ಸಾಧನೆ ಮಾಡುವವರಿಗೆ ಅಡ್ಡಿ ಆತಂಕಗಳಿರಲ್ಲ. ಇದ್ದರೂ ಅವುಗಳನ್ನು ಮೀರಿ ಸಾಧನೆ ಮಾಡುವವರಿದ್ದಾರೆ. ಅಂಥವರಲ್ಲಿ ನಮ್ಮ ಗದುಗಿನ ಸೈಕ್ಲಿಂಗ್ ಕೋಚ್ ಅನಂತ್ ದೇಸಾಯಿ ಕೂಡ ಸೇರುತ್ತಾರೆ. ಕೋವಿಡ್, ಲಾಕ್ ಡೌನ್ ಇವ್ಯಾವವು ಇವರಿಗೆ ಅಡ್ಡಿಯಾಗಲೇ ಇಲ್ಲ.
ಎಲ್ಲ ಕಡೆಗೆ ಲಾಕ್ ಡೌನ್ ಮಾಡಿದಾಗ ಇವರು ಕೈಯಲ್ಲೇ ಇರುವ ಮೊಬೈಲ್ ನಿಂದಲೆ ಆನ್ ಲೈನ್ ಸೈಕ್ಲಿಂಗ್ ಆರಂಭಿಸಿದರು.
ಇವರು ಇರುವುದು ಗದುಗಿನಲ್ಲಿ, ಸೈಕ್ಲಿಂಗ್ ಪಟುಗಳು ಬೇರೆ ಬೇರೆ ಊರು ಮತ್ತು ಹಳ್ಳಿಗಳಲ್ಲಿ. ಆದರೂ ಪ್ರತಿದಿನ ಸೈಕ್ಲಿಂಗ್ ಪಟುಗಳಿಗೆ ನಿರಂತರ ಅಭ್ಯಾಸದಲ್ಲಿ ತೊಡಗಿಸಿ ಅವರ ಮಾರ್ಗದರ್ಶನ ನೀಡುತ್ತಿದ್ದಾರೆ. ಈ ಕ್ರೀಡಾಪಟುಗಳು ನಿರಂತರ ಅಭ್ಯಾಸ ದಲ್ಲಿ ತೊಡಗಿ ರಾಷ್ಟ್ರಮಟ್ಟದ ಸ್ಪರ್ಧೆಗೆ ತಯಾರಿ ನಡೆಸುತ್ತಿದ್ದರು, ಅಷ್ಟರಲ್ಲೇ ಲಾಕ್ ಡೌನ್ ಘೋಷಣೆಯಾಯಿತು. ನಂತರ ಜಿಲ್ಲಾಡಳಿತದ ಹಿರಿಯ ಅಧಿಕಾರಿಗಳೊಂದಿಗೆ ಚರ್ಚಿಸಿ, ಆನ್ ಲೈನ್ ಅಂದರೆ ವಿಡಿಯೋ ಕಾಲಿಂಗ್ ಮೂಲಕ ವೇಗ ನಿರ್ವಹಣೆ ಹಾಗೂ ಗುಡ್ಡದಲ್ಲಿ ಸೈಕಲ್ ತುಳಿಯುವಾಗ ಎದುರಾಗುವ ಅಡ್ಡಿಗಳ ಬಗ್ಗೆ ವಿಡಿಯೋ ದಲ್ಲೇ ತಿಳಿಸಿಕೊಡಬಹುದು ಎಂದು ಕೋಚ್ ದೇಸಾಯಿ ಹೇಳಿದಾಗ ಅಧಿಕಾರಿಗಳು ಒಪ್ಪಿಗೆ ನೀಡಿದರು.
ಕಳೆದ ಎರಡು ತಿಂಗಳಿನಿಂದ ಆರಂಭವಾದ ಈ ಆನ್ ಲೈನ್ ಕೋಚಿಂಗ್ ಪ್ರತಿದಿನ 6.30 ಯಿಂದ 8.30 ವರೆಗೆ ಮತ್ತು ಸಂಜೆ 4.30 ಯಿಂದ 6.30 ವರೆಗೆ ನಡೆಯುತ್ತದೆ.
ಇವರ ಮಾರ್ಗದರ್ಶನದಲ್ಲಿ ಪಳಗಿದ ಖೇಲೋ ಇಂಡಿಯಾ ಸೈಕ್ಲಿಸ್ಟ್ ಪವಿತ್ರಾ ಕುರ್ತಕೋಟಿ ತಮ್ಮ ಆನ್ ಲೈನ್ ಕೋಚಿಂಗ್ ಬಗ್ಗೆ ಹೇಳಿದರು, “ಬೆಳಿಗ್ಗೆ ಮತ್ತು ಸಂಜೆ ನಡೆಯುವ ನಮ್ಮ ಆನ್ ಲೈನ್ ಕೋಚಿಂಗ್ ಸತತವಾಗಿ ನಡೆಯಿತು. ಗುರುಗಳ ಮಾರ್ಗದರ್ಶನದಲ್ಲಿ ಕೋವಿಡ್ ರೂಲ್ಸ್ ಪಾಲಿಸುತ್ತ ಜನರು ಇರದತ್ತ ರೋಡ್ ಗಳಲ್ಲಿ ನಮ್ಮ ಅಭ್ಯಾಸ ನಡೆಯುತ್ತಿದೆ. ಮೊದಮೊದಲು ಮೊಬೈಲ್ ಹಿಡಿದುಕೊಂಡು ಹೋಗುವುದ ಸ್ವಲ್ಪ ಕಷ್ಟವೆನಿಸಿದರೂ ನಂತರ ಸರಿಹೊಂದಿತು. ನಾನು ಹಾಗೂ ಇನ್ನಿತರ ಕ್ರೀಡಾಪಟುಗಳ ನಮ್ಮ ಅಭ್ಯಾಸ ನಿಲ್ಲಲಿಲ್ಲ ಎಂದು ಸಂತಸಪಟ್ಟೆವು. ನಮ್ಮ ಕುಟುಂಬದವರೂ ದೇಸಾಯಿ ಸರ್ ಐಡಿಯಾಕ್ಕೆ ಖುಷ್ ಆಗಿದ್ದಾರೆ”. ಪವಿತ್ರಾ ಶಿರಹಟ್ಟಿ ತಾಲೂಕಿನ ಕಡಕೋಳ ಗ್ರಾಮದ ಹುಡುಗಿ. ಇವರು 10 ನೇ ತರಗತಿಯ ವಿದ್ಯಾರ್ಥಿ.
ಅನಂತ್ ದೇಸಾಯಿ ತಮ್ಮ ಆನ್ ಲೈನ್ ಕೋಚಿಂಗ್ ಬಗ್ಗೆ ತಿಳಿಸಿದರು, “ಏನೇ ಆಗಲಿ ಕೋಚಿಂಗ್ ನಿಲ್ಲಬಾರದು ಎಂದು ಯೋಚಿಸುತ್ತಿದ್ದೆ, ಕೊನೆಗೆ ಕೈಯಲ್ಲಿದ್ದ ಮೋಬೈಲ್ ಕೆಲಸಕ್ಕೆ ಬಂತು. ವಿಡಿಯೋ ಕಾಲ್ ಮುಖಾಂತರ ಈ ಕೋಚಿಂಗ್ ನಡೆಯುತ್ತಿದೆ. ನಮ್ಮ ಕ್ರೀಡಾಪಟುಗಳು ಉತ್ಸಾಹದಿಂದ ಭಾಗವಹಿಸುತ್ತಿದ್ದಾರೆ. ಸೈಕ್ಲಿಂಗ್ ನಲ್ಲಿ ಗದಗ್ ನಗರ ರಾಷ್ಟ್ರಮಟ್ಟದಲ್ಲಿ ಹೆಸರು ಮಾಡಬೇಕು ಎಂಬುದು ನನ್ನ ಸದಾಶಯ”.
ಕ್ರೀಡಾ ಪ್ರೇಮಿಗಳು ಆನ್ ಲೈನ್ ಕೋಚಿಂಗ್ ಬಗ್ಗೆ ಮೆಚ್ಚುಗೆ ವ್ಯಕ್ತಪಡಿಸಿದ್ದು ಈ ತರಹದ ನೂತನ ಯೋಚನೆಗಳು ಕ್ರೀಡಾಪಟುಗಳ ಮನೋಬಲವನ್ನು ಹೆಚ್ಚಿಸುತ್ತವೆ ಹಾಗೂ ಇಂತಹ ಪ್ರಯತ್ನ ಗದುಗಿನಲ್ಲಿ ನಡೆದಿದ್ದು ಪ್ರಶಂಸನೀಯ ಎಂದು ಅಭಿಪ್ರಾಯಪಟ್ಟಿದ್ದಾರೆ.
