ನವದೆಹಲಿ : ನೌಕರರ ಭವಿಷ್ಯ ನಿಧಿ ಸಂಸ್ಥೆಯ (EPFO) ಚಂದಾದಾರರಿಗೆ ಕೇಂದ್ರ ಸರ್ಕಾರ ಮತ್ತು ಇಪಿಎಫ್ಒ ಮಹತ್ವದ ಮಾಹಿತಿಯನ್ನು ನೀಡಿದೆ. ಭವಿಷ್ಯ ನಿಧಿ (PF) ಹಣವನ್ನು ಹಿಂಪಡೆಯುವಾಗ ಅನ್ವಯವಾಗುವ ಟಿಡಿಎಸ್ (TDS) ಕಡಿತ ನಿಯಮಗಳಲ್ಲಿ ಪ್ರಮುಖ ಬದಲಾವಣೆಗಳನ್ನು ಜಾರಿಗೆ ತರಲಾಗಿದೆ. ಈ ಹಿಂದೆ ಟಿಡಿಎಸ್ ವಿನಾಯಿತಿ ಪಡೆಯಲು ಸಲ್ಲಿಕೆಯಾಗುತ್ತಿದ್ದ ಹಳೆಯ ಫಾರ್ಮ್‌ಗಳ ಬದಲಿಗೆ ಹೊಸ ಫಾರ್ಮ್ ಅನ್ನು ಪರಿಚಯಿಸಲಾಗಿದೆ.
ಫಾರ್ಮ್ 15G ಹಾಗೂ 15H ಜಾಗಕ್ಕೆ ಫಾರ್ಮ್ 121 ಪ್ರವೇಶ
ಪಿಎಫ್ ಹಣ ವಿತ್‌ಡ್ರಾ ಮಾಡುವಾಗ ಟಿಡಿಎಸ್ ವಿನಾಯಿತಿ ಪಡೆಯಲು ಈ ಹಿಂದೆ 60 ವರ್ಷದೊಳಗಿನ ನೌಕರರು ಫಾರ್ಮ್ 15G ಹಾಗೂ ಹಿರಿಯ ನಾಗರಿಕರು ಫಾರ್ಮ್ 15H ಅನ್ನು ಸಲ್ಲಿಸಬೇಕಿತ್ತು. ಆದರೆ ಪ್ರಸ್ತುತ ಈ ಎರಡೂ ಫಾರ್ಮ್‌ಗಳ ಬದಲಾಗಿ ಕೇಂದ್ರ ಸರ್ಕಾರ ‘ಫಾರ್ಮ್ 121’ ಅನ್ನು ಜಾರಿಗೆ ತಂದಿದೆ. ಪಿಎಫ್ ಖಾತೆಯಿಂದ ಹಣ ಹಿಂಪಡೆಯುವಾಗ ಟಿಡಿಎಸ್ ಕಡಿತವಾಗದಂತೆ ತಡೆಯಲು ಇಪಿಎಫ್ಒ ಸದಸ್ಯರು ಇನ್ನು ಮುಂದೆ ಈ ಹೊಸ ಫಾರ್ಮ್ 121 ಅನ್ನು ಸಲ್ಲಿಸುವುದು ಕಡ್ಡಾಯವಾಗಿದೆ.
ಟಿಡಿಎಸ್ ಕಡಿತದ ನಿಯಮಗಳು ಮತ್ತು ಮಿತಿ
ಐದು ವರ್ಷಗಳ ನಿರಂತರ ಸೇವೆ ಪೂರ್ಣಗೊಳಿಸಿದ ನೌಕರರಿಗೆ ಪಿಎಫ್ ಹಣ ಹಿಂಪಡೆಯುವಾಗ ಯಾವುದೇ ಟಿಡಿಎಸ್ ಕಡಿತ ಅನ್ವಯಿಸುವುದಿಲ್ಲ. ಆದರೆ, ಐದು ವರ್ಷಗಳ ಸೇವಾ ಅವಧಿ ಪೂರ್ಣಗೊಳ್ಳುವ ಮೊದಲೇ ಪಿಎಫ್ ಖಾತೆಯಿಂದ 50 ಸಾವಿರ ರೂಪಾಯಿಗಿಂತ ಹೆಚ್ಚಿನ ಮೊತ್ತವನ್ನು ಹಿಂಪಡೆದರೆ ಟಿಡಿಎಸ್ ಕಡಿತವಾಗುತ್ತದೆ. ಹಿಂಪಡೆಯುವ ಮೊತ್ತ 50 ಸಾವಿರ ರೂಪಾಯಿಗಿಂತ ಕಡಿಮೆ ಇದ್ದರೆ ಯಾವುದೇ ಟಿಡಿಎಸ್ ಅನ್ವಯಿಸುವುದಿಲ್ಲ.
ಪ್ಯಾನ್ ಕಾರ್ಡ್ ಲಿಂಕ್ ಮತ್ತು ಟಿಡಿಎಸ್ ದರ
ಇಪಿಎಫ್ಒ ಪೋರ್ಟಲ್‌ನಲ್ಲಿ ಪ್ಯಾನ್ ಸಂಖ್ಯೆಯನ್ನು ಅಪ್‌ಡೇಟ್ ಮಾಡುವುದು ಅತ್ಯಂತ ಪ್ರಮುಖವಾಗಿದೆ. ಖಾತೆಗೆ ಪ್ಯಾನ್ ಲಿಂಕ್ ಆಗಿದ್ದರೆ ಶೇಕಡಾ 10 ರಷ್ಟು ಟಿಡಿಎಸ್ ಕಡಿತವಾಗಲಿದ್ದು, ಪ್ಯಾನ್ ಲಿಂಕ್ ಆಗಿರದಿದ್ದರೆ ಈ ಕಡಿತದ ಪ್ರಮಾಣ ಶೇಕಡಾ 20 ರವರೆಗೆ ಏರಿಕೆಯಾಗುವ ಸಾಧ್ಯತೆ ಇರುತ್ತದೆ.
5 ವರ್ಷಗಳ ಸೇವೆಗೂ ಮುನ್ನ ಟಿಡಿಎಸ್‌ನಿಂದ ವಿನಾಯಿತಿ ಯಾವಾಗ?
ಕೆಲವು ವಿಶೇಷ ಸಂದರ್ಭಗಳಲ್ಲಿ ಐದು ವರ್ಷಗಳ ಸೇವೆ ಪೂರ್ಣಗೊಳ್ಳದಿದ್ದರೂ ಟಿಡಿಎಸ್‌ನಿಂದ ವಿನಾಯಿತಿ ದೊರೆಯುತ್ತದೆ. ಒಂದು ಕಂಪನಿಯಿಂದ ಮತ್ತೊಂದು ಕಂಪನಿಗೆ ಬದಲಾದಾಗ ಪಿಎಫ್ ಹಣವನ್ನು ವರ್ಗಾವಣೆ (Transfer) ಮಾಡಿಕೊಂಡರೆ ಅದನ್ನು ನಿರಂತರ ಸೇವೆಯೆಂದು ಪರಿಗಣಿಸಲಾಗುತ್ತದೆ. ಇದಲ್ಲದೆ, ಗಂಭೀರ ಅನಾರೋಗ್ಯದ ಕಾರಣದಿಂದ ಹಣ ಹಿಂಪಡೆದಾಗ, ಕಂಪನಿ ಮುಚ್ಚಿದ ಕಾರಣದಿಂದ ಕೆಲಸ ಕಳೆದುಕೊಂಡಾಗ ಅಥವಾ ನೌಕರಿ ಕಳೆದುಕೊಂಡ ಸಂದರ್ಭದಲ್ಲಿ ಹಣ ಹಿಂಪಡೆದರೆ ಟಿಡಿಎಸ್ ಕಡಿತ ಅನ್ವಯಿಸುವುದಿಲ್ಲ.
ಟಿಡಿಎಸ್ ಕಡಿತವಾದರೆ ಮರುಪಾವತಿ ಹೇಗೆ?
ಒಂದು ವೇಳೆ ಪಿಎಫ್ ಹಣ ವಿತ್‌ಡ್ರಾ ಮಾಡುವಾಗ ಟಿಡಿಎಸ್ ಕಡಿತಗೊಂಡಿದ್ದರೆ ಆತಂಕಪಡುವ ಅಗತ್ಯವಿಲ್ಲ. ನೌಕರನ ಒಟ್ಟು ವಾರ್ಷಿಕ ಆದಾಯವು ಆದಾಯ ತೆರಿಗೆ ಮಿತಿಯೊಳಗೆ ಬರದಿದ್ದರೆ, ವಾರ್ಷಿಕ ಆದಾಯ ತೆರಿಗೆ ರಿಟರ್ನ್ಸ್ (ITR) ಸಲ್ಲಿಸುವ ಮೂಲಕ ಕಡಿತಗೊಂಡ ಹಣವನ್ನು ಮರುಪಾವತಿ (Refund) ರೂಪದಲ್ಲಿ ವಾಪಸ್ ಪಡೆಯಬಹುದು.
ಮೈಸೂರು ಕೇವಲ ಅರಮನೆಗಳ ನಗರವಲ್ಲ, ಅರಿವಿನ ಮನೆಗಳ ನಗರಿ : ಗವಿಮಠದ ಶ್ರೀಗಳ ಬಣ್ಣನೆ | Mysuru Dasara
