ಚಿತ್ರದುರ್ಗದ ರೇಣುಕಾಸ್ವಾಮಿ ಕೊಲೆ ನಡೆದಿದೆ. ಕೊಲೆ ಆಗಿರುವ ವ್ಯಕ್ತಿ ಲಿಂಗಾಯತ ಸಮುದಾಯಕ್ಕೆ ಸೇರಿದ ಯುವಕ. ಭಜರಂಗದಳದಲ್ಲಿ ರೇಣುಕಾಸ್ವಾಮಿ ಜಿಲ್ಲಾ ಸಂರಕ್ಷಕ್ ಆಗಿ ಕಾರ್ಯ ನಿರ್ವಹಣೆ ಮಾಡಿದ್ದಾನೆ. ಆದರೂ ಲಿಂಗಾಯತ ಸಮುದಾಯ ನಾಯಕರು ಆತನ ಸಾವನ್ನು ಖಂಡಿಸುವ ಕೆಲಸ ಮಾಡುತ್ತಿಲ್ಲ. ಆರೋಪಿಗಳಿಗೆ ಕಠಿಣ ಶಿಕ್ಷೆಯಾಗಬೇಕು ಎಂದು ಆಗ್ರಹ ಮಾಡುತ್ತಿಲ್ಲ. ಕೊಲೆ ಆರೋಪ ಹೊತ್ತಿರುವುದು ಓರ್ವ ಸ್ಟಾರ್ ನಟ ಅನ್ನೋ ಕಾರಣಕ್ಕೆ ಎಲ್ಲರ ಬಾಯಿಯೂ ಬಂದ್ ಆಗಿದೆ. ಚುನಾವಣೆ ಸಮಯದಲ್ಲಿ ಪ್ರಚಾರ ಪಡೆಯುವ ಹುಚ್ಚತನ ಎಲ್ಲರನ್ನೂ ಬಾಯಿ ಮುಚ್ಚಿಸಿದೆ.
ರೇಣುಕಾಸ್ವಾಮಿ ತಪ್ಪು ಮಾಡಿದ್ದಾನೋ ಇಲ್ಲವೋ ಅನ್ನೋದು ಇಲ್ಲಿ ಅನಗತ್ಯ ಚರ್ಚೆ. ಆತ ಮೆಸೇಜ್ ಮಾಡಿ ವಿಕೃತಿಯನ್ನೇ ಮೆರೆದಿರಬಹುದು. ಆದರೆ ಕಾನೂನು ಕೈಗೆತ್ತಿಕೊಂಡಿದ್ದು ತಪ್ಪು. ಪೊಲೀಸ್ ಠಾಣೆಗೆ ಹೋಗಿ ದೂರು ಕೊಡಬೇಕಿತ್ತು. ಸೈಬರ್ ಕ್ರೈಂ ಕ್ರಮತೆಗೆದುಕೊಳ್ಳುತ್ತಿತ್ತು. ಆದರೆ ಚಿತ್ರದುರ್ಗದಿಂದ ಕುತಂತ್ರದಿಂದ ಕರೆಸಿ, ಹಲ್ಲೆ ಮಾಡಿ ನಿರ್ದಾಕ್ಷಿಣ್ಯವಾಗಿ ಕೊಲೆ ಮಾಡಿದ್ದು ಎಷ್ಟು ಸರಿ..? ಓರ್ವ ಸಮಾಜದಲ್ಲಿ ಮಾದರಿ ವ್ಯಕ್ತಿಯಾಗಬೇಕಿದ್ದ ಸಿನಿಮಾ ನಟ ಕಾನೂನು ಕೈಗೆತ್ತಿಕೊಂಡಿದ್ದು ತಪ್ಪಲ್ಲವೇ..? ಯಾರೊಬ್ಬ ನಾಯಕರು ಪ್ರಶ್ನೆ ಮಾಡುವುದು ಬೇಡ. ಕನಿಷ್ಟ ಪಕ್ಷ ಖಂಡನೆಯನ್ನೂ ಮಾಡುತ್ತಿಲ್ಲ. ಇದು ಸರೀನಾ..? ಅನ್ನೋ ಪ್ರಶ್ನೆ ಸಮುದಾಯದಲ್ಲೇ ಕೇಳಿಬರುತ್ತಿದೆ.
ಚಿತ್ರದುರ್ಗದಲ್ಲಿ ಲಿಂಗಾಯತ ಸಮುದಾಯ ಸೇರಿದಂತೆ ವಿವಿಧ ಸಂಘಟನೆಗಳು ಪ್ರತಿಭಟನೆ ಮಾಡಿದ್ದಾರೆ. ಪಕ್ಷಾತೀತವಾಗಿ, ಜಾತ್ಯಾತೀತವಾಗಿ ಪ್ರತಿಭಟನೆಯಲ್ಲಿ ಭಾಗಿಯಾಗಿದ್ದಾರೆ. ಆದರೆ ಕೇವಲ ಜಿಲ್ಲಾ ಮಟ್ಟದ ನಾಯಕರು ಮಾತ್ರ ಭಾಗಿಯಾಗಿದ್ದಾರೆ. ಅದೂ ಕೂಡ ಕೇವಲ ಬೆರಳೆಣಿಕೆಯಷ್ಟು ಮಂದಿ ಮಾತ್ರ. ಯಾಕೆ ಸಮಾಜಘಾತುಕ ಶಕ್ತಿಯಾಗಿ ಬದಲಾಗುವ ಸಮಯದಲ್ಲಿ ಸಮಾಜ ಖಮಡಿಸುವ ಕೆಲಸ ಮಾಡಬೇಕು. ಇಲ್ಲದಿದ್ದರೆ ಸಮಾಜಘಾತುಕ ಶಕ್ತಿಯನ್ನು ಪ್ರೋತ್ಸಾಹಿಸಿದಂತೆ ಆಗುವುದಿಲ್ಲವೇ..? ಇದೇ ಕೊಲೆಯನ್ನು ಬೇರೊಂದು ಸಮುದಾಯಕ್ಕೆ ಸೇರಿದ್ದ ವ್ಯಕ್ತಿಯೇನಾದರೂ ಮಾಡಿದ್ದರೆ ಹೋರಾಟ ಇರುತ್ತಿರಲಿಲ್ಲವೇ..? ಆ ಮನೆಗೆ ಅದೆಷ್ಟು ಜನರು ಹೋಗಿ ಬರುತ್ತಿದ್ದರು..? ಸಾವಿನ ಮನೆಯಲ್ಲಿ ರಾಜಕೀಯ ನಡೆಯುತ್ತಿರಲಿಲ್ಲವೇ..?
ಚಿಲನಚಿತ್ರ ನಟ ಎಂದರೆ ಆತ ಸಮಾಜಕ್ಕೆ ಮಾದರಿ ಆಗಬೇಕೇ ಹೊರತು ತನ್ನ ದುಷ್ಚಟಗಳಿಂದ, ದುರಾಭ್ಯಾಸಗಳಿಂದ, ಕಾನೂನು ಬಾಹಿರ ಕೆಲಸಗಳಿಂದ ಸಮಾಜಕಕ್ಕೆ ಮಾರಕ ಆಗಬಾರದು. ಈ ಒಂದು ಕೇಸ್ನಲ್ಲಿ ನಟ ದರ್ಶನ್ ಪಾರಾಗಿ ಬಂದರೆ ಇದು ಸಮಾಜದ ಮೇಲೆ ಎಷ್ಟರ ಮಟ್ಟಿಗೆ ಪರಿಣಾಮ ಬೀರುತ್ತದೆ ಅನ್ನೋದನ್ನು ಅರ್ಥ ಮಾಡಿಕೊಳ್ಳಬೇಕಿದೆ. ಆತ ಅಪರಾಧಿಯಲ್ಲ, ಕೇವಲ ಆರೋಪಿ ಅನ್ನೋದನ್ನು ಒಪ್ಪಿಕೊಳ್ಳೋಣ. ಆದರೆ ಆತನ ವಿರುದ್ಧ ಸಾಕ್ಷ್ಯಗಳು ಇರುವ ಕಾರಣಕ್ಕೇ ಪೊಲೀಸರು ಬಂಧನ ಮಾಡಿದ್ದಾರೆ ಎಂದ ಮೇಲಿ ಕನಿಷ್ಟ ಪಕ್ಷ ಕೃತ್ಯವನ್ನು ಖಂಡಿಸುವ ಕೆಲಸವಾದರೂ ಆಗಬೇಕು ಅಲ್ಲವೇ..? ಮೌನಕ್ಕೆ ಶರಣಾದರೆ ಸಮಾಜಕ್ಕೆ ಕೊಡುವ ಸಂದೇಶವಾದರೂ ಏನು..? ರಾಜಕೀಯ ಲಾಭ ಆಗುವುದಿದ್ದರೆ ಮಾತ್ರ ಹೋರಾಟ ಎಂದೆ..? ಅವರೇ ಉತ್ತರಿಸಬೇಕಿದೆ.
ಕೃಷ್ಣಮಣಿ
