ಕೇರಳ ಎಂದರೆ ಹರತಾಳ್‌ ಅನ್ನುವಂತೆ ಕೇರಳದ ರಾಜಕೀಯ ಪಕ್ಷಗಳು ಮಾಡಿವೆ. ಕೇರಳದಲ್ಲಿ ಯಾವಾಗ ಪ್ರತಿಭಟನೆಗಳು ನಡೆಯುತ್ತೆ, ಯಾವಾಗ ಬಸ್‌ ಇಲ್ಲದೆ ಪರದಾಡಬೇಕು, ಯಾವಾಗ ಪ್ರತಿಭಟನಾ ನಿಮಿತ್ತ ಟ್ರಾಫಿಕ್‌ ಉಂಟಾಗಬಹುದು ಎಂಬುದನ್ನು ಊಹಿಸಲೂ ಸಾಧ್ಯವಿಲ್ಲವೆಂಬ ಪರಿಸ್ಥಿತಿ ಕೇರಳದಲ್ಲಿ ವ್ಯಾಪಕವಾಗಿತ್ತು. ಕೇರಳದಲ್ಲಿ ನಡೆಯುವ ಪ್ರತಿಭಟನೆಗಳ ಬಗ್ಗೆ ಹಲವು ಮಳೆಯಾಲಂ ಸಿನೆಮಾಗಳಲ್ಲಿ ವಿಡಂಬನೆಗಳ ಮೂಲಕ ಟೀಕೆ ಮಾಡಲಾಗುತ್ತಿತ್ತು.
ಇದೀಗ ಅಂತಹದ್ದೇ ಪ್ರತಿಭಟನೆಯೊಂದು ಸಿನೆಮಾ ನಟರೊಬ್ಬರ ಕಾರಿನ ಗಾಜು ಒಡೆಯುವಲ್ಲಿ ಪರ್ಯಾವಸಾನಗೊಂಡಿದೆ. ಇಂಧನ ಹಾಗೂ ದಿನಬಳಕೆ ವಸ್ತುಗಳ ಬೆಲೆ ಏರಿಕೆ ವಿರುದ್ಧ ಎಡಪಲ್ಲಿ-ವೈಟಿಲ್ಲಾ ರಾಷ್ಟ್ರೀಯ ಹೆದ್ದಾರಿಯಲ್ಲಿ ಸೋಮವಾರ ಕೇರಳ ಕಾಂಗ್ರೆಸ್ ಹಮ್ಮಿಕೊಂಡ ಪ್ರತಿಭಟನೆಯಿಂದಾಗಿ ಎರಡು ತಾಸುಗಳಿಗೂ ಅಧಿಕ ಕಾಲ ಸಾರ್ವಜನಿಕರು ಪರದಾಡುವಂತಾಗಿತ್ತು. ಇದರಿಂದಾಗಿ ಉಂಟಾದ ಟ್ರಾಫಿಕ್‌ ಜಾಮಿನಲ್ಲಿ ಎರಡು ತಾಸುಗಳಿಗೂ ಅಧಿಕ ಕಾಲ ಸಿಲುಕಿಕೊಂಡ ಮಲೆಯಾಳಂ ಖ್ಯಾತ ನಟ ಪ್ರತಿಭಟನಾಕಾರರ ವಿರುದ್ಧ ಸ್ಥಳದಲ್ಲೇ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
ಕಾರಿನಿಂದ ಇಳಿದ ರಾಜ್ಯಪ್ರಶಸ್ತಿ ವಿಜೇತ ನಟ ಜೋಜು ಜೋರ್ಜ್‌ ನಿಮ್ಮ ಪ್ರತಿಭಟನೆಗಳು ಸಾಮಾನ್ಯ ಜನರಿಗೆ ತೊಂದರೆ ಕೊಡುವಂತಿರಬಾರದು, ಕಳೆದ ಎರಡು ಗಂಟೆಗಳಿಂದಲೂ ಅಧಿಕ ಕಾಲ ಜನರು ರಸ್ತೆಯಲ್ಲೇ ಸಿಲುಕಿಕೊಂಡಿದ್ದಾರೆ ಎಂದು ಪ್ರತಿಭಟನಾನಿರತ ಕಾಂಗ್ರೆಸ್ ಕಾರ್ಯಕರ್ತರ ವಿರುದ್ಧ ಆಕ್ರೋಶಗೊಂಡಿದ್ದಾರೆ.
ಇದು ನಟ ಹಾಗೂ ಕಾಂಗ್ರೆಸ್ ಕಾರ್ಯಕರ್ತರ ನಡುವಿನ ಜಟಾಪಟಿಗೆ ಕಾರಣವಾಗಿದ್ದು, ನಟನ ವಿರುದ್ಧ ಕೆಂಡಾಮಂಡಲರಾದ ಕಾಂಗ್ರೆಸ್ ಕಾರ್ಯಕರ್ತರು ನಟನ ಕಾರಿನ ಗ್ಲಾಸು ಹೊಡೆದು ದಾಂಧಲೆ ಮಾಡಿದ್ದಾರೆ.
ನಟ ಕುಡಿದ ಮತ್ತಿನಲ್ಲಿದ್ದರು ಹಾಗೂ ಮಹಿಳಾ ಕಾರ್ಯಕರ್ತರೊಂದಿಗೆ ಅನುಚಿತವಾಗಿ ವರ್ತಿಸಿದ್ದಾರೆ ಎಂದು ಆರೋಪಿಸಿರುವ ಕಾಂಗ್ರೆಸ್ ಕಾರ್ಯಕರ್ತರು ನಟನ ವಿರುದ್ಧ ದೂರು ದಾಖಲಿಸಿದ್ದಾರೆ. ನಟನನ್ನು ವಶಕ್ಕೆ ಪಡೆದ ಪೊಲೀಸರು ವೈದ್ಯಕೀಯ ಪರೀಕ್ಷೆಗೆ ರವಾನಿಸಿದ್ದಾರೆ ಎಂದು ಇಂಡಿಯಾ ಟುಡೆ ವರದಿ ಮಾಡಿದೆ.
ಕಾಂಗ್ರೆಸ್ ಕೂಡ ನಟನ ವಿರುದ್ಧ ದೂರು ದಾಖಲಿಸಿದೆ, ಈ ಕಾರಣದಿಂದಾಗಿ ಅವರನ್ನು ಪೊಲೀಸ್ ಠಾಣೆಗೆ ಕರೆದೊಯ್ಯಲಾಯಿತು. ಪೊಲೀಸರು ನಟನ ವಾಹನವನ್ನೂ ವಶಕ್ಕೆ ಪಡೆದು ವೈದ್ಯಕೀಯ ಪರೀಕ್ಷೆಗೆ ಒಳಪಡಿಸಿದ್ದಾರೆ. ಹಾಗೂ ಅವರ ವಾಹನದ ಗಾಜು ಒಡೆದವರ ವಿರುದ್ಧವೂ ಕ್ರಮ ಕೈಗೊಳ್ಳಲಾಗುವುದು ಎಂದು ಪೊಲೀಸರು ತಿಳಿಸಿದ್ದಾರೆ.
ಪ್ರತಿಭಟನೆ ಮಾಡಲು ಯಾವುದೇ ಲಿಖಿತ ಪರವಾನಿಗೆಯನ್ನು ಪ್ರತಿಭಟನಾಕಾರರು ಪಡೆದುಕೊಂಡಿರಲಿಲ್ಲ ಎನ್ನುವುದನ್ನೂ ಪೊಲೀಸರು ತಿಳಿಸಿದ್ದಾರೆ.
ಅದಾಗ್ಯೂ, ಪೊಲೀಸರಿಂದ ಅನುಮತಿ ಪಡೆದಿರುವುದಾಗಿ ಜಿಲ್ಲಾ ಕಾಂಗ್ರೆಸ್ ಸಮಿತಿ (ಡಿಸಿಸಿ) ಅಧ್ಯಕ್ಷ ಮೊಹಮ್ಮದ್ ಶಿಯಾಸ್ ಹೇಳಿದ್ದಾರೆ. ಜೋಜು ಜಾರ್ಜ್ ಕುಡಿದ ಅಮಲಿನಲ್ಲಿ ಪಕ್ಷದ ಮಹಿಳಾ ಕಾರ್ಯಕರ್ತರೊಂದಿಗೆ ಅನುಚಿತವಾಗಿ ವರ್ತಿಸಿದ್ದಾರೆ ಎಂದು ಶಿಯಾಸ್ ಆರೋಪಿಸಿದ್ದಾರೆ.
ಕೇರಳ ಪ್ರದೇಶ ಕಾಂಗ್ರೆಸ್ ಸಮಿತಿ (ಕೆಪಿಸಿಸಿ) ಮುಖ್ಯಸ್ಥ ಕೆ ಸುಧಾಕರನ್ ಅವರು ಜೋಜು ಜಾರ್ಜ್ ಅವರ ಕ್ರಮವನ್ನು ಖಂಡಿಸಿದ್ದು, ಜಾರ್ಜ್ ವಿರುದ್ಧ ಕಾನೂನು ಕ್ರಮಕ್ಕೆ ಒತ್ತಾಯಿಸಿದ್ದಾರೆ.
ಇದೇ ವೇಳೆ ಸುದ್ದಿಗಾರರೊಂದಿಗೆ ಮಾತನಾಡಿದ ಜೋಜು ಜಾರ್ಜ್, ರಸ್ತೆ ತಡೆ ನಡೆಸಿ ಪ್ರತಿಭಟನೆ ನಡೆಸಿರುವುದು ಸ್ವೀಕಾರಾರ್ಹವಲ್ಲ, ಸ್ಥಳೀಯ ಕಾಂಗ್ರೆಸ್ ಮುಖಂಡರು ನಿಂದಿಸಿದ್ದಾರೆ ಎಂದು ಆರೋಪಿಸಿದರು.
ಪ್ರತಿಭಟನೆಯನ್ನು “ನಾಚಿಕೆಗೇಡಿನ ಕೃತ್ಯ” ಎಂದು ಕರೆದ ಜಾರ್ಜ್, ತಮ್ಮ ವಿವಿಧ ಅಗತ್ಯಗಳಿಗಾಗಿ ತಮ್ಮ ಮನೆಗಳಿಂದ ಹೊರಬರುವ ಜನರ ಮೇಲೆ ಪರಿಣಾಮ ಬೀರುವುದರಿಂದ ಇಂತಹ ಆಂದೋಲನಗಳು ಮತ್ತೆ ಪುನರಾವರ್ತಿಸಬಾರದು. ನಾನು ಯಾವುದೇ ಪಕ್ಷದ ವಿರುದ್ಧ ಅಲ್ಲ. ಕೆಲವರು ಕಾಂಗ್ರೆಸ್‌ಗೆ ಮುಜುಗರ ತರಲು ಇಳಿದಿದ್ದಾರೆ. ಯಾವುದೇ ರಾಜಕೀಯ ಪಕ್ಷಗಳು ಇದನ್ನು ಮಾಡಬಾರದು. ಇಂತಹ ಪ್ರತಿಭಟನೆಗಳಿಂದ ಜನರಿಗೆ ತೊಂದರೆಯೇ ಹೊರತು ಏರಿರುವ ಬೆಲೆ ಇಳಿಯುವುದಿಲ್ಲ ಎಂದು ಜೋಜು ಹೇಳಿದ್ದಾರೆ.
‘ನಾನು ಮಾಡಿದ್ದರಲ್ಲಿ ತಪ್ಪೇನೂ ಕಾಣುತ್ತಿಲ್ಲ. ಮಹಿಳಾ ಕಾರ್ಯಕರ್ತರೊಂದಿಗೆ ಮಾತನಾಡಿಲ್ಲ. ತಾನು ಕುಡಿದಿಲ್ಲವೆಂದು ಸಾಬೀತುಪಡಿಸಲು ತಪಾಸಣೆಗಾಗಿ ಆಸ್ಪತ್ರೆಗೆ ಹೋಗುತ್ತೇನೆ. ಐದು ವರ್ಷಗಳಿಂದ ಮದ್ಯಪಾನ ಮಾಡುತ್ತಿಲ್ಲ. ಈ ಹಿಂದೆ ಚೆನ್ನಾಗಿ ಕುಡಿಯುತ್ತಿದ್ದೆ. ಮಹಿಳೆಯರ ಜತೆ ಯಾವತ್ತೂ ಅಸಭ್ಯವಾಗಿ ವರ್ತಿಸಿಲ್ಲ. ಅವರ ಮೌಲ್ಯ ನನಗೆ ಗೊತ್ತು. ನಾನು ಮಾಡಿದ್ದಕ್ಕೆ ನಾನು ಕ್ಷಮೆ ಕೇಳುವುದಿಲ್ಲ ಎಂದು ಜೋಜು ಹೇಳಿದ್ದಾರೆ.
