ರಾಕಿಂಗ್ ಸ್ಟಾರ್ ಯಶ್ ನಟನೆಯ ಬಹು ನಿರೀಕ್ಷಿತ ಸಿನಿಮಾ ಟಾಕ್ಸಿಕ್ ಇದೇ ವರ್ಷ ಮಾರ್ಚ್ 19ರಂದು ತೆರೆಗೆ ಬರಲಿದೆ. ಟಾಕ್ಸಿಕ್ ಚಿತ್ರ ಈಗಾಗಲೇ ಪಾತ್ರ ಪರಿಚಯದ ಪೋಸ್ಟರ್ಗಳ ಮೂಲಕವೇ ಸಿನಿ ಪ್ರಿಯರ ಕುತೂಹಲ ಕೆರಳಿಸಿದೆ. ಸಿನಿಮಾ ಹೇಗಿರಬಹುದು..? ಕಥೆ ಏನಿರಬಹುದು..? ಎನ್ನುವ ಕುತೂಹಲದಲ್ಲಿದ್ದವರಿಗೆ ಇಂದು ಸಣ್ಣ ಝಲಕ್ ಸಿಕ್ಕಿದೆ.
ಹೌದು ರಾಕಿಂಗ್ ಸ್ಟಾರ್ ಯಶ್ ಹುಟ್ಟುಹಬ್ಬಕ್ಕೆ ಅಭಿಮಾನಿಗಳಿಗೆ ಭರ್ಜರಿ ಗಿಫ್ಟ್ ಸಿಕ್ಕಿದ್ದು, ಟಾಕ್ಸಿಕ್ ಚಿತ್ರದ ಟೀಸರ್ ರಿಲೀಸ್ ಆಗಿದೆ. ಇಂದು ಬೆಳಗ್ಗೆ 10 ಗಂಟೆ 10 ನಿಮಿಷಕ್ಕೆ ಟೀಸರ್ ಬಿಡುಗಡೆಯಾಗಿದ್ದು, ಟಾಕ್ಸಿಕ್ ಕಥೆ ಏನಿರಬಹುದು ಎನ್ನುವುದಕ್ಕೆ ಒಂದು ಸುಳಿವು ಸಿಕ್ಕಿದೆ. ಟಾಕ್ಸಿಕ್ ಟೀಸರ್ ಹಾಲಿವುಡ್ ಶೈಲಿಯಲ್ಲಿದ್ದು, ಸಖತ್ ಬೋಲ್ಡ್ ಸೀನ್ಗಳನ್ನು ತೋರಿಸಲಾಗಿದೆ. ಯಶ್ ಮಾಸ್ ಎಂಟ್ರಿ ಮೂಲಕ ಇಂದೊಂದು ಸೂಪರ್ ಆ್ಯಕ್ಷನ್ ಸಿನಿಮಾ ಎನ್ನುವುದು ಪಕ್ಕಾ ಆಗಿದೆ. ಇನ್ನು ಸಿನಿಮಾ ಮೇಕಿಂಗ್ ಕೂಡ ಕನ್ನಡ ಚಿತ್ರರಂಗಕ್ಕೆ ಹೊಸದು ಎನ್ನುವಂತಿದೆ.
ಕೆಜಿಎಫ್ 2 ಬಳಿಕ ಯಶ್ ನಟನೆಯ ಬಹುನಿರೀಕ್ಷಿತ ಚಿತ್ರವಾಗಿರುವ ಟಾಕ್ಸಿಕ್ಗೆ ಮಲಯಾಳಂನ ಖ್ಯಾತ ನಿರ್ದೇಶಕಿ ಗೀತು ಮೋಹನ್ದಾಸ್ ಆಕ್ಷನ್ ಕಟ್ ಹೇಳಿದ್ದಾರೆ. ಕಿಯಾರಾ ಅಡ್ವಾಣಿ, ಹುಮಾ ಖುರೇಷಿ ನಯನತಾರಾ, ರುಕ್ಮಿಣಿ ವಸಂತ್ ಸೇರಿದಂತೆ ಸ್ಟಾರ್ ನಟಿಯರ ತಾರಾಂಗಣವೇ ಈ ಚಿತ್ರಕ್ಕಿದೆ. ಟಾಕ್ಸಿಕ್ ಈಗಾಗಲೇ ಬಹು ನಿರೀಕ್ಷೆ ಹುಟ್ಟು ಹಾಕಿದ್ದು, ಮಾರ್ಚ್ 19ರಂದು ತೆರೆಗೆ ಅಬ್ಬರಿಸಲು ಸಂಪೂರ್ಣ ಸಜ್ಜಾಗಿದೆ.
