ಕೇರಳ ವಿಧಾನಸಭೆ ಚುನಾವಣೆಯಲ್ಲಿ ಕಾಂಗ್ರೆಸ್ ನೇತೃತ್ವದ ಯುಡಿಎಫ್ ಭರ್ಜರಿ ಗೆಲುವಿನೊಂದಿಗೆ ಅಧಿಕಾರಕ್ಕೆ ಮರಳಿದ ಬೆನ್ನಲ್ಲೇ, ಇದೀಗ ಪಕ್ಷದೊಳಗಿನ ಒಂದು ಘಟನೆ ಭಾರೀ ವಿವಾದಕ್ಕೆ ಕಾರಣವಾಗಿದೆ. ಕಾಂಗ್ರೆಸ್ ಕಚೇರಿಯಲ್ಲಿ ಮಹಿಳಾ ಶಾಸಕಿ ಜೊತೆ ಹಿರಿಯ ನಾಯಕನೊಬ್ಬ ವರ್ತಿಸಿದ ರೀತಿಗೆ ಸಾಮಾಜಿಕ ಜಾಲತಾಣಗಳಲ್ಲಿ ತೀವ್ರ ಆಕ್ರೋಶ ವ್ಯಕ್ತವಾಗುತ್ತಿದೆ.
ಹೊಸದಾಗಿ ಆಯ್ಕೆಯಾದ ಶಾಸಕಿ ಬಿಂದು ಕೃಷ್ಣ ಅವರನ್ನು ಸ್ವಾಗತಿಸುವ ವೇಳೆ ಹಿರಿಯ ಕಾಂಗ್ರೆಸ್ ನಾಯಕ ಚೆರಿಯನ್ ಫಿಲಿಪ್ ಅವರು ತಬ್ಬಿಕೊಳ್ಳಲು ಯತ್ನಿಸಿದ ವಿಡಿಯೋ ವೈರಲ್ ಆಗಿದೆ. ವಿಡಿಯೋದಲ್ಲಿ ಶಾಸಕಿ ಹಿಂದೆ ಸರಿಯುತ್ತಾ ಅಸಹಜತೆ ವ್ಯಕ್ತಪಡಿಸಿದರೂ, ನಾಯಕರು ಅವರನ್ನು ತಬ್ಬಿಕೊಳ್ಳಲು ಮರುಮರು ಪ್ರಯತ್ನಿಸುತ್ತಿರುವುದು ಕಂಡುಬಂದಿದೆ.ಕೇರಳ ಪ್ರದೇಶ ಕಾಂಗ್ರೆಸ್ ಸಮಿತಿ (KPCC) ಕಚೇರಿಯಲ್ಲಿ ಶಾಸಕರ ಸಭೆ ನಡೆಯುತ್ತಿದ್ದ ವೇಳೆ ಈ ಘಟನೆ ನಡೆದಿದೆ. ಕೊಲ್ಲಂ ಕ್ಷೇತ್ರದಿಂದ ಗೆದ್ದಿದ್ದ ಬಿಂದು ಕೃಷ್ಣ ಅವರು ಬೆಂಬಲಿಗರ ಅಭಿನಂದನೆಗಳ ನಡುವೆ ಕಚೇರಿಗೆ ಆಗಮಿಸಿದ್ದರು. ಈ ವೇಳೆ ಸ್ವಾಗತಿಸುವ ನೆಪದಲ್ಲಿ ಚೆರಿಯನ್ ಫಿಲಿಪ್ ಅವರು ಮೊದಲು ಶೇಕ್ಹ್ಯಾಂಡ್ ಮಾಡಲು ಮುಂದಾದಂತೆ ಕಂಡುಬಂದರೂ, ಬಳಿಕ ಅವರನ್ನು ತನ್ನತ್ತ ಎಳೆದು ತಬ್ಬಿಕೊಳ್ಳಲು ಯತ್ನಿಸಿರುವ ದೃಶ್ಯ ಕ್ಯಾಮೆರಾದಲ್ಲಿ ಸೆರೆಯಾಗಿದೆ.
ವಿಡಿಯೋದಲ್ಲಿ ಬಿಂದು ಕೃಷ್ಣ ಅವರು ಮುಜುಗರದಿಂದ ಹಿಂದೆ ಸರಿಯುತ್ತಿರುವುದು ಸ್ಪಷ್ಟವಾಗಿ ಗೋಚರಿಸುತ್ತಿದೆ. ಕೆಲ ಕ್ಷಣಗಳ ಕಾಲ ಕೈ ಹಿಡಿದುಕೊಂಡೇ ಅವರನ್ನು ಹತ್ತಿರಕ್ಕೆಳೆದುಕೊಳ್ಳಲು ನಾಯಕರು ಪ್ರಯತ್ನಿಸಿದ್ದು, ಬಳಿಕ ಶಾಸಕಿ ಕೈಮುಗಿದು ಅಲ್ಲಿಂದ ತೆರಳಿದ್ದಾರೆ.
ಈ ದೃಶ್ಯ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆದ ಬಳಿಕ ಭಾರೀ ಚರ್ಚೆಗೆ ಕಾರಣವಾಗಿದೆ. “ಒಬ್ಬ ಮಹಿಳೆ ಅಸಹಜತೆ ವ್ಯಕ್ತಪಡಿಸಿದಾಗ ಅದನ್ನು ಗೌರವಿಸಬೇಕಿತ್ತು”, “ಸಾರ್ವಜನಿಕ ವೇದಿಕೆಯಲ್ಲಿ ಇದು ಅನುಚಿತ ವರ್ತನೆ” ಎಂದು ಹಲವರು ಟೀಕಿಸಿದ್ದಾರೆ. ಕೆಲವರು ಕಾಂಗ್ರೆಸ್ ನಾಯಕತ್ವ ಈ ವಿಚಾರದಲ್ಲಿ ಸ್ಪಷ್ಟ ನಿಲುವು ತೆಗೆದುಕೊಳ್ಳಬೇಕು ಎಂದು ಆಗ್ರಹಿಸಿದ್ದಾರೆ.
ಘಟನೆ ನಡೆಯುವಾಗ ಅಲ್ಲಿದ್ದ ಕೆಲವು ನಾಯಕರು ಮತ್ತು ಪತ್ರಕರ್ತರು ನಗುತ್ತಿರುವ ದೃಶ್ಯವೂ ಟೀಕೆಗೆ ಗುರಿಯಾಗಿದೆ. ಮಹಿಳೆಯರ ವೈಯಕ್ತಿಕ ಗಡಿಗಳು, ಸಾರ್ವಜನಿಕ ಬದುಕಿನಲ್ಲಿ ಗೌರವ ಮತ್ತು ಒಪ್ಪಿಗೆಯ ಮಹತ್ವದ ಕುರಿತು ಈ ಘಟನೆ ಹೊಸ ಚರ್ಚೆಗೆ ಕಾರಣವಾಗಿದೆ.ವಿವಾದ ತೀವ್ರಗೊಂಡಿದ್ದರೂ, ಈ ಕುರಿತು ಚೆರಿಯನ್ ಫಿಲಿಪ್ ಅಥವಾ ಬಿಂದು ಕೃಷ್ಣ ಅವರಿಂದ ಇನ್ನೂ ಯಾವುದೇ ಅಧಿಕೃತ ಪ್ರತಿಕ್ರಿಯೆ ಬಂದಿಲ್ಲ. ಕಾಂಗ್ರೆಸ್ ಪಕ್ಷವೂ ಈ ವಿಚಾರದಲ್ಲಿ ಮೌನ ವಹಿಸಿದೆ.
