ಇರಾನ್ ವಿರುದ್ಧ ಅಮೆರಿಕ ಮತ್ತು ಇಸ್ರೇಲ್ ನಡೆಸುತ್ತಿರುವ ಯುದ್ಧವು ದುಬೈನ ಆರ್ಥಿಕತೆಯ ಮೇಲೆ ಭೀಕರ ಪರಿಣಾಮ ಬೀರಿದೆ. ಸಾವಿರಾರು ಕೋಟಿ ರೂಪಾಯಿಗಳ ನಷ್ಟದ ಭೀತಿಯಲ್ಲಿದೆ ದುಬೈ.ಈಗಿನ ಯುದ್ಧದ ವಾತಾವರಣದಿಂದಾಗಿ ವಿಮಾನಗಳ ಹಾರಾಟ ಸ್ಥಗಿತಗೊಂಡಿದ್ದು, ದುಬೈ ಆರ್ಥಿಕ ಹೊಡೆತ ಅನುಭವಿಸುತ್ತಿದೆ. ಯುದ್ಧದ ಕಾರಣದಿಂದ ದುಬೈನ ಬೆನ್ನೆಲುಬಾದ ಪ್ರವಾಸೋದ್ಯಮ ಮತ್ತು ರಿಯಲ್ ಎಸ್ಟೇಟ್ ವ್ಯವಹಾರಗಳೂ ಕುಸಿಯಲಿವೆ.
2025ರ ಮೊದಲ ತ್ರೈಮಾಸಿಕದಲ್ಲೇ ಇಲ್ಲಿ 2.34 ಕೋಟಿ ಪ್ರಯಾಣಿಕರು ಸಂಚರಿಸಿದ್ದರು. ಅಂದರೆ ಪ್ರತಿದಿನ ಸರಾಸರಿ 2.70 ಲಕ್ಷ ಜನರು ಇಲ್ಲಿಂದ ಪ್ರಯಾಣ ಮಾಡುತ್ತಾರೆ. ಎಮಿರೇಟ್ಸ್ ಏರ್ಲೈನ್ಸ್ ಪ್ರತಿದಿನ ಜಾಗತಿಕವಾಗಿ ಅಂದಾಜು 800 ರಿಂದ 850 ಕೋಟಿ ರೂಪಾಯಿ ಆದಾಯ ಗಳಿಸುತ್ತದೆ.
ಒಬ್ಬ ಪ್ರಯಾಣಿಕನಿಂದ ವಿಮಾನ ನಿಲ್ದಾಣಕ್ಕೆ ಶುಲ್ಕ ಮತ್ತು ಶಾಪಿಂಗ್ ಮೂಲಕ ಅಂದಾಜು 40 ರಿಂದ 70 ಡಾಲರ್ ಆದಾಯ ಬರುತ್ತದೆ. ವಿಮಾನಗಳು ರದ್ದಾದಲ್ಲಿ ಕೇವಲ ವಿಮಾನ ನಿಲ್ದಾಣವೊಂದಕ್ಕೇ ದಿನಕ್ಕೆ ಸುಮಾರು 80 ರಿಂದ 150 ಕೋಟಿ ರೂಪಾಯಿಗಳಿಗೂ ಹೆಚ್ಚು ನಷ್ಟವಾಗುತ್ತಿದೆ.
ವಿಮಾನಯಾನ, ಪ್ರವಾಸೋದ್ಯಮ ಮತ್ತು ವ್ಯಾಪಾರ ಎಲ್ಲವನ್ನೂ ಲೆಕ್ಕ ಹಾಕಿದರೆ, ಕೇವಲ 24 ಗಂಟೆಗಳಲ್ಲಿ ದುಬೈಗೆ ಸಾವಿರಾರು ಕೋಟಿ ರೂಪಾಯಿಗಳ (ನೂರಾರು ಮಿಲಿಯನ್ ಡಾಲರ್) ನಷ್ಟ ಉಂಟಾಗುವ ಸಾಧ್ಯತೆಯಿದೆ.ಯುದ್ಧದ ಭೀತಿಯಿಂದ ದುಬೈನ ಪ್ರಮುಖ ಷೇರು ಸೂಚ್ಯಂಕಗಳು ಈಗಾಗಲೇ ಕುಸಿತ ಕಾಣುತ್ತಿದ್ದು, ಹೂಡಿಕೆದಾರರಲ್ಲಿ ಆತಂಕ ಮೂಡಿಸಿದೆ.
