ಬಿಬಿಎಂಪಿ (Bruhath Bengaluru Mahanagara Palike) ಚುನಾವಣೆ ಶೀಘ್ರವೇ ನಡೆಯುವ ಸಾಧ್ಯತೆ ಇದೆ. ಇದರ ನಡುವೆಯೇ ಬಿಬಿಎಂಪಿ ಪ್ರಸಕ್ತ ಸಾಲಿನ ಬಜೆಟ್ (BBMP Budget) ಮಂಡಿಸಲು ತೆರೆಮರೆಯಲ್ಲಿ ಸಿದ್ಧತೆ ಮಾಡಿಕೊಳ್ಳುತ್ತಿದೆ.
ಹೌದು, ಚುನಾವಣೆ ಸಿದ್ಧತೆಯ ಜೊತೆಗೆ ಬಜೆಟ್ ಗೂ ಸಿದ್ಧತೆ ಆರಂಭಿಸಿದೆ ಬಿಬಿಎಂಪಿ. ಈಗ ಎಲ್ಲರ ಗಮನ ಬಿಬಿಎಂಪಿ ಬಜೆಟ್ ಮೇಲೆ ನೆಟ್ಟಿದ್ದು, ನಮಗೇನು ಸಿಗಲಿದೆ ಎಂದು ಸಿಲಿಕಾನ್‌ ಸಿಟಿ ಜನರು ಎದುರು ನೋಡುತ್ತಿದ್ದಾರೆ.
ಚುನಾವಣೆ ಜೊತೆಗೆ ಬಜೆಟ್‌ಗೂ ಬಿಬಿಎಂಪಿ ಭರ್ಜರಿ ಸಿದ್ಧತೆಗಳನ್ನು ನಡೆಸುತ್ತಿದೆ. ಚುನಾವಣೆ ಹಿನ್ನಲೆ ಸರ್ಕಾರದಿಂದ ವಿಶೇಷ ಗಿಫ್ಟ್ ನಿರೀಕ್ಷೆಯಲ್ಲಿ ಬಜೆಟ್ ಗೆ ಸಿದ್ಧತೆ ಮಾಡಲಾಗುತ್ತಿದೆ. ಸದ್ಯ ಪಾಲಿಕೆ ಸಂಪನ್ಮೂಲಕ್ಕೆ ತಕ್ಕಂತೆ ವಾಸ್ತವಿಕ ಬಜೆಟ್ ಗೆ ಮುಂದಾಗಿದೆ.
ಸರ್ಕಾರ ವಿಶೇಷ ನೆರವು ನೀಡಿದ್ದಲ್ಲಿ ಜನಪ್ರಿಯ ಬಜೆಟ್ ಗೂ ಯೋಜನೆ ರೂಪಿಸುತ್ತಿದೆ ಪಾಲಿಕೆ. ಸರ್ಕಾರದಿಂದ ವಿಶೇಷ ಅನುದಾನ ಇಲ್ಲದಿದ್ದರೆ, ಬೆಂಗಳೂರಿಗೆ ಯಾವುದೇ ಹೊಸ ಯೋಜನೆ ಪ್ಲ್ಯಾನ್‌ ಮಾಡದೆ ಇರಲು ಬಿಬಿಎಂಪಿ (BBMP) ನಿರ್ಧರಿಸಿದೆ.
2022 – 23ನೇ ಸಾಲಿನ ಬಿಬಿಎಂಪಿ ಬಜೆಟ್ ಗೆ ಅದಾಯ ಕೊರತೆ
ಈ ಬಾರಿ ದೊಡ್ಡ ಮೊತ್ತದ ಬಜೆಟ್ ಮಂಡಿಸದೇ ಇರಲು ಪಾಲಿಕೆ ನಿರ್ಧರಿಸಿದೆ. ಯಾಕೆಂದರೆ ಈ ಬಾರಿಯ ಬಜೆಟ್ ಗೆ ಪಾಲಿಕೆ ಆದಾಯದ ಕೊರತೆ ಎದುರಿಸುತ್ತಿದೆ. ಯಾವುದೇ ಹೊಸ ಕಾಮಗಾರಿ ಕೈಗೊಳ್ಳಲು ಅರ್ಥಿಕವಾಗಿ ಪಾಲಿಕೆ ಈ ಬಾರಿ ಸದೃಢವಾಗಿಲ್ಲ. ಕೊರೋನಾ (Corona) ಹಾಗೂ ಇನ್ನಿತರ ಕಾರಣಗಳಿಂದ ಕಳೆದ ಎರಡು ವರ್ಷಗಳಿಂದ ಅರ್ಥಿಕ ಸಂಕಷ್ಟ ದಲ್ಲಿದೆ ಬಿಬಿಎಂಪಿ. ಕೇವಲ ಅಸ್ತಿ ತೆರಿಗೆ (Property Tax) ಒಂದೆ ನಂಬಿಕೊಂಡಿರುವ ಮಹಾನಗರ ಪಾಲಿಕೆ, ಅಸ್ತಿ ತೆರಿಗೆಯಿಂದ 2,670 ಕೋಟಿ ಹಾಗೂ ಇತರೆ ಮೂಲಗಳಿಂದ 1 ಸಾವಿರ ಕೋಟಿ ಆದಾಯ ಶೇಖರಿಸಿಕೊಂಡಿದೆ. ಒಟ್ಟು ಪಾಲಿಕೆ ಆದಾಯ 3500 ಕೋಟಿ ಹಾಗೂ ಸರ್ಕಾರದಿಂದ 3500 ಕೋಟಿ ಅನುದಾನ ಸಿಕ್ಕಿದೆ. ಒಟ್ಟಾರೆ ಈ 7 ಸಾವಿರ ಕೋಟಿಯಲ್ಲಿ ಸಿಬ್ಬಂದಿಗಳಿಗೆ ಸಂಬಳ (BBMP Employees Salary) ನೀಡಬೇಕು. ಕಛೇರಿಗಳ ವಿದ್ಯುತ್ ಬಿಲ್ (Electricity Bill), ಪಾರ್ಕ್ ನಿರ್ವಹಣೆ (Park Mainatince) ಸೇರಿದಂತೆ ಇತರೆ ಖರ್ಚುಗಳು ತಿಂಗಳಿಗೆ 300 ಕೋಟಿ ವ್ಯಯವಾಗುತ್ತಿದೆ.
ಬಿಬಿಎಂಪಿಯ ಬಜೆಟ್ ತಯಾರಿ ಬಗ್ಗೆ ಪ್ರತಿಕ್ರಿಯಿಸಿದ ಮುಖ್ಯ ಆಯುಕ್ತ ಗೌರವ್‌ ಗುಪ್ತಾ, ನಮ್ಮಲ್ಲಿ ಇರುವ ಆದಾಯ ಮೂಲಗಳು ಹಾಗೂ ರಾಜ್ಯ ಸರ್ಕಾರದ ಆದಾಯ ಮೂಲಗಳು ಅಂದಾಜಿನಲ್ಲಿದೆ. ಏನೆಲ್ಲ ಕಾಮಾಗಾರಿಗಳನ್ಮ ಕೈಗೆತ್ತಿಕೊಳ್ಳಬೇಕು, ನಮ್ಮ‌ದಿನನಿತ್ಯ ನಿರ್ವಹಣಾ ವೆಚ್ಚವೇ (Mainatince Charges) ಗೆ ಎಷ್ಟು ತಗುಲುತ್ತದೆ.? ಹಾಗೆ ಹೊಸ ಕಾಮಾಗಾರಿಗಳಿಗೆ (Project Luanching) ಎಷ್ಟು ಹಣ ತಗುಲುತ್ತದೆ ಎನ್ನುವುದನ್ನ ನೋಡಬೇಕಾಗುತ್ತದೆ. ಇದಕ್ಕೆ ಸಂಭಂದಪಟ್ಟಂತೆ ಸಮಗ್ರ ವರದಿ ತಯಾರಿಸಬೇಕಿದೆ. ಹೊಸ ಯೋಜನೆಗಳ ಬಗ್ಗೆ ಜನಪ್ರತಿನಿಧಿಗಳು ಹಾಗೂ ಸಿಎಂ ಬಳಿ ಚರ್ಚೆ ಮಾಡಲಿದ್ದೇವೆ ಎಂದರು.
ಕಳೆದ ಬಾರಿ 10,295 ಕೋಟಿ ರೂ. ಮೊತ್ತದ ಬಜೆಟ್ ಮಂಡನೆ
ಇನ್ನು, ಗುತ್ತಿಗೆದಾರರಿಗೆ (BBMP Contractors) ಸುಮಾರು 2 ಸಾವಿರ ಕೋಟಿ ರೂಪಾಯಿ ಪಾವತಿ ಬಾಕಿ ಇದೆ. ಕಳೆದ ಬಾರಿ 10,295 ಕೋಟಿ ಬಜೆಟ್ ಗೆ ಸರ್ಕಾರ ಅನುಮೋದನೆ ನೀಡಿತ್ತು. ಈ ವರ್ಷ ಪಾಲಿಕೆ ಆದಾಯ ಹೆಚ್ಚಿಸಿ ಕೊಳ್ಳಲು ಬಿಬಿಎಂಪಿ ಕಾಯ್ದೆ-2020 ಅನ್ವಯ ಜಾಹಿರಾತು ನಿಯಮ ಜಾರಿಗೆ ಚಿಂತನೆ ಮಾಡಿದೆ. ಬೀದಿ ಬದಿ ವ್ಯಾಪಾರಿಗಳ ನೊಂದಣಿಯಿಂದಲೂ ಆದಾಯಕ್ಕೆ ಯೋಜನೆಹಾಕಲಾಗಿದೆ. ಪಾಲಿಕೆ ವ್ಯಾಪ್ತಿಯ 500 ಶುದ್ಧ ಕುಡಿಯುವ ನೀರಿನ ಘಟಕಗಳಿಂದ (BBMP Pure Drinking Water Plant) ತಿಂಗಳಿಗೆ ತಲಾ 10 ಸಾವಿರ ರೂ. ಶುಲ್ಕ ಸಂಗ್ರಹಕ್ಕೆ ಪಾಲಿಕೆ ಪ್ಲ್ಯಾನ್‌ ಮಾಡಿಕೊಂಡಿದೆ. ಜೊತೆಗೆ ಕಸದ ಮೇಲೆಯೂ ಕಣ್ಣಿಟ್ಟಿದ್ದು, ಗಾರ್ಬೇಜ್‌ ಬಿಲ್ (Garbage Bill) ಅನ್ನೂ ಜಾರಿ ಮಾಡುವ ಯೋಚನೆಯಲ್ಲಿದೆ. ಸದ್ಯ ವಾಸ್ತವಿಕ ಬಜೆಟ್ ಮಂಡಿಸಿ, ಚುನಾವಣೆ ನಂತರ ಜನಪ್ರತಿನಿಧಿಗಳೇ ಪೂರ್ಣ ಬಜೆಟ್ ಮಂಡಿಸಲಿ ಎಂಬ ಚರ್ಚೆಯೂ ಸಾಗಿದೆ.
