ನಾನು ಫಕೀರ ಕಣ್ರೀ… ದೇಶದ ಜನ ಬೇಡಾ ಅಂದಾಗ ಜೋಳಿಗೆ ಹಾಕೊಂಡು ಹೋಗ್ತೀನಿ ಅಂತಾ ಪ್ರಧಾನಿ ನರೇಂದ್ರ ಮೋದಿ ಹೇಳಿರಬಹುದು. ಆದರೆ, ಅವರು ಪ್ರತಿ ನಿಧಿಸುತ್ತಿರುವ ಪಕ್ಷ ಬಿಜೆಪಿ ಮಾತ್ರ ‘ಫಕೀರ’ರ ಪಕ್ಷವಲ್ಲ, ‘ಅಮೀರ’ರ ಪಕ್ಷ ಎಂಬುದನ್ನು ಸಾಬೀತು ಮಾಡಿದೆ. ದೇಶದಲ್ಲಿ ಬಿಜೆಪಿ ಅತ್ಯಂತ ಶ್ರೀಮಂತ ಪಕ್ಷವಾಗಿ ಹೊರಹೊಮ್ಮಿದೆ. ದೇಶದ ರಾಷ್ಟ್ರೀಯ ಪಕ್ಷಗಳ ಒಟ್ಟು ಆಸ್ತಿಗಳ ಪೈಕಿ ಬಿಜೆಪಿ ಶೇ.69.37 ರಷ್ಟು ಆಸ್ತಿಯನ್ನು ಹೊಂದಿದ್ದು ಅಗ್ರಪಾಲು ಪಡೆದುಕೊಂಡಂತಿದೆ.
ರಾಷ್ಟ್ರೀಯ ಮತ್ತು ಪ್ರಾದೇಶಿಕ ಪಕ್ಷಗಳು ಚುನಾವಣಾ ಆಯೋಗಕ್ಕೆ ಮತ್ತು ಆದಾಯತೆರಿಗೆ ಇಲಾಖೆಗೆ ಸಲ್ಲಿಸಿರುವ ಆಸ್ತಿ ಮತ್ತು ಹೊಣೆಗಾರಿಕೆಗಳ ವಿವರಗಳನ್ನಾಧರಿಸಿ 2019-20ನೇ ಸಾಲಿನ ಆಸ್ತಿವಿವರಗಳ ವರದಿಯನ್ನು ಅಸೋಸಿಯೇಷನ್ ಫಾರ್ ಡೆಮಾಕ್ರಾಟಿಕ್ ರಿಫಾರ್ಮ್ಸ್ (ಎಡಿಆರ್) ಸಿದ್ಧಪಡಿಸಿದೆ.
ವಿವಿಧ ರಾಜಕೀಯ ಪಕ್ಷಗಳ ಆಸ್ತಿಗಳ ಕುರಿತಾದ ವಿಸ್ತೃತ ವರದಿಯಲ್ಲಿ ತ್ವರಿತಗತಿಯಲ್ಲಿ ಬಿಜೆಪಿ ಶ್ರೀಮಂತ ಪಕ್ಷವಾಗಿ ಹೊರಹೊಮ್ಮಿರುವ ಬಗ್ಗೆ ಅಂಕಿಅಂಶಗಳು ನೀಡಿದೆ.
2019-20ನೇ ಹಣಕಾಸು ವರ್ಷದಲ್ಲಿ ಬಿಜೆಪಿ ₹ 4,847.78 ಕೋಟಿ ಮೌಲ್ಯದ ಆಸ್ತಿಯನ್ನು ಘೋಷಿಸಿದೆ, ಇದು ಎಲ್ಲಾ ರಾಜಕೀಯ ಪಕ್ಷಗಳಿಗಿಂತ ಅತ್ಯಧಿಕವಾಗಿದೆ, ನಂತರದ ಸ್ಥಾನದಲ್ಲಿ ಬಿಎಸ್ಪಿ ₹ 698.33 ಕೋಟಿ ಮತ್ತು ಕಾಂಗ್ರೆಸ್ ₹ 588.16 ಕೋಟಿ ಆಸ್ತಿ ಹೊಂದಿವೆ.
ಎಡಿಆರ್ ಮಾಹಿತಿ ಪ್ರಕಾರ, 2019-20ನೇ ವಿತ್ತೀಯ ವರ್ಷದಲ್ಲಿ ಏಳು ರಾಷ್ಟ್ರೀಯ ಮತ್ತು 44 ಪ್ರಾದೇಶಿಕ ಪಕ್ಷಗಳು ಘೋಷಿಸಿದ ಒಟ್ಟು ಆಸ್ತಿ ಕ್ರಮವಾಗಿ ₹ 6,988.57 ಕೋಟಿ ಮತ್ತು ₹ 2,129.38 ಕೋಟಿ.
44 ಪ್ರಾದೇಶಿಕ ಪಕ್ಷಗಳ ಪೈಕಿ ಅಗ್ರ 10 ಪಕ್ಷಗಳ ಆಸ್ತಿ ಮೌಲ್ಯ ₹ 2028.715 ಕೋಟಿ ಅಥವಾ ಅವೆಲ್ಲವೂ ಸೇರಿ ಘೋಷಿಸಿದ ಒಟ್ಟು ಮೊತ್ತದ ಶೇ.95.27ರಷ್ಟು. ಪ್ರಾದೇಶಿಕ ಪಕ್ಷಗಳ ಪೈಕಿ, ಸಮಾಜವಾದಿ ಪಕ್ಷವು ₹ 563.47 ಕೋಟಿ (ಶೇ. 26.46), ಟಿಆರ್ಎಸ್ ₹ 301.47 ಕೋಟಿ ಮತ್ತು ಎಐಎಡಿಎಂಕೆ ₹ 267.61 ಕೋಟಿ ಮೌಲ್ಯದ ಆಸ್ತಿಗಳನ್ನು ಘೋಷಿಸಿಕೊಂಡಿವೆ.
2019-20 ವಿತ್ತೀಯ ವರ್ಷದಲ್ಲಿ ಪ್ರಾದೇಶಿಕ ಪಕ್ಷಗಳು ಘೋಷಿಸಿದ ಒಟ್ಟು ಆಸ್ತಿಯಲ್ಲಿ ₹1,639.51 ಕೋಟಿ (ಶೇ. 76.99) ರಷ್ಟು ದೊಡ್ಡ ಪಾಲನ್ನು ಫಿಕ್ಸೆಡ್ ಡೆಪಾಸಿಟ್ಗಳು/ಎಫ್ಡಿಆರ್ ರೂಪದಲ್ಲಿಟ್ಟಿವೆ. ಎಫ್ಡಿಆರ್/ಫಿಕ್ಸೆಡ್ ಡಿಪಾಸಿಟ್ ರೂಪದಲ್ಲಿ ಬಿಜೆಪಿ ಮತ್ತು ಬಿಎಸ್ಪಿ ಕ್ರಮವಾಗಿ ₹ 3,253.00 ಕೋಟಿ ಮತ್ತು ₹ 618.86 ಕೋಟಿಗಳನ್ನು ಘೋಷಿಸಿವೆ,, ಕಾಂಗ್ರೆಸ್ ₹ 240.90 ಕೋಟಿ ಘೋಷಿಸಿದೆ.
ಪ್ರಾದೇಶಿಕ ಪಕ್ಷಗಳ ಪೈಕಿ ಎಸ್ಪಿ (434.219 ಕೋಟಿ ರೂ.), ಟಿಆರ್ಎಸ್ (256.01 ಕೋಟಿ ರೂ.), ಎಐಎಡಿಎಂಕೆ ( 246.90 ಕೋಟಿ), ಡಿಎಂಕೆ (162.425 ಕೋಟಿ), ಶಿವಸೇನೆ (148.46 ಕೋಟಿ), ಬಿಜೆಡಿ (118.425 ಕೋಟಿ. ) ಫಿಕ್ಸೆಡ್ ಡೆಪಾಸಿಟ್ಗಳು/ಎಫ್ಡಿಆರ್ ಘೋಷಿಸಿಕೊಂಡಿವೆ.
2019-20 ವಿತ್ತೀಯ ವರ್ಷದಲ್ಲಿ ಏಳು ರಾಷ್ಟ್ರೀಯ ಮತ್ತು 44 ಪ್ರಾದೇಶಿಕ ಪಕ್ಷಗಳು ಘೋಷಿಸಿದ ಒಟ್ಟು ಹೊಣೆಗಾರಿಕೆಗಳು (ಸಾಲ ಇತ್ಯಾದಿ) ₹ 134.93 ಕೋಟಿಗಳಾಗಿವೆ.
ರಾಷ್ಟ್ರೀಯ ರಾಜಕೀಯ ಪಕ್ಷಗಳು 2019-20ನೇ ಹಣಕಾಸು ವರ್ಷದಲ್ಲಿ ಒಟ್ಟು ₹ 74.27 ಕೋಟಿ ಹೊಣೆಗಾರಿಕೆಗಳನ್ನು ಘೋಷಿಸಿವೆ. ರಾಷ್ಟ್ರೀಯ ಪಕ್ಷಗಳು ಸಾಲಗಳ ಅಡಿಯಲ್ಲಿ ₹ 4.26 ಕೋಟಿ ಮತ್ತು ಇತರ ಹೊಣೆಗಾರಿಕೆಗಳ ಅಡಿಯಲ್ಲಿ ₹ 70.01 ಕೋಟಿ ಘೋಷಿಸಿವೆ ಮತ್ತು 2019-20 ರಲ್ಲಿ ಕಾಂಗ್ರೆಸ್ ₹ 49.55 ಕೋಟಿ (ಶೇ 66.72) ಗರಿಷ್ಠ ಒಟ್ಟು ಹೊಣೆಗಾರಿಕೆಗಳನ್ನು ಘೋಷಿಸಿದೆ. ನಂತರದ ಸ್ಥಾನದಲ್ಲಿ ಎಐಟಿಸಿ ₹ 11.32 ಕೋಟಿ (ಶೇ 15.24 ರಷ್ಟು) ಘೋಷಿಸಿದೆ.
ಪ್ರಾದೇಶಿಕ ಪಕ್ಷಗಳು ಸಾಲಗಳ ಅಡಿಯಲ್ಲಿ ₹ 30.29 ಕೋಟಿ ಮತ್ತು ಇತರ ಹೊಣೆಗಾರಿಕೆಗಳ ಅಡಿಯಲ್ಲಿ ₹ 30.37 ಕೋಟಿಗಳನ್ನು ಘೋಷಿಸಿದ್ದವು. 2019-20 ವಿತ್ತೀಯ ವರ್ಷದಲ್ಲಿ ಟಿಡಿಪಿಯು ₹ 30.342 ಕೋಟಿ (ಶೇ. 50.02) ಗರಿಷ್ಠ ಒಟ್ಟು ಹೊಣೆಗಾರಿಕೆಗಳನ್ನು ಘೋಷಿಸಿದೆ. ನಂತರ ಡಿಎಂಕೆ ಪ್ರತಿ ₹ 8.05 ಕೋಟಿ (ಶೇ.13.27) ಘೋಷಿಸಿದೆ.