ವಿಶ್ವದ ದೊಡ್ಡಣ್ಣ ಖ್ಯಾತಿಯ ಅಮೆರಿಕದಲ್ಲಿ 2ನೇ ಬಾರಿಗೆ ಅಧಿಕಾರದ ಚುಕ್ಕಾಣಿ ಹಿಡಿದಿರುವ ಡೊನಾಲ್ಡ್‌ ಟ್ರಂಪ್ ಅಕ್ರಮ ವಲಸಿಗರನ್ನು ದೇಶದಿಂದ ಹೊರ ಹಾಕುವುದಾಗಿ ಘೋಷಣೆ ಮಾಡಿದ್ದರು. ಚುನಾವಣೆ ವೇಳೆಯೇ ಸಮರ ಸಾರಿದ್ದ ಟ್ರಂಪ್, ಹಲವು ದೇಶಗಳ ಅಕ್ರಮ ವಲಸಿಗರನ್ನು ಅಮೆರಿಕದಿಂದ ಹೊರದಬ್ಬುತ್ತಿದ್ದಾರೆ. ಮೊದಲ ಭಾಗವಾಗಿ ಗ್ವಾಟೆಮಾಲಾ, ಪೆರು ಮತ್ತು ಹೊಂಡುರಾಸ್‌ ದೇಶಗಳ ವಲಸಿಗರನ್ನು ವಿಮಾನಗಳ ಮೂಲಕ ಶಿಫ್ಟ್‌ ಮಾಡಲಾಗಿದೆ.
ಭಾರತೀಯ ಮೂಲದ ಅಕ್ರಮ ವಲಸಿಗರನ್ನ ದೇಶದಿಂದ ಹೊರ ಹಾಕುವ ಕೆಲಸ ನಡೆಯುತ್ತಿದೆ. ಅಮೆರಿಕದ ಮಿಲಿಟರಿ ವಿಮಾನ ಭಾರತದತ್ತ ಹೊರಡಿದೆ. ಅಮೆರಿಕರಿಂದ 205 ಜನ ಭಾರತೀಯರನ್ನು ಹೊರ ಹಾಕಲಾಗ್ತಿದೆ. ಅಕ್ರಮ ವಲಸಿಗರು ಎಂದು ಗುರ್ತಿಸಿದ್ದ 205 ಜನರನ್ನು ಹೊತ್ತ ಅಮೆರಿಕ ವಾಯು ಸೇನೆಗೆ ಸೇರಿದ ಗ್ಲೋಬಲ್‌ ಮಾಸ್ಟರ್‌ ಸಿ – 17 ವಿಮಾನದಲ್ಲಿ ಕರೆತರಲಾಗ್ತಿದೆ. ಟೆಕ್ಸಾಸ್‌ನಿಂದ ಹೊರಟಿರುವ ನಾಳೆ ಭಾರತಕ್ಕೆ ತಲುಪುವ ಸಾಧ್ಯತೆಯಿದೆ.
ಅಮೆರಿಕದ ವಿಮಾನದಲ್ಲಿರೋ ಭಾರತೀಯ ವಲಸಿಗರು ದೆಹಲಿ ಬದಲಿಗೆ ಪಂಜಾಬ್‌ನ ಅಮೃತಸರಕ್ಕೆ ಬಂದಿಳಿಯೋ ಸಾಧ್ಯತೆಯಿದೆ. ಸಿ-17 ಯುದ್ಧ ವಿಮಾನದಲ್ಲಿ ರಕ್ಷಣಾ ಪಡೆಗಳು, ಸರಕುಗಳು, ವೈದ್ಯಕೀಯ ನೆರವು, ಏರ್‌ಡ್ರಾಪ್‌ಗಳಿಗೆ ಬಳಸಲಾಗುತ್ತೆ. ಆದ್ರೆ ನಾಗರಿಕ ವಿಮಾನಗಳ ಬದಲಾಗಿ ಅಮೆರಿಕದ ವಾಯುಪಡೆಯ C-17 ಯುದ್ಧ ವಿಮಾನದಲ್ಲಿ ಕಳಿಸಿಕೊಡಲಾಗ್ತಿದೆ. ಅಲ್ಲದೆ 205 ಜನರಿಗೆ ವಿಮಾನದಲ್ಲಿ ಒಂದೇ ಒಂದು ಟಾಯ್ಲೆಟ್ ಮಾತ್ರ ಇದ್ದು ಅಮೆರಿಕ ಸರ್ಕಾರದ ನಡೆ ಭಾರೀ ಚರ್ಚೆಗೆ ಕಾರಣವಾಗಿದೆ.
ಇತಿಹಾಸದಲ್ಲಿ ವಲಸಿಗರನ್ನು ಭಾರತಕ್ಕೆ ಗಡಿಪಾರು ಮಾಡ್ತಿರೋದು ಇದೇ ಮೊದಲು. ಹೀಗಾಗಿ ಅಮೆರಿಕ ನಡೆ ಬಗ್ಗೆ ಪ್ರಧಾನಿ ಮೋದಿ, ವಿದೇಶಾಂಗ ಸಚಿವ ಎಸ್.ಜೈಶಂಕರ್ ಸೇರಿದಂತೆ ಹಲವು ನಾಯಕರು ಕಳವಳ ವ್ಯಕ್ತಪಡಿಸಿದ್ದಾರೆ. ಈ ಎಲ್ಲಾ ಬೆಳವಣಿಗೆಗಳ ಮಧ್ಯೆ ಪ್ರಧಾನಿ ನರೇಂದ್ರ ಮೋದಿ ಇದೇ ತಿಂಗಳ 12 – 14ರಂದು ಅಮೆರಿಕ ಪ್ರವಾಸ ಕೈಗೊಳ್ತಿದ್ದಾರೆ. ಡೊನಾಲ್ಡ್‌ ಟ್ರಂಪ್ ಆತ್ಮೀಯರಾಗಿರುವ ಪ್ರಧಾನಿ ಮೋದಿ ಟ್ರಂಪ್ ಭೇಟಿಯಾಗುವ ಸಾಧ್ಯತೆ ಇದೆ.
