ಬಾಂಗ್ಲಾದೇಶದಲ್ಲಿ ಅಪರೂಪದ ಅಲ್ಬಿನೋ ಎಮ್ಮೆೊಂದು ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ಸಂಚಲನ ಮೂಡಿಸಿದೆ. ಅಮೆರಿಕ ಅಧ್ಯಕ್ಷ ಡೋನಾಲ್ಡ್ ಟ್ರಂಪ್ ಅವರಂತೆಯೇ ಕಾಣುತ್ತದೆ ಎಂದು ನೆಟ್ಟಿಗರು ಹೇಳುತ್ತಿರುವ ಈ ಎಮ್ಮೆ, ಈದ್ ಉಲ್ ಅಧಾ ಹಬ್ಬದ ಮುನ್ನ ದೇಶಾದ್ಯಂತ ಕುತೂಹಲಕ್ಕೆ ಕಾರಣವಾಗಿದೆ.ನರಾಯಣಗಂಜ್ ಪ್ರದೇಶದ ರಬೇಯಾ ಆಗ್ರೋ ಫಾರ್ಮ್ನಲ್ಲಿ ಸಾಕಲಾಗಿದ್ದ ಈ ಅಪರೂಪದ ಎಮ್ಮೆ, ಅದರ ಬಂಗಾರದ ಬಣ್ಣದ ಉದ್ದ ಕೂದಲು ಮತ್ತು ವಿಶಿಷ್ಟ ರೂಪದಿಂದಲೇ “ಡೊನಾಲ್ಡ್ ಟ್ರಂಪ್” ಎಂಬ ಹೆಸರನ್ನು ಪಡೆದಿದೆ. ಸುಮಾರು 700 ಕಿಲೋಗ್ರಾಂ ತೂಕ ಹೊಂದಿರುವ ಈ ಎಮ್ಮೆ ಈಗಾಗಲೇ ಈದ್ ಬಲಿಗಾಗಿ ಮಾರಾಟವಾಗಿದೆ ಎಂದು ಫಾರ್ಮ್ ಮಾಲೀಕರು ತಿಳಿಸಿದ್ದಾರೆ.
ಫಾರ್ಮ್ ಮಾಲೀಕ ಜಿಯಾ ಉದ್ಧಿನ್ ಮೃಧಾ ಅವರ ಪ್ರಕಾರ, ಎಮ್ಮೆಯ ತಲೆಯ ಮುಂದಿರುವ ಹಳದಿ-ಬಂಗಾರದ ಬಣ್ಣದ ಕೂದಲು ಟ್ರಂಪ್ ಅವರ ಹೆರ್ಸ್ಟೈಲ್ ಅನ್ನು ಹೋಲುತ್ತದೆ ಎಂದು ಕುಟುಂಬದವರು ತಮಾಷೆಯಾಗಿ ಈ ಹೆಸರು ಇಟ್ಟಿದ್ದರು. ಬಳಿಕ ಎಮ್ಮೆಯ ಫೋಟೋ ಮತ್ತು ವಿಡಿಯೋಗಳು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿ, ಸಾವಿರಾರು ಜನರ ಗಮನ ಸೆಳೆದವು. ಪ್ರತಿದಿನ ದೂರದ ಜಿಲ್ಲೆಗಳಿಂದಲೂ ಜನರು ಫಾರ್ಮ್ಗೆ ಬಂದು ಸೆಲ್ಫಿ ಹಾಗೂ ವಿಡಿಯೋಗಳನ್ನು ತೆಗೆಯುತ್ತಿದ್ದರು ಎನ್ನಲಾಗಿದೆ.
ಈ ಎಮ್ಮೆ ಸಾಮಾನ್ಯ ಕಪ್ಪು ಬಣ್ಣದ ಜಾತಿಯದ್ದಲ್ಲ. ಇದು ಅಪರೂಪದ ಅಲ್ಬಿನೋ ಜಾತಿಗೆ ಸೇರಿದ್ದು, ದೇಹದಲ್ಲಿ ಮೆಲಾನಿನ್ ಅಂಶ ಕಡಿಮೆ ಇರುವುದರಿಂದ ಚರ್ಮವು ಹಗುರವಾದ ಗುಲಾಬಿ ಛಾಯೆ ಹೊಂದಿದೆ.
ತಜ್ಞರ ಪ್ರಕಾರ, ಬಾಂಗ್ಲಾದೇಶದಲ್ಲಿ ಇಂತಹ ಅಲ್ಬಿನೋ ಎಮ್ಮೆಗಳು ತುಂಬಾ ವಿರಳ. ಉದ್ದವಾದ ಬಂಗಾರದ ಕೂದಲು, ಗುಲಾಬಿ ಮೂಗು ಮತ್ತು ವಿಶಿಷ್ಟ ದೇಹಾಕೃತಿಯೇ ಇದನ್ನು ಜನಪ್ರಿಯಗೊಳಿಸಿದೆ.
ಫಾರ್ಮ್ ಮಾಲೀಕರ ಮಾಹಿತಿ ಪ್ರಕಾರ, ಈ ಎಮ್ಮೆಗೆ ವಿಶೇಷ ಆರೈಕೆ ನೀಡಲಾಗುತ್ತಿತ್ತು. ದಿನಕ್ಕೆ ನಾಲ್ಕು ಬಾರಿ ಸ್ನಾನ ಮಾಡಿಸುವುದು, ವಿಶೇಷ ಆಹಾರ ನೀಡುವುದು ಹಾಗೂ ಆರೋಗ್ಯದ ಮೇಲೂ ಹೆಚ್ಚುವರಿ ಕಾಳಜಿ ವಹಿಸಲಾಗುತ್ತಿತ್ತು. “ಇದು ತುಂಬಾ ಶಾಂತ ಸ್ವಭಾವದ ಪ್ರಾಣಿ. ಅಲ್ಬಿನೋ ಎಮ್ಮೆಗಳು ಸಾಮಾನ್ಯವಾಗಿ ಆಕ್ರಮಣಕಾರಿ ಆಗುವುದಿಲ್ಲ” ಎಂದು ಅವರು ಹೇಳಿದ್ದಾರೆ.
ಈದ್ ಉಲ್ ಅಧಾ ಹಬ್ಬದ ಅಂಗವಾಗಿ ಪ್ರಾಣಿಬಲಿ ನೀಡುವ ಸಂಪ್ರದಾಯದ ಹಿನ್ನೆಲೆ, ಈ ಎಮ್ಮೆಯನ್ನು ಖರೀದಿಸಲಾಗಿದೆ ಎಂದು ತಿಳಿದುಬಂದಿದೆ. ಪ್ರತಿ ಕಿಲೋಗ್ರಾಂಗೆ 550 ಟಾಕಾ ದರದಲ್ಲಿ, ಸುಮಾರು ಮೂರು ಲಕ್ಷ ರೂಪಾಯಿಗೆ ಎಮ್ಮೆ ಮಾರಾಟವಾಗಿದೆ ಎಂದು ಫಾರ್ಮ್ ಮಾಲೀಕರು ಮಾಹಿತಿ ನೀಡಿದ್ದಾರೆ.
ಈ ಎಮ್ಮೆ ಕುರಿತ ಫೋಟೋಗಳು ಮತ್ತು ವಿಡಿಯೋಗಳು ಫೇಸ್ಬುಕ್, ಎಕ್ಸ್ ಹಾಗೂ ಇನ್ಸ್ಟಾಗ್ರಾಂ ಸೇರಿದಂತೆ ವಿವಿಧ ಸಾಮಾಜಿಕ ಜಾಲತಾಣಗಳಲ್ಲಿ ಲಕ್ಷಾಂತರ ವೀಕ್ಷಣೆಗಳನ್ನು ಪಡೆದುಕೊಂಡಿವೆ. ಕೆಲವರು ಇದನ್ನು “ಟ್ರಂಪ್ ಎಮ್ಮೆ” ಎಂದು ಕರೆಯುತ್ತಾ ಹಾಸ್ಯಮಯ ಪೋಸ್ಟ್ಗಳನ್ನು ಹಂಚಿಕೊಳ್ಳುತ್ತಿದ್ದರೆ, ಇನ್ನೂ ಕೆಲವರು ಅಪರೂಪದ ಪ್ರಾಣಿಯನ್ನು ನೋಡಿ ಅಚ್ಚರಿ ವ್ಯಕ್ತಪಡಿಸುತ್ತಿದ್ದಾರೆ. ಬಾಂಗ್ಲಾದೇಶದಲ್ಲಿ ಈದ್ ಸಮಯದಲ್ಲಿ ವಿಚಿತ್ರ ರೂಪದ ಅಥವಾ ಅತಿದೊಡ್ಡ ಪ್ರಾಣಿಗಳು ವೈರಲ್ ಆಗುವುದು ಸಾಮಾನ್ಯವಾದರೂ, ಈ ಬಾರಿ “ಡೊನಾಲ್ಡ್ ಟ್ರಂಪ್” ಎಮ್ಮೆ ಜಾಗತಿಕ ಮಟ್ಟದಲ್ಲೇ ಸುದ್ದಿಯಾಗಿದೆ.
