ನವದೆಹಲಿ : ದೇಶದಲ್ಲಿ ಎನ್ ಡಿಎ ಸರ್ಕಾರ ಜಾರಿಯಾದ ನಂತರ ಕಾನೂನಿನಲ್ಲಿ ಹಲವಾರು ಬದಲಾವಣೆಗಳಾಗಿವೆ. ಅದರಂತೆ ಇಲ್ಲಿಯವರೆಗೆ ಚಾಲ್ತಿಯಲ್ಲಿದ್ದ ಇಂಡಿಯನ್‌ ಪೀನಲ್‌ ಕೋಡ್ ಮತ್ತು ಕ್ರಿಮಿನಲ್ ಪ್ರೊಸೀಜರ್ ಕೋಡ್ (ಸಿಆರ್‌ಪಿಸಿ) ರದ್ದುಗೊಂಡು ಭಾರತೀಯ ನ್ಯಾಯ ಸಂಹಿತೆ (Bharatiya Nyaya Samhita) ಜಾರಿಗೆ ಬರಲಿದೆ.
ಹೀಗಾಗಿ ಇನ್ನು ಮುಂದೆ ದೇಶದ ಎಲ್ಲ ಕಾನೂನು ಜಾರಿ ಅಧಿಕಾರಿಗಳು ಬಿಎನ್ಎಸ್ ಅಡಿಯಲ್ಲಿಯೇ ಪ್ರಕರಣವನ್ನು ದಾಖಲಿಸಿಕೊಳ್ಳಬೇಕಿದೆ. ಭಾರತೀಯ ದಂಡ ಸಂಹಿತೆ (IPC), ಕ್ರಿಮಿನಲ್ ಪ್ರೊಸೀಜರ್ ಕೋಡ್ (CrPC) ಮತ್ತು ಭಾರತೀಯ ಸಾಕ್ಷ್ಯ ಕಾಯಿದೆಗಳು ಅಸ್ತಿತ್ವದಲ್ಲಿರುವುದಿಲ್ಲ ಮತ್ತು ಜುಲೈ ಒಂದರಿಂದ ಕ್ರಿಮಿನಲ್ ಅಪರಾಧಗಳ ಎಲ್ಲಾ ಪ್ರಥಮ ಮಾಹಿತಿ ವರದಿಗಳನ್ನು (ಎಫ್‌ಐಆರ್) ನೂತನ ನಿಬಂಧನೆಗಳ ಅಡಿಯಲ್ಲಿ ನೋಂದಾಯಿಸಬೇಕೆಂದು ಕೇಂದ್ರ ಗೃಹ ಸಚಿವಾಲಯ ಸೂಚಿಸಿದೆ.
ಭಾರತೀಯ ನ್ಯಾಯ ಸಂಹಿತಾ (BNS) ಅಡಿಯಲ್ಲಿ ದಾಖಲಾದ ಎಲ್ಲಾ ಪ್ರಕರಣಗಳ ಪ್ರಾಸಿಕ್ಯೂಷನ್ ಮತ್ತು ವಿಚಾರಣೆಯು ಭಾರತೀಯ ನಾಗರಿಕ ಸುರಕ್ಷಾ ಸಂಹಿತಾ (BNSS) ಮತ್ತು ಎಲೆಕ್ಟ್ರಾನಿಕ್ ದಾಖಲೆಗಳು ನಿಗದಿಪಡಿಸಿದ ಕಾಲದ ಪ್ರಕಾರ ಮುಂದುವರಿಯುತ್ತದೆ ಮತ್ತು ಭಾರತೀಯ ಸಾಕ್ಷಿ ಅಧಿನಿಯಮ್ (BSA) ಅಡಿಯಲ್ಲಿ ಕಾನೂನುಬದ್ಧವಾಗಿ ಸ್ವೀಕಾರಾರ್ಹ ಸಾಕ್ಷ್ಯವನ್ನು ರೂಪಿಸುತ್ತದೆ.
ಈಗ ವಿಚಾರಣೆಯ ಹಂತದಲ್ಲಿರುವ ಎಲ್ಲಾ ಕ್ರಿಮಿನಲ್ ಪ್ರಕರಣಗಳು ಭಾರತೀಯ ದಂಡ ಸಂಹಿತೆ (IPC), ಕ್ರಿಮಿನಲ್ ಪ್ರೊಸೀಜರ್ ಕೋಡ್ (CrPC) ಮತ್ತು ಭಾರತೀಯ ಪುರಾವೆಗಳ ಕಾಯಿದೆಯಡಿಯಲ್ಲಿ ಅವುಗಳ ವಿಲೇವಾರಿ ಆಗುವವರೆಗೂ ದೇಶದಲ್ಲಿ ಅಸ್ತಿತ್ವ ದಲ್ಲಿರುವ ಕಾನೂನಿನ ಅನ್ವಯ ಮುಂದುವರಿಯುತ್ತದೆ ಎಂದು ಸರ್ಕಾರಿ ಮೂಲಗಳು ಸ್ಪಷ್ಟಪಡಿಸಿವೆ.
ಜುಲೈ 1, 2024 ರಿಂದ BNS, BNSS ಮತ್ತು BSA ಗಳನ್ನು ಜಾರಿಗೊಳಿಸಲು ಅದೇಶ ಹೊರಡಿಸುವಾಗ ಬಿಎನ್ಎಸ್ ನ ಸೆಕ್ಷನ್ 106 (2) ರ ಕುರಿತು ಒಂದು ವಿನಾಯಿತಿಯನ್ನು ನೀಡಲಾಗಿದೆ – ಇದು ಅತಿ ವೇಗದ ಮತ್ತು ನಿರ್ಲಕ್ಷ್ಯದ ಚಾಲನೆಯಿಂದ ಸಾವಿಗೆ ಕಾರಣವಾದ ಮತ್ತು ಪೋಲೀಸ್‌ ಅಥವಾ ಮ್ಯಾಜಿಸ್ಟ್ರೇಟ್‌ ಗೆ ವರದಿ ಮಾಡದೇ ತಪ್ಪಿಸಿಕೊಂಡರೆ 10 ವರ್ಷಗಳವರೆಗೆ ಜೈಲು ಶಿಕ್ಷೆಯನ್ನು ವಿಧಿಸಲಾಗುತ್ತದೆ. 10 ವರ್ಷಗಳ ಜೈಲು ಶಿಕ್ಷೆಗೆ ದೇಶಾದ್ಯಂತ ಲಾರಿ ಚಾಲಕರ ತೀವ್ರ ವಿರೋಧ ಮತ್ತು ಪ್ರತಿಭಟನೆ ವ್ಯಕ್ತವಾಗಿತ್ತು. ಆದರೆ ಕೇಂದ್ರ ಸರ್ಕಾರ 2024 ರ ಜನವರಿ 2 ರಂದು ಅಖಿಲ ಭಾರತ ಮೋಟಾರ್ ಟ್ರಾನ್ಸ್‌ಪೋರ್ಟ್ ಕಾಂಗ್ರೆಸ್ (ಎಐಎಂಟಿಸಿ) ಗೆ ನೀಡಿದ ಭರವಸೆಯಂತೆ ಬಿಎನ್ಎಸ್ ಮತ್ತು ಬಿಎನ್‌ಎಸ್‌ಎಸ್ ನ ಅಧಿಸೂಚನೆಗಳು ಸೆಕ್ಷನ್ 106(2) ಮಾತ್ರ ನಿಗದಿತ ದಿನಾಂಕದಂದು ಜಾರಿಗೆ ಬರುವುದಿಲ್ಲ ಎಂದು ಹೇಳಿದೆ.
ಜುಲೈ 1, 2024 ರಿಂದ, BNS ಅಡಿಯಲ್ಲಿ ದಾಖಲಾದ ಎಲ್ಲಾ ಪ್ರಕರಣಗಳು ವಿವಿಧ ಕ್ರಿಮಿನಲ್ ಪ್ರಕ್ರಿಯೆಗಳಿಗಾಗಿ BNSS ಸೂಚಿಸಿದ ಕಾಲಮಿತಿಗಳನ್ನು ಅನುಸರಿಸಬೇಕಾಗುತ್ತದೆ ಎಂದು ಮೂಲಗಳು ತಿಳಿಸಿವೆ. ಇದರರ್ಥ ವಿದ್ಯುನ್ಮಾನವಾಗಿ ದಾಖಲಿಸಿದ ಎಫ್‌ಐಆರ್ ಅನ್ನು 3 ದಿನಗಳಲ್ಲಿ ದಾಖಲಾತಿ ಮಾಡಿಕೊಳ್ಳಬೇಕು ತನಿಖಾ ಸ್ಥಿತಿಯನ್ನು 90 ದಿನಗಳಲ್ಲಿ ಸಂತ್ರಸ್ಥರು ಅಥವಾ ದೂರುದಾರರೊಂದಿಗೆ ಹಂಚಿಕೊಳ್ಳಬೇಕು ಮತ್ತು ಚಾರ್ಜ್‌ಶೀಟ್ ಸಲ್ಲಿಕೆಯ ನಂತರ 60 ದಿನಗಳಲ್ಲಿ ನ್ಯಾಯಾಧೀಶರು ಆರೋಪಗಳನ್ನು ರೂಪಿಸಬೇಕು. ಮುಖ್ಯವಾಗಿ, ವಿಚಾರಣೆಯ ಮುಕ್ತಾಯದ ನಂತರ 45 ದಿನಗಳೊಳಗೆ ತೀರ್ಪನ್ನು ಘೋಷಿಸಬೇಕು ಮತ್ತು ದೋಷಮುಕ್ತಗೊಳಿಸುವಿಕೆ ಅಥವಾ ಅಪರಾಧ ನಿರ್ಣಯವನ್ನು ಸೆಷನ್ಸ್ ನ್ಯಾಯಾಲಯವು 30 ದಿನಗಳ ನಂತರ ಅಥವಾ ವಾದಗಳನ್ನು ಪೂರ್ಣಗೊಳಿಸಿದ ನಂತರ (45 ದಿನಗಳವರೆಗೆ ವಿಸ್ತರಿಸಬಹುದು) ನ್ಯಾಯಾಲಯಗಳು ಅದಕ್ಕೆ ಅನುಗುಣವಾಗಿ ಸಾಮರ್ಥ್ಯ ಅಭಿವೃದ್ಧಿಪಡಿಸಬೇಕಾಗಿದೆ.
