ಕರೋನಾ ಸೋಂಕಿನಿಂದ ಎದುರಾದ ಆರ್ಥಿಕ ಬಿಕ್ಕಟ್ಟಿನ ಬಿಸಿ ರಿಲಯನ್ಸ್ ಸಮೂಹ ಸಂಸ್ಥೆಗಳಿಗೂ ತಟ್ಟಿದ್ದು ತೈಲ ಮತ್ತು ಅನಿಲ ವಿಭಾಗದಲ್ಲಿ ಉನ್ನತ ಹುದ್ದೆಯಲ್ಲಿ ಕೆಲಸ ಮಾಡುವ ಕಾರ್ಮಿಕರ ವೇತನದಲ್ಲಿ ಅರ್ಧದಷ್ಟು ಕಡಿತಗೊಳಿಸಲಾಗುವುದು ಎಂದು ರಿಲಯನ್ಸ್ ಇಂಡಸ್ಟ್ರೀಸ್ ಮಂಗಳವಾರ ಘೋಷಿಸಿದೆ ಎಂದು ʼರಾಯಿಟರ್ಸ್ʼ ವರದಿ ಮಾಡಿದೆ. ವಾರ್ಷಿಕ 15 ಲಕ್ಷಕ್ಕಿಂತ ಹೆಚ್ಚು ವೇತನ ಪಡೆಯುವ ಕಾರ್ಮಿಕರ ವೇತನದಲ್ಲಿ 10% ಕಡಿತಗೊಳಿಸಲಾಗುವುದು, ಉನ್ನತ ಹುದ್ದೆಯ ಮಂದಿಯ 30% ರಿಂದ 50% ವೇತನದಲ್ಲಿ ಕಡಿತಗೊಳಿಸಲಾಗುವುದು ಎಂದು ಕಂಪೆನಿಯ ಅಧಿಕೃತ ಹೇಳಿಕೆಯನ್ನು ಆಧರಿಸಿ ʼರಾಯಿಟರ್ಸ್ʼ ಸುದ್ದಿ ಸಂಸ್ಥೆ ವರದಿ ಮಾಡಿದೆ.
ಸಂಸ್ಕರಿಸಿದ ಪೆಟ್ರೋಲಿಯಂ ಉತ್ಪನ್ನಗಳು ಮತ್ತು ಪೆಟ್ರೋ ರಾಸಾಯನಿಕಗಳ ಬೇಡಿಕೆ ಕಡಿಮೆಯಾದ ಕಾರಣ ಹೈಡ್ರೋಕಾರ್ಬನ್ಗಳ ವ್ಯವಹಾರದಲ್ಲಿ ಪ್ರತಿಕೂಲ ಪರಿಣಾಮ ಬೀರಿದೆ ಎಂದು ಕಾರ್ಯನಿರ್ವಾಹಕ ನಿರ್ದೇಶಕ ಹಿತಲ್ ಮೆಸ್ವಾನಿ ನೌಕರರಿಗೆ ಬರೆದ ಪತ್ರದಲ್ಲಿ ತಿಳಿಸಿದ್ದಾರೆ. ನಾವು ನಿರ್ವಹಣಾ ವೆಚ್ಚ ಹಾಗೂ ನಿಗದಿತ ವೆಚ್ಚದ ಮೇಲೆ ಗಣನೀಯ ಪ್ರಮಾಣದ ಹಿಡಿತ ಹೊಂದಬೇಕಾದಂತಹ ಪರಿಸ್ಥಿತಿಯಲ್ಲಿದ್ದೇವೆ. ಇದಕ್ಕೆ ನಮ್ಮೆಲ್ಲರ ಕೊಡುಗೆಯೂ ಅಗತ್ಯವಾಗಿದೆ. ನಮ್ಮ ಚೇರ್ಮನ್ (ಅಂಬಾನಿ) ತಮ್ಮ ಸಂಪೂರ್ಣ ಭತ್ಯೆಯನ್ನು ತ್ಯಜಿಸಿದ್ದಾರೆಂದು ಪತ್ರದಲ್ಲಿ ಬರೆದಿದ್ದಾರೆ.
ರಿಲಯನ್ಸ್ ಇಂಡಸ್ಟ್ರೀಸ್ ತನ್ನ ಕಾರ್ಮಿಕರಿಗೆ ನೀಡುವ ವಾರ್ಷಿಕ ಬೋನಸ್ ನಗದು ಮತ್ತು ಕಾರ್ಯಕ್ಷಮತೆ ಆಧಾರಿತ ಪ್ರೋತ್ಸಾಹಕಗಳನ್ನು ಕೂಡಾ ಮುಂದೂಡಿದೆ ಎಂದು ʼದಿ ಎಕನಾಮಿಕ್ ಟೈಮ್ಸ್ʼ ವರದಿ ಮಾಡಿದೆ. ರಿಲಯನ್ಸ್ ನೇತೃತ್ವದ ಉಳಿದ ಸಂಸ್ಥೆಗಳ ಮೇಲೆ ಆರ್ಥಿಕ ಬಿಕ್ಕಟ್ಟಿನ ನೇರ ಪರಿಣಾಮ ಬೀರಿದೆಯೇ ಎಂದು ಇನ್ನೂ ಸ್ಪಷ್ಟಗೊಂಡಿಲ್ಲ.
ಪಾರದರ್ಶಕತೆ ಕಾಪಾಡಿಕೊಳ್ಳದ ಕುರಿತು ವಿವಾದಗಳೆದ್ದಿರುವ PM-CARES ನಿಧಿಗೆ 500 ಕೋಟಿ ಸಂಭಾವನೆ ನೀಡಿರುವ ಗುಜರಾತ್ ಮೂಲದ ಅಂಬಾನಿ ತನ್ನ ಕಾರ್ಮಿಕರ ವೇತನದಲ್ಲಿ ಬಹುತೇಕ ಅರ್ಧದಷ್ಟನ್ನು ತಡೆಹಿಡಿದಿರುವುದು ಸಂದೇಹ ಮತ್ತು ಆಕ್ರೋಶಕ್ಕೆ ಗುರಿಯಾಗಿದೆ.
ಕೃಪೆ: Scroll.in
