ತಿರುನೆಲ್ವೇಲಿ ; ತಮಿಳುನಾಡಿನ ತಿರುನೆಲ್ವೇಲಿಯ ನಡುಕಲ್ಲೂರ್, ಕೊಡಗನಲ್ಲೂರ್, ಕೊಂಡನಗರಂ, ಮತ್ತು ಸುತಮಲ್ಲಿ ಪ್ರದೇಶಗಳಲ್ಲಿ ಕೇರಳದಿಂದ ಕೊಂಡೊಯ್ದು ಸುರಿದಿರುವ ವೈದ್ಯಕೀಯ ತ್ಯಾಜ್ಯವನ್ನು ತೆರವುಗೊಳಿಸಲು, ಕೇರಳ ಸರ್ಕಾರ ವಿಶೇಷ ತಂಡವನ್ನು ನಿಯೋಜಿಸಿದೆ. ರಾಷ್ಟ್ರೀಯ ಹಸಿರು ನ್ಯಾಯಮಂಡಳಿ (ಎನ್ಜಿಟಿ) ದಕ್ಷಿಣ ಪೀಠದ ಕಟ್ಟುನಿಟ್ಟಿನ ನಿರ್ದೇಶನದ ಬೆನ್ನಲ್ಲೇ, ಕೇರಳ ಸರ್ಕಾರ ಈ ಕ್ರಮಕ್ಕೆ ಮುಂದಾಗಿದೆ. ಡಿಸೆಂಬರ್ 23ರ ಒಳಗೆ ತ್ಯಾಜ್ಯವನ್ನು ತರುವಂತೆ ಎನ್ಜಿಟಿ ಕೇರಳಕ್ಕೆ ಆದೇಶಿಸಿತ್ತು.
ಕೇರಳದ ಸಹಾಯಕ ಕಲೆಕ್ಟರ್ ಆಲ್ಬರ್ಟ್ ನೇತೃತ್ವದ ತಂಡವು ಎಂಟು ಟ್ರಕ್ಗಳ ಮೂಲಕ ತ್ಯಾಜ್ಯವನ್ನು ವಾಪಸ್ ತರಲು ಕ್ರಮ ಕೈಗೊಂಡಿದೆ. ಈ ಘಟನೆಗೆ ಸಂಬಂಧಿಸಿದಂತೆ ತಿರುನೆಲ್ವೇಲಿ ಜಿಲ್ಲೆಯ ಜನರು ತೀವ್ರ ಆಕ್ರೋಶ ವ್ಯಕ್ತಪಡಿಸಿದ್ದು, ವಿಷಯವು ಸುತಮಲ್ಲಿ ಪೊಲೀಸ್ ಠಾಣೆಯ ದೂರು ದಾಖಲುಗಳಿಗೆ ಕಾರಣವಾಗಿದೆ. ಅಕ್ರಮ ತ್ಯಾಜ್ಯ ವಿಸರ್ಜನೆ ಸಂಬಂಧ, ಕೇರಳದ ಲಾರಿ ಮಾಲೀಕ ಹಾಗೂ ಖಾಸಗಿ ತ್ಯಾಜ್ಯ ನಿರ್ವಹಣಾ ಸಂಸ್ಥೆಯ ಮೇಲ್ವಿಚಾರಕ ಸೇರಿದಂತೆ ಇಬ್ಬರನ್ನು ಬಂಧಿಸಲಾಗಿದೆ. ಈ ದಂಧೆಗೆ ಸಂಬಂಧಿಸಿದಂತೆ ಸದ್ಯಕ್ಕೆ ಆರು ಪ್ರಕರಣಗಳು ದಾಖಲಾಗಿವೆ.
ತಿರುನೆಲ್ವೇಲಿ ಜಿಲ್ಲಾಧಿಕಾರಿ ಕಾರ್ತಿಕೇಯನ್, ಕೇರಳ ಪರಿಶೀಲನಾ ತಂಡದ “ತ್ಯಾಜ್ಯ ಅಪಾಯಕಾರಿಯಲ್ಲ” ಎಂಬ ವರದಿಗೆ ಆಕ್ಷೇಪ ವ್ಯಕ್ತಪಡಿಸಿದ್ದಾರೆ. “ತ್ಯಾಜ್ಯ ಅಪಾಯಕಾರಿಯಲ್ಲ ಎಂದು ಹೇಳಿದರೆ, ತ್ಯಾಜ್ಯ ವಿಲೇವಾರಿಗಾಗಿ ಮಧ್ಯವರ್ತಿಗಳನ್ನು ನೇಮಿಸಬೇಕಾಗಿದ್ದೇನು? ಮತ್ತು ಅದಕ್ಕಾಗಿ ದೊಡ್ಡ ಮೊತ್ತದ ಹಣವನ್ನು ಖರ್ಚು ಮಾಡುವುದು ಏಕೆ?” ಎಂದು ಅವರು ಪ್ರಶ್ನಿಸಿದರು.
ವಿಸರ್ಜಿಸಲಾದ ತ್ಯಾಜ್ಯದಲ್ಲಿ ಬಳಸಿದ ಸಿರಿಂಜ್ಗಳು, ಪಿಪಿಇ ಕಿಟ್ಗಳು, ಮತ್ತು ವೈದ್ಯಕೀಯ ದಾಖಲೆಗಳಂತಹ ಅಪಾಯಕಾರಿ ವಸ್ತುಗಳು ಸೇರಿದ್ದು, ಸ್ಥಳೀಯ ಪರಿಸರಕ್ಕೆ ಮತ್ತು ಜನಸಾಮಾನ್ಯರ ಆರೋಗ್ಯಕ್ಕೆ ಹಾನಿ ಉಂಟುಮಾಡುತ್ತಿದೆ. ನೀರಿನ ಮೂಲಗಳು ಕಲುಷಿತಗೊಂಡಿದ್ದು, ಸ್ಥಳೀಯ ಜಾನುವಾರುಗಳ ಆರೋಗ್ಯವೂ ಕೆಡುತ್ತಿದೆ. ಸ್ಥಳೀಯರು ಈ ಅಕ್ರಮದ ಬಗ್ಗೆ ಸಾಕಷ್ಟು ಬಾರಿ ದೂರು ನೀಡಿದರೂ, ತ್ವರಿತ ಪರಿಹಾರ ದೊರಕಿಲ್ಲ. ತ್ಯಾಜ್ಯವನ್ನು ಕಾಗದದ ಕಾರ್ಖಾನೆಗಳಿಗೆ ಸಾಗಿಸುವ ನೆಪದಲ್ಲಿ ಟ್ರಕ್ಗಳಲ್ಲಿ ಡಂಪ್ ಮಾಡಲಾಗುತ್ತಿದೆ ಎಂದು ಶಂಕಿಸಲಾಗಿದೆ.
