ಸಂಭಲ್ ; ಉತ್ತರ ಪ್ರದೇಶದ ಸಂಭಲ್ ನ ಶಾಹಿ ಜಾಮಾ ಮಸೀದಿಯ ಸಮೀಕ್ಷೆಯ ವಿಸ್ತೃತ ವರದಿ ಚಂಡೌಸಿ ನ್ಯಾಯಾಲಯಕ್ಕೆ ಗುರುವಾರ ಸಲ್ಲಿಸಲಾಗಿದೆ, ಮತ್ತು ಆ ಸ್ಥಳದಲ್ಲಿ ಹಿಂದೆಯೊಂದು ದೇವಸ್ಥಾನ ಇದ್ದುದಕ್ಕೆ ಸಾಕ್ಷಿ ದೊರೆತಿದೆ ಎಂದು ಮೂಲಗಳು ತಿಳಿಸಿವೆ.
“ಕೋರ್ಟ್ ನಿರ್ದೇಶನದಂತೆ ನವೆಂಬರ್ 19 ಮತ್ತು 24ರಂದು ಮಸೀದಿಯಲ್ಲಿ ಸಮೀಕ್ಷೆ ನಡೆಸಿ, ಆ ಸ್ಥಳದ ಎಲ್ಲಾ ಕೋನಗಳ ವಿಡಿಯೋ ಸೆರೆಯೊಂದಿಗೆ 40-45 ಪುಟಗಳ ವರದಿಯನ್ನು ಸಿವಿಲ್ ನ್ಯಾಯಾಧೀಶರಿಗೆ ಮುಚ್ಚಿದ ಲಕೋಟೆಯಲ್ಲಿ ಸಲ್ಲಿಸಲಾಗಿದೆ,” ಎಂದು ಪ್ರಕರಣದ ವಕೀಲ ರಮೇಶ್ ಸಿಂಗ್ ರಾಘವ್ ತಿಳಿಸಿದ್ದಾರೆ.
ಮೊಘಲ್ ಕಾಲದ ಜಾಮಾ ಮಸೀದಿಯ ಸ್ಥಳದಲ್ಲಿ ಮೊದಲು ಹರಿಹರ ದೇವಾಲಯವಿದ್ದ ಎಂಬ ನಿರೀಕ್ಷೆಯನ್ನು ಆಧರಿಸಿ ಸಮೀಕ್ಷೆ ನಡೆಯಿತು. ಆದರೆ, ಕೋರ್ಟ್ ಈ ಬಗ್ಗೆ ವರದಿಯನ್ನು ಬಹಿರಂಗಪಡಿಸದಂತೆ ಆದೇಶಿಸಿದ್ದು, ಸಮೀಕ್ಷೆ ವೇಳೆ ಪ್ರತಿಭಟನಾಕಾರರು ಮತ್ತು ಭದ್ರತಾ ಪಡೆಗಳ ನಡುವೆ ಘರ್ಷಣೆ ಉಂಟಾಗಿ, ನಾಲ್ವರು ಸಾವನ್ನಪ್ಪಿದರು ಮತ್ತು ಹಲವರು ಗಾಯಗೊಂಡರು.
ಆರ್ಎಸ್ಎಸ್ ಮುಖ್ಯಸ್ಥ ಮೋಹನ್ ಭಾಗವತ್ ಅವರು ದೀರ್ಘಕಾಲೀನ ಮಂದಿರ-ಮಸೀದಿ ವಿವಾದವನ್ನು ಬಗೆಹರಿಸಲು ಕರೆ ನೀಡಿದ ಬೆನ್ನಲ್ಲೇ, ಈ ವಿವಾದಗಳು ಸತ್ಯವನ್ನು ಅನ್ವೇಷಿಸುವ ಹೋರಾಟವಾಗಿದ್ದು, ನಾಗರಿಕ ನ್ಯಾಯ ಪಡೆಯಲು ಅಗತ್ಯವಿದೆ ಎಂದು ಆರ್ಎಸ್ಎಸ್ ಮುಖವಾಣಿಯಾಗಿರುವ ಆರ್ಗನೈಸರ್ನಲ್ಲಿ ಬರೆದ ಸಂಪಾದಕೀಯದಲ್ಲಿ ಉಲ್ಲೇಖಿಸಲಾಗಿದೆ.
“ಜಾಮಾ ಮಸೀದಿಯ ಸ್ಥಳದಲ್ಲಿ ಶ್ರೀ ಹರಿಹರ ದೇವಸ್ಥಾನವಿತ್ತು ಎಂಬ ಸಮೀಕ್ಷೆಯ ಅರ್ಜಿಯಿಂದ ಹುಟ್ಟಿದ ವಿವಾದವು ಜನರು ಮತ್ತು ಸಮುದಾಯಗಳಿಗೆ ನೀಡಿರುವ ಸಾಂವಿಧಾನಿಕ ಹಕ್ಕುಗಳ ಕುರಿತು ಚರ್ಚೆಗೆ ಅವಕಾಶವನ್ನು ನೀಡಿದೆ.
ಇದನ್ನು ಹಿಂದೂ-ಮುಸ್ಲಿಂ ವಿವಾದಕ್ಕೆ ಸೀಮಿತಗೊಳಿಸದೆ, ಎಲ್ಲಾ ವರ್ಗಗಳನ್ನು ಒಳಗೊಂಡ ನಿಜವಾದ ಇತಿಹಾಸವನ್ನು ಆಧರಿಸಿ ಚರ್ಚಿಸಬೇಕು,” ಎಂಬುದಾಗಿ ವರದಿಯಲ್ಲಿ ಉಲ್ಲೇಖಿಸಲಾಗಿದೆ.ಈ ಹೋರಾಟವು ಧಾರ್ಮಿಕ ಶ್ರೇಷ್ಠತೆಗೆ ಮಾತ್ರವಲ್ಲ, ಬದಲಿಗೆ ರಾಷ್ಟ್ರದ ಗುರುತನ್ನು ಪುನಃಸ್ಥಾಪಿಸಿ ನಾಗರಿಕ ನ್ಯಾಯವನ್ನು ಹುಡುಕುವ ಪ್ರಯತ್ನವಾಗಿದೆ ಎಂದು ಆರ್ಗನೈಸರ್ ಸ್ಪಷ್ಟಪಡಿಸಿದೆ.
