗಳಲ್ಲಿ ಉಲ್ಲೇಖವಾಗಿದೆ.
ಈ ಹಿನ್ನೆಲೆಯಲ್ಲಿ “ಕಾಣೆಯಾಗಿದೆ” ಎಂದು ಹೇಳಲಾಗುತ್ತಿದ್ದ ಬೆಳ್ಳಿ ಇಟ್ಟಿಗೆಗಳು ಮತ್ತು ಬಾರ್ಗಳು ಅಧಿಕೃತ ದಾಖಲೆಗಳಲ್ಲಿ ದಾಖಲಾಗಿವೆ ಹಾಗೂ ಅವು ಕಳುವಾಗಿವೆ ಎಂಬುದಕ್ಕೆ ಈವರೆಗೆ ಯಾವುದೇ ದೃಢ ಪುರಾವೆ ಲಭ್ಯವಾಗಿಲ್ಲ ಎಂದು ಎಸ್ಐಟಿ ಪ್ರಾಥಮಿಕವಾಗಿ ಅಭಿಪ್ರಾಯಪಟ್ಟಿದೆ.ಇದರ ನಡುವೆಯೇ, ದೇಣಿಗೆ ಹಣ ದುರುಪಯೋಗ ಆರೋಪ ಸಂಬಂಧ ದಾಖಲಾದ ಪ್ರಕರಣದಲ್ಲಿ ಈಗಾಗಲೇ ಎಂಟು ಮಂದಿಯನ್ನು ಬಂಧಿಸಲಾಗಿದೆ. ಟ್ರಸ್ಟ್ನ ಪ್ರಧಾನ ಕಾರ್ಯದರ್ಶಿ ಚಂಪತ್ ರಾಯ್ ಅವರ ಆಪ್ತ ಸಹಾಯಕ ಟಿನ್ನು ಯಾದವ್ ಸೇರಿದಂತೆ ಹಲವು ಮಂದಿಯನ್ನು ವಿಚಾರಣೆಗೆ ಒಳಪಡಿಸಲಾಗಿದೆ. ಪ್ರಕರಣದ ನೈತಿಕ ಹೊಣೆ ಹೊತ್ತು ಕೆಲ ಅಧಿಕಾರಿಗಳು ತಮ್ಮ ಹುದ್ದೆಗಳಿಗೆ ರಾಜೀನಾಮೆ ನೀಡಿರುವುದಾಗಿ ವರದಿಯಾಗಿದೆ.
