ಜನಪ್ರಿಯ ಸ್ವಯಂ-ಘೋಷಿತ ದೇವಮಾನವ ಜಗ್ಗಿ ವಾಸುದೇವ್ ಅಲಿಯಾಸ್ ʼಸದ್ಗುರುʼ ಅವರು ಖಾಸಗಿ ವಾಹಿನಿಯೊಂದರ ಸಂದರ್ಶನದಲ್ಲಿ ನಿರೂಪಕ ಕೇಳಿದ ಪ್ರಶ್ನೆಗೆ ಕೋಪಗೊಂಡಿದ್ದು, ಕೆಮರಾ ಆಫ್ ಮಾಡುವಂತೆ ಎಗರಾಡಿದ ವಿಡಿಯೋ ಸಾಮಾಜಿಕ ಮಾಧ್ಯಮಗಳಲ್ಲಿ ವೈರಲ್ ಆಗಿದೆ. ಜಗ್ಗಿ ವಾಸುದೇವ್ ಸ್ಥಾಪಿಸಿರುವ ಇಶಾ ಫೌಂಡೇಶನ್ ಸಂಸ್ಥೆಯ ಯೋಜನೆಯೊಂದರಲ್ಲಿ ಕಾನೂನು ಉಲ್ಲಂಘನೆಯ ಕುರಿತಂತೆ ನಿರೂಪಕ ಸದ್ಗುರುವನ್ನು ಪ್ರಶ್ನಿಸಿದ್ದು, ಈ ಪ್ರಶ್ನೆಯಿಂದ ವಿಚಲಿತರಾದ ಜಗ್ಗಿ ವಾಸುದೇವ್ ಸಿಡಿಮಿಡಿಗೊಂಡಿದ್ದಾರೆ. ಮಾತ್ರವಲ್ಲ, ನಿರೂಪಕನಲ್ಲಿ ಸುಮ್ಮನಿರುವಂತೆ ಸೂಚಿಸಿ, ತನ್ನ ಜನರಲ್ಲಿ ಕೆಮರಾ ಬಂದ್ ಮಾಡಿ ಎಂದು ಹೇಳುವುದು ವೈರಲ್ ಆಗಿರುವ ವಿಡಿಯೋದಲ್ಲಿ ಕಂಡು ಬಂದಿದೆ.
ಜಗ್ಗಿ ವಾಸುದೇವ್ ನೇತೃತ್ವದ ಇಶಾ ಫೌಂಡೇಶನ್ ಸಂಸ್ಥೆಯ ಯೋಜನೆಗಳಿಗೆ ಪರಿಸರ ಅನುಮತಿಯನ್ನು ಏಕೆ ಪಡೆದಿಲ್ಲ ಎಂದು ʼಬಿಬಿಸಿ ತಮಿಳುʼ ವಾಹಿನಿಯ ನಿರೂಪಕ ಸದ್ಗುರು ಬಳಿ ಪ್ರಶ್ನಿಸಿದ್ದಾರೆ. ಇದರಿಂದ ಇರಿಸು-ಮುರಿಸುಗೊಳಗಾದ ಜಗ್ಗಿ ವಾಸುದೇವ್, “ಯಾವುದೇ ಅಕ್ರಮ ನಡೆದಿಲ್ಲ, ಎಲ್ಲವೂ ಪರಿಪೂರ್ಣವಾಗಿದೆ ಎಂದು ಸರಕಾರ ಹೇಳಿದೆ….ಈ ನೆಲದಲ್ಲಿ ಕಾನೂನು ಇಲ್ಲವೇ? ಸರಕಾರ ಇಲ್ಲವೇ? ಅವರ ಕೆಲಸ ಅವರೇ ಮಾಡಲಿ. ನೀವು ಏನಕ್ಕೆ ಮಾಡುತ್ತಿದ್ದೀರಿ?” ಎಂದು ಪ್ರಶ್ನೆಗೆ ಮರು ಪ್ರಶ್ನೆ ಹಾಕಿ ಸಂದರ್ಶಕನನ್ನು ಮೌನವಾಗಿಸಲು ಪ್ರಯತ್ನಿಸಿದ್ದಾರೆ.
ಆದರೆ, ವಾಸುದೇವ್ ಪ್ರಯತ್ನಕ್ಕೆ ಹಿಂಜರಿಯದ ಸಂದರ್ಶಕ “ನಿಮಗೆ ಪರಿಸರದ ಬಗ್ಗೆ ತುಂಬಾ ಕಾಳಜಿ ಇದ್ದರೆ, ನೀವು ಈ ಕಟ್ಟಡಗಳನ್ನು ಪ್ರಾರಂಭಿಸುವ ಮೊದಲು ಏಕೆ ಸರಿಯಾದ ರೀತಿ ಅನುಮತಿ ತೆಗೆದುಕೊಳ್ಳಬಾರದು?” ಎಂದು ಪುನಃ ಪ್ರಶ್ನಿಸಿದ್ದಾರೆ.
ಸಂದರ್ಶಕ ತನ್ನ ಪ್ರಶ್ನೆಯಿಂದ ಹಿಂದೆ ಸರಿಯದಾದಾಗ, “ನಿಮ್ಮ ನಾನ್ಸೆನ್ಸ್ ನೀವು ಹೇಳುತ್ತಿರುವಿರಿ … ಅವರ ಕ್ಯಾಮೆರಾವನ್ನು ಆಫ್ ಮಾಡಿ. ಸಾಕು … ಕೇಳು, ಮನುಷ್ಯ, ನನ್ನ ಮಾತುಗಳನ್ನು ಕೇಳು. ದೇಶದಲ್ಲಿ ಇರುವ ಪ್ರತಿಯೊಂದು ಕಾನೂನನ್ನು ಅನುಸರಿಸಲಾಗಿದೆ. ಸಣ್ಣ ಪುಟ್ಟ ತಕರಾರಿದ್ದದ್ದನ್ನು ಬಹಳ ಹಿಂದೆಯೇ, 20 ವರ್ಷಗಳ ಹಿಂದೆ, ಸರಿ ಮಾಡಿದ್ದೇವೆ…” ಎಂದು ವಾಸುದೇವ್ ಹೇಳಿದ್ದಾರೆ. ಆಗಲೇ ಮಧ್ಯಪ್ರವೇಶಿಸಿದ ಸಂದರ್ಶಕ, ನಾನು 2012 ರ ವಿಷಯವನ್ನು ಪ್ರಸ್ತಾಪಿಸುತ್ತಿದ್ದೇನೆ ಎನ್ನುತ್ತಾರೆ. ಈ ಹಂತದಲ್ಲಿ ಸಂದರ್ಶನವನ್ನು ಕಡಿತಗೊಳಿಸಲಾಗಿದೆ.
ಈ ವೇಳೆ “ಜಗ್ಗಿ ವಾಸುದೇವ್ ಜೊತೆಗಿದ್ದ ಜನರು BBC ಯ ಮೂರು ಕ್ಯಾಮೆರಾಗಳನ್ನು ಬಲವಂತವಾಗಿ ಬಂದ್ ಮಾಡಿದರು” ಎಂದು BBC ನ್ಯೂಸ್ ಹೇಳಿದೆ. ಸದ್ಯ ಈ ವಿಡಿಯೋ ಸಾಮಾಜಿಕ ಮಾಧ್ಯಮದಲ್ಲಿ ವೈರಲ್ ಆಗಿದ್ದು, ಡಿಬೇಟುಗಳಲ್ಲಿ ನಿರರ್ಗಳ ಮಾತನಾಡಿ ಜನಪ್ರಿಯರಾಗಿರುವ ಸ್ವಯಂಘೋಷಿತ ದೇವಮಾನವಜಗ್ಗಿ ವಾಸುದೇವ್ ಪತ್ರಕರ್ತರ ಒಂದು ಪ್ರಶ್ನೆಗೆ ಉತ್ತರಿಸದೆ ಕೆಮರಾ ಆಫ್ ಮಾಡಿಸಿರುವುದು ಸಾಕಷ್ಟು ಚರ್ಚೆಗೆ ಕಾರಣವಾಗಿದೆ.
ಅಲ್ಲದೆ, ಈ ವಿಡಿಯೋ ಸಾಮಾಜಿಕ ಮಾಧ್ಯಮದಲ್ಲಿ ವೈರಲ್ ಆಗಿದ್ದು, ಸ್ವಘೋಷಿತ ದೇವಮಾನವ ತನ್ನ ಭಕ್ತರಲ್ಲಿ ಸಿಟ್ಟಾಗದಂತೆ ಕರೆ ನೀಡುತ್ತಾರೆ, ಆದರೆ, ಸ್ವತಃ ಪಾಲಿಸುವುದಿಲ್ಲ ಎಂದು ನೆಟ್ಟಿಗರು ಸದ್ಗುರು ನಡೆಯನ್ನು ಟೀಕಿಸಿದ್ದಾರೆ.
