ಕರ್ನಾಟಕದ ಹೆದ್ದಾರಿಗಳು ಮತ್ತು ಪ್ರಮುಖ ರಸ್ತೆಗಳಲ್ಲಿನ ಸಮಸ್ಯೆಗಳು ವಿಧಾನಸಭೆಯಲ್ಲಿ ಚರ್ಚೆಗೆ ಬಂದಿವೆ. ಸೋಮವಾರದ ಅಧಿವೇಶನದಲ್ಲಿ ಈ ವಿಷಯವನ್ನು ಪ್ರಸ್ತಾಪಿಸಿದ ಮಾಜಿ ಸ್ಪೀಕರ್ ಕೆ ಆರ್ ರಮೇಶ್ ಕುಮಾರ್, ಸರ್ಕಾರವನ್ನು ತರಾಟೆಗೆ ತೆಗೆದುಕೊಂಡಿದ್ದಾರೆ. ಈ ವೇಳೆ ರಸ್ತೆಗಳಲ್ಲಿರುವ ಹಂಪ್ಗಳಲ್ಲಿ 99% ದಷ್ಟು ಅವೈಜ್ಞಾನಿಕ ಎಂಬುವುದನ್ನು ಲೋಕೋಪಯೋಗಿ ಸಚಿವ ಸಿಸಿ ಪಾಟೀಲ್ ಒಪ್ಪಿಕೊಂಡಿದ್ದಾರೆ.
52 ಕಿಮೀ ಉದ್ದದ ಹೊಸಕೋಟೆ-ಮಡಿಕೇರಿ ಕ್ರಾಸ್ ರೋಡ್ ಮತ್ತು 82 ಕಿಮೀ ಉದ್ದದ ರಾಷ್ಟ್ರೀಯ ಹೆದ್ದಾರಿ 234 ರಲ್ಲಿ ಮುಲ್ಬಾಗಲ್ ಮತ್ತು ಚಿಕ್ಕಬಳ್ಳಾಪುರವನ್ನು ಸಂಪರ್ಕಿಸುವ ಅಧಿಕೃತ ರಸ್ತೆ ಹಂಪ್‌ಗಳು/ಸ್ಪೀಡ್ ಬ್ರೇಕರ್‌ಗಳ ಬಗ್ಗೆ ವಿವರಗಳನ್ನು ನೀಡುವಂತೆ ಕೆ ಆರ್ ರಮೇಶ್ ಕುಮಾರ್ ಸಿಸಿ ಪಾಟೀಲ್ ಅವರಿಗೆ ಪ್ರಶ್ನೋತ್ತರ ವೇಳೆಯಲ್ಲಿ ಕೇಳಿದ್ದಾರೆ.
ಪಾಟೀಲ್ ತನ್ನ ಲಿಖಿತ ಪ್ರತಿಕ್ರಿಯೆಯಲ್ಲಿ, 52 ಕಿಮೀ ರಸ್ತೆಯು 33 ಅಧಿಕೃತ ‘ಪಾದಚಾರಿ ದಾಟುವಿಕೆಗಳನ್ನು’ ಹೊಂದಿದೆ ಮತ್ತು NH 234 ನಲ್ಲಿ 84 ರಸ್ತೆ ಹಂಪ್ಗಳಲ್ಲಿ 70 ಅವೈಜ್ಞಾನಿಕವಾಗಿದೆ ಎಂದು ಹೇಳಿದರು.
ಇದನ್ನು ಕೇಳಿ ಸಿಟ್ಟಾದ ರಮೇಶ್ ಕುಮಾರ್ ಅವರು “ಅದು 33 ಅಲ್ಲ, 52-ಕಿಮೀ ರಸ್ತೆಯಲ್ಲಿ 47 ಹಂಪ್‌ಗಳನ್ನು ಇದೆ” ಎಂದು ಹೇಳಿದರು. “ಇದಕ್ಕೊಂದು ಪ್ರಕ್ರಿಯೆ ಇದೆಯೇ? ಈ ರಸ್ತೆ ಹಂಪ್‌ಗಳನ್ನು ಹಾಕಿದವರು ಯಾರು? ನಿಮ್ಮ ಅಧಿಕಾರಿಗಳು ರಸ್ತೆಗಳನ್ನು ಪರಿಶೀಲಿಸುವುದಿಲ್ಲವೇ? ಸದನವು ಈ ವಿಷಯವನ್ನು ಚರ್ಚಿಸುತ್ತಿರುವುದು ಇದು ಎರಡನೇ ಬಾರಿ. ನಾವೇಕೆ ಇಲ್ಲಿಗೆ ಬರಬೇಕು? ಎಂದು ಪಾಟೀಲ್ ಅವರಿಗೆ ಪ್ರಶ್ನಿಸಿದರು ಮತ್ತು ಸಂಬಂಧಪಟ್ಟ ಎಂಜಿನಿಯರ್‌ಗಳನ್ನು ಅಮಾನತುಗೊಳಿಸುವಂತೆ ಸಚಿವರಿಗೆ ಒತ್ತಾಯಿಸಿದರು.
ರಮೇಶ್ ಕುಮಾರ್ ಅವರ ಮಾತಿಗೆ ಪ್ರತಿಕ್ರಿಯಿಸಿದ ಪಾಟೀಲ್ ಅವರು, ರಸ್ತೆ ಹಂಪ್‌ಗಳು ಅಪಾಯಕಾರಿಯಾಗಿ ಪರಿಣಮಿಸಿವೆ ಎಂದು ಒಪ್ಪೊಕೊಂಡಿದ್ದಾರೆ. “ನನ್ನ ಸ್ವಂತ ಕ್ಷೇತ್ರದಲ್ಲಿ ನಾನು ಇದರಿಂದ ಕಷ್ಟವಾಗುತ್ತಿದೆ, ಆದರೆ ಅಧಿಕಾರಿಗಳನ್ನು ಅಮಾನತುಗೊಳಿಸುವುದು ಅದಕ್ಕೆ ಪರಿಹಾರವಲ್ಲ, ಎಂದು ಪಾಟೀಲ್ ಅವರು ಉತ್ತರಿಸಿದ್ದಾರೆ.
ಸ್ಥಳೀಯರ ಆಜ್ಞೆಯ ಮೇರೆಗೆ ಅವೈಜ್ಞಾನಿಕ ರಸ್ತೆ ಹಂಪ್‌ಗಳು ಬರಲು ಕಾರಣ ಎಂದು ಹೇಳಿದರು. “ಅವರು ಸ್ಪೀಡ್ ಬ್ರೇಕರ್‌ಗಳನ್ನು ಸ್ಥಾಪಿಸಲು ನೇರವಾಗಿ ಗುತ್ತಿಗೆದಾರರನ್ನು ಸಂಪರ್ಕಿಸುತ್ತಾರೆ. ಸ್ಥಳೀಯರಿಗೆ ಎಲ್ಲಿ ಅಪಘಾತಗಳು ಸಂಭವಿಸಿದರೂ ಅವರಿಗೆ ಅಲ್ಲೆ ಸ್ಪೀಡ್ ಬ್ರೇಕರ್ ಬೇಕು ಎಂದು ಅವರು ಬಯಸುತ್ತಾರೆ. ಅದು ಸಹಜವೆ ನಾನು ಒಪ್ಪಿಕೊಳ್ಳುತ್ತೇನೆ. “ಅವರು ನಿರ್ಮಿಸಿದ ಎಲ್ಲಾ ಸ್ಪೀಡ್ ಬ್ರೇಕರ್‌ಗಳಲ್ಲಿ, ಶೇಕಡಾ 99 % ರಷ್ಟು ವೈಜ್ಞಾನಿಕವಾಗಿರುವುದಿಲ್ಲ, ಅದ್ದರಿಂದ ” ಅವೈಜ್ಞಾನಿಕ ರಸ್ತೆ ಹಂಪ್‌ಗಳನ್ನು ತೆಗೆದುಹಾಕಲು ಅಧಿಕಾರಿಗಳಿಗೆ ನಿರ್ದೇಶನ ನೀಡುವುದಾಗಿ ಪಾಟೀಲ್ ಅವರು ಹೇಳಿದರು.
ಕೆಂಪೇಗೌಡ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ ಹೋಗುವ ರಸ್ತೆಯ ಉದಾಹರಣೆಯನ್ನು ಉಲ್ಲೇಖಿಸಿ ರಮೇಶ್ ಕುಮಾರ್ ಪಾಟೀಲರನ್ನು ಮತ್ತಷ್ಟು ತರಾಟೆಗೆ ತೆಗೆದುಕೊಂಡರು. “ವೇಗವನ್ನು ಪರೀಕ್ಷಿಸಲು ನಿಮ್ಮ ಬಳಿ ಪೊಲೀಸರು ಇದ್ದಾರೆ. ನೀವು ಟೆಂಪೋಗಳು, ರಿಕ್ಷಾಗಳು ಮತ್ತು ಸ್ಕೂಟರ್‌ಗಳನ್ನು ಸಹ ಅನುಮತಿಸುತ್ತೀರಿ. ಸಮಯಕ್ಕೆ ಸರಿಯಾಗಿ ತಮ್ಮ ವಿಮಾನಗಳನ್ನು ಹಿಡಿಯಲು ಬಯಸುವ ಜನರು ವಾಹನಗಳನ್ನು ವೇಗವಾಗಿ ಚಲಿಸುತ್ತಾರೆ, ”ಎಂದು ಪಾಟೀಲ್ ರನ್ನು ತರಾಟೆಗೆ ತಗೆದುಕೊಂಡರು.
ಸ್ಪೀಕರ್ ವಿಶ್ವೇಶ್ವರ ಹೆಗಡೆ ಕಾಗೇರಿ ಕೂಡ ಈ ವಿಚಾರವನ್ನು ಪ್ರಸ್ತಾಪಿಸಿದರು ಮತ್ತು ರಸ್ತೆ ಹಂಪ್‌ಗಳ ಅನಿಯಂತ್ರಿತ ಬಳಕೆಯ ಬಗ್ಗೆ ಏನಾದರೂ ಮಾಡುವಂತೆ ಪಾಟೀಲ್ ಅವರನ್ನು ಕೇಳಿದರು.
