ನವದೆಹಲಿ: ಖಾಸಗಿ ಕಾರು ಹಾಗೂ ದ್ವಿಚಕ್ರ ವಾಹನಗಳ ಮಾಲೀಕರಿಗೆ ತಮ್ಮ ಅಗತ್ಯಕ್ಕೆ ತಕ್ಕಂತೆ ವಿಮೆ ಆಯ್ಕೆ ಮಾಡಿಕೊಳ್ಳುವ ಅವಕಾಶ ಕಲ್ಪಿಸಲು, ಭಾರತೀಯ ವಿಮಾ ನಿಯಂತ್ರಣ ಮತ್ತು ಅಭಿವೃದ್ಧಿ ಪ್ರಾಧಿಕಾರವು (IRDAI) ನೂತನ 4 ಹಂತಗಳ ಮೋಟಾರು ವಿಮಾ ವ್ಯವಸ್ಥೆಯನ್ನು (Motor Insurance System) ಪರಿಚಯಿಸಿದೆ. ಈ ಪರಿಷ್ಕೃತ ನಿಯಮಗಳು 2026ರ ಡಿಸೆಂಬರ್ 15 ರಿಂದ ಜಾರಿಗೆ ಬರಲಿವೆ.
ಗ್ರಾಹಕರಿಗೆ ಹೆಚ್ಚಿನ ಆಯ್ಕೆಗಳನ್ನು ಒದಗಿಸುವುದು ಹಾಗೂ ವಿಮಾ ಪಾಲಿಸಿಗಳಲ್ಲಿ ಪಾರದರ್ಶಕತೆ ತರುವುದು ಈ ಹೊಸ ವ್ಯವಸ್ಥೆಯ ಮುಖ್ಯ ಉದ್ದೇಶವಾಗಿದೆ ಎಂದು ನಿಯಂತ್ರಕ ಸಂಸ್ಥೆ ತಿಳಿಸಿದೆ. ಸುಪ್ರೀಂ ಕೋರ್ಟ್‌ನ ಆದೇಶಕ್ಕೆ (ನ್ಯಾಷನಲ್ ಇನ್ಶೂರೆನ್ಸ್ ಕಂಪನಿ ಲಿಮಿಟೆಡ್ ವರ್ಸಸ್ ತುಂಗಲಾ ಧನಲಕ್ಷ್ಮಿ ಮತ್ತು ಇತರರು) ಬದ್ಧವಾಗಿ ಐಆರ್‌ಡಿಎಐ ಈ ಸುತ್ತೋಲೆ ಹೊರಡಿಸಿದೆ.
ನೂತನ ವಿಮಾ ವ್ಯವಸ್ಥೆಯ 4 ಪ್ರಮುಖ ವಿಭಾಗಗಳು
ಥರ್ಡ್-ಪಾರ್ಟಿ ಲಯಬಿಲಿಟಿ (ತೃತೀಯ ವ್ಯಕ್ತಿ ಹೊಣೆಗಾರಿಕೆ): ಈ ಕವರ್ ಹಿಂದಿನಂತೆಯೇ ಖಾಸಗಿ ಕಾರು ಮತ್ತು ದ್ವಿಚಕ್ರ ವಾಹನಗಳಿಗೆ ಕಡ್ಡಾಯವಾಗಿರಲಿದೆ.
ಸಹಪ್ರಯಾಣಿಕರ ಕಾನೂನು ಹೊಣೆಗಾರಿಕೆ (Legal liability for occupants or pillion riders): ಕಾರಿನಲ್ಲಿರುವ ಸಹಪ್ರಯಾಣಿಕರು ಅಥವಾ ದ್ವಿಚಕ್ರ ವಾಹನದ ಹಿಂಬದಿ ಸವಾರರಿಗೆ ಉಂಟಾಗುವ ಕಾನೂನು ಹೊಣೆಗಾರಿಕೆಗೆ ಈ ವಿಭಾಗ ರಕ್ಷಣೆ ನೀಡುತ್ತದೆ.
ವೈಯಕ್ತಿಕ ಅಪಘಾತ ವಿಮೆ (Personal Accident Cover): ವಾಹನ ಮಾಲೀಕರಿಗೆ ಅನ್ವಯಿಸುವ ನಿಯಮಗಳಿಗೆ ಒಳಪಟ್ಟು ಇದು ಪಾಲಿಸಿಯ ಪ್ರತ್ಯೇಕ ಅಂಗವಾಗಿರಲಿದೆ.
ಸ್ವಂತ ವಾಹನ ಹಾನಿ ವಿಮೆ (Own-damage cover): ವಿಮೆ ಹೊಂದಿರುವ ವಾಹನಕ್ಕೆ ಆಗುವ ಹಾನಿಯನ್ನು ಇದು ಭರಿಸುತ್ತದೆ.
ಥರ್ಡ್-ಪಾರ್ಟಿ ವಿಮೆ ಕಡ್ಡಾಯವಾಗಿದ್ದು, ಉಳಿದ ಕವರ್‌ಗಳನ್ನು ವಾಹನ ಮಾಲೀಕರು ತಮ್ಮ ಇಚ್ಛೆಯಂತೆ (ಐಚ್ಛಿಕವಾಗಿ) ಆಯ್ಕೆ ಮಾಡಿಕೊಳ್ಳಬಹುದಾಗಿದೆ.
ಹೊಸ ನಿಯಮಗಳ ವಿವರ
ಏಕರೂಪದ ಆಯ್ಕೆ ನಮೂನೆ ಮತ್ತು ಮಾಹಿತಿ ಪತ್ರ: ಎಲ್ಲಾ ಸಾಮಾನ್ಯ ವಿಮಾ ಕಂಪನಿಗಳು ಪ್ರಮಾಣಿತ ಪಾಲಿಸಿ ಪದಗಳನ್ನು (standardised policy wording) ಬಳಸಬೇಕು. ಗ್ರಾಹಕರು ತಮಗೆ ಬೇಕಾದ ಕವರ್‌ಗಳನ್ನು ಆನ್‌ಲೈನ್ ಅಥವಾ ಆಫ್‌ಲೈನ್ ಮೂಲಕ ಆಯ್ಕೆ ಮಾಡಲು ಏಕರೂಪದ ‘ಆಯ್ಕೆ ನಮೂನೆ’ (Customer Option Form) ಹಾಗೂ ಪ್ರೀಮಿಯಂ ವಿವರಗಳನ್ನು ಸ್ಪಷ್ಟವಾಗಿ ವಿವರಿಸುವ ‘ಗ್ರಾಹಕ ಮಾಹಿತಿ ಪತ್ರ’ (Customer Information Sheet) ನೀಡುವುದು ಕಡ್ಡಾಯ.
ಮಧ್ಯದಲ್ಲೇ ಸೇರ್ಪಡೆಗೆ ಅವಕಾಶ: ಈಗಾಗಲೇ ಚಾಲ್ತಿಯಲ್ಲಿರುವ ಪಾಲಿಸಿದಾರರು ಹೆಚ್ಚುವರಿ ಪ್ರೀಮಿಯಂ ಪಾವತಿಸುವ ಮೂಲಕ ತಮ್ಮ ಪಾಲಿಸಿಯ ಅವಧಿಯ ಮಧ್ಯದಲ್ಲೇ ಹಿಂಬದಿ ಸವಾರರು ಅಥವಾ ಸಹಪ್ರಯಾಣಿಕರ ಹೊಣೆಗಾರಿಕೆ ಕವರ್ ಅನ್ನು ಸೇರಿಸಿಕೊಳ್ಳಬಹುದು.
ದರ ನಿಗದಿಯಲ್ಲಿ ಕಂಪನಿಗಳಿಗೆ ಸ್ವಾತಂತ್ರ್ಯ: ಸ್ವಂತ ವಾಹನ ಹಾನಿ (Own-damage) ಕವರ್‌ನ ದರವನ್ನು ಮಾರುಕಟ್ಟೆ ಪರಿಸ್ಥಿತಿಗೆ ತಕ್ಕಂತೆ ನಿರ್ಧರಿಸಲು ಮತ್ತು ಹೊಸ ಉತ್ಪನ್ನಗಳನ್ನು ವಿನ್ಯಾಸಗೊಳಿಸಲು ವಿಮಾ ಕಂಪನಿಗಳಿಗೆ ಸ್ವಾತಂತ್ರ್ಯ ನೀಡಲಾಗಿದೆ.
‘ಬಿಮಾ ಸುಗಮ್’ ವೇದಿಕೆಯೊಂದಿಗೆ ಸಂಯೋಜನೆ: ಈ ಹೊಸ 4 ಹಂತಗಳ ವಿಮಾ ವ್ಯವಸ್ಥೆಯನ್ನು ‘ಬಿಮಾ ಸುಗಮ್’ (Bima Sugam) ಪೋರ್ಟಲ್‌ಗೆ ಜೋಡಿಸಲು ಸೂಚಿಸಲಾಗಿದ್ದು, ಡಿಸೆಂಬರ್ 15, 2026 ರಿಂದ ಈ ವೇದಿಕೆಯಲ್ಲಿ ಹೊಸ ಪಾಲಿಸಿಗಳು ಸಾರ್ವಜನಿಕರಿಗೆ ಲಭ್ಯವಾಗಲಿವೆ.
ಇಂದು ಸಿಎಂ ಅಧ್ಯಕ್ಷತೆಯಲ್ಲಿ ಮಹತ್ವದ ಕ್ಯಾಬಿನೆಟ್ ಮೀಟಿಂಗ್; ಈ ಹಲವು ಯೋಜನೆಗಳಿಗೆ ಸಿಗುತ್ತಾ ಒಪ್ಪಿಗೆ?
