ಕೊಲ್ಹಾಪುರ (ಮಹಾರಾಷ್ಟ್ರ): ವಿಠ್ಠಲನ ದರ್ಶನಕ್ಕಾಗಿ ಪಂಢರಪುರಕ್ಕೆ ಕುಟುಂಬ ಸಮೇತ ಬಂದಿದ್ದ ‘ಮಹಾರಾಜ್’ ಎಂಬ ಸಾಕು ನಾಯಿ ದಾರಿ ತಪ್ಪಿ ಒಂಟಿಯಾಗಿ 225 ಕಿಲೋಮೀಟರ್ ನಡೆದು ಕೊಲ್ಹಾಪುರದ ಮನೆಗೆ ತಲುಪಿದೆ.
ಈ ನಾಯಿಗೆ ಹಾರ ಹಾಕಿ ಪೂಜಿಸುತ್ತಿರುವ ಛಾಯಾಚಿತ್ರಗಳು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿವೆ. ಮಹಾರಾಜ ನಾಯಿ ತನ್ನ ಮಾಲೀಕನ ಕುಟುಂಬದ ಜತೆ ಕೊಲ್ಲಾಪುರದ ನಾನಿಬಾಯಿ ಚಿಖ್ಲಿಯಿಂದ ಪಂಢರಪುರಕ್ಕೆ ಹೋಗಿತ್ತು. ಆದರೆ ಆಕಸ್ಮಿಕವಾಗಿ ಕುಟುಂಬ ಸದಸ್ಯರಿಂದ ಬೇರ್ಪಟ್ಟಿತ್ತು. ಅಚ್ಚರಿ ಎಂದರೆ ಎರಡು ದಿನಗಳ ಹಿಂದೆ ನಾಯಿ ಒಂಟಿಯಾಗಿ ಮನೆಗೆ ಮರಳಿದೆ.
ಮಹಾರಾಜ ಮಾಲೀಕ ಜ್ಞಾನೇಶ್ವರ್ ಕುಂಬಾರ್ ಅವರು ಕುಟುಂಬದೊಂದಿಗೆ ಮಹಾರಾಷ್ಟ್ರ-ಕರ್ನಾಟಕ ಗಡಿಯಲ್ಲಿರುವ ನಿಪಾನಿ ಬಳಿಯ ಯಮಗರ್ನಿ ಗ್ರಾಮದಲ್ಲಿ ವಾಸಿಸುತ್ತಿದ್ದಾರೆ. ಕಳೆದ 30 ವರ್ಷಗಳಿಂದ ಈ ಕುಟುಂಬ ಪ್ರತಿ ವರ್ಷ ಪಂಢರಪುರಕ್ಕೆ ನಡೆದುಕೊಂಡು ಬರುತ್ತಿದೆ. ಅವರ ಪ್ರಯಾಣದಲ್ಲಿ ನಾಯಿ ಕೂಡ ಕುಟುಂಬದೊಂದಿಗೆ ಬಂದಿದೆ.
ಈ ವರ್ಷವೂ ಜುಲೈ 6 ರಿಂದ 14 ರ ನಡುವೆ ಗ್ರಾಮದಿಂದ ಕಾಲ್ನಡಿಗೆಯಲ್ಲಿ ಯಾತ್ರೆ ಮಾಡಲಾಯಿತು. ಕುಟುಂಬ ಸದಸ್ಯರೊಂದಿಗೆ ಮಹಾರಾಜ ಪಂಢರಪುರಕ್ಕೆ 225 ಕಿ.ಮೀ. ನಡೆದು ಹೋಗಿತ್ತು. ಆದರೆ, ಈ ಸಂದರ್ಭದಲ್ಲಿ ನೆರೆದಿದ್ದ ಅಪಾರ ಜನಸ್ತೋಮದಲ್ಲಿ ನಾಯಿ ದಾರಿ ತಪ್ಪಿತು.
ಕುಂಬಾರ್ ಕುಟುಂಬವು ತಮ್ಮ ಪ್ರೀತಿಯ ನಾಯಿಯನ್ನು ಹುಡುಕಲು ಪ್ರಯತ್ನಿಸಿತು ಆದರೆ ಎರಡು ದಿನಗಳ ನಂತರ ಬರಿಗೈಯಲ್ಲಿ ಮನೆಗೆ ಮರಳಬೇಕಾಯಿತು. ಈ ಘಟನೆ ಗ್ರಾಮಸ್ಥರೊಂದಿಗೆ ಕುಟುಂಬವನ್ನು ತೀವ್ರ ದುಃಖಕ್ಕೆ ತಳ್ಳಿತ್ತು. ಗ್ರಾಮಸ್ಥರು ಸಾಮಾಜಿಕ ಮಾಧ್ಯಮದಲ್ಲಿ ನಾಯಿಯ ಬಗ್ಗೆ ಮಾಹಿತಿಯನ್ನು ಪೋಸ್ಟ್ ಮಾಡಿದ್ದಾರೆ ಮತ್ತು ಎಲ್ಲಿಯಾದರೂ ಮಹಾರಾಜನನ್ನು ಕಂಡರೆ ಮಾಹಿತಿ ನೀಡುವಂತೆ ಜನರಿಗೆ ಮನವಿ ಮಾಡಿದ್ದಾರೆ.
ಒಂದು ವಾರ ಪೂರ್ತಿ ನಾಯಿಗಾಗಿ ಹುಡುಕಾಟ ಮುಂದುವರೆಯಿತು. ಕುಟುಂಬವು ನಾಯಿಯನ್ನು ಹುಡುಕುವ ಭರವಸೆಯನ್ನು ಕಳೆದುಕೊಳ್ಳುತ್ತಿರುವಾಗ, ಮಹಾರಾಜ ಏಕಾಂಗಿಯಾಗಿ ಹಳ್ಳಿಗೆ ಮರಳಿದೆ.. ತಮ್ಮ ಪ್ರೀತಿಯ ನಾಯಿ ಒಂಟಿಯಾಗಿ ಮನೆಗೆ ಬಂದಿರುವುದು ಕಂಡು ಕುಂಬಾರ ಕುಟುಂಬದ ಸಂತಸಕ್ಕೆ ಮಿತಿಯೇ ಇರಲಿಲ್ಲ. ನಂತರ ಗ್ರಾಮಸ್ಥರು ಅವರ ಕೊರಳಿಗೆ ಹಾರ ಹಾಕಿ ಮೆರವಣಿಗೆ ನಡೆಸಿದರು. ಅಲ್ಲದೇ ಸಾಮಾಜಿಕ ಜಾಲತಾಣದಲ್ಲಿ ಫೋಟೋಗಳನ್ನು ಅಪ್ಲೋಡ್ ಮಾಡಿದ್ದಾರೆ.
ಪಶುವೈದ್ಯಾಧಿಕಾರಿ ಡಾ.ಸ್ಯಾಮ್ ಲುಡ್ರಿಕ್ ಮಾತನಾಡಿ, “ಸಾಕುಪ್ರಾಣಿಗಳು ತಾವು ಸಂಚರಿಸುವ ಮಾರ್ಗಗಳಲ್ಲಿ ಮಲಮೂತ್ರವನ್ನು ಬಿಟ್ಟು ಮರಳಲು ವಾಸನೆ ಬಳಸುತ್ತವೆ. ಈ ನಾಯಿಯು ನಾಲ್ಕಾರು ವಾಹನದಲ್ಲಿ ಪಂಢರಪುರಕ್ಕೆ ಹೋಗಿದ್ದರೆ ಹಿಂತಿರುಗಲು ಸಾಧ್ಯವಾಗುತ್ತಿರಲಿಲ್ಲ. ಅದು ಬಿಟ್ಟುಹೋದ ಮಲವಿಸರ್ಜನೆಯು ಅದಕ್ಕೆ ಅದೇ ಸ್ಥಳಕ್ಕೆ ಮರಳಲು ಸಹಾಯ ಮಾಡಿತು.” ಎಂದರು.
