ಪಶ್ಚಿಮ ಏಷ್ಯಾದಲ್ಲಿ ನಡೆಯುತ್ತಿರುವ ಗಲಾಟೆಗಳು ಮತ್ತು ಹೆಚ್ಚುತ್ತಿರುವ ಉದ್ವಿಗ್ನತೆಗಳು ಭಾರತೀಯ ಷೇರು ಮಾರುಕಟ್ಟೆಗೆ ಹೊಸ ಆತಂಕವನ್ನುಂಟು ಮಾಡಿವೆ. ಅಲ್ಲಿ ಪರಿಸ್ಥಿತಿ ತೀವ್ರವಾದರೆ ಅದರ ನೇರ ಪರಿಣಾಮ ಕಚ್ಚಾ ತೈಲದ ಬೆಲೆಗಳ ಮೇಲೆ ಬೀಳುತ್ತದೆ. ಭಾರತ ತನ್ನ ಅಗತ್ಯದ ಬಹುಪಾಲು ತೈಲವನ್ನು ಆಮದು ಮಾಡಿಕೊಳ್ಳುವುದರಿಂದ, ಈ ಬೆಳವಣಿಗೆ ದೇಶದ ಆರ್ಥಿಕತೆಗೆ ಸವಾಲಾಗಿ ಪರಿಣಮಿಸುವ ಸಾಧ್ಯತೆ ಇದೆ. ಈ ಹಿನ್ನೆಲೆಯಲ್ಲಿ ಜಾಗತಿಕ ಬ್ರೋಕರೇಜ್ ಸಂಸ್ಥೆಗಳು ಹೂಡಿಕೆದಾರರಿಗೆ ಎಚ್ಚರಿಕೆಯಿಂದ ಹೂಡಿಕೆ ಮಾಡಲು ಸಲಹೆ ನೀಡಿವೆ.
ಜಪಾನ್ ಮೂಲದ ಪ್ರಮುಖ ಬ್ರೋಕರೇಜ್ ಸಂಸ್ಥೆ ನೊಮುರಾ ಡಿಸೆಂಬರ್ 2026ರ ನಿಫ್ಟಿ ಗುರಿಯನ್ನು ಶೇ.15ರಷ್ಟು ಕಡಿತಗೊಳಿಸಿದೆ. ಇದುವರೆಗೆ 29,300ಕ್ಕೆ ಏರಬಹುದು ಎಂದು ನಿರೀಕ್ಷಿಸಿದ್ದ ನಿಫ್ಟಿ ಗುರಿಯನ್ನು ಈಗ 24,900ಕ್ಕೆ ಇಳಿಸಲಾಗಿದೆ. ಮಾರ್ಚ್ 16ರಂದು ಬಿಡುಗಡೆಗೊಂಡ ವರದಿಯ ಪ್ರಕಾರ, ಕಚ್ಚಾ ತೈಲದ ಬೆಲೆಗಳು ಇದೇ ರೀತಿ ಏರಿಕೆಯಲ್ಲಿ ಮುಂದುವರಿದರೆ 2027ರ ಆರ್ಥಿಕ ವರ್ಷದಲ್ಲಿ ಕಂಪನಿಗಳ ಲಾಭದಲ್ಲಿ ಶೇ.10ರಿಂದ 15ರಷ್ಟು ಕುಸಿತವಾಗುವ ಸಾಧ್ಯತೆ ಇದೆ ಎಂದು ತಿಳಿಸಲಾಗಿದೆ.
ಇತ್ತ ಸಿಟಿ ರಿಸರ್ಚ್ ಸಂಸ್ಥೆಯೂ ತನ್ನ ಅಂದಾಜುಗಳನ್ನು ಪರಿಷ್ಕರಿಸಿದ್ದು, ನಿಫ್ಟಿ ಗುರಿಯನ್ನು 28,500ರಿಂದ 27,000ಕ್ಕೆ ಇಳಿಸಿದೆ. ತಜ್ಞರ ಪ್ರಕಾರ, ಇದು ಕೇವಲ ತೈಲದ ಬೆಲೆ ಏರಿಕೆಯ ಸಮಸ್ಯೆಯಷ್ಟೇ ಅಲ್ಲ; ಗಲ್ಫ್ ದೇಶಗಳಿಂದ ಬರುವ ಹಡಗುಗಳ ಸಂಚಾರದಲ್ಲಿ ಅಡಚಣೆ ಉಂಟಾದರೆ ಪೂರೈಕೆ ಸರಪಳಿಗೂ ದೊಡ್ಡ ಸಮಸ್ಯೆ ಎದುರಾಗಬಹುದು. ಇದರಿಂದ ಕೃಷಿ ಕ್ಷೇತ್ರದಲ್ಲಿ ರಸಗೊಬ್ಬರ, ಔಷಧೋದ್ಯಮ ಮತ್ತು ಪೇಂಟ್ ಉದ್ಯಮಗಳಿಗೆ ನೇರ ಪರಿಣಾಮ ಬೀಳುವ ಸಾಧ್ಯತೆ ಇದೆ.
ಸಿಟಿ ವರದಿಯ ಪ್ರಕಾರ, ಪೂರೈಕೆ ಸಮಸ್ಯೆಗಳು ಎರಡು-ಮೂರು ತಿಂಗಳು ಮುಂದುವರಿದರೆ ಭಾರತದ ಜಿಡಿಪಿ ಬೆಳವಣಿಗೆ ಶೇ.0.20ರಿಂದ 0.30ರಷ್ಟು ಕುಸಿಯಬಹುದು. ಜೊತೆಗೆ ಹಣದುಬ್ಬರವೂ ಹೆಚ್ಚಾಗುವ ಸಾಧ್ಯತೆ ಇದೆ. ಈ ಆತಂಕದ ನಡುವೆ ಮಾರುಕಟ್ಟೆಯಲ್ಲೂ ಈಗಾಗಲೇ ತಿದ್ದುಪಡಿ ಪ್ರಾರಂಭವಾಗಿದ್ದು, ನಿಫ್ಟಿ ಮತ್ತು ಸೆನ್ಸೆಕ್ಸ್ ತಮ್ಮ ಗರಿಷ್ಠ ಮಟ್ಟದಿಂದ ಸುಮಾರು ಶೇ.10ರಷ್ಟು ಕುಸಿದಿವೆ.
ಈ ಪರಿಸ್ಥಿತಿಯಲ್ಲಿ ಹೂಡಿಕೆದಾರರು ಹೆಚ್ಚು ಎಚ್ಚರಿಕೆಯಿಂದ ನಡೆದುಕೊಳ್ಳಬೇಕೆಂದು ತಜ್ಞರು ಸಲಹೆ ನೀಡಿದ್ದಾರೆ. ಹಣದುಬ್ಬರದ ಮೇಲೆ ಭಾರತೀಯ ರಿಸರ್ವ್ ಬ್ಯಾಂಕ್ ಕಣ್ಣಿಟ್ಟಿರುವುದರಿಂದ ಬಡ್ಡಿದರ ಕಡಿತದ ಸಾಧ್ಯತೆ ತಕ್ಷಣ ಕಾಣುತ್ತಿಲ್ಲ. ಜೊತೆಗೆ ಡಾಲರ್ ಎದುರು ರೂಪಾಯಿ ಮೌಲ್ಯ ಕುಸಿಯುತ್ತಿರುವುದು ವಿದೇಶಿ ಹೂಡಿಕೆದಾರರ ಮೇಲೂ ಪರಿಣಾಮ ಬೀರುವ ಸಾಧ್ಯತೆ ಇದೆ. ಆದ್ದರಿಂದ ಮಾರುಕಟ್ಟೆ ಅಸ್ಥಿರವಾಗಿರುವ ಈ ಸಮಯದಲ್ಲಿ ಆತುರದ ನಿರ್ಧಾರಗಳಿಗಿಂತ ಸುರಕ್ಷಿತ ಹೂಡಿಕೆಗಳ ಕಡೆ ಹೆಚ್ಚು ಗಮನ ಹರಿಸುವುದು ಉತ್ತಮ ಎಂದು ವಿಶ್ಲೇಷಕರು ಅಭಿಪ್ರಾಯಪಟ್ಟಿದ್ದಾರೆ.
