ಮೈಸೂರು: ಸಾಂಸ್ಕೃತಿಕ ನಗರಿ ಮೈಸೂರಿನಲ್ಲಿ ಎಲ್ಲೆಲ್ಲೂ ಶಿವನ ಆರಾಧನೆ ನಡೆಯುತ್ತಿದೆ. ಮಹಾಶಿವರಾತ್ರಿ ಅಂಗವಾಗಿ ಶಿವಭಕ್ತರು ಶಿವನಾಮಸ್ಮರಣೆಯಲ್ಲಿ ತೊಡಗಿದ್ದಾರೆ.
ಶಿವರಾತ್ರಿ ವಿಶೇಷತೆ ಅಂಗವಾಗಿ ಮೈಸೂರಿನ ಲಲಿತ ಮಹಲ್ ಮೈದಾನದಲ್ಲಿ ನಿರ್ಮಿಸಿರುವ 21 ಅಡಿಗಳ ವಿಶೇಷ ಶಿವಲಿಂಗ ಭಕ್ತರ ಕಣ್ಮನ ಸೆಳೆಯುತ್ತಿದೆ.
ಹಿಮಾಲಯದ ತಪ್ಪಲಿನ ಮಾದರಿ ಗುರಿ ಶಿಖರ ನಿರ್ಮಿಸಿ, ಅದರ ಮಧ್ಯದಲ್ಲಿ ಮೂಡಿದ ಶಿವಲಿಂಗದ ಮಾದರಿಯು ಬರೋಬ್ಬರಿ 21 ಅಡಿ ಎತ್ತರ ಇದೆ. ಈ ಶಿವಲಿಂಗವನ್ನು ಮೈಸೂರಿನ ಅಲನಹಳ್ಳಿಯಲ್ಲಿರುವ ಬ್ರಹ್ಮಕುಮಾರಿ ಈಶ್ವರಿ ವಿಶ್ವವಿದ್ಯಾಲಯ ಸೇವಾ ಕೇಂದ್ರದಿಂದ ಸ್ಥಾಪನೆ ಮಾಡಲಾಗಿದೆ.
ಈ ವಿಶಿಷ್ಟ ಶಿವಲಿಂಗ ದರ್ಶನಕ್ಕೆ ಸಾಂಸ್ಕೃತಿಕ ನಗರಿ ಜನ ಕಾತರರಾಗಿ ಆಗಮಿಸಿ ಭಕ್ತಿಭಾವ ಮೆರೆಯುತ್ತಿದ್ದಾರೆ .ಶಿವರಾತ್ರಿ ಹಬ್ಬದಂದು ಪೂಜೆ ಮುಗಿಸಿ ನೂರಾರು ಜನ ಇಲ್ಲಿಗೆ ಆಗಮಿಸಿ ಶಿವಲಿಂಗದ ದರ್ಶನ ಪಡೆಯುತ್ತಿದ್ದಾರೆ. ಬೃಹತ್ ಶಿವಲಿಂಗದ ಮುಂದೆ ಪ್ರತಿಯೊಬ್ಬರು ಫೋಟೋ ಕ್ಲಿಕ್ಕಿಸಿಕೊಳ್ತಿದ್ದ ದೃಶ್ಯ ಸಾಮಾನ್ಯವಾಗಿದೆ. ಬೃಹತ್ ರುದ್ರಾಕ್ಷಿ ಶಿವಲಿಂಗ ಶಿವರಾತ್ರಿ ಮೆರಗನ್ನ ಇನ್ನಷ್ಟು ಹೆಚ್ಚಿಸಿದೆ
5 ಲಕ್ಷ ರುದ್ರಾಕ್ಷಿ‌ಗಳಿಂದ ನಿರ್ಮಾಣ:
ಲಲಿತ್‌ ಮಹಲ್ ಬಳಿಯ ಮೈದಾನದಲ್ಲಿ ಬ್ರಹ್ಮಕುಮಾರಿ ಈಶ್ವರಿ ವಿಶ್ವವಿದ್ಯಾಲಯ ಸ್ಥಾಪಿಸಿರೋ ಶಿವಲಿಂಗ ಬಹಳ ವಿಶಿಷ್ಟವಾಗಿದೆ. ಈ ಶಿವಲಿಂಗಕ್ಕೆ ಶಿವನಿಗೆ ಇಷ್ಟವಾದ ರುದ್ರಾಕ್ಷಿಗಳನ್ನು ಬಳಸಿ ನಿರ್ಮಿಸಲಾಗಿದೆ. ಹೃಷಿಕೇಶದಿಂದ ತರಿಸಲಾದ ಬರೋಬ್ಬರಿ 5 ಲಕ್ಷದ 20 ಸಾವಿರ ರುದ್ರಾಕ್ಷಿಯಿಂದ ಈ ಶಿವಲಿಂಗ ನಿರ್ಮಾಣ ಮಾಡಲಾಗಿದೆ. ಸೇವಾಶ್ರಮದ ಭಕ್ತರೆಲ್ಲ ಸೇರಿ ದಾರಗಳ ಮೂಲಕ ರುದ್ರಾಕ್ಷಿಗಳನ್ನು ಪೋಣಿಸಿ ಈ ಕೈಲಾಸ ಶಿವಲಿಂಗ ನಿರ್ಮಿಸಿದ್ದಾರೆ. ಬೃಹತ್ ಲಿಂಗದ ಜೊತೆಗೆ ಹಿಮಾಲಯದ ಗುಹೆಗಳ ಮಾದರಿ ನಿರ್ಮಾಣ ಮಾಡಿದ್ದು, ಆಧ್ಯಾತ್ಮ, ಧ್ಯಾನ, ಜೀವನ ಆದರ್ಶ, ಶಿವರಾತ್ರಿ ಆಚರಣೆ ಮಹತ್ವ ತಿಳಿಸುವ ಹಲವು ನಾಮ ಫಲಕಗಳನ್ನು ಇಲ್ಲಿ ಅಳವಡಿಕೆ ಮಾಡಲಾಗಿದೆ.
ಶಿವಲಿಂಗ ಆಕರ್ಷಣೆ..
ಇನ್ನು 21 ಅಡಿ ಬೃಹತ್ ಲಿಂಗದ ಸುತ್ತಲೂ ಹಿಮಾಲಯದ ಪರ್ವತಗಳ ಮಾದರಿ ನಿರ್ಮಾಣ ಮಾಡಲಾಗಿದ್ದು, ಅದರ ಒಳ ಭಾಗದಲ್ಲಿ ಗುಹೆಗಳ ನಿರ್ಮಾಣ ಮಾಡಲಾಗಿದೆ. ಅಲ್ಲಿ ಬರುವ ಭಕ್ತರಿಗೆ ಜೋತಿರ್ಲಿಂಗಗಳ ದರ್ಶನದ ವ್ಯವಸ್ಥೆ ಮಾಡಲಾಗಿದೆ.
ಸೋಮನಾಥ, ಮಲ್ಲಿಕಾರ್ಜುನ, ಮಹಾಕಾಳೇಶ್ವರ, ವಿಶ್ವನಾಥ, ವೈದ್ಯನಾಥ, ನಾಗೇಶ್ವರ, ಕೇದಾರನಾಥ, ರಾಮೇಶ್ವರ, ಗ್ರಿಷ್ಣೇಶ್ವರ, ಭೀಮಶಂಕರ, ತ್ರಯಂಬಕೇಶ್ವರ ಹಾಗೂ ಓಂಕಾರೇಶ್ವರ ದೇವರ ಮಾದರಿ ಪ್ರತಿಮೆ ನಿರ್ಮಾಣ ಮಾಡಲಾಗಿದೆ. ಅಷ್ಟು ಮಾತ್ರವಲ್ಲದೆ ಪ್ರತೀ ಸ್ಥಳದ ಪರಿಚಯದೊಂದಿದೆ ಅವುಗಳ ಪುರಾಣ ಪ್ರತೀತಿಗಳ ಬಗ್ಗೆ ತಿಳಿಸಿಕೊಡಲಾಗುತ್ತಿದೆ.
ಆಲನಹಳ್ಳಿ ಬ್ರಹ್ಮಕುಮಾರಿ ಆಶ್ರಮ ಪ್ರತಿವರ್ಷ ಶಿವರಾತ್ರಿಗೆ ವಿಶೇಷ ಶಿವಲಿಂಗ ಸ್ಥಾಪನೆ ಮಾಡಿಕೊಂಡು ಬರುತ್ತಿದೆ. ಕಳೆದ ಬಾರಿ21 ಸಾವಿರ ತೆಂಗಿನಕಾಯಿ ಬಳಸಿ 21 ಅಡಿ ಎತ್ತರದ ಶಿವಲಿಂಗ ಸ್ಥಾಪನೆ ಮಾಡಲಾಗಿತ್ತು. ಈ ರುದ್ರಾಕ್ಷಿಯಿಂದ ಶಿವಲಿಂಗ ರಚನೆ ಯಾಗಿದ್ದು, ಫೆಬ್ರವರಿ 22ರ ವರೆಗೆ ಸಾರ್ವಜನಿಕ ದರ್ಶನಕ್ಕೆ ಅವಕಾಶ ಮಾಡಿಕೊಡಲಾಗಿದೆ.
