ನವದೆಹಲಿ: ದೇಶದ ಅತಿದೊಡ್ಡ ವೈದ್ಯಕೀಯ ಪ್ರವೇಶ ಪರೀಕ್ಷೆಯಾದ NEET-UG 2026 ಪ್ರಶ್ನೆಪತ್ರಿಕೆ ಸೋರಿಕೆ ಪ್ರಕರಣವು ಕೇವಲ ಪರೀಕ್ಷೆಗೂ ಮುನ್ನ ನಡೆದ ಸಣ್ಣ ಲೋಪವಲ್ಲ, ಬದಲಾಗಿ ಹಲವು ತಿಂಗಳುಗಳಿಂದ ಯೋಜಿತವಾಗಿ ನಡೆದ ಬಹು-ರಾಜ್ಯ ಕ್ರಿಮಿನಲ್ ಜಾಲದ ಸಂಚು ಎಂದು ಕೇಂದ್ರ ತನಿಖಾ ದಳ (CBI) ತನ್ನ ಆರೋಪಪಟ್ಟಿಯಲ್ಲಿ ಬಹಿರಂಗಪಡಿಸಿದೆ.
ಸಿಬಿಐ ಸಲ್ಲಿಸಿರುವ ಆರೋಪಪಟ್ಟಿಯಲ್ಲಿ ಒಟ್ಟು 13 ಮಂದಿಯನ್ನು ಆರೋಪಿಗಳಾಗಿ ಹೆಸರಿಸಲಾಗಿದೆ. ಇವರಲ್ಲಿ ರಾಷ್ಟ್ರೀಯ ಪರೀಕ್ಷಾ ಸಂಸ್ಥೆ (NTA) ನೇಮಿಸಿದ್ದ ಸಸ್ಯಶಾಸ್ತ್ರ, ರಸಾಯನಶಾಸ್ತ್ರ ಹಾಗೂ ಭೌತಶಾಸ್ತ್ರ ವಿಷಯಗಳ ಮೂವರು ತಜ್ಞರು, ತರಬೇತಿ ಕೇಂದ್ರಗಳ ನಿರ್ವಾಹಕರು, ದಲ್ಲಾಳಿಗಳು ಹಾಗೂ ಕೆಲ ಅಭ್ಯರ್ಥಿಗಳು ಸೇರಿದ್ದಾರೆ. ಪ್ರಸ್ತುತ ಎಲ್ಲ ಆರೋಪಿಗಳೂ ನ್ಯಾಯಾಂಗ ಬಂಧನದಲ್ಲಿದ್ದಾರೆ.
ಪ್ರಶ್ನೆಪತ್ರಿಕೆ ಹೇಗೆ ಸೋರಿಕೆಯಾಯಿತು?
ಸಿಬಿಐ ತನಿಖೆಯ ಪ್ರಕಾರ, ಪ್ರಶ್ನೆಪತ್ರಿಕೆ ತಯಾರಿಕೆ ಮತ್ತು ಅನುವಾದ ಪ್ರಕ್ರಿಯೆಯಲ್ಲಿ ಭಾಗಿಯಾಗಿದ್ದ ಕೆಲ ತಜ್ಞರು ತಮ್ಮ ಅಧಿಕೃತ ಪ್ರವೇಶವನ್ನು ದುರುಪಯೋಗಪಡಿಸಿಕೊಂಡು ಪ್ರಶ್ನೆಗಳನ್ನು ಹೊರಗೆ ಸೋರಿಕೆ ಮಾಡಿದ್ದಾರೆ. ಬಳಿಕ ಮಧ್ಯವರ್ತಿಗಳ ಮೂಲಕ ಹಲವು ರಾಜ್ಯಗಳ ಅಭ್ಯರ್ಥಿಗಳಿಗೆ ಹಣ ಪಡೆದು ಪ್ರಶ್ನೆಪತ್ರಿಕೆಗಳನ್ನು ತಲುಪಿಸಲಾಗಿದೆ.
ತನಿಖೆ ವೇಳೆ ವಶಪಡಿಸಿಕೊಂಡ ಮೊಬೈಲ್ಗಳ ಡಿಜಿಟಲ್ ವಿಶ್ಲೇಷಣೆಯಲ್ಲಿ ವಾಟ್ಸಾಪ್ ಗುಂಪುಗಳು, ಟೆಲಿಗ್ರಾಮ್ ಚಾಟ್ಗಳು, ಪ್ರಶ್ನೆಪತ್ರಿಕೆಗಳ PDF ಪ್ರತಿಗಳು ಹಾಗೂ ಛಾಯಾಚಿತ್ರಗಳು ಪತ್ತೆಯಾಗಿವೆ. “NEET 2026” ಹೆಸರಿನ ವಾಟ್ಸಾಪ್ ಗುಂಪು ಸೇರಿದಂತೆ ಹಲವು ಡಿಜಿಟಲ್ ಸಾಕ್ಷ್ಯಗಳು ಆರೋಪಿಗಳ ನಡುವಿನ ಸಂಪರ್ಕವನ್ನು ದೃಢಪಡಿಸುತ್ತವೆ ಎಂದು ಸಿಬಿಐ ತಿಳಿಸಿದೆ.
ಆರೋಪಿ ಯಶ್ ಯಾದವ್ ಅವರ ಮೊಬೈಲ್ನಿಂದ ಪ್ರಶ್ನೆಪತ್ರಿಕೆಗಳ PDF ಮತ್ತು ಟೆಲಿಗ್ರಾಮ್ ಸಂಭಾಷಣೆಗಳು ಪತ್ತೆಯಾಗಿದ್ದು, “AP Broker” ಹೆಸರಿನ ಸಂಪರ್ಕವನ್ನು ಸಹ ಆರೋಪಿ ಶುಭಂ ಮಧುಕರ್ ಖೈರ್ನರ್ ಎಂದು ಗುರುತಿಸಲಾಗಿದೆ.ಸಿಬಿಐ ಪ್ರಕಾರ, ಒಬ್ಬ ಅಭ್ಯರ್ಥಿ ಮತ್ತು ಅವರ ತಂದೆಯಿಂದ ₹4 ಲಕ್ಷ ಪಡೆದು ಪರೀಕ್ಷೆಗೆ ಮುನ್ನ ಪ್ರಶ್ನೆಪತ್ರಿಕೆ ತೋರಿಸಲಾಗಿತ್ತು. ಮತ್ತೊಂದು ಪ್ರಕರಣದಲ್ಲಿ ₹25 ಲಕ್ಷಕ್ಕೆ ಪ್ರಶ್ನೆಪತ್ರಿಕೆ ಮಾರಾಟ ಮಾಡಿರುವ ಆರೋಪವೂ ದಾಖಲಾಗಿದೆ. ತನಿಖೆ ವೇಳೆ ಖಾಲಿ ಸಹಿ ಮಾಡಿದ ಚೆಕ್ಗಳು ಹಾಗೂ ಮೂಲ ಶೈಕ್ಷಣಿಕ ದಾಖಲೆಗಳನ್ನೂ ವಶಪಡಿಸಿಕೊಳ್ಳಲಾಗಿದೆ.
ರಾಜಸ್ಥಾನ, ಮಹಾರಾಷ್ಟ್ರ, ಹರಿಯಾಣ, ಬಿಹಾರ ಹಾಗೂ ಕೇರಳ ಸೇರಿದಂತೆ ಹಲವು ರಾಜ್ಯಗಳಲ್ಲಿ ಕಾರ್ಯನಿರ್ವಹಿಸುತ್ತಿದ್ದ ತರಬೇತಿ ಕೇಂದ್ರಗಳು, ದಲ್ಲಾಳಿಗಳು ಮತ್ತು ಖಾಸಗಿ ಶಿಕ್ಷಣ ಸಂಸ್ಥೆಗಳ ಜಾಲದ ಮೂಲಕ ಈ ಸೋರಿಕೆ ನಡೆದಿರುವ ಸಾಧ್ಯತೆಯನ್ನು ಸಿಬಿಐ ಉಲ್ಲೇಖಿಸಿದೆ.ಆರೋಪಿಗಳ ವಿರುದ್ಧ ಭಾರತೀಯ ನ್ಯಾಯ ಸಂಹಿತೆ (BNS), ಭ್ರಷ್ಟಾಚಾರ ತಡೆ ಕಾಯ್ದೆ ಹಾಗೂ ಸಾರ್ವಜನಿಕ ಪರೀಕ್ಷೆಗಳು (ಅನ್ಯಾಯ ವಿಧಾನಗಳ ತಡೆಗಟ್ಟುವಿಕೆ) ಕಾಯ್ದೆ–2024ರ ವಿವಿಧ ವಿಧಿಗಳಡಿ ಪ್ರಕರಣ ದಾಖಲಿಸಲಾಗಿದೆ. ಡಿಜಿಟಲ್ ಸಾಕ್ಷ್ಯಗಳೇ ಈ ಪ್ರಕರಣದ ಪ್ರಮುಖ ಆಧಾರ ಎಂದು ತನಿಖಾ ಸಂಸ್ಥೆ ತಿಳಿಸಿದೆ.
ಪರೀಕ್ಷೆಗೆ ಮುನ್ನ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡಿದ್ದ “ಊಹೆ ಪ್ರಶ್ನೆಪತ್ರಿಕೆ”ಯಲ್ಲಿದ್ದ 120–140 ಪ್ರಶ್ನೆಗಳು ಅಂತಿಮ ಪ್ರಶ್ನೆಪತ್ರಿಕೆಗೆ ಹೊಂದಿಕೆಯಾಗಿದ್ದವು ಎಂಬುದು ತನಿಖೆಯಲ್ಲಿ ಬೆಳಕಿಗೆ ಬಂದಿದೆ. ಆರಂಭದಲ್ಲಿ ಆರೋಪಗಳನ್ನು NTA ತಳ್ಳಿಹಾಕಿದರೂ, ನಂತರದ ತನಿಖೆಯಲ್ಲಿ ಸೋರಿಕೆ ದೃಢಪಟ್ಟ ಹಿನ್ನೆಲೆಯಲ್ಲಿ ಮೇ 3ರಂದು ನಡೆದ NEET-UG 2026 ಪರೀಕ್ಷೆಯನ್ನು ಮೇ 12ರಂದು ರದ್ದುಪಡಿಸಲಾಯಿತು.ಈ ನಿರ್ಧಾರದಿಂದ 23 ಲಕ್ಷಕ್ಕೂ ಹೆಚ್ಚು ಅಭ್ಯರ್ಥಿಗಳು ಮರುಪರೀಕ್ಷೆ ಎದುರಿಸುವ ಪರಿಸ್ಥಿತಿ ನಿರ್ಮಾಣವಾಗಿದ್ದು, ಇದು ದೇಶದ ವೈದ್ಯಕೀಯ ಪ್ರವೇಶ ಪರೀಕ್ಷೆಗಳ ಇತಿಹಾಸದಲ್ಲೇ ಅತಿದೊಡ್ಡ ವಿವಾದಗಳಲ್ಲಿ ಒಂದಾಗಿದೆ.
ಈ ಪ್ರಕರಣದ ಬಳಿಕ ಪರೀಕ್ಷಾ ವ್ಯವಸ್ಥೆಯನ್ನು ಇನ್ನಷ್ಟು ಸುರಕ್ಷಿತಗೊಳಿಸಲು AI ಆಧಾರಿತ ನಿಗಾವ್ಯವಸ್ಥೆ, ಬ್ಲಾಕ್ಚೈನ್ ತಂತ್ರಜ್ಞಾನ, ಎಂಡ್-ಟು-ಎಂಡ್ ಡಿಜಿಟಲ್ ಭದ್ರತೆ ಹಾಗೂ ಪ್ರಶ್ನೆಪತ್ರಿಕೆ ನಿರ್ವಹಣೆಯ ಕಟ್ಟುನಿಟ್ಟಿನ ವ್ಯವಸ್ಥೆ ಜಾರಿಗೆ ತರಲು ಕೇಂದ್ರ ಸರ್ಕಾರ ಮತ್ತು NTA ಚಿಂತನೆ ನಡೆಸಿವೆ.
