ಪಟ್ನಾ: ಜನ ಮರುಳೋ ಜಾತ್ರೆ ಮರಳೋ ಎನ್ನುವ ಮಾತನ್ನು ದೊಡ್ಡವರು ಸುಮ್ಮನೆ ಮಾಡಿಲ್ಲ ಎನ್ನುವುದು ಈಗಿನ ಕಾಲದ ಸ್ಥಿತಿಯಲ್ಲಿ ಪದೇ ಪದೇ ಸಾಬೀತಾಗುತ್ತಿದೆ. ಮೋಸ ಹೋಗುವವರು ಇರುವ ವರೆಗೂ ಮೋಸ ಮಾಡುವವರು ಯಾವ ಮಟ್ಟಕ್ಕಾದರೂ ಇಳಿದು ಮೋಸ ಮಾಡುತ್ತಾರೆ ಎನ್ನುವುದಕ್ಕೆ ಬಿಹಾರದಲ್ಲಿ ಬಯಲಿಗೆ ಬಂದ ಅಪರಾಧ ಜಾಲ ಸಾಕ್ಷಿಯಾಗಿದೆ.
ಬ್ಯಾಂಕ್ ಖಾತೆ ನವೀಕರಣ, ಕ್ರೆಡಿಟ್ ಕಾರ್ಡ್ ವಂಚನೆ, ಶಾಂಪಿಂಗ್, ಆಫರ್, ಕಡಿಮೆ ಹೂಡಿಕೆಯಲ್ಲಿ ಹೆಚ್ಚ ಲಾಭ ಹೀಗೆ ಅನೇಕ ಐಡಿಯಾಗಳಿಂದ ಜನರನ್ನು ವಂಚಿಸುತ್ತಿದ್ದ ಸೈಬರ್ ವಂಚಕರಿಗೆ ಶಾಕ್ ಆಗುವಂತೆ ಬಿಹಾರದ ಸೈಬರ್ ವಂಚಕರ ತಂಡವೊಂದು ಖತರ್ನಾಕ್ ಪ್ಲಾನ್ ಮಾಡಿದ್ದು, ಸದ್ಯ ಸ್ಥಳೀಯ ಪೊಲೀಸರು ಈ ಜಾಲವನ್ನು ಮಟ್ಟಹಾಕಿದ್ದಾರೆ ಎಂದು ವರದಿಯಾಗಿದೆ.
ʼಅಖಿಲ ಭಾರತ ಗರ್ಭಿಣಿ ಉದ್ಯೋಗ ಯೋಜನೆʼ (All India Pregnant Job) ಎಂಬ ಹೆಸರಿನ ಭಾರೀ ವಂಚನೆ ಜಾಲ ಬಯಲಾಗಿದ್ದು, ಯುವಕರನ್ನು ಗುರಿಯಾಗಿಸಿಕೊಂಡು ಲಕ್ಷಾಂತರ ರೂಪಾಯಿ ವಸೂಲಿ ಮಾಡಿದ ಪ್ರಕರಣ ಬೆಳಕಿಗೆ ಬಂದಿದೆ. ʼನನ್ನನ್ನು ಗರ್ಭಿಣಿಯನ್ನಾಗಿ ಮಾಡಿ… ನಿಮಗೆ ₹13 ಲಕ್ಷ ಹಣ ಮತ್ತು 2BHK ಫ್ಲಾಟ್ ನೀಡುತ್ತೇವೆʼ ಎಂಬ ಅಸಂಬದ್ಧ ಆಮೀಷವೊಡ್ಡಿದ ಸೈಬರ್ ವಂಚಕರು ನೂರಾರು ಯುವಕರನ್ನು ಈ ಜಾಲದಲ್ಲಿ ಬೀಳಿಸಿ ವಂಚಿಸಿದ್ದಾರೆ.
ಈ ಬಗ್ಗೆ ಮಹಿಳೆಯೊಬ್ಬಳ ವಿಡಿಯೋ ಕೂಡ ಹಂಚಿಕೊಂಡಿರುವ ವಂಚಕರು ಕೆಲ ಕೃತಕ ವೆಬ್ಸೈಟ್ಗಳ ಮೂಲಕ ನೊಂದಣಿ ಮಾಡಿಸಿಕೊಂಡು ಮೊದಲು ₹5,000 ರಿಂದ ₹20,000ರವರೆಗೆ ನೋಂದಣಿ ಶುಲ್ಕ ಪಾವತಿಸಿಕೊಂಡಿದ್ದಾರೆ ಬಳಿಕ ಒಪ್ಪಂದ ಪತ್ರ, ವೈದ್ಯಕೀಯ ಪರಿಶೀಲನೆ ಹೆಸರಲ್ಲಿ ಮತ್ತಷ್ಟು ಹಣ ಪಡೆದು ಬಳಿಕ ಸಂಪರ್ಕ ಕಡಿತಗೊಳಿಸುತ್ತಿದ್ದಾರೆ. ಈ ವಂಚನೆಯಲ್ಲಿ ಕೆಲವರು ಲಕ್ಷಾಂತರ ರೂಪಾಯಿ ಕಳೆದುಕೊಂಡಿರುವುದಾಗಿ ದೂರು ನೀಡಿದ್ದಾರೆ. ಪೊಲೀಸ್ ಮೂಲಗಳ ಪ್ರಕಾರ ರಾಜ್ಯದ ವಿವಿಧ ಜಿಲ್ಲೆಗಳಿಂದ ದೂರುಗಳು ದಾಖಲಾಗಿವೆ. ಸದ್ಯ ಪೊಲೀಸರು ಈ ಜಾಲವನ್ನು ಭೇದಿಸಿದ್ದು, ಈ ರೀತಿಯ ಜಾಹೀರಾತುಗಳನ್ನು ನೋಡಿ ಮೂರ್ಖರಾಗಬೇಡಿ. ಸಾರ್ವಜನಿಕರು ಜಾಗರೂಕರಾಗಿ ಎಂದು ಮನವಿ ಮಾಡಿದ್ದಾರೆ.
