ನವದೆಹಲಿ : ಆಯುಷ್ಮಾನ್ ಭಾರತ್ (Ayushman Bharat) ಫಲಾನುಭವಿಗಳು ಶೀಘ್ರದಲ್ಲೇ ಸಿ-ಸೆಕ್ಷನ್ (C-section), ಮೂತ್ರಪಿಂಡದ ಕಲ್ಲು ಅಥವಾ ಕಿಡ್ನಿ ಸ್ಟೋನ್ (kidney stone), ಮೂತ್ರನಾಳದ ಸೋಂಕು (urinary tract infection), ಭೇದಿ (diarrhoea), ಮಲೇರಿಯಾ (malaria) ಅಥವಾ ಮೂಲವ್ಯಾಧಿ (piles) ಶಸ್ತ್ರಚಿಕಿತ್ಸೆಗಳಿಗಾಗಿ ಕೇವಲ ಸರ್ಕಾರಿ ಆಸ್ಪತ್ರೆಗೆ (government hospital) ಭೇಟಿ ನೀಡಬೇಕಾಗಬಹುದು. ಒಂದು ವೇಳೆ ಖಾಸಗಿ ಆಸ್ಪತ್ರೆಯಲ್ಲಿ (private hospital) ಈ ಚಿಕಿತ್ಸೆಗಳನ್ನು ಪಡೆಯಬೇಕೆಂದರೆ ಯೋಜನೆಯಡಿ ಕವರೇಜ್ ಸಿಗುವುದಿಲ್ಲ, ಬದಲಾಗಿ ರೋಗಿಗಳೇ ಸ್ವಂತ ಹಣ ಪಾವತಿಸಬೇಕಾದ ಪರಿಸ್ಥಿತಿ ನಿರ್ಮಾಣವಾಗುವ ಸಾಧ್ಯತೆಯಿದೆ.

112ಕ್ಕೆ ಏರಿಕೆಯಾಗಲಿರುವ ಕಾಯ್ದಿರಿಸಿದ ಚಿಕಿತ್ಸೆಗಳ ಪಟ್ಟಿ
ರಾಷ್ಟ್ರೀಯ ಆರೋಗ್ಯ ಪ್ರಾಧಿಕಾರವು (ಎನ್ಎಚ್ಎ) ಆಯುಷ್ಮಾನ್ ಭಾರತ್ ಪ್ರಧಾನ ಮಂತ್ರಿ ಜನ ಆರೋಗ್ಯ ಯೋಜನೆ ಅಡಿಯಲ್ಲಿ ಕೇವಲ ಸರ್ಕಾರಿ ಆಸ್ಪತ್ರೆಗಳಿಗೆ ಮಾತ್ರ ಮೀಸಲಾಗಿರುವ ಕಾರ್ಯವಿಧಾನಗಳ ಪಟ್ಟಿಯನ್ನು ಪ್ರಸ್ತುತ ಇರುವ 23 ರಿಂದ 112 ಕ್ಕೆ ವಿಸ್ತರಿಸಲು ಪ್ರಸ್ತಾಪಿಸಿದೆ. ನವೆಂಬರ್ 25 ರೊಳಗೆ ಈ ಬಗ್ಗೆ ಸಲಹೆಗಳನ್ನು ಸಲ್ಲಿಸುವಂತೆ ಎಲ್ಲಾ ರಾಜ್ಯಗಳು ಮತ್ತು ಕೇಂದ್ರಾಡಳಿತ ಪ್ರದೇಶಗಳಿಗೆ ಸೂಚಿಸಲಾಗಿದ್ದು, ಡಿಸೆಂಬರ್ 1, 2026 ರಿಂದ ಈ ಹೊಸ ನಿಯಮವನ್ನು ಜಾರಿಗೆ ತರಲು ಯೋಜಿಸಲಾಗಿದೆ. ಈಗಾಗಲೇ ಕೆಲವು ರಾಜ್ಯಗಳು ತಮ್ಮ ಮಟ್ಟದಲ್ಲಿ ಸರ್ಕಾರಿ ಆಸ್ಪತ್ರೆಗಳಿಗೆ ಕೆಲವೊಂದು ಚಿಕಿತ್ಸೆಗಳನ್ನು ಕಾಯ್ದಿರಿಸಿದ್ದು, ದೇಶಾದ್ಯಂತ ಒಂದೇ ರೀತಿಯ ನಿಯಮ ಜಾರಿಗೆ ತರುವ ಉದ್ದೇಶದಿಂದ ಈ ಹೆಜ್ಜೆ ಇಡಲಾಗಿದೆ.
ಯಾವೆಲ್ಲಾ ಪ್ರಮುಖ ಚಿಕಿತ್ಸೆಗಳು ಸೇರಿವೆ?
ಹೊಸದಾಗಿ ಸೇರ್ಪಡೆ ಮಾಡಲು ಉದ್ದೇಶಿಸಿರುವ 89 ಚಿಕಿತ್ಸೆಗಳ ಪೈಕಿ ಸ್ತ್ರೀರೋಗ ವಿಭಾಗಕ್ಕೆ ಸಂಬಂಧಿಸಿದ 21 ಚಿಕಿತ್ಸೆಗಳಿವೆ. ಇದರಲ್ಲಿ ವಿವಿಧ ಹಂತಗಳ ಗರ್ಭಪಾತ, ನಾಲ್ಕು ಬಗೆಯ ಗರ್ಭಾಶಯ ತೆಗೆಯುವ ಶಸ್ತ್ರಚಿಕಿತ್ಸೆಗಳು (ಹಿಸ್ಟರೆಕ್ಟಮಿ) ಮತ್ತು ಹೆಚ್ಚಿನ ಅಪಾಯದ ಹೆರಿಗೆಗಳು ಸೇರಿವೆ. ಇದರ ಜೊತೆಗೆ ಕ್ಯಾನ್ಸರ್ ತಪಾಸಣೆಗೆ ಬಳಸುವ ಬಯಾಪ್ಸಿಗಳು, ಗರ್ಭಕಂಠದ ಸ್ಕ್ರೀನಿಂಗ್, ತೀವ್ರ ರಕ್ತಹೀನತೆ, ರಕ್ತದೊತ್ತಡದ ತೀವ್ರ ಏರಿಕೆ, ಹೆಪಟೈಟಿಸ್, ಮೇದೋಜ್ಜೀರಕ ಗ್ರಂಥಿಯ ಉರಿಯೂತ ಮತ್ತು ಮಕ್ಕಳಲ್ಲಿನ ಎಡಿಎಚ್ಡಿ (ADHD) ಸಮಸ್ಯೆಗೆ ನೀಡುವ ಆರೈಕೆಗಳು ಈ ಪಟ್ಟಿಯಲ್ಲಿ ಸ್ಥಾನ ಪಡೆದಿವೆ.
ರೋಗಿಗಳ ಮೇಲಿನ ಪರಿಣಾಮವೇನು?
ಈ ಪ್ರಸ್ತಾವನೆ ಜಾರಿಯಾದರೆ, ಸರ್ಕಾರಿ ಆಸ್ಪತ್ರೆಗಳಿಗೆ ಕಾಯ್ದಿರಿಸಲಾದ ಪ್ಯಾಕೇಜ್ಗಳನ್ನು ಖಾಸಗಿ ಆಸ್ಪತ್ರೆಗಳು ಮಾಡುವಂತಿದ್ದರೂ, ಯೋಜನೆಯಡಿ ಅದಕ್ಕೆ ಹಣವನ್ನು ಕ್ಲೈಮ್ ಮಾಡುವಂತಿಲ್ಲ. ಇದರಿಂದಾಗಿ ವಾರ್ಷಿಕ 5 ಲಕ್ಷ ರೂಪಾಯಿಗಳವರೆಗೆ ಉಚಿತ ಆರೋಗ್ಯ ವಿಮೆ ಪಡೆಯುವ ಬಡ ಕುಟುಂಬಗಳು ಸರ್ಕಾರಿ ಆಸ್ಪತ್ರೆಯಲ್ಲಿ ಉಚಿತವಾಗಿ ಚಿಕಿತ್ಸೆ ಪಡೆಯುವುದು ಅಥವಾ ಖಾಸಗಿ ಆಸ್ಪತ್ರೆಯಲ್ಲಿ ತಮ್ಮ ಕೈಯಿಂದಲೇ ಹಣ ಪಾವತಿಸಿ ಚಿಕಿತ್ಸೆ ಪಡೆಯುವ ಆಯ್ಕೆಗಳನ್ನು ಮಾತ್ರ ಹೊಂದಿರುತ್ತಾರೆ.
ತಜ್ಞರ ಮಿಶ್ರ ಪ್ರತಿಕ್ರಿಯೆ
ಈ ನಡೆಯ ಬಗ್ಗೆ ತಜ್ಞರಲ್ಲಿ ವಿಭಿನ್ನ ಅಭಿಪ್ರಾಯಗಳು ವ್ಯಕ್ತವಾಗಿವೆ. ಸಾರ್ವಜನಿಕ ಆರೋಗ್ಯ ಅರ್ಥಶಾಸ್ತ್ರಜ್ಞ ಇಂದ್ರನೀಲ್ ಮುಖೋಪಾಧ್ಯಾಯ ಅವರ ಪ್ರಕಾರ, ಖಾಸಗಿ ಆಸ್ಪತ್ರೆಗಳಲ್ಲಿ ಹಣಕ್ಕಾಗಿ ನಡೆಯುವ ಅನಗತ್ಯ ಸಿ-ಸೆಕ್ಷನ್ ಮತ್ತು ಇತರ ಶಸ್ತ್ರಚಿಕಿತ್ಸೆಗಳ ವಂಚನೆಯನ್ನು ತಡೆಯಲು ಈ ಕ್ರಮ ಸಹಾಯ ಮಾಡುತ್ತದೆ. ಆದರೆ, ಸರ್ಕಾರಿ ಆಸ್ಪತ್ರೆಗಳಲ್ಲಿ ಈ ಎಲ್ಲಾ ಚಿಕಿತ್ಸೆಗಳನ್ನು ನೀಡಲು ಅಗತ್ಯವಿರುವ ಮೂಲಸೌಕರ್ಯ ಮತ್ತು ಸಾಮರ್ಥ್ಯ ಇದೆಯೇ ಎಂಬ ಆತಂಕವನ್ನು ಹಲವರು ವ್ಯಕ್ತಪಡಿಸಿದ್ದಾರೆ. ತಜ್ಞರಾದ ಕೆ.ಎಂ. ಗೋಪಕುಮಾರ್ ಮತ್ತು ಐಐಟಿ ದೆಹಲಿಯ ಅರ್ಥಶಾಸ್ತ್ರಜ್ಞೆ ರೀತಿಕಾ ಖೇರಾ ಅವರು, ಮೂಲಸೌಕರ್ಯಗಳನ್ನು ಹೆಚ್ಚಿಸದೆ ಈ ನಿಯಮ ಜಾರಿಗೆ ತಂದರೆ ರೋಗಿಗಳಿಗೆ ತೀವ್ರ ತೊಂದರೆಯಾಗಬಹುದು ಎಂದು ಎಚ್ಚರಿಸಿದ್ದಾರೆ. ಉತ್ತಮ ಸೌಲಭ್ಯಗಳಿಲ್ಲದ ರಾಜ್ಯಗಳಲ್ಲಿ ಬಡ ರೋಗಿಗಳು ಪರದಾಡುವಂತಾಗಬಹುದು, ಹೀಗಾಗಿ ತುರ್ತು ಚಿಕಿತ್ಸೆಗಳನ್ನು ಎರಡೂ ವಲಯಗಳಿಗೆ ಮುಕ್ತವಾಗಿಡಬೇಕು ಎಂಬುದು ಅವರ ಸಲಹೆಯಾಗಿದೆ.
ವಿಮೆಯಿಲ್ಲದ ವಾಹನಗಳಿಗೆ 10,000 ರೂ. ದಂಡ : ಎನ್ಹೆಚ್ಎಐನಿಂದ ಹೊಸ ರೂಲ್ಸ್!






