ಭಾರತದ ಮುಖ್ಯ ನ್ಯಾಯಮೂರ್ತಿ ಎನ್‌ವಿ ರಮಣ ಅವರು ಸುಪ್ರೀಂ ಕೋರ್ಟ್‌ನ ಕೊಲಿಜಿಯಂ ಶಿಫಾರಸು ಮಾಡಿದ ಒಟ್ಟು 37 ಮಹಿಳಾ ಅಭ್ಯರ್ಥಿಗಳ ಪೈಕಿ 17 ಮಂದಿಯನ್ನು ಮಾತ್ರ ಈವರೆಗೆ ನೇಮಕ ಮಾಡಲಾಗಿದ್ದು, ಉಳಿದ ಹೆಸರುಗಳು ಕೇಂದ್ರ ಸರ್ಕಾರದ ಬಳಿ ಇನ್ನೂ ಬಾಕಿ ಇವೆ ಎಂದು ಎನ್‌ವಿ ರಮಣ ಹೇಳಿದ್ದಾರೆ. ಮಾತ್ರವಲ್ಲದೆ ಕಾನೂನು ಶಿಕ್ಷಣದಲ್ಲಿ ಹೆಣ್ಣುಮಕ್ಕಳಿಗೆ ಮೀಸಲಾತಿ ನೀಡಬೇಕು ಎಂದು ಸಿಜೆಐ ಕರೆ ನೀಡಿದ್ದಾರೆ.
“ಉನ್ನತ ನ್ಯಾಯಾಲಯಗಳಿಗೆ ನಾವು ಇದುವರೆಗೆ 192 ಅಭ್ಯರ್ಥಿಗಳನ್ನು ಶಿಫಾರಸು ಮಾಡಿದ್ದೇವೆ. ಇವರಲ್ಲಿ 37 ಅಭ್ಯರ್ಥಿಗಳು ಅಂದರೆ ಶೇ.19 ರಷ್ಟು ಮಹಿಳೆಯರು. ಇದು ನಿಸ್ಸಂಶಯವಾಗಿ ಉಚ್ಚ ನ್ಯಾಯಾಲಯಗಳಲ್ಲಿ ಈಗಿರುವ ಮಹಿಳಾ ನ್ಯಾಯಾಧೀಶರ ಶೇಕಡಾ 11.8 ಕ್ಕಿಂತ ಹೆಚ್ಚು. ಆದರೆ ದುರದೃಷ್ಟವಶಾತ್, ಹೈಕೋರ್ಟಿಗೆ ಶಿಫಾರಸು ಮಾಡಲಾದ 37 ಮಹಿಳೆಯರಲ್ಲಿ 17 ಮಂದಿಯನ್ನು ಮಾತ್ರ ನೇಮಕ ಮಾಡಲಾಗಿದೆ ”ಎಂದು ಸಿಜೆಐ ಮೊದಲ ಬಾರಿ ಆಚರಿಸಲಾಗುತ್ತಿರುವ ‘ಮಹಿಳಾ ನ್ಯಾಯಾಧೀಶರ ಅಂತರರಾಷ್ಟ್ರೀಯ ದಿನ’ದ ಆನ್‌ಲೈನ್ ಈವೆಂಟ್‌ನ ತಮ್ಮ ಭಾಷಣದಲ್ಲಿ ಹೇಳಿದ್ದಾರೆ
ವೃತ್ತಿಯಲ್ಲಿ ಹೆಚ್ಚಿನ ಮಹಿಳಾ ಪ್ರಾತಿನಿಧ್ಯದ ಅಗತ್ಯವನ್ನು ಒತ್ತಿ ಹೇಳಿದ ಸಿಜೆಐ, ಕಾನೂನು ಶಿಕ್ಷಣದಲ್ಲಿ ಹೆಣ್ಣುಮಕ್ಕಳಿಗೆ ಮೀಸಲಾತಿ ನೀಡಬೇಕೆಂದು ಕರೆ ನೀಡಿದರು. “ನಾನು ಕಾನೂನು ಶಿಕ್ಷಣದಲ್ಲಿ ಹೆಣ್ಣುಮಕ್ಕಳ ಮೀಸಲಾತಿಯನ್ನು ಬಲವಾಗಿ ಪ್ರಸ್ತಾಪಿಸುತ್ತೇನೆ. ಅಂತಹ ಪ್ರಯತ್ನಗಳು ಈಗಾಗಲೇ ಜಿಲ್ಲಾ ಮಟ್ಟದಲ್ಲಿ ಮಹಿಳಾ ನ್ಯಾಯಾಂಗ ಅಧಿಕಾರಿಗಳನ್ನು ನೇಮಿಸುವಲ್ಲಿ ಉತ್ತೇಜಕ ಫಲಿತಾಂಶಗಳನ್ನು ನೀಡಿದೆ ಎಂದು ಡೇಟಾ ಸಾಬೀತುಪಡಿಸುತ್ತದೆ” ಎಂದೂ ಅವರು ಹೇಳಿದ್ದಾರೆ.
ಕಳೆದ ವರ್ಷ ಏಪ್ರಿಲ್ 28 ರಂದು ಸಭೆ ಸೇರಿದ್ದ ವಿಶ್ವಸಂಸ್ಥೆಯ ಸಾಮಾನ್ಯ ಸಭೆಯು ಪ್ರತಿ ವರ್ಷ ಮಾರ್ಚ್ 10 ಅನ್ನು ಮಹಿಳಾ ನ್ಯಾಯಾಧೀಶರ ಅಂತರರಾಷ್ಟ್ರೀಯ ದಿನವನ್ನಾಗಿ ಆಚರಿಸಲು ನಿರ್ಧರಿಸಿತ್ತು. ಕತಾರ್ ಮಂಡಿಸಿದ ಈ ನಿರ್ಣಯವನ್ನು ಬೆಂಬಲಿಸಿದ ರಾಷ್ಟ್ರಗಳಲ್ಲಿ ಭಾರತವೂ ಒಂದು.
ನ್ಯಾಯಮೂರ್ತಿ ರಮಣ ಅವರು, “ವಕೀಲ ವೃತ್ತಿಯು ಇನ್ನೂ ಪುರುಷ ಪ್ರಾಬಲ್ಯವನ್ನು ಹೊಂದಿದೆ, ಮಹಿಳೆಯರ ಪ್ರಾತಿನಿಧ್ಯ ತೀವ್ರ ಕಡಿಮೆ ಇದೆ” ಎಂದ ಅವರು “ಮಾರ್ಚ್ 10 ಅನ್ನು ಅಂತರರಾಷ್ಟ್ರೀಯ ಮಹಿಳಾ ನ್ಯಾಯಾಧೀಶರ ದಿನವೆಂದು ಗುರುತಿಸುವುದು ‘ಜಾಗೃತಿ ಮೂಡಿಸಲು ಮತ್ತು ರಾಜಕೀಯ ಇಚ್ಛಾಶಕ್ತಿಯನ್ನು ಸಜ್ಜುಗೊಳಿಸಲು’ ಒಂದು ಪ್ರಮುಖ ಹೆಜ್ಜೆಯಾಗಿದೆ” ಎಂದಿದ್ದಾರೆ.
ಸಿಜೆಐ ಅವರು “ಮಹಿಳೆಯರು ವಿಶೇಷವಾಗಿ ಭಾರತೀಯ ಸಮಾಜದಲ್ಲಿ ಎದುರಿಸುತ್ತಿರುವ ವ್ಯವಸ್ಥಿತ ಪೂರ್ವಾಗ್ರಹಗಳ ಬಗ್ಗೆ ಸಂಪೂರ್ಣ ಅರಿವು ನನಗಿದೆ. ಸಾಕಷ್ಟು ಕೌಶಲ್ಯ ಮತ್ತು ಜ್ಞಾನವನ್ನು ಗಳಿಸಿದರೂ ಮಹಿಳೆಯರಿಗೆ ಪ್ರಾತಿನಿಧ್ಯದ ಕೊರತೆ ಇದೆ” ಎಂದು ಹೇಳಿದ್ದಾರೆ. “ನ್ಯಾಯಾಧೀಶರು ಮತ್ತು ವಕೀಲರಾಗಿ ಮಹಿಳೆಯರ ಉಪಸ್ಥಿತಿಯು ನ್ಯಾಯ ವಿತರಣಾ ವ್ಯವಸ್ಥೆಯನ್ನು ಗಣನೀಯವಾಗಿ ಸುಧಾರಿಸುತ್ತದೆ. ಬೆಂಚ್ ಮತ್ತು ಬಾರ್‌ನಲ್ಲಿ ಮಹಿಳೆಯರ ಉಪಸ್ಥಿತಿಯು ಸಾಂಕೇತಿಕ ಪ್ರಾಮುಖ್ಯತೆಗಿಂತ ಹೆಚ್ಚಿನದನ್ನು ಹೊಂದಿದೆ. ಅವರು ಕಾನೂನಿಗೆ ವಿಭಿನ್ನ ದೃಷ್ಟಿಕೋನವನ್ನು ತರುತ್ತಾರೆ, ಅದು ಅವರ ಅನುಭವದ ಮೇಲೆ ನಿರ್ಮಿಸಲ್ಪಟ್ಟಿರುತ್ತದೆ. ಕೆಲವು ಕಾನೂನುಗಳು ಪುರುಷರು ಮತ್ತು ಮಹಿಳೆಯರ ಮೇಲೆ ಬೀರಬಹುದಾದ ವಿಭಿನ್ನ ಪರಿಣಾಮಗಳ ಬಗ್ಗೆ ಅವರು ಹೆಚ್ಚು ಸೂಕ್ಷ್ಮವಾದ ತಿಳುವಳಿಕೆಯನ್ನು ಹೊಂದಿದ್ದಾರೆ” ಎಂದೂ ಅವರು ಇದೇ ಸಂದರ್ಭದಲ್ಲಿ ಹೇಳಿದ್ದಾರೆ.
