ನವದೆಹಲಿ : ಭಾರತದಲ್ಲಿ ಅತೀ ಹೆಚ್ಚು ಬಿಲಿಯನೇರ್ ನೆಲೆಸಿರುವ ನಗರಗಳ ಪಟ್ಟಿಯಲ್ಲಿ ದೇಶದ ವಾಣಿಜ್ಯ ನಗರಿ ಮುಂಬೈ ತನ್ನ ಅಗ್ರಸ್ಥಾನವನ್ನು ಭದ್ರಪಡಿಸಿಕೊಂಡಿದೆ. ‘ಎಂ3ಎಂ ಹುರುನ್ ಇಂಡಿಯಾ ರಿಚ್ ಲಿಸ್ಟ್’ ವರದಿಯ ಪ್ರಕಾರ, ಮುಂಬೈ ಬರೋಬ್ಬರಿ 465 ಸಿರಿವಂತರೊಂದಿಗೆ ದೇಶದಲ್ಲೇ ಮೊದಲ ಸ್ಥಾನದಲ್ಲಿದೆ. ಕೇವಲ ಮುಂಬೈ ನಗರವೊಂದರಲ್ಲೇ 93 ಡಾಲರ್ ಶತಕೋಟ್ಯಧಿಪತಿಗಳಿದ್ದಾರೆ ಎಂಬುದು ವಿಶೇಷ.
ಮುಂಬೈನ ನಂತರದ ಸ್ಥಾನದಲ್ಲಿ ರಾಷ್ಟ್ರ ರಾಜಧಾನಿ ನವದೆಹಲಿ ಗುರುತಿಸಿಕೊಂಡಿದ್ದು, ಇಲ್ಲಿ ಒಟ್ಟು 236 ಮಂದಿ ಅತಿ ಸಿರಿವಂತರು ವಾಸಿಸುತ್ತಿದ್ದಾರೆ. ಕೈಗಾರಿಕೆ, ರಿಯಲ್ ಎಸ್ಟೇಟ್ ಹಾಗೂ ಸಾಂಪ್ರದಾಯಿಕ ವ್ಯಾಪಾರ ಕ್ಷೇತ್ರಗಳಲ್ಲಿ ತೊಡಗಿಸಿಕೊಂಡಿರುವ ಗಣ್ಯರು ನವದೆಹಲಿಯ ಶ್ರೀಮಂತರ ಪಟ್ಟಿಯಲ್ಲಿ ಮುಂಚೂಣಿಯಲ್ಲಿದ್ದಾರೆ.
ದೇಶದ ಸಿಲಿಕಾನ್ ಸಿಟಿ ಎಂದೇ ಹೆಸರಾಗಿರುವ ಕರ್ನಾಟಕದ ಬೆಂಗಳೂರು ಈ ಪಟ್ಟಿಯಲ್ಲಿ ಮೂರನೇ ಸ್ಥಾನ ಪಡೆದುಕೊಂಡಿದೆ. ನಗರದಲ್ಲಿ ಒಟ್ಟು 129 ಮಂದಿ ಶ್ರೀಮಂತರು ನೆಲೆಸಿದ್ದು, ತಂತ್ರಜ್ಞಾನ, ಕೃತಕ ಬುದ್ಧಿಮತ್ತೆ ಹಾಗೂ ನವೋದ್ಯಮ (ಸ್ಟಾರ್ಟಪ್) ಕ್ಷೇತ್ರಗಳು ಬೆಂಗಳೂರಿನ ಆಸ್ತಿ ಹೆಚ್ಚಳಕ್ಕೆ ಪ್ರಮುಖ ಕಾರಣವಾಗಿವೆ.
ಅದಾನಿ ನಂ.1, ಅಂಬಾನಿಗೆ ಎರಡನೇ ಸ್ಥಾನ
ಇತ್ತೀಚಿನ ವರದಿಯ ಪ್ರಕಾರ, ಗೌತಮ್ ಅದಾನಿ ಮತ್ತು ಅವರ ಕುಟುಂಬವು ಭಾರತದ ಅತ್ಯಂತ ಶ್ರೀಮಂತರ ಪಟ್ಟಿಯಲ್ಲಿ ಮತ್ತೆ ಮೊದಲ ಸ್ಥಾನಕ್ಕೇರಿದೆ. ಅದಾನಿ ಕುಟುಂಬದ ಸಂಪತ್ತು ಶೇಕಡಾ 13 ರಷ್ಟು ಹೆಚ್ಚಳವಾಗಿದ್ದು, ಒಟ್ಟು ಆಸ್ತಿ ರೂ. 9.23 ಲಕ್ಷ ಕೋಟಿಗೆ ತಲುಪಿದೆ. ಇಷ್ಟು ದಿನ ಅಗ್ರಸ್ಥಾನದಲ್ಲಿದ್ದ ಮುಕೇಶ್ ಅಂಬಾನಿ ಮತ್ತು ಕುಟುಂಬವು ಶೇಕಡಾ 10 ರಷ್ಟು ಇಳಿಕೆಯೊಂದಿಗೆ ರೂ. 8.63 ಲಕ್ಷ ಕೋಟಿ ಸಂಪತ್ತಿನೊಂದಿಗೆ ಎರಡನೇ ಸ್ಥಾನಕ್ಕೆ ಜಾರಿದೆ.
ಹೆಚ್ಚುತ್ತಿರುವ ಭಾರತೀಯ ಕೋಟ್ಯಧಿಪತಿಗಳ ಸಂಖ್ಯೆ
ದೇಶದಲ್ಲಿ ಕನಿಷ್ಠ ರೂ. 1,000 ಕೋಟಿಗೂ ಅಧಿಕ ಆಸ್ತಿ ಹೊಂದಿರುವ ಒಟ್ಟು 1,810 ವ್ಯಕ್ತಿಗಳನ್ನು ಈ ಪಟ್ಟಿ ಒಳಗೊಂಡಿದೆ. ಇವರ ಒಟ್ಟು ಸಂಪತ್ತು ರೂ. 187.5 ಟ್ರಿಲಿಯನ್ ಆಗಿದ್ದು, ಇದು ಭಾರತದ ಒಟ್ಟು ಜಿಡಿಪಿಯ ಬಹುತೇಕ ಅರ್ಧದಷ್ಟಿದೆ. ಕಳೆದ ಐದು ವರ್ಷಗಳಲ್ಲಿ ಭಾರತದ ಡಾಲರ್ ಶತಕೋಟ್ಯಧಿಪತಿಗಳ ಸಂಖ್ಯೆ 237 ರಿಂದ 391 ಕ್ಕೆ ಏರಿಕೆಯಾಗಿದ್ದು, ಸಿರಿವಂತರ ಒಟ್ಟಾರೆ ಬೆಳವಣಿಗೆ ವೇಗವಾಗಿ ಮುನ್ನುಗ್ಗುತ್ತಿದೆ.
