ಮಂಡ್ಯ:
ಮಂಡ್ಯ ಪಟ್ಟಣದಲ್ಲಿ ಸೋಮವಾರ ನಡೆದ ಬಲಿದಾನ್ ದಿವಸ್ ಕಾರ್ಯಕ್ರಮದಲ್ಲಿ ಮಾಜಿ ಸಂಸದ ಅನಂತಕುಮಾರ ಹೆಗಡೆ ವಿವಾದಾತ್ಮಕ ಹೇಳಿಕೆ ನೀಡಿ ಚರ್ಚೆಗೆ ಕಾರಣರಾದರು. ಹಿಂದೂ ಎಂಬುದು ಜಾತಿಯಲ್ಲ, ಅದು ಒಂದು ಸಂಸ್ಕೃತಿ ಹಾಗೂ ಜೀವನಮೌಲ್ಯ ಎಂದು ಅವರು ಹೇಳಿದ್ದಾರೆ.
ಯಾರು ದುಷ್ಟತೆಯನ್ನು ವಿರೋಧಿಸುತ್ತಾರೋ ಅವರು ಎಲ್ಲರೂ ಹಿಂದೂಗಳು ಎಂದು ಸಂಸ್ಕೃತದಲ್ಲಿ ಹೇಳಲಾಗಿದೆ ಎಂದು ತಿಳಿಸಿದ ಹೆಗಡೆ, ಜಾತ್ಯತೀತತೆ ಕುರಿತಾಗಿ ಕಿಡಿಕಾರಿದರು. “ನನ್ನ ಪ್ರಕಾರ ಅಪ್ಪ-ಅಮ್ಮ ಇಲ್ಲದವರು ಮಾತ್ರ ಜಾತ್ಯತೀತರು” ಎಂದು ಹೇಳಿ, ತಮ್ಮ ಅಭಿಪ್ರಾಯವನ್ನು ಸ್ಪಷ್ಟಪಡಿಸಿದರು.ಇದೇ ವೇಳೆ, ಜಾತ್ಯತೀತತೆ ಎನ್ನುವವರ ವಿರುದ್ಧ ತೀವ್ರ ವಾಗ್ದಾಳಿ ನಡೆಸಿದ ಅವರು, ತಮ್ಮನ್ನು ಜಾತ್ಯತೀತ ಎಂದು ಕರೆಯಿಕೊಳ್ಳುವವರನ್ನು ಪ್ರಶ್ನಿಸಿದರು. “ನಾನಂತೂ ಜಾತ್ಯತೀತ ಅಲ್ಲ” ಎಂದು ನೇರವಾಗಿ ಹೇಳಿದರು.
ಇತಿಹಾಸದ ವಿಷಯಗಳನ್ನು ಉಲ್ಲೇಖಿಸಿ, ಹಿಂದೂ ಸಮುದಾಯದ ಶಕ್ತಿಯನ್ನು ಒತ್ತಿಹೇಳಿದರು. ಮೈಸೂರು ಭಾಗದಲ್ಲಿ ಇತಿಹಾಸದ ಸಂದರ್ಭಗಳಲ್ಲಿ ನಡೆದ ಘಟನೆಗಳನ್ನು ಪ್ರಸ್ತಾಪಿಸಿ, ಸ್ಥಳೀಯರ ಸಾಹಸವನ್ನು ಪ್ರಶಂಸಿಸಿದರು.ಹೆಗಡೆ ಅವರ ಈ ಹೇಳಿಕೆಗಳು ರಾಜಕೀಯ ಹಾಗೂ ಸಾಮಾಜಿಕ ವಲಯದಲ್ಲಿ ಚರ್ಚೆಗೆ ಕಾರಣವಾಗುವ ಸಾಧ್ಯತೆ ಇದೆ.
