ವರ್ಚುವಲ್ ಪ್ರೈವೇಟ್ ನೆಟ್ವರ್ಕ್ ಅಥವಾ ವಿಪಿಎನ್ ಸೇವೆಗಳನ್ನು ನೀಡುವ ಕಂಪನಿಗಳು ಐದು ವರ್ಷಗಳವರೆಗೆ ಭಾರತೀಯ ಬಳಕೆದಾರರ ಮಾಹಿತಿಯನ್ನು ಸಂಗ್ರಹಿಸಿಡಬೇಕೆಂದು ಕೇಂದ್ರ ಸರ್ಕಾರವು ನಿರ್ದೇಶಿಸಿದೆ.
ವಿಪಿಎನ್ ತನ್ನ ಬಳಕೆದಾರರಿಗೆ ತಮ್ಮ ಸ್ಥಳವನ್ನು ಮರೆಮಾಚಲು ಮತ್ತು ಇಂಟರ್ನೆಟ್ ಸೇವೆ ಒದಗಿಸುವವರಿಗೆ ತಮ್ಮ ಹುಡುಕಾಟದ ಇತಿಹಾಸವನ್ನು (search history) ಬಹಿರಂಗಪಡಿಸದೆ ಇಂಟರ್ನೆಟ್ ಬ್ರೌಸ್ ಮಾಡಲು ಅನುಮತಿಸುತ್ತದೆ. ತಮ್ಮ ದೇಶಗಳಲ್ಲಿ ನಿಷೇಧಿತ ವೆಬ್ಸೈಟ್ಗಳನ್ನು ಪ್ರವೇಶಿಸಲು ತನಿಖಾ ಪತ್ರಕರ್ತರು ಮತ್ತು ಎತಿಕಲ್ ಹ್ಯಾಕರ್ಗಳು ಕೂಡಾ ಈ ತಂತ್ರಜ್ಞಾನವನ್ನು ಹೆಚ್ಚಾಗಿ ಬಳಸುತ್ತಾರೆ. ಭಾರತದಂತಹ ದೇಶದಲ್ಲಿ ನಗ್ನ ಚಿತ್ರಗಳ ವೆಬ್ಸೈಟ್ಗಳನ್ನು ಬ್ಯಾನ್ ಮಾಡಿದ ಬಳಿಕ, ಅಂತಹ ವೆಬ್ಸೈಟ್ಗಳಿಗೆ ಪ್ರವೇಶ ಪಡೆಯಲು ಹಾಗೂ ನಿಷೇಧಿತ ವೆಬ್ಸೈಟ್ ಗಳ ಮೂಲಕ ಸಿನೆಮಾಗಳನ್ನು ಡೌನ್ಲೋಡ್ ಮಾಡಿಕೊಳ್ಳಲು ವಿಪಿಎನ್ ಸಹಾಯ ಮಾಡುತ್ತದೆ.
ಇನ್ನು ಮುಂದೆ ಭಾರತದಲ್ಲಿ VPN ಪೂರೈಕೆದಾರರು ಬಳಕೆದಾರರ ಹೆಸರುಗಳು, ವಿಳಾಸಗಳು, ಸಂಪರ್ಕ ಸಂಖ್ಯೆಗಳು, ಚಂದಾದಾರಿಕೆಯ ಅವಧಿ, ಇಮೇಲ್ ಮತ್ತು IP ವಿಳಾಸ ಮತ್ತು ಇತರ ಸೇವೆಗಳನ್ನು ಸಂಗ್ರಹಿಸಬೇಕಾಗಿದೆ ಎಂದು ʼಭಾರತೀಯ ಕಂಪ್ಯೂಟರ್ ತುರ್ತು ಪ್ರತಿಕ್ರಿಯೆ ತಂಡʼ ಅಥವಾ CERT-In ಏಪ್ರಿಲ್ 28 ರಂದು ಆದೇಶ ಹೊರಡಿಸಿದೆ.
ಸಿಇಆರ್ಟಿ-ಇನ್ ಮಾಹಿತಿ ತಂತ್ರಜ್ಞಾನ ಸಚಿವಾಲಯದ ಅಡಿಯಲ್ಲಿ ಕಾರ್ಯನಿರ್ವಹಿಸುತ್ತದೆ ಮತ್ತು ಸೈಬರ್ ಭದ್ರತಾ ಬೆದರಿಕೆಗಳ ಬಗ್ಗೆ ಕಾರ್ಯಾಚರಿಸುವ ಕುರಿತು ದೇಶದ ನೋಡಲ್ ಏಜೆನ್ಸಿಯಾಗಿದೆ. ಹೊಸ ನಿರ್ದೇಶನವು ಜೂನ್ ಅಂತ್ಯದಿಂದ ಜಾರಿಗೆ ಬರಲಿದೆ ಮತ್ತು ಕ್ಲೌಡ್ ಸೇವಾ ಪೂರೈಕೆದಾರರು ಮತ್ತು ವರ್ಚುವಲ್ ಖಾಸಗಿ ಸರ್ವರ್ ಪೂರೈಕೆದಾರರಿಗೆ ಸಹ ಅನ್ವಯಿಸುತ್ತದೆ.
ಇಂಟರ್ನೆಟ್ ಭದ್ರತಾ ಸೇವೆಗಳ ಸಂಸ್ಥೆ ನಾರ್ಟನ್ ಪ್ರಕಾರ, ಬೆಲಾರಸ್, ಚೀನಾ, ಇರಾಕ್, ಉತ್ತರ ಕೊರಿಯಾ, ಓಮನ್, ರಷ್ಯಾ ಮತ್ತು ಯುನೈಟೆಡ್ ಅರಬ್ ಎಮಿರೇಟ್ಸ್ನಂತಹ ಕೆಲವೇ ದೇಶಗಳಲ್ಲಿ VPN ಸೇವೆಗಳನ್ನು ಪ್ರಸ್ತುತ ನಿಯಂತ್ರಿಸಲಾಗುತ್ತದೆ ಅಥವಾ ಸಂಪೂರ್ಣವಾಗಿ ನಿಷೇಧಿಸಲಾಗಿದೆ.
ಕ್ರಿಪ್ಟೋಕರೆನ್ಸಿ ವಿನಿಮಯ ಕೇಂದ್ರಗಳಿಗೆ ಐದು ವರ್ಷಗಳ ಅವಧಿಗೆ ಬಳಕೆದಾರರ ಹಣಕಾಸಿನ ವಹಿವಾಟಿನ ದಾಖಲೆಯನ್ನು ನಿರ್ವಹಿಸಲು ನಿರ್ದೇಶಿಸಲಾಗಿದೆ ಎಂದು CERT-In ಹೇಳಿದೆ.
“ವರ್ಚುವಲ್ ಆಸ್ತಿ ಸೇವಾ ಪೂರೈಕೆದಾರರು, ವರ್ಚುವಲ್ ಆಸ್ತಿ ವಿನಿಮಯ ಪೂರೈಕೆದಾರರು ಮತ್ತು ಕಸ್ಟೋಡಿಯನ್ ವ್ಯಾಲೆಟ್ ಪೂರೈಕೆದಾರರು ಕೆವೈಸಿ ಮತ್ತು ಹಣಕಾಸಿನ ವಹಿವಾಟಿನ ದಾಖಲೆಗಳ ಭಾಗವಾಗಿ ಪಡೆದ ಎಲ್ಲಾ ಮಾಹಿತಿಯನ್ನು ಕಡ್ಡಾಯವಾಗಿ ಐದು ವರ್ಷಗಳ ಅವಧಿವರೆಗೆ ನಿರ್ವಹಿಸಬೇಕು.,” ಎಂದು CERT-In ತನ್ನ ಆದೇಶದಲ್ಲಿ ತಿಳಿಸಿದೆ.
ನಿರ್ದೇಶನಗಳನ್ನು ಅನುಸರಿಸಲು ವಿಫಲವಾದ ಯಾವುದೇ ಸಂಸ್ಥೆಯು ಮಾಹಿತಿ ತಂತ್ರಜ್ಞಾನ ಕಾಯ್ದೆಯ ಸೆಕ್ಷನ್ 70B ನ ಉಪವಿಭಾಗ (7) ಅಡಿಯಲ್ಲಿ ಕ್ರಮವನ್ನು ಎದುರಿಸಬಹುದು ಎಂದು ಸೈಬರ್ ಭದ್ರತಾ ಸಂಸ್ಥೆ ಹೇಳಿದೆ. ಈ ಸೆಕ್ಷನ್ನಲ್ಲಿ ಒಂದು ವರ್ಷ ಜೈಲು ಶಿಕ್ಷೆ, 1 ಲಕ್ಷ ರೂ.ವರೆಗೆ ದಂಡ ಅಥವಾ ಎರಡನ್ನೂ ವಿಧಿಸುವ ಅವಕಾಶವಿದೆ.
