ಸ್ವಾತಂತ್ರ್ಯ ಬಂದಿರೋದು ಬರೀ ರಸ್ತೆ, ಸೇತುವೆ ಮಾಡೋದಕ್ಕಲ್ಲ ಹಿಂದುತ್ವ ಹಾಗೂ ಸಂಸ್ಕೃತಿ ಉಳಿಸೋದಕ್ಕೆ ಎಂದು ಮಾಜಿ ಸಚಿವ ಕೆಎಸ್ ಈಶ್ವರಪ್ಪ ಹೇಳಿದ್ದಾರೆ.
ಜೆಡಿಎಸ್-ಕಾಂಗ್ರೆಸ್‌ ತೊರೆದು ಬಿಜೆಪಿ ಸೇರ್ಪಡೆ ಕಾರ್ಯಕ್ರಮವನ್ನುದ್ದೇಶಿಸಿ ಮಾತನಾಡಿದ ಕೆ.ಎಸ್.ಈ ಕಾಂಗ್ರೆಸ್‌ ವಿರುದ್ದ ಹರಿಹಾಯ್ದಿದ್ದಾರೆ.
ಸ್ವಾತಂತ್ರ್ಯ ಬಂದಾಗಿನಿಂದ, ನರೇಂದ್ರ ಮೋದಿ ಪ್ರಧಾನಿಯಾಗುವವರೆಗೆ ಅಭಿವೃದ್ಧಿ ಕಾರ್ಯಗಳು ಕಡಿಮೆಯಾಗುತ್ತಿದ್ದವು. ನಮಗೆ ಸ್ವಾತಂತ್ರ್ಯ ಯಾಕೆ ಬಂತು ಎಂದರೆ ಬ್ರಿಟೀಷರ ವಿರುದ್ಧ ಹೋರಾಡಿಯೋ, ಸೇತುವೆ-ರಸ್ತೆ ಮಾಡುವುದಕ್ಕೋ ಅಲ್ಲ.! ಸ್ವಾತಂತ್ರ್ಯ ಬಂದಿರೋದು ಈ ದೇಶದ ಸಂಸ್ಕೃತಿ ಉಳಿಸಬೇಕು ಅಂತ..! ಅಯೋಧ್ಯೆಯಲ್ಲಿ ರಾಮ ಮಂದಿರ ಆಗ್ತಾ ಇದೆ. ಕಾಶಿ ವಿಶ್ವನಾಥನ ದೇಗುಲ ಕೂಡ ಆಗುತ್ತೆ. ಜಮ್ಮು ಕಾಶ್ಮೀರದ ವಿಶೇಷಾಧಿಕಾರ ರದ್ದು ಮಾಡಿ ಹಲವು ವರ್ಷಗಳಾಗಿವೆ.
ಮುಸ್ಲಿಂ ಸಮುದಾಯದಲ್ಲಿ ತ್ರಿವಳಿ ತಲಾಕ್ ಹೆಣ್ಣುಮಕ್ಕಳಿಗೆ ಕಂಟಕವಾಗಿತ್ತು. ಅದನ್ನೂ ಕೂಡ ತೆರವು ಮಾಡಲಾಗಿದೆ. ಈ ತರಹ ದೇಶದಲ್ಲಿ ಭಾರತೀಯ ಸಂಸ್ಕೃತಿ ಬೆಳೆಸುತ್ತಾ, ಹಿಂದುತ್ವ ಪ್ರತಿಪಾದನೆ ಮಾಡಲಾಗುತ್ತಿದೆ. ಒಂದು ಕಡೆ ಅಭಿವೃದ್ಧಿ, ಇನ್ನೊಂದೆಡೆ ಹಿಂದುತ್ವ, ನಾಯಕತ್ವ ಎಂದು ಬಿಜೆಪಿ ಸರ್ಕಾರದ ಸಾಧನೆಗಳ ಬಗ್ಗೆ ಗುಣಗಾನ ಮಾಡಿದ್ದಾರೆ.
ಪಕ್ಷದ ನೇತೃತ್ವ ಎಂದಾಕ್ಷಣ ಸುಲಭದ ಕೆಲಸವಲ್ಲ. ಉದಾಹರಣೆಗೆ ಇಡೀ ಶಿವಮೊಗ್ಗದ ಏಳು ಸ್ಥಾನಗಳಲ್ಲಿ ಆರು ಗೆದ್ದಿದ್ದೇವೆ. ಭದ್ರಾವತಿ ನಾವು ಗೆಲ್ಲಲು ಸಾಧ್ಯವಾಗಲಿಲ್ಲ..! ಲೋಕಸಭೆ ಚುನಾವಣೆಯಲ್ಲಿ ನರೇಂದ್ರ ಮೋದಿ ಗೆಲ್ಲಬೇಕು ಎಂದು ಅತೀ ಹೆಚ್ಚು ಮತಗಳನ್ನ ಹಾಕಿದ್ದು ನಮ್ಮ ಶಿವಮೊಗ್ಗ ಜಿಲ್ಲೆ. ಪ್ರಧಾನಿ ಮೋದಿ ಅವರ ಆಶಯದಂತೆ ಅಭಿವೃದ್ಧಿ ಜೊತೆ ಹಿಂದುತ್ವವನ್ನೂ ಪ್ರತೀ ವಾರ್ಡ್ ನಲ್ಲಿ ಬೆಳೆಸಬೇಕು ಎಂದು ಕರೆ ಕೊಟ್ಟಿದ್ದಾರೆ.
ಈ ದೇಶದಲ್ಲಿ ಏನಾಗ್ತಿದೆ. ಹಿಂದೂ ಯುವತಿಯನ್ನ ಕರೆದುಕೊಂಡು ಹೋಗಿ ಮೂವತ್ತೈದು ತುಂಡು ಮಾಡಿ ಎಸೆಯುತ್ತಾರೆಂದರೆ ಎಷ್ಟು ಸೊಕ್ಕಿರಬೇಕು..! ಆ ಆಕ್ರೋಶ ನಮ್ಮಲಿದೆ ಇನ್ನೂ..! ಹಿಂದುತ್ವದ ಮೇಲಿನದ ದಬ್ಬಾಳಿಕೆ ಸಹಿಸಬಾರದು. ನಮ್ಮೆಲ್ಲಾ ಪ್ರಯತ್ನಗಳನ್ನ ಮಾಡೋಣ. ದೇಶದಲ್ಲಿ ಬಿಜೆಪಿ ಬೆಳೆಸ್ತಿರೋ ಉದ್ದೇಶ ನಮ್ಮ ಸಂಸ್ಕೃತಿ ಉಳಿಸ್ತಿದ್ದೇವೆ ಎಂದರ್ಥ. ನಾವೆಲ್ಲರೂ ಹಿಂದೂ ಹುಲಿಗಳಾಗಬೇಕು. ಆ ಮುಖಾಂತರ ಧರ್ಮ ಉಳಿಸಬೇಕು ಎಂದು ಪಕ್ಷ ಸೇರ್ಪಡೆ ಕಾರ್ಯಕ್ರಮದಲ್ಲಿ ಮಾತನಾಡುವ ವೇಳೆ ಹೇಳಿದ್ದಾರೆ.
