ಶಿವಮೊಗ್ಗ: ಮಾ.೩೦: ರಾಜ್ಯ ವಿಧಾನಸಭಾ ಚುನಾವಣೆಗೆ ಒಂದು ತಿಂಗಳು ಬಾಕಿ ಇದೆ. ಆದರೆ ಶಿವಮೊಗ್ಗದ ಜ್ವಲಂತ ಸಮಸ್ಯೆಗಳು ಒಂದೊಂದಾಗಿ ಬಿಜೆಪಿಯನ್ನು ಕಾಡುತ್ತಿವೆ. ಅದರಲ್ಲಿ ಬಹಳ ಮುಖ್ಯವಾಗಿ ಐತಿಹಾಸಿಕ ಮಹತ್ವ ಹೊಂದಿರುವ ಭದ್ರಾವತಿಯ ವಿಶ್ವೇಶ್ವರಯ್ಯ ಕಬ್ಬಿಣ ಮತ್ತು ಉಕ್ಕು ಕಾರ್ಖಾನೆ.
ಜನವರಿ ತಿಂಗಳಲ್ಲಿ ಭಾರತೀಯ ಉಕ್ಕು ಪ್ರಾಧಿಕಾರ ಆದೇಶದ ಮೇರೆಗೆ, ಕಾರ್ಖಾನೆ ಆಡಳಿತ ಮಂಡಳಿ ನಿರ್ಣಯ ಕೈಗೊಂಡು ಕಾರ್ಖಾನೆಯನ್ನ ಮುಚ್ಚಲು ನಿರ್ಧರಿಸಿತ್ತು. ಅಂದಿನಿಂದ ಕಾರ್ಖಾನೆಯ ಗುತ್ತಿಗೆ ಕಾರ್ಮಿಕರು ಪ್ರತಿಭಟನೆ ನಡೆಸುತ್ತಾ ಬಂದಿದ್ದಾರೆ. ಕಾರ್ಖಾನೆಯ ಎದುರಿನಲ್ಲಿ ತಾತ್ಕಾಲಿಕ ಶೆಡ್ ನಿರ್ಮಾಣ ಮಾಡಿಕೊಂಡು ಸತತವಾಗಿ 70 ದಿನಗಳು ಸರ್ಕಾರದ ನಿರ್ಣಯವನ್ನ ವಿರೋಧಿಸಿದ್ದಾರೆ. ಇವೆಲ್ಲದನ್ನ ಅರಿತ ಕೇಂದ್ರ ಸರ್ಕಾರ ಚುನಾವಣಾ ಸಂದರ್ಭದಲ್ಲಿ ಒಂದು ಭರವಸೆ ಮೂಡಿಸಿದೆ. ಕಾರ್ಖಾನೆಯನ್ನ ಮುಚ್ಚುವುದಿಲ್ಲ ಉತ್ಪಾದನೆ ಈ ತ್ರೈಮಾಸಿಕ ಅವಧಿಯಲ್ಲಿ ಕೂಡ ಮುಂದುವರಿಯುತ್ತದೆ ಎಂದು ಸ್ವತಃ ಶಿವಮೊಗ್ಗ ಸಂಸದ ಬಿ ವೈ ರಾಘವೇಂದ್ರ ಮಾಧ್ಯಮಗಳಿಗೆ ಮಾಹಿತಿ ನೀಡಿದ್ದಾರೆ.
![](https://pratidhvani.com/wp-content/uploads/2023/03/visl-bhadravati-97244340.jpg)
ಮಾಧ್ಯಮಗಳೊಂದಿಗೆ ಮಾತನಾಡಿ, ಕೇಂದ್ರ ಗೃಹ ಸಚಿವ ಅಮಿತ್ ಶಾ ಮಂಗಳೂರಿಗೆ ಬಂದ ಸಂದರ್ಭದಲ್ಲಿ ಕಾರ್ಖಾನೆಯ ಬಗ್ಗೆ ವಿಸ್ತೃತ ವರದಿ ಪಡೆದು ಕೂಲಂಕಷವಾಗಿ ಪರಿಶೀಲನೆ ಮಾಡಿದ್ದರು. ಅದರ ಫಲವಾಗಿ ಹಾಗೂ ಸ್ಟೀಲ್ ಅಥಾರಿಟಿ ಆಫ್ ಇಂಡಿಯಾದ ಆಸಕ್ತಿ ಮೇರೆಗೆ ಕಾರ್ಖಾನೆ ಇನ್ನೂ ಮೂರು ತಿಂಗಳ ಕಾಲ ನಿರಾತಂಕವಾಗಿ ನಡೆಯಲಿದೆ. ಬೀಸೋ ದೊಣ್ಣೆಯಿಂದ ತಪ್ಪಿಸಿಕೊಂಡರೆ ನೂರು ವರ್ಷ ಆಯಸ್ಸು ಎಂಬಂತೆ ಕಾರ್ಖಾನೆಯನ್ನು ಮುಂದುವರಿಸಲು ನಮಗೆ ಅವಕಾಶ ಸಿಕ್ಕಿದೆ ಎಂದು ರಾಘವೇಂದ್ರ ಹೇಳಿದರು.
![](https://pratidhvani.com/wp-content/uploads/2023/03/VISL-Factory-4.webp)
ಕಳೆದ ವಾರ ಬೆಂಗಳೂರಿನಲ್ಲೂ ಕೂಡ ಈ ಸಂಬಂಧ ಅಮಿತ್ ಶಾ ಚರ್ಚೆ ಮಾಡಿದ್ದೇವೆ. ಸುಮಾರು 10000 ಕುಟುಂಬಗಳಿಗೆ ಕಾರ್ಖಾನೆ ಮುಚ್ಚುವುದರಿಂದ ಸಮಸ್ಯೆಯಾಗುತ್ತದೆ. ಹಾಗೂ ವಿಶ್ವೇಶ್ವರಯ್ಯ ಹೆಸರನ್ನ ಉಳಿಸಬೇಕು ಎಂದು ಮನವರಿಕೆ ಮಾಡಿಕೊಟ್ಟ ಫಲದಿಂದ ಇವತ್ತು ಕಾರ್ಖಾನೆ, ಉಳಿಯುತ್ತಿದೆ. ನಾನು ದೆಹಲಿಗೆ ಹೋಗಿ ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್, ಉಕ್ಕು ಸಚಿವ ಜ್ಯೋತಿರಾದಿತ್ಯ ಸಿಂಧ್ಯಾ ಭೇಟಿ ಮಾಡಿದ್ದೆ. ಅವರು ತಮ್ಮ ಕೈಯಲ್ಲಿ ಇಲ್ಲ ಎಂದು ಹೇಳಿ ಬಿಟ್ಟರು. ಆದರೆ ಗೃಹ ಸಚಿವ ಅಮಿತ್ ಶಾ ಅವರ ಮೂಲಕ ಸಂದೇಶ ನೀಡುವ ಮೂಲಕ ಈ ಕಾರ್ಖಾನೆಯನ್ನು ಮುಚ್ಚುವುದನ್ನ ತಡೆಹಿಡಿಯಲಾಗಿದೆ. ಕಾರ್ಖಾನೆಯನ್ನು ಹಿಂಪಡೆವ ಸಂಬಂಧ ಎಲ್ಲಾ ಪ್ರಕ್ರಿಯೆ ನಡೆಯುತ್ತಿದೆ. ಯಾವುದೇ ಕಾರಣಕ್ಕೂ ಕಾರ್ಖಾನೆ ಸ್ಥಗಿತ ಗೊಳ್ಳುವುದಿಲ್ಲ.
![](https://pratidhvani.com/wp-content/uploads/2023/03/pic-8-1024x1024.jpg)
ಮಾರ್ಚ್ 30 ರಂದು ಉತ್ಪಾದನೆ ಅಧಿಕೃತವಾಗಿ ಸ್ಥಗಿತಗೊಳ್ಳಬೇಕಿತ್ತು ( ಮೊದಲ ತ್ರೈಮಾಸಿಕ) ಆದರೆ ಇನ್ನು ಮೂರು ತಿಂಗಳು ಜೂನ್ ವರೆಗೆ ನಿರಾತಂಕವಾಗಿ ಕಾರ್ಖಾನೆ ಸ್ಟೀಲ್ ಅಥಾರಿಟಿ ಆಫ್ ಇಂಡಿಯಾ ಅಡಿಯಲ್ಲೇ ಮುಂದುವರಿಯಲಿದೆ. ಇದಕ್ಕೆ ಬೇಕಿರುವ ಬಜೆಟ್ ಕೂಡ ನೀಡಲಾಗಿದೆ. ಈಗಿನ ತ್ರೈಮಾಸಿಕ ಮುಂದುವರಿಕೆಯಿಂದ ಜುಲೈ ಅಂತ್ಯ ಆಗಬಹುದು. ಬೀಸೋ ದೊಣ್ಣೆಯಿಂದ ತಪ್ಪಿಸಿಕೊಂಡಿದ್ದೇವೆ. ನೂರು ವರ್ಷ ಆಯಸ್ಸು ..! ಚುನಾವಣೆ ಮುಗಿಸಿಕೊಂಡು ಇದಕ್ಕೆ ಪೂರಕವಾಗಿ ಏನು ತಮಾಡಬೇಕೋ ಅದನ್ನ ಮಾಡುತ್ತೇವೆ ಎಂದರು. ಕೇಂದ್ರ ಹಾಗೂ ರಾಜ್ಯ ಸರ್ಕಾರ ಎರಡೂ ಕೂಡ ಆಸಕ್ತರಾಗಿದ್ದು ನಮ್ಮ ಕಾರ್ಖಾನೆಯನ್ನು ನಾವು ಉಳಿಸಿಕೊಳ್ಳುತ್ತೇವೆ ಎಂದು ಎಂಪಿ ರಾಘವೇಂದ್ರ ಭರವಸೆ ನೀಡಿದ್ದಾರೆ.