ಬೆಂಗಳೂರು : ಇಂದು ಅಧಿಕೃತವಾಗಿ ಕಾಂಗ್ರೆಸ್ ಸೇರ್ಪಡೆಗೊಂಡಿರುವ ಗೀತಾ ಶಿವರಾಜ್ಕುಮಾರ್ ಮೊದಲ ಬಾರಿಗೆ ಈ ವಿಚಾರವಾಗಿ ಮಾಧ್ಯಮಗಳ ಜೊತೆ ಮಾತನಾಡಿದ್ದಾರೆ. ಬೆಂಗಳೂರಿನಲ್ಲಿ ಈ ವಿಚಾರವಾಗಿ ಮಾತನಾಡಿದ ಅವರು, ನನಗೆ ಕಾಂಗ್ರೆಸ್ ಸೇರುವಂತೆ ಹೇಳಿದ್ದೇ ಶಿವರಾಜ್ಕುಮಾರ್ ಎಂದಿದ್ದಾರೆ.
ನಾನು ನಾಳೆಯಿಂದ ಸೊರಬ ಕ್ಷೇತ್ರದಲ್ಲಿ ಪ್ರಚಾರ ಆರಂಭಿಸಲಿದ್ದೇನೆ. ಶಿರಸಿ ಹಾಗೂ ಕಾರವಾರ ಕ್ಷೇತ್ರದಲ್ಲಿಯೂ ಪ್ರಚಾರ ಮಾಡುತ್ತೇನೆ, ಇದಾದ ಬಳಿಕ ಪಕ್ಷದ ಸೂಚನೆಯಂತೆ ಕ್ಷೇತ್ರಗಳಿಗೆ ಭೇಟಿ ನೀಡುತ್ತೇನೆ ಎಂದು ಗೀತಾ ಶಿವರಾಜ್ಕುಮಾರ್ ಹೇಳಿದ್ದಾರೆ.
ಇನ್ನು ಶಿವರಾಜ್ಕುಮಾರ್ ಕ್ಯಾಂಪೇನ್ ಬಗ್ಗೆಯೂ ಮಾತನಾಡಿದ ಅವರು, ಶಿವರಾಜ್ಕುಮಾರ್ ಸೊರಬದಲ್ಲಿ ಪ್ರಚಾರ ಮಾಡಲಿದ್ದಾರೆ. ಬೇರೆ ಕ್ಷೇತ್ರಗಳಲ್ಲಿ ಪ್ರಚಾರ ಮಾಡುವ ಬಗ್ಗೆ ತೀರ್ಮಾನ ಮಾಡಿಲ್ಲ ಎಂದು ಹೇಳಿದ್ದಾರೆ.
ನಾನು ಕಾಂಗ್ರೆಸ್ ಸೇರ್ಪಡೆಯಾಗುವಂತೆ ಮಧು ಬಂಗಾರಪ್ಪ ನನಗೆ ಒತ್ತಡ ಹಾಕಿಲ್ಲ. ಸಹೋದರನ ಜೊತೆ ನಿಲ್ಲುವಂತೆ ನನ್ನ ತಾಯಿ ಮೊದಲೇ ಹೇಳಿದ್ದರು. ನಾನು ಮೊದಲಿನಿಂದಲೂ ಮಧು ಬಂಗಾರಪ್ಪ ಜೊತೆ ನಿಂತವಳು. ಮುಂದೆಯೂ ಇರುತ್ತೇನೆ ಎಂದು ಹೇಳಿದ್ದಾರೆ.
