ನವದೆಹಲಿ : ಭಾರತದಲ್ಲಿ ಷೇರು ಮಾರುಕಟ್ಟೆ (Stock Market) ಹಾಗೂ ಮ್ಯೂಚುವಲ್ ಫಂಡ್‌ಗಳಲ್ಲಿ (Mutual Fund) ಹೂಡಿಕೆ ಮಾಡುವವರ ಸಂಖ್ಯೆ ದಿನದಿಂದ ದಿನಕ್ಕೆ ಏರಿಕೆಯಾಗುತ್ತಿದೆ. ಹಣಕಾಸು ಸಚಿವಾಲಯದ ಅಂಕಿಅಂಶಗಳ ಪ್ರಕಾರ, 2026ರ ಆರ್ಥಿಕ ವರ್ಷದಲ್ಲಿ ಬರೋಬ್ಬರಿ 2.35 ಕೋಟಿ ಹೊಸ ಡಿಮ್ಯಾಟ್ ಖಾತೆಗಳು ಸೇರ್ಪಡೆಯಾಗಿದ್ದು, ಒಟ್ಟು ಖಾತೆಗಳ ಸಂಖ್ಯೆ 21.6 ಕೋಟಿ ಗಡಿ ದಾಟಿದೆ. ಮ್ಯೂಚುವಲ್ ಫಂಡ್ ಹೂಡಿಕೆದಾರರ ಸಂಖ್ಯೆಯೂ 5.9 ಕೋಟಿಗೆ ಮುಟ್ಟಿದ್ದು, ಇದರಲ್ಲಿ ಬಹುತೇಕರು ಸಣ್ಣ ನಗರಗಳವರಾಗಿದ್ದಾರೆ. ಆದರೆ ಇದೇ ಜನಪ್ರಿಯತೆಯನ್ನು ಬಂಡವಾಳವಾಗಿಸಿಕೊಂಡಿರುವ ಸೈಬರ್ ವಂಚಕರು, ವಾಟ್ಸಾಪ್ ಮತ್ತು ಟೆಲಿಗ್ರಾಂ ಮೂಲಕ ಖಾತರಿ ಲಾಭದ ಆಮಿಷವೊಡ್ಡಿ ನಕಲಿ ಟ್ರೇಡಿಂಗ್ ಆ್ಯಪ್‌ಗಳ ಹೆಸರಿನಲ್ಲಿ ಜನರ ಕೋಟ್ಯಂತರ ರೂಪಾಯಿ ( money) ಉಳಿತಾಯವನ್ನು ಲೂಟಿ ಮಾಡುತ್ತಿದ್ದಾರೆ.
ಹೂಡಿಕೆ ಸಲಹೆಗಳ ಹೆಸರಿನಲ್ಲಿ ನಡೆಯುವ ವಂಚನೆಗೆ ‘ಸೆಬಿ’ ಎಚ್ಚರಿಕೆ
ಸಾಮಾಜಿಕ ಜಾಲತಾಣಗಳಲ್ಲಿ ಹೆಚ್ಚುತ್ತಿರುವ ಇಂತಹ ವಂಚನೆಗಳ ವಿರುದ್ಧ ಭಾರತೀಯ ಷೇರುಪೇಟೆ ನಿಯಂತ್ರಣ ಮಂಡಳಿ (ಸೆಬಿ) ಕಠಿಣ ಎಚ್ಚರಿಕೆ ನೀಡಿದೆ. ನೋಂದಣಿಯಾಗದ ಕೆಲ ವ್ಯಕ್ತಿಗಳು ಉಚಿತ ಹೂಡಿಕೆ ಶಿಕ್ಷಣದ ಹೆಸರಿನಲ್ಲಿ ಆಹ್ವಾನಿತ ವಾಟ್ಸಾಪ್ ಗ್ರೂಪ್‌ಗಳನ್ನು ರಚಿಸಿ, ವಿದೇಶಿ ಮೊಬೈಲ್ ಸಂಖ್ಯೆಗಳಿಂದ ನಕಲಿ ಮಾರುಕಟ್ಟೆ ತಜ್ಞರಂತೆ ಪೋಸ್ ನೀಡುತ್ತಿದ್ದಾರೆ. ಈ ಗ್ರೂಪ್‌ಗಳಲ್ಲಿರುವ ಇತರ ಸದಸ್ಯರು ತಮಗೆ ಭಾರಿ ಲಾಭ ಬಂದಂತೆ ನಕಲಿ ಸ್ಕ್ರೀನ್‌ಶಾಟ್‌ಗಳನ್ನು ಹಂಚಿಕೊಂಡು, ವಂಚಕರನ್ನು ಹೊಗಳುವ ಮೂಲಕ ಸುಳ್ಳು ವಿಶ್ವಾಸವನ್ನು ಸೃಷ್ಟಿಸುತ್ತಾರೆ. ಇಂತಹ ನಕಲಿ ಬೆಂಬಲವನ್ನು ನಂಬಿ ಹೂಡಿಕೆದಾರರು ಮೋಸ ಹೋಗುತ್ತಿದ್ದಾರೆ ಎಂದು ಸೆಬಿ ಕಳವಳ ವ್ಯಕ್ತಪಡಿಸಿದೆ.
ಕಳೆದುಕೊಂಡ ಹಣವನ್ನು ಮರಳಿ ಪಡೆಯಲು ತಕ್ಷಣವೇ ಏನು ಮಾಡಬೇಕು?
ನೀವು ಇಂತಹ ನಕಲಿ ಆ್ಯಪ್ ಅಥವಾ ವಾಟ್ಸಾಪ್ ಗ್ರೂಪ್‌ಗಳಿಗೆ ಹಣ ಕಳುಹಿಸಿ ಮೋಸ ಹೋಗಿದ್ದರೆ, ತಕ್ಷಣ ಕಾರ್ಯಪ್ರವೃತ್ತರಾಗುವುದು ಅತ್ಯಂತ ಮುಖ್ಯ. ಮೊದಲಿಗೆ ಹಣ ವರ್ಗಾವಣೆಯಾದ ತಕ್ಷಣವೇ ನಿಮ್ಮ ಬ್ಯಾಂಕ್ ಅಥವಾ ಪಾವತಿ ಸಂಸ್ಥೆಗೆ ಮಾಹಿತಿ ನೀಡಿ ಖಾತೆಯನ್ನು ನಿರ್ಬಂಧಿಸಲು ಕೋರಬೇಕು. ನಂತರ ವಿಳಂಬ ಮಾಡದೆ ರಾಷ್ಟ್ರೀಯ ಸೈಬರ್ ಅಪರಾಧ ಸಹಾಯವಾಣಿ ಸಂಖ್ಯೆ 1930ಕ್ಕೆ ಕರೆ ಮಾಡಿ ದೂರು ದಾಖಲಿಸಬೇಕು. ಜೊತೆಗೆ ಅಧಿಕೃತ ರಾಷ್ಟ್ರೀಯ ಸೈಬರ್ ಕ್ರೈಮ್ ಪೋರ್ಟಲ್‌ನಲ್ಲಿ (cybercrime.gov.in) ಸಂಪೂರ್ಣ ವಿವರಗಳೊಂದಿಗೆ ದೂರು ದಾಖಲಿಸಬೇಕು. ಆರಂಭಿಕ ಹಂತದಲ್ಲೇ ದೂರು ನೀಡಿದರೆ, ವಂಚಕರು ಆ ಹಣವನ್ನು ಬೇರೆ ಖಾತೆಗಳಿಗೆ ವರ್ಗಾಯಿಸುವುದನ್ನು ಅಥವಾ ಎಟಿಎಂ ಮೂಲಕ ಹಿಂಪಡೆಯುವುದನ್ನು ತಡೆಹಿಡಿಯುವ ಸಾಧ್ಯತೆ ಹೆಚ್ಚಿರುತ್ತದೆ.
ಇಂತಹ ವಂಚನೆಗಳಿಂದ ರಕ್ಷಣೆ ಪಡೆಯಲು ಅಗತ್ಯ ಮುನ್ನೆಚ್ಚರಿಕೆಗಳು
ಯಾವುದೇ ವ್ಯಕ್ತಿ ಅಥವಾ ವೇದಿಕೆ ಷೇರು ಮಾರುಕಟ್ಟೆಯಲ್ಲಿ ನಿಶ್ಚಿತ ಅಥವಾ ದುಪ್ಪಟ್ಟು ಲಾಭದ ಭರವಸೆ ನೀಡಿದರೆ ಅದನ್ನು ನೇರವಾಗಿ ವಂಚನೆ ಎಂದು ಪರಿಗಣಿಸಬೇಕು, ಏಕೆಂದರೆ ನಿಯಮಗಳ ಪ್ರಕಾರ ಯಾವುದೇ ಮಾನ್ಯತೆ ಪಡೆದ ಸಂಸ್ಥೆಯೂ ಖಾತರಿ ಲಾಭದ ಭರವಸೆ ನೀಡುವಂತಿಲ್ಲ. ಅಪರಿಚಿತ ವಾಟ್ಸಾಪ್ ಗ್ರೂಪ್‌ಗಳಲ್ಲಿ ಹಂಚಿಕೊಳ್ಳಲಾಗುವ ಲಿಂಕ್‌ಗಳನ್ನು ಕ್ಲಿಕ್ ಮಾಡಬಾರದು ಅಥವಾ ಅಲ್ಲಿನ ಸಲಹೆಗಳನ್ನು ನಂಬಿ ಹೂಡಿಕೆ ಮಾಡಬಾರದು. ಯಾವುದೇ ಆ್ಯಪ್ ಡೌನ್‌ಲೋಡ್ ಮಾಡುವ ಮುನ್ನ ಅಧಿಕೃತ ಆ್ಯಪ್ ಸ್ಟೋರ್‌ಗಳಲ್ಲಿ ಪರಿಶೀಲಿಸಬೇಕು ಹಾಗೂ ಸೆಬಿ ಅಧಿಕೃತ ವೆಬ್‌ಸೈಟ್‌ಗೆ ಭೇಟಿ ನೀಡಿ ಆ ಸಂಸ್ಥೆಯು ಮಾನ್ಯತೆ ಪಡೆದಿದೆಯೇ ಎಂಬುದನ್ನು ಖಚಿತಪಡಿಸಿಕೊಳ್ಳಬೇಕು. ಕೇವಲ ಸೆಬಿ-ನೋಂದಾಯಿತ ಹೂಡಿಕೆ ಸಲಹೆಗಾರರಿಂದ ಮಾತ್ರ ಅಧಿಕೃತ ಸಲಹೆಗಳನ್ನು ಪಡೆಯುವುದು ನಿಮ್ಮ ಹಣಕ್ಕೆ ಸುರಕ್ಷಿತ.
ನವೆಂಬರ್ 1ರ ‘ಚಲೋ ದೆಹಲಿ’ ಮೆಗಾ ರ್‍ಯಾಲಿಗೆ ರಾಹುಲ್ ಗಾಂಧಿ ಕರೆ: ರೈತರು, ವಿದ್ಯಾರ್ಥಿಗಳಿಗೆ ಆಹ್ವಾನ
