ತಮ್ಮ ಸಂಶೋಧನಾ ಹಾಗೂ ವಿಶ್ಲೇಷಣಾ ವಿಡಿಯೋಗಳಿಗೆ ಜನಪ್ರಿಯರಾಗಿರುವ ಧೃವ್‌ ರಾಠಿ ಮತ್ತೆ ಸುದ್ದಿಯಲ್ಲಿದ್ದಾರೆ.
ಸೋಮವಾರ ಸಂಜೆ, ‘ಡರಾ ಹುವಾ ಡಿಕ್ಟೇಟರ್‍’ ಹೆಸರಿನಲ್ಲಿ ಪ್ರಕಟಿಸಿದ ವಿಡಿಯೋ 20 ಗಂಟೆಗಳಲ್ಲಿ 1.07 ಕೋಟಿ ವ್ಯೂವ್ಸ್‌ ಪಡೆದು ಚರ್ಚೆಯಲ್ಲಿದೆ.
ಧೃವ್‌ ರಾಠಿ ತಮ್ಮ ವಿಡಿಯೋಗಳ ಮೂಲಕ ಜನಪ್ರಿಯರಾದವರು. ಬಿಜೆಪಿ ದ್ವಂದ್ವ ನೀತಿ, ಕೋಮುದ್ವೇಷ, ಹುಸಿ ಆಶ್ವಾಸನೆ, ಭ್ರಷ್ಟಾಚಾರವನ್ನು ತಮ್ಮ ಅಧ್ಯಯನ ಹಾಗೂ ವಿಶ್ಲೇಷಣೆಗಳ ಮೂಲಕ ಬಯಲು ಮಾಡುತ್ತಾ ಬಂದವರು.
ತಿಂಗಳ ಹಿಂದೆ ಭಾರತ ಸರ್ವಾಧಿಕಾರದತ್ತ ವಾಲುತ್ತಿದೆ ಎಂಬ ವಿಡಿಯೋವೊಂದನ್ನು ಪ್ರಕಟಿಸಿದ್ದರು. ಸಾಂವಿಧಾನಿಕ ಸಂಸ್ಥೆಗಳನ್ನು ಬಳಸಿಕೊಂಡು ವಿಪಕ್ಷಗಳನ್ನು ನಿಶ್ಶಸ್ತ್ರಗೊಳಿಸುವ ಯತ್ನ ಪ್ರಜಾಪ್ರಭುತ್ವದ ಎಲ್ಲ ನಿಯಮಗಳನ್ನು ಉಲ್ಲಂಘಿಸುತ್ತಿರುವ ಬಗ್ಗೆ ವಿವರವಾಗಿ ಚರ್ಚಿಸಿದ್ದ ಧೃವ್‌ ರಾಠಿ ಮೋದಿ, ಸರ್ವಾಧಿಕಾರಿಯಾಗುತ್ತಿದ್ದಾರ? ಎಂದು ಪ್ರಶ್ನಿಸಿತ್ತು. ಈ ವಿಡಿಯೋ 2.4 ಕೋಟಿ ವ್ಯೂವ್‌ಗಳನ್ನು ಪಡೆದುಕೊಂಡಿತ್ತು.
ಇದರ ಬೆನ್ನಲ್ಲೇ ಎಲೆಕ್ಟೊರಲ್‌ ಬಾಂಡ್‌ ಪ್ರಕರಣವನ್ನು ದೇಶದ ಅತಿ ದೊಡ್ಡ ಹಗರಣ ಎಂದು ಕರೆದು ಮತ್ತೊಂದು ವಿಡಿಯೋವನ್ನು ಹಂಚಿಕೊಂಡಿದ್ದರು. ಕಳೆದ ಒಂದು ತಿಂಗಳಲ್ಲಿ ಬಿಜೆಪಿ ವಿಪಕ್ಷಗಳ ಮೇಲೆ ನಡೆಸುತ್ತಿರುವ ದಾಳಿ ಹಾಗೂ ಕಳೆದ ಒಂದು ವಾರದಲ್ಲಿ ಬಿಜೆಪಿಗೆ ನ್ಯಾಯಾಂಗದಲ್ಲಿ ಆಗುತ್ತಿರುವ ಹಿನ್ನಡೆಯ ಹಿನ್ನೆಲೆಯಲ್ಲಿ ಡಿಕ್ಟೇಟರ್‍ ಹೆದರಿದ್ದಾರಾ? ಎಂದು ಪ್ರಶ್ನಿಸುವ ವಿಡಿಯೋವನ್ನು ಸೋಮವಾರ ಪ್ರಕಟಿಸಿದ್ದಾರೆ.
ಇಪ್ಪತ್ತಮೂರು ನಿಮಿಷಗಳ ವಿಡಿಯೋದಲ್ಲಿ ಪ್ರಜಾಪ್ರಭುತ್ವ ಉಳಿಸುವ ಜವಾಬ್ದಾರಿ ಪ್ರತಿಯೊಬ್ಬ ಭಾರತೀಯನದ್ದು ಎಚ್ಚರಿಸಿದ್ದಾರೆ. ಪೂರ್ಣ ವಿಡಿಯೋ ಇಲ್ಲಿದೆ. https://www.youtube.com/watch?v=JyJd111Ym7U&t=614s
