ಅನಿರೀಕ್ಷಿತ ನಡೆಯೊಂದರಲ್ಲಿ ಅಮೆರಿಕದ ನೌಕಾಪಡೆಯು ಈ ವಾರ ಭಾರತದ ಪೂರ್ವ ಕಡಲ ಗಡಿಯಲ್ಲಿ ಅನುಮತಿಯಿಲ್ಲದೆ ಗಸ್ತು ತಿರುಗುವಿಕೆಯನ್ನು ನಡೆಸಿದೆ. ಇದು ಭಾರತದ ‘ಅತಿಯಾದ ಕಡಲ ಹಕ್ಕುಗಳನ್ನು’ ಪ್ರಶ್ನಿಸುವ ಉದ್ದೇಶವನ್ನು ಹೊಂದಿದೆ ಎಂದೂ ಸಹ ಅಮೆರಿಕ ಘೋಷಿಸಿದೆ.
ಯುಎಸ್ ಏಳನೇ ನೌಕಾಪಡೆಯ ಕಮಾಂಡರ್ ಹೊರಡಿಸಿದ ಪತ್ರಿಕಾ ಪ್ರಕಟಣೆಯಲ್ಲಿ “ಏಪ್ರಿಲ್ 7 ರಂದು ಯುಎಸ್ಎಸ್ ಜಾನ್ ಪಾಲ್ ಜೋನ್ಸ್ ಭಾರತದ ವಿಶೇಷ ಆರ್ಥಿಕ ವಲಯದ (EEZ) ಒಳಗೆ, ಲಕ್ಷದ್ವೀಪ ಸಮೂಹದ ಪಶ್ಚಿಮಕ್ಕೆ ಸುಮಾರು 130 ನಾಟಿಕಲ್ ಮೈಲುಗಳಷ್ಟು ದೂರದಲ್ಲಿ ಭಾರತದ ಒಪ್ಪಿಗೆ ಪಡೆಯದೆ ಆದರೆ ಅಂತರರಾಷ್ಟ್ರೀಯ ನಿಯಮಗಳಿಗೆ ಅನುಗುಣ ನೌಕಾಪಡೆಯ ಹಕ್ಕುಗಳು ಮತ್ತು ಸ್ವಾತಂತ್ರ್ಯಗಳನ್ನು ಪ್ರತಿಪಾದಿಸಿದೆ” ಎಂದು ತಿಳಿಸಿದೆ.
ಈ ಗಸ್ತು ಭಾರತದ ಅತಿಯಾದ ಕಡಲ ಹಕ್ಕುಗಳನ್ನು ಪ್ರಶ್ನಿಸುವ ಮೂಲಕ ಅಂತರರಾಷ್ಟ್ರೀಯ ಕಾನೂನಿನಲ್ಲಿ ಗುರುತಿಸಲ್ಪಟ್ಟ ಸಮುದ್ರದ ಹಕ್ಕುಗಳು, ಸ್ವಾತಂತ್ರ್ಯಗಳು ಮತ್ತು ಕಾನೂನುಬದ್ಧ ಬಳಕೆಗಳನ್ನು ಎತ್ತಿಹಿಡಿದಿದೆ ಎಂದು ಅದು ಹೇಳಿದೆ.
ಈ ಬಗ್ಗೆ ಕಳವಳ ವ್ಯಕ್ತಪಡಿಸಿರುವ ಭಾರತದ ವಿದೇಶಾಂಗ ಇಲಾಖೆ ಯುಎಸ್ಎಸ್ನ ಪಾಲ್ ಜೋನ್ಸ್ ಪರ್ಷಿಯನ್ ಕೊಲ್ಲಿಯಿಂದ ಮಲಾಕ್ಕಾ ಜಲಸಂಧಿಯ ಕಡೆಗೆ ಸಾಗುವುದನ್ನು ನಿರಂತರವಾಗಿ ಮೇಲ್ವಿಚಾರಣೆ ಮಾಡಲಾಗುತ್ತಿದೆ ಎಂದು ಪ್ರತಿಕ್ರಿಯಿಸಿದೆ.
ವಿದೇಶಿ ಮಿಲಿಟರಿ ಹಡಗುಗಳು ತಮ್ಮ EEZ ಒಳಗೆ ಮಿಲಿಟರಿ ಚಟುವಟಿಕೆಗಳನ್ನು ನಡೆಸುವುದರ ಬಗ್ಗೆ ಅಮೆರಿಕ ಹಾಗೂ ಭಾರತದ ನಿಲುವುಗಳಲ್ಲಿ ಮೊದಲಿನಿಂದಲೂ ಭಿನ್ನಾಭಿಪ್ರಾಯಗಳಿವೆ.
1995 ರಲ್ಲಿ ಭಾರತವು ಯುಎನ್ ಕನ್ವೆನ್ಷನ್ ಆಫ್ ದಿ ಸೀ ( UNCLOS)ಅನ್ನು ಅಂಗೀಕರಿಸಿದಾಗ “ಸಮಾವೇಶದ ನಿಬಂಧನೆಗಳು ಇತರ ದೇಶಗಳಿಗೆ ವಿಶೇಷ ಆರ್ಥಿಕ ವಲಯದಲ್ಲಿ ಮತ್ತು ಭೂಖಂಡದಲ್ಲಿ ಮಿಲಿಟರಿ ವ್ಯಾಯಾಮಗಳನ್ನು ನಡೆಸುವ ಅಧಿಕಾರ ನೀಡುವುದಿಲ್ಲ, ನಿರ್ದಿಷ್ಟವಾಗಿ ಕರಾವಳಿ ರಾಜ್ಯಗಳ ಒಪ್ಪಿಗೆಯಿಲ್ಲದೆ ಶಸ್ತ್ರಾಸ್ತ್ರಗಳು ಅಥವಾ ಸ್ಫೋಟಕಗಳ ಬಳಕೆಯನ್ನು ಮಾಡುವಂತಿಲ್ಲ” ಎಂದು ಘೋಷಿಸಿದೆ. ಆದರೆ ಅಮೆರಿಕವು ಈ ಒಡಂಬಡಿಕೆಯನ್ನು ಅನುಮೋದಿಸಿಲ್ಲ ಮತ್ತು EEZಗಳಲ್ಲಿ ಇತರ ದೇಶಗಳಿಗೂ ಕಾರ್ಯ ನಿರ್ವಹಿಸುವ ಹಕ್ಕು ಇದೆ ಎಂದು ವಾದಿಸುತ್ತಾ ಬಂದಿದೆ.
ಅಲ್ಲದೆ ದಿ ವೈರ್ನಲ್ಲಿ ಮನೋಜ್ ಜೋಶಿ ಅವರ 2019 ರ ಲೇಖನವೊಂದರ ಪ್ರಕಾರ, ಯುನೈಟೆಡ್ ಸ್ಟೇಟ್ಸ್ ನಿಯಮಿತವಾಗಿ ಭಾರತದ EEZನಲ್ಲಿ ಗುಪ್ತಚರ ಮತ್ತು ಸಮೀಕ್ಷೆ ಕಾರ್ಯಾಚರಣೆಗಳನ್ನು ಪದೇ ಪದೇ ನಡೆಸುತ್ತಿದೆ. FONOP (Freedom Of Navigation Operations)ಯ 2018 ರ ವರದಿಯನ್ನು ಹೊರತುಪಡಿಸಿ 2011 ರಿಂದ 2017 ರವರೆಗಿನ ಎಲ್ಲಾ ಹಿಂದಿನ ವರದಿಗಳು ಯುಎಸ್ ಮಿಲಿಟರಿ ಒಂದೇ ವರ್ಷದಲ್ಲಿ ಭಾರತದ ಅನುಮತಿಯಿಲ್ಲದೆ ಅನೇಕ ಬಾರಿ ಭಾರತದ EEZ ಒಳಗೆ ನುಗ್ಗಿವೆ ಎಂದು ತಿಳಿಸುತ್ತದೆ.
ಈ ಹಿಂದೆ ಮಾಡಿದಂತೆ ಭವಿಷ್ಯದಲ್ಲೂ ಯುಎಸ್ನ ಪಡೆಗಳು ನಿಯಮಿತವಾಗಿ ನ್ಯಾವಿಗೇಷನ್ ಕಾರ್ಯಾಚರಣೆಗಳ ಸ್ವಾತಂತ್ರ್ಯವನ್ನು (FONOP ಗಳು) ನಡೆಸುತ್ತವೆ ಎಂದೂ ಪತ್ರಿಕಾ ಪ್ರಕಟಣೆಯಲ್ಲಿ ತಿಳಿಸಲಾಗಿದೆ. ಅಲ್ಲದೆ ಭಾರತದ ‘ಮೊದಲೇ ಅನುಮತಿ ಪಡೆದುಕೊಳ್ಳಬೇಕು’ ಎನ್ನುವ ನಿಯಮವು ಅಂತರರಾಷ್ಟ್ರೀಯ ಕಾನೂನಿಗೆ ಹೊಂದಿಕೆಯಾಗುವುದಿಲ್ಲ ಎಂದು ಪ್ರಕಟಣೆಯಲ್ಲಿ ಪ್ರತಿಪಾದಿಸಿದೆ.
ಭಾರತವು 7,000 ಕಿಲೋಮೀಟರ್ (4,300 ಮೈಲಿ) ಗಿಂತ ಹೆಚ್ಚು ಕಡಲ ಗಡಿಯನ್ನು ಹೊಂದಿದ್ದು, ಏಳು ರಾಷ್ಟ್ರಗಳೊಂದಿಗೆ ಗಡಿಗಳನ್ನು ಹಂಚಿಕೊಂಡಿದೆ. ಯುಎಸ್ ಮಿಲಿಟರಿಯ ಅನಿರೀಕ್ಷಿತ ನಡೆಯು ಈ ಏಳೂ ಗಡಿಗಳಲ್ಲಿ ಬೀರುವ ಪರಿಣಾಮಗಳ ಬಗ್ಗೆ ಮತ್ತು ಅಂತರರಾಷ್ಟ್ರೀಯ ಒಡಂಬಡಿಕೆಯನ್ನು ಮೀರುವ ಅಮೆರಿಕದ ಉದ್ದಟತನಕ್ಕೆ ಕೇಂದ್ರ ಸರ್ಕಾರ ಹೇಗೆ ಪ್ರತಿಕ್ರಿಯಿಸಲಿದೆ ಎನ್ನುವುದರ ಮೇಲೆ ನಮ್ಮ ಗಡಿ ಸುರಕ್ಷತೆಯು ಅಡಕವಾಗಿದೆ.