ನವದೆಹಲಿ : ದೇಶದಲ್ಲಿ ತೀವ್ರ ಸ್ವರೂಪದ ‘ಎಲ್-ನಿನೋ’ (El Niño) ಹವಾಮಾನ ವಿದ್ಯಮಾನ ಎದುರಾಗಲಿದ್ದು, ಸಂಭಾವ್ಯ ಅಪಾಯವನ್ನು ಎದುರಿಸಲು ಸಿದ್ಧರಾಗುವಂತೆ 188 ಭಾರತೀಯ ವಿಜ್ಞಾನಿಗಳು ಹಾಗೂ ಖ್ಯಾತ ಪರಿಸರ ತಜ್ಞರು ಜಂಟಿಯಾಗಿ ಕ್ರಮಕ್ಕಾಗಿ ಕರೆ ನೀಡಿದ್ದಾರೆ.
ಎಲ್-ನಿನೋ ಎಂಬುದು ಜಾಗತಿಕ ಹವಾಮಾನ ಪ್ರಕ್ರಿಯೆಯಾಗಿದ್ದು, ಇದು ಭಾರತೀಯ ಮಾನ್ಸೂನ್ ಮಳೆಯನ್ನು ದುರ್ಬಲಗೊಳಿಸಿ ತೀವ್ರವಾದ ಬಿಸಿಲು, ಶೆಕೆ ಹಾಗೂ ಒಣ ಹವಾಮಾನ ಪರಿಸ್ಥಿತಿಗಳನ್ನು ಸೃಷ್ಟಿಸುತ್ತದೆ. ಇದು ಉಗಮಿಸುವ ಪೆಸಿಫಿಕ್ ಮಹಾಸಾಗರದಲ್ಲಿ ತಾಪಮಾನವು 0.5°C ಮಿತಿಯನ್ನು ದಾಟಿ ಆಗಸ್ಟ್ನಲ್ಲಿ ಬರೋಬ್ಬರಿ 2.6°C ತಲುಪಿದೆ. ಎಲ್-ನಿನೋ ಮೇ ತಿಂಗಳಲ್ಲೇ ಆರಂಭವಾಗಿದ್ದರೂ, ಭಾರತ ಸೇರಿದಂತೆ ಉತ್ತರ ಗೋಳಾರ್ಧದಲ್ಲಿ ಇದರ ಮುಖ್ಯ ಪರಿಣಾಮಗಳು ನವೆಂಬರ್ನಿಂದ ಮುಂದಿನ ವರ್ಷದವರೆಗೆ ಕಂಡುಬರಲಿವೆ. ತಜ್ಞರು ಈ ವಿದ್ಯಮಾನವನ್ನು ಸಂಭಾವ್ಯ ‘ಸೂಪರ್ ಎಲ್-ನಿನೋ’ ಎಂದು ಗುರುತಿಸಿದ್ದಾರೆ.
ಬಯಲುಸೀಮೆಗೆ ಏನಾಗಿದೆ ?
ಕೃಷಿ: ರಾಗಿ ಬೆಳೆ, ನೆಲಗಡಲೆ ಬಿತ್ತನೆ ವಿಳಂಬ, ಹಣ್ಣು ಹೂವು ತರಕಾರಿ ಬೆಳೆಗಳ ಇಳುವರಿ ಕುಸಿತ.
ಪಶುಸಂಗೋಪನೆ: ಮೇವಿನ ಕೊರತೆ, ಒಣಗಿದ ಗೋಮಾಳಗಳು, ಫೀಡ್ ಬೆಲೆ ಏರಿಕೆ, ದನಗಳ ಬಲವಂತದ ಮಾರಾಟ
ಅಂತರ್ಜಲ ಮತ್ತು ಕುಡಿಯುವ ನೀರು: ಖಾಲಿಯಾಗಿರುವ ಕೆರೆ- ಕುಂಟೆಗಳು, ಬತ್ತಿ ಹೋಗುತ್ತಿರುವ 1200 ಅಡಿಗಿಂತ ಹೆಚ್ಚು ಆಳದ ಕೊಳವೆಬಾವಿಗಳು.
ರೈತ ಆರ್ಥಿಕತೆ: ಬೆಳೆ ನಷ್ಟ, ಆರ್ಥಿಕ ಸಂಕಷ್ಠ, ಮೆೃಯೆಲ್ಲಾ ಸಾಲ, ಜೀವನೋಪಾಯ ಕಷ್ಠ, ವಲಸೆ.
ಭಾರತದ ಮೇಲೆ ನಿರೀಕ್ಷಿತ ವಿನಾಶಕಾರಿ ಪರಿಣಾಮಗಳು
ಸ್ಪಷ್ಟ ಪರಿಣಾಮಗಳು: ವ್ಯಾಪಕ ಪ್ರಮಾಣದಲ್ಲಿ ಹವಳಗಳ ಬಣ್ಣ ಕಳೆದುಕೊಳ್ಳುವಿಕೆ (coral bleaching) ಮತ್ತು ಅವುಗಳ ಸಾವು, ಹೆಚ್ಚಿನ ಕಾಡ್ಗಿಚ್ಚುಗಳು, ಪಶ್ಚಿಮ ಘಟ್ಟಗಳಲ್ಲಿನ ಬೃಹತ್ ಮಳೆಕಾಡಿನ ಮರಗಳ ಸಾವು.
ಮಾನವ ಜೀವನೋಪಾಯ: ಬರಗಾಲ ಮತ್ತು ತೀವ್ರ ಶಾಖದ ಹೆಚ್ಚಿನ ಸಾಧ್ಯತೆಯಿರುವುದರಿಂದ, ಇದು ರೈತರು, ಮೀನುಗಾರರು ಮತ್ತು ಕುರಿಗಾಹಿಗಳಿಗೆ ವಿನಾಶಕಾರಿಯಾಗಬಹುದು.
ಸೂಕ್ಷ್ಮ ಪರಿಣಾಮಗಳು: ಹಣ್ಣು ಬಿಡುವಲ್ಲಿ ವಿಳಂಬ, ಪ್ರಾಣಿಗಳ ನಡವಳಿಕೆಯಲ್ಲಿ ಬದಲಾವಣೆಗಳು.
ವಿಜ್ಞಾನಿಗಳು ಆತಂಕ ವ್ಯಕ್ತಪಡಿಸಲು ಕಾರಣಗಳೇನು? – ಪ್ರಮುಖ ಹೇಳಿಕೆಗಳು
ಜಯಶ್ರೀ ರತ್ನಂ, ಎನ್ಸಿಬಿಎಸ್ (NCBS)
ಮುಂಬರುವ ವರ್ಷವು ಉಷ್ಣವಲಯದ ಕಾಡುಗಳಿಗೆ ಒಂದು ಕಠಿಣ ಪರೀಕ್ಷೆಯಾಗಲಿದೆ. ಪಶ್ಚಿಮ ಘಟ್ಟಗಳಲ್ಲಿನ ಬೃಹತ್ ಅರಣ್ಯ ಮರಗಳು ಈಗಾಗಲೇ ತಮ್ಮ ಶಾಖ ಸಹಿಷ್ಣುತೆಯ ಮಿತಿಯನ್ನು ತಲುಪಿವೆ. ದೊಡ್ಡ ಮರಗಳು ಬರಗಾಲಕ್ಕೆ ವಿಶೇಷವಾಗಿ ದುರ್ಬಲವಾಗಿರುತ್ತವೆ. ನಗರ ಪ್ರದೇಶಗಳಲ್ಲಿ ಶಾಖ ಹೆಚ್ಚಾಗುವ ‘ಹೀಟ್ ಐಲ್ಯಾಂಡ್’ ಪರಿಣಾಮದಿಂದಾಗಿ ನಗರದ ಮರಗಳು ಕೂಡ ಅಪಾಯದಲ್ಲಿವೆ.
ರೋಹನ್ ಆರ್ಥರ್, ಸಮುದ್ರ ಜೀವಶಾಸ್ತ್ರಜ್ಞ, ಎನ್ಸಿಎಫ್ (NCF)
ಹವಳದ ದಿಬ್ಬಗಳು (coral reefs) ದೊಡ್ಡ ಪ್ರಮಾಣದ ನಾಶದಿಂದ ಚೇತರಿಸಿಕೊಳ್ಳಲು ಕನಿಷ್ಠ ಒಂದು ದಶಕದ ಸಮಯ ಬೇಕಾಗುತ್ತದೆ. ಕೊನೆಯ ಪ್ರಮುಖ ಎಲ್-ನಿನೋ ಕೇವಲ 2 ವರ್ಷಗಳ ಹಿಂದೆ (2024ರಲ್ಲಿ) ಸಂಭವಿಸಿತ್ತು. ಮುಂಬರುವ ಶಾಖದ ಅಲೆಯ (heatwave) ನಿರೀಕ್ಷಿತ ಪ್ರಮಾಣ ಮತ್ತು ತೀವ್ರತೆಯು ನಿಜಕ್ಕೂ ಭಯಾನಕ ಮುನ್ಸೂಚನೆಯಾಗಿದೆ.
ರಾಕ್ಸಿ ಮ್ಯಾಥ್ಯೂ ಕೋಲ್, ಹವಾಮಾನ ವಿಜ್ಞಾನಿ, ಐಐಟಿಎಂ ಪುಣೆ (IITM)
ಮಾನ್ಸೂನ್ ಮಳೆಯ ಕೊರತೆಯೊಂದಿಗೆ ಕೊನೆಗೊಳ್ಳುತ್ತಿದೆ, ಆದರೆ ಪರಿಣಾಮಗಳು ಅಲ್ಲಿಗೆ ನಿಲ್ಲುವುದಿಲ್ಲ. ಅವು ಮುಂದಿನ ಋತುಗಳಿಗೂ ವ್ಯಾಪಿಸಿ ಸರಣಿ ಪರಿಣಾಮಗಳನ್ನು ಉಂಟುಮಾಡಲಿವೆ—ಮಣ್ಣಿನ ತೇವಾಂಶದ ಕೊರತೆ, ಕಡಿಮೆ ನೀರಿನ ಸಂಗ್ರಹ, ಭೂಮಿ ಮತ್ತು ಸಮುದ್ರದ ಮೇಲಿನ ಶಾಖದ ಅಲೆಗಳು, ಬೆಳೆಗಳ ಮೇಲಿನ ಒತ್ತಡ, ಕಾಡ್ಗಿಚ್ಚು ಮತ್ತು ಹವಳಗಳ ಬಣ್ಣ ಕಳೆದುಕೊಳ್ಳುವಿಕೆ ಮುಂದುವರಿಯಲಿದೆ.
