ಕನ್ನಡದ ಸೂಪರ್ಹಿಟ್ಗೆ ಮತ್ತೊಂದು ಗರಿ; ‘ತುಂಬಾಡ್ಚಿ ಮಂಜುಳಾ’ ಹೆಸರಿನಲ್ಲಿ ಮರಾಠಿಗೆ ಎಂಟ್ರಿ. ಕನ್ನಡ ಚಿತ್ರರಂಗದಲ್ಲಿ ಸಂಚಲನ ಮೂಡಿಸಿದ್ದ ‘ಸು ಫ್ರಮ್ ಸೋ’ ಇದೀಗ ಮರಾಠಿ ಭಾಷೆಗೆ ರಿಮೇಕ್ ಆಗುತ್ತಿದೆ. ಗ್ರಾಮೀಣ ಹಿನ್ನೆಲೆ, ಹಾರರ್-ಕಾಮಿಡಿ ಶೈಲಿ ಮತ್ತು ವಿಭಿನ್ನ ಕಥಾಹಂದರದಿಂದ ಪ್ರೇಕ್ಷಕರ ಮನಗೆದ್ದಿದ್ದ ಈ ಸಿನಿಮಾ ಈಗ ‘ತುಂಬಾಡ್ಚಿ ಮಂಜುಳಾ’ ಹೆಸರಿನಲ್ಲಿ ಮರಾಠಿ ಪ್ರೇಕ್ಷಕರ ಮುಂದೆ ಬರಲು ಸಜ್ಜಾಗಿದೆ.
ನಿರ್ದೇಶಕ ಜೆ.ಪಿ. ತುಮಿನಾಡ್ ಅವರ ನಿರ್ದೇಶನದಲ್ಲಿ ಮೂಡಿಬಂದ ‘ಸು ಫ್ರಮ್ ಸೋ’ ಸಿನಿಮಾ ಬಿಡುಗಡೆಯಾದ ಬಳಿಕ ಭಾರೀ ಜನಪ್ರಿಯತೆ ಪಡೆದಿತ್ತು. ಕರಾವಳಿ ಭಾಗದ ಗ್ರಾಮೀಣ ಸೊಗಡು, ಅತೀಂದ್ರಿಯ ಅಂಶಗಳು ಮತ್ತು ಹಾಸ್ಯದ ಮಿಶ್ರಣ ಚಿತ್ರವನ್ನು ದೊಡ್ಡ ಮಟ್ಟದಲ್ಲಿ ಹಿಟ್ ಮಾಡಿತ್ತು. ಶನೀಲ್ ಗೌತಮ್, ರಾಜ್ ಬಿ. ಶೆಟ್ಟಿ, ಸಂಧ್ಯಾ ಅರಕೆರೆ ಸೇರಿದಂತೆ ಹಲವು ಕಲಾವಿದರ ಅಭಿನಯಕ್ಕೂ ಮೆಚ್ಚುಗೆ ವ್ಯಕ್ತವಾಗಿತ್ತು.
ಈ ಚಿತ್ರದ ಯಶಸ್ಸಿನ ಬೆನ್ನಲ್ಲೇ ಇದೀಗ ಮರಾಠಿಯಲ್ಲಿ ರಿಮೇಕ್ ಆಗುತ್ತಿದ್ದು, ‘ತುಂಬಾಡ್ಚಿ ಮಂಜುಳಾ’ ಎಂಬ ಟೈಟಲ್ ಈಗಾಗಲೇ ಸಿನಿಪ್ರೇಕ್ಷಕರ ಗಮನ ಸೆಳೆದಿದೆ. ವಿಧವ್ ಕೊರೇಗಾಂವ್ಕರ್ ನಿರ್ದೇಶನದ ಈ ಚಿತ್ರಕ್ಕೆ ರಿಷಿಕೇಶ್ ತುರಾಯಿ ಕಥೆ ಬರೆದಿದ್ದಾರೆ. ಝೀ ಸ್ಟುಡಿಯೋಸ್ ಬ್ಯಾನರ್ನಲ್ಲಿ ಉಮೇಶ್ ಕುಮಾರ್ ಬನ್ಸಲ್ ಮತ್ತು ಭವೇಶ್ ಜನವಲೆಕರ್ ಚಿತ್ರವನ್ನು ನಿರ್ಮಿಸುತ್ತಿದ್ದಾರೆ. ಚಿತ್ರದಲ್ಲಿ ಮಕರಂದ ಅನಾಸ್ಪುರೇ, ಜಿತೇಂದ್ರ ಜೋಶಿ, ಓಂ ಭುತ್ಕರ್, ಯೋಗೇಶ್ ಶಿರ್ಸಾಟ್ ಸೇರಿದಂತೆ ಮರಾಠಿ ಚಿತ್ರರಂಗದ ಖ್ಯಾತ ಕಲಾವಿದರು ನಟಿಸುತ್ತಿದ್ದಾರೆ. ನಟಿ ಸಾಯಿ ತಾಮ್ಹಂಕರ್ ಪಾತ್ರದ ಬಗ್ಗೆ ವಿಶೇಷ ಕುತೂಹಲ ಮೂಡಿದ್ದು, ಚಿತ್ರದ ಟ್ರೈಲರ್ ಈಗಾಗಲೇ ಉತ್ತಮ ಪ್ರತಿಕ್ರಿಯೆ ಪಡೆಯುತ್ತಿದೆ.
‘ಸು ಫ್ರಮ್ ಸೋ’ ಸಿನಿಮಾ ಕನ್ನಡದಲ್ಲಿ ಭಾರೀ ಯಶಸ್ಸು ಕಂಡ ನಂತರ ತಮಿಳು ಸೇರಿದಂತೆ ಇತರೆ ಭಾಷೆಗಳಲ್ಲಿಯೂ ರಿಮೇಕ್ ಹಕ್ಕುಗಳ ಬೇಡಿಕೆ ಹೆಚ್ಚಾಗಿತ್ತು. ಈಗ ಮರಾಠಿ ರಿಮೇಕ್ ಅಧಿಕೃತವಾಗಿ ಘೋಷಣೆಯಾಗಿರುವುದು ಕನ್ನಡ ಕಥೆಗಳಿಗೆ ರಾಷ್ಟ್ರ ಮಟ್ಟದಲ್ಲಿ ಸಿಗುತ್ತಿರುವ ಸ್ವೀಕಾರದ ಸಂಕೇತವಾಗಿದೆ ಎಂದು ಸಿನಿ ವಲಯ ಅಭಿಪ್ರಾಯಪಟ್ಟಿದೆ. ‘ತುಂಬಾಡ್ಚಿ ಮಂಜುಳಾ’ ಸಿನಿಮಾ ಜೂನ್ 5ರಂದು ಮಹಾರಾಷ್ಟ್ರದಾದ್ಯಂತ ಬಿಡುಗಡೆಯಾಗಲಿದೆ. ಕನ್ನಡದ ಮೂಲ ಕಥೆಯ ಮಜಾ ಉಳಿಸಿಕೊಂಡೇ ಮರಾಠಿ ನೈಜತೆಯನ್ನು ಸೇರಿಸುವ ಪ್ರಯತ್ನ ಚಿತ್ರತಂಡ ಮಾಡಿದೆ ಎನ್ನಲಾಗುತ್ತಿದೆ.
